Umi karríto ideprovechoiterei ñandéve mas de 10 áñorema. Ko múndo tuichakuére hetaiterei hénte ohecha umi karríto, enterove lénto ningo hesaho voi hese. Umi hénte ohechávo peteĩva umi karríto oikuaáma haʼeha umi testígo de Jehová mbaʼe. Ichukoiterei ningo umi karríto, ha ndahaʼéi upévante, ifasileterei jaipuru hag̃ua avei. Peteĩ ermána Poloniagua heʼi: “Umi karríto iporã ha ipraktikoiterei. Avei ndahasyiete jakoloka ha ñamonguʼe hag̃ua”.

 ¿Mbaʼéichapa ojejapo ha oñemog̃uahẽ opárupi umi karríto?

 Áño 2001-pe, Kuérpo Governánte omeʼẽ permíso umi ermáno Franciaguápe oprova hag̃ua diferénte método de predikasión púvlika ha umíva apytépe oĩ kuri umi karríto. Heta mbaʼe otantea hikuái. Por ehémplo, ojepuru umi maléta irruedítava ha umi karríto de supermerkádo oñemoĩ hag̃uáicha pype umi puvlikasión. Ipahápe pe sukursál oelehi peteĩ modélo ha heta áñore oipuru hikuái upéva.

 Pe pruéva ojejapóva Fránciape oikoite kuri. Upévare áño 2011-pe, pe Kuérpo Governánte odesidi ojeprova hag̃ua avei umi karríto ha mesa orekóva puvlikasión pe siuda de Nueva Yórkpe (Estados Unidos). Umi prekursór opartisipa vaʼekue ko pruévape ohechakuaa pe karríto ipraktikoha. Por ehémplo, ikatu ojeguerova oimehápe ha sapyʼaitépe. Péro omeʼẽ avei hikuái unos kuánto idéa oñemehora hag̃ua. Ñepyrũrã umi karríto de madéra kuri ha ipohyive, upévare ijetuʼueterei ojehupi ha oñemboguejy hag̃ua umi eskalérarupi. Entónse ojejapo peteĩ ivevyivéva, péro ani hag̃uáicha omboveve chupe pe yvytu. Oñembotuicha avei irruéda ani hag̃ua ojegolpeapa umi tape vaíre, ha oñemoĩ chupe peteĩ káha ojegueraha hag̃ua hetave umi puvlikasión.

 ¡Oikoite kuri pe pruéva ojejapóva! Upévare pe Kuérpo Governánte año 2012 guive oaprova ojepuru hag̃ua umi karríto ko múndo tuichakuére. Ha oñekontrata peteĩ favrikántepe ojapo hag̃ua umi karríto en kantida, ha ojepuru umi materiál ivevýi ha imbarete porãva.

 Umi áño ohasávape oñemehoramie ohóvo umi karríto. Por ehémplo áño 2015 guive oñemoĩ hese peteĩ fórro de plástiko omoʼãva chupe oky jave. Dina, peteĩ ermána oikóva Geórgiape heʼi: “Oikoite legálmente pe fórro oñemoĩva pe karrítore, péicha ojeprotehe porã umi puvlikasionkuéra oky mbaʼéramo”. Áño 2017-pe ojejapo umi kartél magnétiko unos kuánto idiómape. Peteĩ ermáno Poloniagua hérava Tomasz heʼi: “Anteve hetaiterei roiko vaʼerã kuri rodespega hag̃ua umi kartél. Péro ojepuru rire umi magnétiko, ifasilvéma oréve rokambia hag̃ua”. Áño 2019-pe ojepuru umi materiál iporãvéva ha oñemehora pe ojejapo lája ikatu hag̃uáicha odurave umi karríto.

 Peteĩ emprésa ofavrika entéro umi karríto ha oñemondo ko múndo tuichakuére. Káda karríto ovale 43 dólar, apárte oĩ jey pe envío ha ótro gásto. Koʼág̃a peve oñemondóma amo 420.000 karrítorupi káda kongregasiónpe, ha ojegastáma mas de 16 millón de dólar.

 Péro ojepuru porã hag̃ua umi donasión, ojejogua en kantida umi karríto. Ha avei umi kongregasión ikatu ojerurénte umi rrepuésto tekotevẽramo, ojerure rangue peteĩ ipyahúva.

 Umi ermánope ogustaiterei umi karríto, Martina oikóva Ghánape heʼi: “Heta vése ningo ñande ñañemboja vaʼerã umi héntere japredika hag̃ua chupekuéra, péro pe karríto reheve haʼekuerahaitéma la oñembojáva. Enterove ohasáva ha omañáva orresivíma umi notísia porã”.

 Ótro país oĩvape Áfricape, peteĩ karai oñemoag̃ui pe karrítore ha oraha unos kuánto puvlikasión iñidiómape. Una semána upe rire, ou jey ha heʼi umi ermanokuérape : “Aleepaitéma umi puvlikasión pemeʼẽ vaʼekue chéve, ha iñimportánte la heʼíva pype. Upévare araháta che vállepe che hentekuéra olee hag̃ua avei”. Pe karai hentekuéra mombyry oiko, amo 500 kilómetrorupi pe oĩhágui. Upéi 2 mése rire pe karai ou jey ha oñemoag̃ui pe karrítore, ha heʼi: “Umi puvlikasión araha vaʼekue ojeleepaitéma pe puévlo aikohápe, ha ogustaiterei chupekuéra umi mbaʼe oleéva. Upévare odesidi hikuái oikoseha avei chuguikuéra Testígo de Jehová. Péro oreko hikuái unos kuánto porandu. Por ehémplo haʼekuéra opilla ojevautisa hag̃ua oñapymi vaʼerãha ýpe, péro pe sóna roikohápe ndaipóri ni peteĩ rrío, ¿ou vaʼerã piko hikuái koʼa peve ojevautisa hag̃ua?”. Umi ermáno ojerure peteĩ prekursór oñeʼẽvape pe karai idióma osegi hag̃ua oipytyvõ chupe. Upe guive heta vésema oñemongeta hikuái.

 ¡Ajépa javyʼaite umi karríto ojepuru haguére oñemombeʼu hag̃ua “umi notísia porã” oparupiete! (Mateo 24:14). Koʼã karríto ojejapo oñemeʼẽ rupi umi donasión ko múndo tuichakuére. Por ehémplo umi oñemeʼẽva Internet rupive: donate.dan124.com. ¡Roagradeseterei ningo peẽme peichaite peve pendepojera haguére!