Pe Kuérpo Governántepe g̃uarã iñimportanteterei ojepuru ñane kontrivusión ojejapo hag̃ua umi edifísio ñanepytyvõtava jasegi hag̃ua japredika. Por ehémplo, pe áño de servísio 2023-pe, umi sukursál orekóva umi testígo de Jehová oipuru mas 500 millón de dólar ikatu hag̃uáicha ojogua, omopuʼã, ombopyahu ha omantene umi Salón del Reino ha umi Salón de Asambléa, oĩva ko múndo tuichakuére. a Ha upévape ndoikéiti umi mbaʼe ogastáva umi kongregasión ojapo hag̃ua mantenimiénto umi Salón del Réinope.

 Umi kontrivusión ojepuru avei oñemopuʼã ha oñemantene hag̃ua umi sukursál, umíva ningo iñimportanteterei hína oñeorganisa ha ojesegi hag̃ua pe predikasión ko múndo tuichakuére. Koʼág̃a heta traváho ojejapóva Betélpe isensillove, ikatu hag̃uáicha ojepuru pe pláta oñemopuʼã ha oñembopyahu hag̃ua hetave Salón del Reino ha Salón de Asambléa. Péro avei oñekotevẽ pláta oñemyatyrõ, oñembopyahu ha oñekambia hag̃ua de lugár umi sukursál. ¿Mbaʼérepa iñimportantete koʼã konstruksión? ¿Ha mbaʼérepa jaʼekuaa oñemopuʼãramo umi sukursál oipytyvõha ojepredikave hag̃ua ha osalva hag̃ua umi héntepe? Jahechamína.

 Oĩ heta sukursál ojapómava mas de 30 térã 40 áño oñemopuʼã hague. Nicholas, ombaʼapóva Departaménto Mundiál de Diséño ha Konstruksiónpe, heʼi: “Umi edifísio ojekuida porãvéva jepe, kon el tiémpo oñembyaipa ohóvo ha oñepyrũ iprovléma heta. Oñembopyahu jave peteĩ edifísio haʼete ku oñemeʼẽva chupe ótra oportunida ha upéicha ikatu osegi ideprovécho”.

 Avei oĩ unas kuánta sukursál tekotevẽva ojadapta umi nesesida orekóvare ñane organisasión. Oñepyrũ guive oñemopuʼã umi sukursál, umi puvlikadór avei amás día hetave. Upéva heʼise tekotevẽha oĩve ermáno ombaʼapóva upépe. Upéicha rupi umi sukursál koʼág̃a tekotevẽ oñembotuichave oikepa hag̃uáicha hikuái.

 Iñimportánte avei pe segurida, upéicha rupi ojedesidi oñemyatyrõ térã oñembopyahutaha heta sukursál, koʼýte jarekóvo enkuénta koʼã ára pahápe oĩvetaha ohóvo umi desástre naturál (Lucas 21:11). Oĩ heta téknika de konstruksión ipyahúva ojepurúva oñembopyahu hag̃ua peteĩ sukursál, upéicha rupi umi ombaʼapóva upépe oiko segurove. Ha ndahaʼéi upévante, síno oiko jave peteĩ desástre naturál ikatu ojepuru avei umi lugár ojejapo hag̃ua umi lavór de sokórro ha ojesegi hag̃ua oñeorganisa pe predikasión upe sónape.

 Áño de servísio 2023 aja pe Kuérpo Governánte oaprova heta projékto de konstruksión 43 sukursálpe g̃uarã, upéva hína haimete alamita umi sukursál oĩva ko múndo tuichakuére. Jahechamína koʼág̃a unos kuánto ehémplo ohechaukáva mbaʼeichaite pevépa iñimportánte pe traváho ojejapóva.

 Angola. Peteĩ ermáno oĩva pe Komite de Sukursálpe hérava Matt heʼi: “Oremopirĩmba rohechávo mbaʼéichapa oñekumpli pe profesía oĩva Ageo 2:7-pe, 10 áñopente pe kantida de puvlikadór hetave 60 por ciento voi. Hetave rupi umi puvlikadór, tekotevẽ avei el tríple hetave pe kantida de ermáno ombaʼapóva Betélpe. Péro pe sukursál nomeʼẽi oñeinvita hag̃uáicha umi voluntário oñekotevẽvape, upéicha rupi heta betelita tekotevẽ vaʼekue ombaʼapo hetave óra”.

 Oñepresenta rupi ko situasión, ojejerure unos kuánto ermánope ohecha hag̃ua mbaʼépa ikatu ojejapo oñembotuichave hag̃ua pe sukursál. Ñepyrũrã haʼete la ipyaʼeve ha oikovétava oñembopyahúramo umi edifísio oĩmava voi. Péro heta oñeinvestiga rire, umi ermáno oñemeʼẽ enkuénta ojapóramo upéicha ndojepuruporãmoʼãiha umi kontrivusión. Ohechakuaa hikuái iporãitevetaha ojogua ha ombopyahúramo peteĩ edifísio oĩva ag̃ui upégui. Matt omombeʼu: “Ore ningo ndoroikuaái pe lugár ojejoguaséva ha oñembopyahuséva iporãtapa peteĩ konstruksión ojapovaichagua ñane organisasión, upévare rojepyʼapyʼi kuri umi ermáno opresentárõ guare pe Komite de Sukursálpe upe idéa. Péro koʼág̃a rohecha porãiterei Jehová ovendesi hague ko desisión, pórke pe edifísio haʼe kavalete la roikotevẽ vaʼekue”.

 Provávlemente kon el tiémpo pe sukursál de Angola tekotevẽta oñembotuichave, pórke ko paíspe amás día hetaiterei oĩ oñemoag̃uíva Jehová organisasiónre. Péro miéntras tánto pe edifísio pyahu, umi ogaʼi oñeinstala vaʼekue Betel korapýpe ha umi ojealkila vaʼekue, oikoitéta ojesegi hag̃ua oñembaʼapo. Péicha ikatúta oñeñatende porãve umi nesesida oĩvare ko sukursál territóriope.

 Japón. Ojapóma ningo haimete 40 áño oñemopuʼã hague pe primer edifísio oĩva ko sukursálpe ha upe guive noñembopyahúitiva. Umi ermáno ningo oñehaʼãmbaite okuida porã umi edifísiore, upéicharõ jepe koʼãva ojepurúma hetave tiémpo pe oñepensa vaʼekuégui. Upévare oho reíma hese umi projékto oñembopyahu hag̃ua umi edifísio.

 Umi áño ohasa vaʼekuépe tuichaiterei okambia ojeiko lája Betélpe. Por ehémplo áño 2015 mboyve Betel oprepara vaʼekue umi tembiʼu entéro umi ombaʼapóvape g̃uarã upépe. Upévare heta koty oĩva Betel de Japónpe oreko peteĩ kosina michĩʼínteva. Péro koʼág̃a umi betelita okosinave vaʼerã ikotýpe, upévare oñembopyahúrõ guare pe sukursál oñembotuichave umi kosina. Kumiko, peteĩ ermána ombaʼapóva Betel de Japónpe, heʼi: “Tuichave rupi koʼág̃a pe kosina, ndahasyiete chéve ajadapta hag̃ua umi kámbio oĩvare Betélpe. Añeñandu che rogapeguáicha”.

 Pe traváho ojejapóva pe sukursál de Japónpe ningo iñimportanteterei ojepredika hag̃ua ko múndo tuichakuére (Mateo 28:19, 20). ¿Mbaʼérepa jaʼe upéva? Pórke la Biblia kompletoite oñeimprimi mokõi sukursálpente, ha Japón haʼe hína peteĩva. Upéicha rupi oñembopyahúrõ guare ko sukursál, oñeinstala pe impréntape peteĩ mákina espesiál ombyatýva pe pólvo ha umi kuatia rembyre osẽva upégui. Ojejogua ha oñeinstala hag̃ua ko mákina ohupyty kuri haimete un millón de dólar, péro tuichaiterei ideprovécho pórke oipytyvõ ombaʼapo segurove hag̃ua umi ermáno. Ha upéva mediánte, ojesegi oñeimprimi ha oñemondo ko múndo tuichakuére umi puvlikasión bíblica.

 Umi ombaʼapóva ko projéktore ndoipotái kuri ojejoko pe impresión de la Biblia pe konstruksión aja. Trey, peteĩ ermáno ombaʼapóva pe Komite de Sukursál de Japónpe, heʼi: “Kavalete oñembopyahu aja umi edifísio ojetradusipa kuri la Biblia heta idiómape, upévare tekotevẽ oñeimprimi heta Biblia ojerahaka hag̃ua ko múndo tuichakuére. Upéicha rupi, diferénte departaménto oĩva Betélpe ha pe emprésa oñekontrata vaʼekue tekotevẽ oñopytyvõmba oñeinstala hag̃ua pe mákina pyahu ojejokoʼỹre pe traváho de impresión”. Legálmente ijetuʼu kuri, upéicharõ jepe, éntre marzo ha agosto de 2023 oñeimprimi haimete 220.000 Biblia káda mes. Hiʼarive upérõ tuichavéntema kuri la traváho pe impréntape. Entéro koʼã mbaʼe ojehupyty ha oñekompletapaite pe traváho oñeseʼỹre pe presupuéstogui.

 Avei ojehecha mbaʼéichapa ikatu ojeaorrave elektrisida. Upévare oñemoĩta panél solár pyahu, oipytyvõtava ojeaorra hag̃ua káda áño amo 120.000 dólar rupi. Oñemoĩta avei ventána orekóva mbohapy vídrio iñanambusuve hag̃ua, upéva oipytyvõta ani hag̃ua ojegastaiterei elektrisida. Ha upéva mediánte, ojeaorráta haimete 10.000 dólar káda áño. Ojejapo hag̃ua koʼã mbaʼe ningo oreko añete la igásto, péro amo ipahápe heta ojeaorra, ojekalkula amo 3 millón imédio de dólar rupi. Ha avei saʼive oñembyai pe médio ambiénte.

 Koʼã mokõi projékto ojejapóva Angola ha Japónpe ohechauka porã oĩha heta traváho umi sukursálpe, ojesegi hag̃ua oñeñatende umi nesesida oĩva iterritóriope. Péro oĩve gueteri heta traváho ojejapo vaʼerã. Aaron, ombaʼapóva Departaménto Mundiál de Diséño ha Konstruksiónpe, heʼi: “Hetaiterei mbaʼéma ningo ojejapo, péro oĩti heta la traváho”. ¿Mbaʼéichapa ikatúta ojejapopa? Haʼe heʼive: “Ñane ermanokuéra nomeʼẽiramo ikontrivusión, ndaikatumoʼãi ojekuvripa umi gásto ojejapo hag̃ua koʼã projékto iñimportantetéva. Avei roagradeseterei umi ojeofresévape ombaʼapo hag̃ua pe konstruksiónpe, ha umi oñeorganisámavape koʼág̃a oapoja hag̃ua umi projékto ojejapótavape amo gotyove. Umi sakrifísio ha pláta omeʼẽva ñane ermanokuéra ohechauka porã mbaʼéichapa Jehová ñanevendesi” (Salmo 110:3).

 Entéro umi edifísio oipurúva umi testígo de Jehová oñemopuʼã ha oñemyatyrõva ojepaga umi kontrivusión voluntária rupive, ha heta umívagui oñemeʼẽ donate.dan124.com rupive. ¡Grásiamante péicha pendepojera haguére!