Éxodo 28:1-43
28 “Eiporavo umi israelita apytégui ne ermáno Aarónpe+ ha itaʼyrakuéra+ Nadab, Abihú,+ Eleazar ha Itamárpe+ ikatu hag̃uáicha ombaʼapo chéve saserdóteramo.+
2 Pejapo vaʼerã Aarónpe ijaorã oipurútava saserdóteramo,* péicha haʼe iporãta ha oñemombaʼéta chupe.+
3 Ere vaʼerã enterove umi ivalévape, umi che ambokatupyry vaʼekuépe, ojapo hag̃ua Aarónpe ijaorã,+ ha péicha enterove ohecháta aiporavo hague Aarónpe ombaʼapo hag̃ua chéve saserdóteramo.
4 Koʼã mbaʼe ojapo vaʼerã hikuái: peteĩ pechéra,*+ peteĩ delantál,*+ peteĩ ao ijyvakuareíva,+ peteĩ ao puku akuádro, peteĩ turvánte*+ ha peteĩ sinturón.+ Koʼã ao sagrádo ningo ojejapo vaʼerã ne ermáno Aarón ha itaʼyrakuérape g̃uarã, ikatu hag̃uáicha ombaʼapo chéve saserdóteramo.
5 Umi kuimbaʼe ikatupyrýva ojapo hag̃ua umi ao, oipurúta koʼã mbaʼe: ílo de óro, ílo hovy, lána líla, ílo pytã asýva ha ílo de líno iporãva.
6 Haʼekuéra ojapo hag̃ua pe delantál oipuru vaʼerã ílo hovy, lána líla, ílo pytã asýva ha líno trensádo iporãva, ha pevorda vaʼerã ílo de órope.+
7 Pe delantál ojejapo hag̃ua ojepuru vaʼerã mokõi téla pedáso ha oñembojoaju vaʼerã ijatiʼýpe umi mokõi ijoríllape.
8 Ojejapo vaʼerã avei peteĩ sinturón vordádo+ ha oñemoĩ vaʼerã pe delantál rehe, ani hag̃ua okuʼe ha opyta hatã hag̃ua pe delantál. Ha ojejapo hag̃ua ojepuru vaʼerã koʼã mbaʼe: ílo de óro, ílo hovy, lána líla, ílo pytã asýva ha líno trensádo iporãva.
9 Pejagarra vaʼerã mokõi itaʼi ónise+ ha peskrivi hese Israel* raʼykuéra réra.+
10 Peteĩ itaʼíre peskrivi vaʼerã 6 Israel raʼy réra ha pe ótro itaʼíre umi 6 hembýva réra, ha primeroite pemoĩ vaʼerã pe taʼýra ypykue réra ha upéi pe imitãvéva chugui ha peho hese upéicha peg̃uahẽ meve pe ipahaguépe.
11 Peteĩ artesáno oskrivi vaʼerã koʼã itáre Israel raʼykuéra réra ha ojapo vaʼerã upéva ojejapoháicha peteĩ séllore.+ Upéi pemboguapýta umi itaʼi mokõi vaseʼi de órope.
12 Umi mokõi ita ivaseʼi reheve pemoĩta pe téla oĩvare pe delantál atiʼýre. Koʼã itaʼi omomanduʼáta umi israelítape Ñandejárare.+ Ha Aarón oñepresenta jave Jehová renondépe, ogueraha vaʼerã ijatiʼy ári umi itaʼi orekóva Israel raʼykuéra réra, ha umíva omomanduʼáta Ñandejárape hesekuéra.
13 Ha umi itaʼípe g̃uarã pejapo vaʼerã mokõi vaseʼi de óro.
14 Pejapóta avei mokõi piolín de óro+ pemoĩ hag̃ua umi vaseʼíre.+
15 Ha peteĩ vordadór ojapo vaʼerã pe pechéra. Upe pechérape oĩta hína umi mbaʼe ojepurútava ojekuaa hag̃ua Ñandejára odesidíva.+ Ha umi mbaʼe peipurúma vaʼekue pejapo hag̃ua pe delantál, peipuru jey vaʼerã pejapo hag̃ua pe pechéra: ílo de óro, ílo hovy, lána líla, ílo pytã asýva ha líno trensádo iporãva.+
16 Ko pechéra ojedovla vove mbytépe opyta vaʼerã kuadradoite, ipuku vaʼerã 22 sentímetro* ha ipe vaʼerã 22 sentímetro.*
17 Upéi pemoĩ vaʼerã hese ita iporãva ivaseʼi reheve. Umi ita pemoĩ vaʼerã en 4 fíla pe pechérare, pe primera fílape oĩ vaʼerã: rruvi, topásio ha esmerálda.
18 Pe segunda fílape oĩ vaʼerã: turkésa, safíro ha háspe.
19 Pe tercera fílape oĩ vaʼerã: léschem,* ágata ha amatísta.
20 Pe cuarta fílape oĩ vaʼerã: krisólito, ónise ha háde. Koʼã ita pemboguapy vaʼerã umi vaseʼi de órope.
21 Umi ita orrepresentáta hína umi 12 trívupe. Káda itáre ojeskrivi vaʼerã peteĩ Israel raʼy réra, ha ojeskrivi vaʼerã hese ojejapoháicha peteĩ séllore.
22 Pejapo vaʼerã piolín de óro ha pemboja pe pechérare.+
23 Ha pejapo vaʼerã avei mokõi argollaʼi de óro pemoĩ hag̃ua pe pechéra rehe, ha opyta vaʼerã umi mokõi eskínape yvate gotyo.
24 Káda eskínape, pe argollaʼi kuárupi pembohasa vaʼerã peteĩ piolín de óro.
25 Ha umi mokõi piolín púnta pembohasa vaʼerã umi vaseʼi de óro kuárupi, koʼãva oĩ hína pe téla oĩvare pe delantál atiʼýpe.
26 Pejapo vaʼerã avei mokõi argollaʼi de óro ha pemoĩ pe pechéra oríllare, iguy gotyo, oja hag̃uáicha pe delantál rehe.+
27 Upéi pejapove vaʼerã avei mokõi argollaʼi de óro ha pemoĩ pe delantál renonde gotyo, og̃uahẽháme yvy gotyo umi mokõi téla osẽva pe delantál atiʼýgui, oñembojoajuhápe pe delantál, pe sinturón vordádo arimi.+
28 Koʼã mokõi argollaʼíre oñeñapytĩ vaʼerã mokõi sínta hovy, ha koʼã sínta oñeñapytĩ vaʼerã avei umi argollaʼi oĩvare pe pechéra oríllape, iguy gotyo. Péicha pe pechéra ndokuʼemoʼãi ha opyta hatãta pe delantál ári ha pe sinturón vordádo arimi.
29 Aarón oike jave Ñandejára renondépe pe lugár Sántope, ogueraha vaʼerã pe pechéra orekóva Israel raʼykuéra réra ha ojepurúva ojekuaa hag̃ua Ñandejára odesidíva. Ha péicha siémpre Jehová imanduʼáta Israel raʼykuérare.
30 Pemoĩ vaʼerã pe Urim ha Tumim*+ pe pechéra ryepýpe, umíva ojepuru vaʼerã ojekuaa hag̃ua Ñandejára odesidíva. Ha upe pechéra Aarón siémpre ogueraha vaʼerã ipéchore oike jave Jehová renondépe. Aarón oipurúta pe Urim ha Tumim Jehová renondépe ohusga hag̃ua umi israelítape.
31 Pejapo vaʼerã ílo hovýgui peteĩ ao puku ha ijyvakuareíva pe delantál guýpe g̃uarã.+
32 Pe ao ikua vaʼerã mbytépe pe saserdóte omoinge hag̃ua iñakã. Ani hag̃ua osoro, upe ao kuéllo rembeʼy oñembovyvy porã vaʼerã, oñembovyvyháicha umi soldádo ao juru. Ko ao ojapo vaʼerã peteĩ ivaléva ombovyvy hag̃ua.
33 Pejapo vaʼerã granadaʼi ílo hovýgui, lána líla ha ílo pytã asývagui. Koʼãva pemosaingo vaʼerã pe ao ruguái rruédore kompletoite, ha pemosaingo vaʼerã avei hese kampanaʼi de óro.
34 Umi granadaʼi ha kampanaʼi de óro pemosaingo vaʼerã interkaládo pe ao ijyvakuareíva ruguáire.
35 Aarón omonde vaʼerã ko ao ombaʼapóta jave de súmo saserdóte. Umi kampanílla pu oñehendu vaʼerã Aarón oike jave pe lugár Sántope Jehová renondépe, ha oñehendu vaʼerã avei osẽnguévo upégui. Péicha haʼe ojapo vaʼerã ani hag̃ua omano.+
36 Pejapo vaʼerã avei peteĩ pláka de óro púro ha peskrivi vaʼerã hese ojejapoháicha peteĩ séllore, ha heʼi vaʼerã hese: ‘Jehová mbaʼe hína pe santida’.+
37 Ko pláka pejokua vaʼerã sintaʼi hovýpe pe turvántere,+ ha opyta vaʼerã pe ifrénte gotyo.
38 Ko pláka siémpre oĩ vaʼerã Aarón syváre, ha upéva ohechaukáta haʼe oĩtaha rresponsávle umi israelita opekáramo umi mbaʼe sagrádova kóntrape.+ Umíva hína umi mbaʼe osantifikáva umi israelita oofrese jave Ñandejárape peteĩ rregálo sagrádoramo. Upévare ko pláka siémpre oĩ vaʼerã Aarón syváre ikatu hag̃uáicha Jehová oasepta umi israelítape.
39 Pejapo vaʼerã avei peteĩ ao puku akuádrova téla de líno iporãvagui, peteĩ turvánte téla de líno iporãvagui ha peteĩ sinturón ojevorda pyréva.+
40 Pejapo vaʼerã Aarón raʼykuérape g̃uarã ao puku akuádro, sinturón ha turvánte,*+ péicha haʼekuéra iporãta ha oñemombaʼéta chupekuéra.+
41 Emonde vaʼerã koʼã mbaʼe ne ermáno Aarón rehe ha itaʼyrakuérare. Eñohẽ vaʼerã iñakãrekuéra aséite enombra* hag̃ua chupekuéra+ ha esantifika avei chupekuéra. Ha emeʼẽ vaʼerã chupekuéra autorida ombaʼapo hag̃ua chéve saserdóteramo.
42 Pejapo vaʼerã avei chupekuéra g̃uarã kalsonsíllo téla de línogui ani hag̃ua oĩ hikuái opío.+ Koʼã kalsonsíllo ipuku vaʼerã ikuʼa guive ikuárto peve.
43 Koʼãva omonde vaʼerã Aarón ha itaʼyrakuéra oike hag̃ua pe tavernákulope,* ha avei oñemoag̃ui jave hikuái pe altár rehe ombaʼapo hag̃ua pe lugár sagrádope. Péicha haʼekuéra ndopytavaimoʼãi che renondépe ha nomanomoʼãi. Koʼã mbaʼe siémpre okumpli vaʼerã Aarón ha itaʼyrakuéra”.
Nóta
^ Hebréope: “ao sagrádova”.
^ Jacóbpe oñehenói avei Israel.
^ Ndojekuaái mbaʼeichagua ita iporãvapa upéva. Ikatu hína ámbar, hasínto, ópalo térã turmalína.
^ Ko turvánte idiferénte vaʼekue upe oipurúvagui pe súmo saserdóte.
