Éxodo 40:1-38
40 Upéi Jehová heʼi Moiséspe:
2 “Pe primer díape del primer mes remopuʼã vaʼerã pe tavernákulo, upéva hína pe lugár de rreunión.+
3 Emoĩ hyepýpe pe Árka del Pákto,*+ ha emoĩ pe kortína odividíva pe koty oñemoʼã hag̃ua pe árka.+
4 Emoinge vaʼerã avei pype pe mesa+ ha emohenda hiʼári umi mbaʼe oĩ vaʼerã voi pe mesa ári. Emoinge avei pype pe kandelávro+ ha emyendy umi lamparaʼi.+
5 Upéi ekoloka avei hyepýpe pe altár de óro ojehapyhápe insiénso.+ Upe altár oĩ vaʼerã pe kortína rire, pe Árka del Pákto* ypýpe. Emoĩ vaʼerã avei pe kortína oĩtava pe tavernákulo entrádape.+
6 Emoĩ vaʼerã pe altár ojehapyha umi ofrénda+ pe tavernákulo entráda renondépe, upéva hína pe lugár de rreunión.
7 Upéi emohenda pe palangána guasu okápe, pe altár ha pe tavernákulo* mbytépe, ha ekarga pype y.+
8 Emongora télape pe tavernákulo korapy,+ ha emoĩ avei pe téla+ pe korapy entradarã.
9 Upéi emoĩ pe aséite ojepurúva ojejapo hag̃ua nombramiénto+ pe tavernákulore* ha opa mbaʼe oĩvare pype.+ Péicha resantifikáta pe tavernákulo ha hembiporukuéra ikatu hag̃uáicha ojepuru che servísiope.
10 Ha reñohẽ vaʼerã aséite pe altár rehe, pe ojepurúva ojejapo hag̃ua umi ofrénda ojehapýva, ha hembiporukuérare. Péicha reapartáta pe altár ha opytátama sagradoiterei ojepuru hag̃ua che servísiope añoite.+
11 Reñohẽ vaʼerã aséite pe palangána guasu ha hendag̃uáre, péicha resantifikáta umi mbaʼe.
12 Upéi egueraha Aarón ha itaʼyrakuérape pe tavernákulo entrádape ha embojahu chupekuéra upépe.*+
13 Ha emonde vaʼerã Aarón rehe umi ao iporãva oipurútava pe saserdóte,+ enombra+ ha esantifika chupe. Péicha haʼe cheservíta de saserdóte.
14 Upéi egueru avei Aarón raʼykuérape ha emonde hesekuéra umi ao puku akuádro.+
15 Ha reñohẽ vaʼerã iñakãrekuéra aséite renombra hag̃ua chupekuéra rejapo haguéicha itúare.+ Péicha renombrávo Aarón raʼykuérape, haʼekuéra ha umi ifamiliare cheservítama de saserdóte heta tiémpore”.+
16 Moisés ojapo opa mbaʼe Jehová omanda hagueichaite chupe.+ Upeichaite ojapo.
17 Pe primer día del primer mes pe segundo áñope, oñemopuʼã pe tavernákulo.+
18 Moisés omopuʼãrõ guare pe tavernákulo, omoĩ umi vaseʼi ikuáva mbytépe+ ha omoñemboʼy hiʼári umi armáhe.+ Upe rire omoĩ umi yvyra puku+ ombojoaju hag̃ua umi armasón ha okoloka umi orkón.
19 Ha Moisés oipyso umi téla guasu+ pe tavernákulo armáhe ári,+ Jehová omanda hagueichaite chupe.
20 Upe rire omoĩ pe árkape+ umi ita ipéva orekóva umi mandamiénto,*+ ha omoĩ avei umi yvyra puku+ pe árkare ha upéi omoĩ pe árka tápa.+
21 Ha omoinge pe árka pe tavernákulo ryepýpe, ha omoĩ pe kortína+ odividíva pe koty omoʼã hag̃ua pe Árka del Pákto.*+ Péicha Moisés ojapo Jehová omanda hagueichaite chupe.
22 Upe rire omoinge avei pe mesa+ pe tavernákulope. Pe mesa opyta nórte gotyo pe tavernákulo ryepýpe, pe kortína ypýpe.
23 Ha omohenda porã hiʼári umi pan+ oñepresentáva Jehovápe. Péicha Moisés ojapo Jehová omanda hagueichaite chupe.
24 Omoinge avei pe tavernákulope pe kandelávro,+ ha opyta pe mesa renondépe sur gotyo pe tavernákulo ryepýpe.
25 Ha omyendy umi lamparaʼi+ Jehová renondépe. Péicha Moisés ojapo Jehová omanda hagueichaite chupe.
26 Upéi okoloka avei pe altár+ de óro pe tavernákulo ryepýpe, ha opyta pe kortína ypýpe.
27 Upe altár ári ojehapy vaʼerã insiénso hyakuã asýva.+ Péicha Moisés ojapo Jehová omanda hagueichaite chupe.
28 Upéi omoĩ pe kortína+ pe tavernákulo entrádape.
29 Omoĩ avei pe tavernákulo entráda renondépe pe altár ojejapohápe pe ofrénda ojehapýva.+ Ko altár ári ojejapo vaʼerã ofrénda ojehapýva+ ha ofrénda de semílla. Péicha Moisés ojapo Jehová omanda hagueichaite chupe.
30 Upéi omohenda pe palangána guasu okápe, pe altár ha pe tavernákulo mbytépe, ha okarga pype y.+
31 Moisés, Aarón ha itaʼyrakuéra oipuru pe y ojepohéi ha ojepyhéi hag̃ua.
32 Haʼekuéra* katuete oñemopotĩ+ oikéta jave pe tavernákulope térã oñemoag̃uíta jave pe altár rehe, Jehová omanda hagueichaite Moiséspe.
33 Upéi omoĩ pe téla omongora hag̃ua pe tavernákulo korapy+ ha pe altár, ha omoĩ avei pe téla pe tavernákulo korapy entradarã.+
Péicha Moisés ojapopa pe tavernákulo.
34 Ha pe arai ojahoʼi pe tavernákulo, ha Jehová podér omimbipa pe tavernákulope.+
35 Moisés katu ndaikatúi oike pe tavernákulope, pe arai osegi rupi ojahoʼi pe tavernákulo ha Jehová podér omimbipa rupi upépe.+
36 Pe arai ojupi jave pe tavernákulogui, umi israelita ombyaty ikosakuéra ha okontinua iviáhe. Péicha ojapo hikuái oviaha aja entéro pe desiértore.+
37 Péro pe arai ndojupíri aja, haʼekuéra opyta ha nokontinuái iviáhe.+
38 Pe arai Jehová oipurúva opyta pe tavernákulo ári de diakue, ha pyharekue katu opyta hiʼári peteĩ tatarendy. Ha pyharekue umi israelita ohecha pe tatarendy oviaha aja entéro pe desiértore.+
Nóta
^ Oiméne Moisés heʼi chupekuéra ojahu hag̃ua.
^ Hebréope: “Árka del Testimónio”.
^ Térã: “Aarón ha itaʼyrakuéra”.
