1 Samuel 3:1-21
-
Samuélpe ojeporavo profetarã (1-21).
3 Ha Samuel imitãramo jepe, oservi+ Jehová rógape, ha oipytyvõ pe saserdóte Elípe. Upe tiémpope saʼi oñehendu Jehová omeʼẽha imensáhe térã umi visión+ isiervokuérape.
2 Elí katu itujáma, hesa iñapatĩmba ha ndohechavéima.+ Peteĩ díape haʼe oñeno hína ikotýpe,
3 ha pe lámpara oĩva Ñandejára rógape+ hendy gueteri. Samuel katu oñeno hína Jehová témplope,*+ oĩháme Ñandejára árka.
4 Jehová oñepyrũ ohenói Samuélpe. Ha haʼe okontesta: “Ápe aime, ¿mbaʼépa reipota che karai?”.
5 Ha odipara oho Elí rendápe ha heʼi: “Ápe ajúma, nde ningo cherenói”. Elí katu heʼi: “No, che norohenóiri, tereho katu eñeno jey”. Upémarõ haʼe oho oñeno.
6 Upéi Jehová ohenói jey Samuélpe ha heʼi: “Samuel”. Upémarõ haʼe opuʼã ha oho jey Elí rendápe ha heʼi chupe: “Ápe ajúma, nde ningo cherenói”. Péro Elí heʼi chupe: “Che norohenóiri che raʼy, tereho katu eñeno jey”.
7 (Upe tiémpope Samuel ndoikuaaporãi gueteri Jehovápe, pórke Jehová neʼĩra omeʼẽ chupe imensáhe).+
8 Upéi Jehová 3 veseha ohenói Samuélpe ha heʼi: “Samuel”. Ohendúvo upéva, haʼe opuʼã oho Elí rendápe ha heʼi: “Ápe ajúma, nde ningo cherenói”.
Upépe Elí opilla Jehová ohenoiha hína pe mitãrusúpe.
9 Upémarõ Elí heʼi Samuélpe: “Tereho jeýnte eñeno, ha ág̃a nerenói jeýrõ, ere vaʼerã: ‘Jehová, eñeʼẽ katu por favór, che ajapysaka hína nderehe’”. Ha Samuel oho jey oñeno ikotýpe.
10 Upéi Jehová heʼi jey: “Samuel, Samuel”. Ha haʼe okontesta chupe: “Eñeʼẽ katu por favór, che ajapysaka hína nderehe”.
11 Jehová heʼi Samuélpe: “Oĩramo ohendúva la che ajapóva hína Israélpe, opytáta ijapysa ryapupa.*+
12 Upe tiémpo og̃uahẽ vove, akumplipaitéta la haʼe vaʼekue ajapotaha Elí ha hogayguakuérare, mbaʼevete ndopytamoʼãi oñekumpliʼỹre.+
13 Nde ere vaʼerã Elípe che akastigaha ifamiliakuérape opa ára g̃uarã, opeka haguére che kóntrape. Pórke haʼe oikuaa porã+ itaʼyrakuéra oñembohory hague cherehe+ ha haʼe ndokorrehíri chupekuéra.+
14 Upévare che ahura Elí familiakuérape naperdonamoʼãiha ipekadokuéra. Ndaiporimoʼãi mbaʼeveichagua sakrifísio ni ofrénda ikatu vaʼerã oñemeʼẽ hesehapekuéra”.+
15 Samuel opyta oke koʼẽmba peve, ha opuʼã rire oavri Jehová róga rokẽ. Haʼe okyhyjeterei heʼi hag̃ua Elípe la ohecha vaʼekue.
16 Péro Elí ohenói chupe ha heʼi: “Samuel, che raʼy”, ha haʼe okontesta: “¿Mbaʼépa reipota karai?”.
17 Elí heʼi chupe: “¿Mbaʼe mensáhe piko omeʼẽ ndéve Ñandejára? Emombeʼupaite chéve la heʼi vaʼekue ndéve, aníke remokañy mbaʼevete chehegui. Ha la neremombeʼupáirõ chéve, Ñandejára tandekastiga ndéve el dóvle”.
18 Upémarõ Samuel omombeʼupaite chupe, mbaʼevete nomokañýi chugui. Ha ohendupa rire chupe, Elí heʼi: “Péva ningo Jehová volunta. Toiko katu la haʼe oipotáva”.
19 Samuel katu okakuaave ohóvo ha Jehová siémpre oĩ hendive.+ Ha Ñandejára oñenkarga oñekumplipaite hag̃ua* Samuel heʼi vaʼekue.
20 Ha Israel kompletoite, Dan guive Beer-Seba peve, ohechakuaa Jehová oiporavo hague Samuélpe iprofetarã.
21 Jehová ningo ojaparese vaʼekue Samuélpe Silópe, upévare Jehová osegi ojechauka chupe upépe. Ha umi mensáhe rupive, Jehová oikuaauka Samuélpe mbaʼeichagua Dióspa haʼe.+
Nóta
^ Péva hína pe tavernákulo.
^ Hebréope: “mokõive ijapysa opytáta hyapu”.
^ Hebréope: “ani hag̃ua hoʼa yvýre”.
