Eclesiastés 4:1-16
4 Upéi amaña mbaʼéichapa oĩ heta hénte ombohasa asýva hapichápe ko yvy ape ári. Ahecha mbaʼéichapa umi osufríva oiko hesay hováre ha ndaipóri avave okonsola vaʼerã chupekuéra.+ Umi oporomaltratáva oreko autorida, ha upévare avave noipytyvõi umi ohasa asývape.
2 Upéi avyʼa apensávo umi omanómavare, ha haʼe iporãveha ñamano ke la jaikove.+
3 Ha umi nonaséiva katu oĩ porãvéntema,+ pórke haʼekuéra ndohechái umi mbaʼe vai ojejapóva ko yvy ape ári.+
4 Ahecha avei mbaʼéichapa umi hénte ombaʼapo pohýi ha oñehaʼã ivaleve itraváhope oganaségui hapichápe.+ Ha péva vyrorei avei. Haʼete jaikóva yvytu rapykuéri.
5 Pe itavýva omanótama vareʼágui, péro haʼe osegínte ojekuʼako.+
6 Iporãve repytuʼuʼimi,* reiko rangue rejejuka traváhope.* Péicha haʼete reikóva yvytu rapykuéri.+
7 Ahecha avei ótro vyrorei ojejapóva ko yvy ape ári.
8 Oĩ peteĩ kuimbaʼe haʼeño peteĩva. Haʼe naiñamígoi, ndaitaʼýrai ni naiñermánoi. Siémpre ombaʼapo pohýi ha núnka noñekontentái umi rrikésa okonsegívare.+ Péro upéi oñeporandu: “¿Mávape g̃uarã piko che la peichaite ambaʼapo? ¿Mbaʼére piko ndadisfrutái umi mbaʼe arekóvagui?”.+ Kóva vyrorei avei, haʼete peteĩ kárga pohýi.+
9 Upévare mokõi iporãve peteĩgui,+ pórke hetave mbaʼe okonsegíta hikuái ombaʼapo rupi oñondive.
10 Ha peteĩva hoʼáramo, pe ótro ikatúta oipytyvõ chupe opuʼã hag̃ua. Péro, ¿mbaʼe oikóta peteĩva hoʼáramo ha ndaipórirõ avave oipytyvõ vaʼerã chupe?
11 Upéicha avei, pyharekue peteĩva ikatu omoirũ pe ótrope ani hag̃ua iroʼyeterei. Péro pe oĩva haʼeño iroʼýramo, ¿máva oipytyvõta chupe?
12 Oimeraẽva ikatu ipuʼaka pe oĩvare haʼeño, péro mokõi oñomoirũramo ikatúta oñemoĩ hese. Ha peteĩ pióla mbohapy isãva, ndosoichéne oimeháicha rei.
13 Peteĩ mitãʼi imboriahu ha iñarandúva ovaleve peteĩ rréi ijedáva ha itavývagui+ ha nohendusevéimava umi konsého.+
14 Upéi pe mitãʼi osẽ kárselgui oiko hag̃ua chugui rréi,+ haʼe onase pe ótro rréi omanda aja, ha upérõ haʼe imboriahu kuri.+
15 Amaña umi hénte oikóvare ápe ha pépe ko yvy apére ha ahecha avei mbaʼépa oiko pe mitãʼíre. Haʼe ojupi kuri pe ótro rréi rendaguépe.
16 Hetaiterei persóna omoirũ kuri pe mitãʼípe, upéicharõ jepe umi hénte oúva upe rire, ndoguerohorymoʼãi chupe.+ Péva vyrorei avei. Haʼete jaikóva yvytu rapykuéri.
