Números 12:1-16
12 Upéi Míriam ha Aarón oñepyrũ oñeʼẽ vai Moisés rehe omenda haguére peteĩ kuña cusítare.+
2 Haʼekuéra heʼi: “¿Jehová piko ojevale Moisésre añónte oñeʼẽ hag̃ua? ¿Ndojevaléi piko avei ñanderehe oñeʼẽ hag̃ua?”.+ Ha Jehová ohendupa chupekuéra.+
3 Moisés katu ivuenoiterei ha ndaipóri voi ótro haʼeichagua+ ko yvy ape ári.
4 Upeichaháguinte Jehová heʼi Moisés, Aarón ha Míriampe: “Peẽ mbohapyvéva, pesẽ tapeho pe tavernákulope”.* Upémarõ mbohapyvéva osẽ oho.
5 Ha Jehová oguejy pe araípe,*+ opyta pe tavernákulo entrádape ha ohenói Aarón ha Míriampe. Ha mokõivéva oñemoag̃ui hese.
6 Upépe Ñandejára heʼi chupekuéra: “Pehendumína la haʼétava peẽme: oĩramo pende apytépe Jehová proféta, peteĩ visión rupive+ aikuaaukáta chupe mávapa che, ha añeʼẽta chupe iképe.+
7 ¡Péro che ndajapói upéicha Moisés ndive! Che ahejapaite hína ikárgope che róga.+
8 Che ningo frénte a frénte añeʼẽ hendive,+ ojapoháicha mokõi kuimbaʼe oñemongeta jave. Oimeraẽ mbaʼe che haʼeséva, aexplika porã chupe. Ha che, Jehová, chete voi ajechauka chupe. ¿Mbaʼére piko upéicharõ ndapekyhyjéi raʼe peñeʼẽ vai hag̃ua Moisés rehe?”.
9 Upévo Jehová orrenegaiterei hesekuéra, ha osẽ oho upégui.
10 Ha pe arai ojei pe tavernákulo árigui, ha Míriampe ojagarrapaite lépra, eládaicha morotĩ sakã opyta.+ Aarón ojerévo omaña hese, ohecha ojagarrapaiteha chupe lépra.+
11 Upepete Aarón heʼi Moiséspe: “Moisés, ajerure ndéve ikatúramo, anína reheja ore ári ko kastígo. Añetehápe ivai la rojapo vaʼekue, ha orevýrogui oiko orerehe péicha.
12 Anína reheja chupe opyta peteĩ mitã omano vaʼekuéicha onase mboyve, ha onasévo pe hete ja oñembyaipa léntomava”.
13 Upémarõ Moisés ojerure asy Jehovápe: “¡Ñandejára, emongueramína chupe!”.+
14 Jehová heʼi Moiséspe: “Itúa ondyvúramo hováre, upéicharõ haʼe opyta vaʼerã oñemotĩ 7 día aja, ¿ajépa? Upéicharõ tojeaparta* chupe pe kampaméntogui oĩ hag̃ua haʼeño 7 día,+ ha upéi ae ikatúta ou jey pe kampaméntope”.
15 Upémarõ ojeaparta Míriampe pe kampaméntogui oĩ hag̃ua haʼeño 7 día,+ ha umi hénte ndohói moõve Míriam ou jey peve pe kampaméntope.
16 Upéi umi hénte osẽ Hazerótgui+ ha oho opyta desiérto de Paránpe.+
Nóta
^ Hebréope: “peteĩ arai ojoguáva kolúmnape”.
^ Térã: “toñemoĩ en kuarenténa”. Upéicha jave ojeaparta peteĩ persónape ikatúgui oguerova ótrore imbaʼasy.
