Zacarías 6:1-15
6 Ha amaña jey ha ahecha peteĩ visión rupive 4 kárro de gérra oúva mokõi montáña paʼũgui, ha umi montáña ningo de kóvre vaʼekue.
2 Pe primer kárrope oitira umi kavaju pytãva, ha pe segundo kárrope umi kavaju hũva.+
3 Pe tercer kárrope oitira umi kavaju morotĩva, ha pe cuarto kárrope umi kavaju iparáva ha iparaʼíva.+
4 Che aporandu pe ánhel oñeʼẽvape chendive: “Che ruvicha, ¿mbaʼe piko heʼise koʼã kárro de gérra?”.
5 Pe ánhel okontesta chéve: “Koʼãva hína umi 4 espíritu yvagapegua*+ osẽva oñepresenta rire Ñandejára renondépe, haʼe hína Mburuvicha ko yvy tuichakuére.+
6 Pe kárro oitiráva umi kavaju hũ oho pe yvy oĩvape nórte gotyo,+ umi morotĩva oho pe yvy oĩvape oéste gotyo,* ha umi iparáva oho pe yvy oĩvape sur gotyo.
7 Ha umi iparaʼíva ohosetereíma voi orrekorre pe yvy otokahápe chupekuéra”. Upéi haʼe heʼi: “Tapeho perrekorre pe yvýre”. Ha oñepyrũ oho hikuái pe yvy otokahápe chupekuéra.
8 Upéi haʼe osapukái chéve ha heʼi: “Emañami, umi kavaju ohóva nórte gotyo ombopochyjera Jehová espíritu pe yvy oĩvape nórte gotyo”.
9 Jehová oñeʼẽ jey chéve ha heʼi:
10 “Ejagarra pe kontrivusión ogueru vaʼekue Heldái, Tobiya ha Jedayá umi hénte oĩvagui prisionéroramo. Ha upe díape reho vaʼerã Josías rógape, haʼéva Sofonías raʼy, ha reho vaʼerã umi ou vaʼekuéndi Babilóniagui.
11 Rejagarra vaʼerã pe pláta ha óro ha ejapo peteĩ koróna,* ha emoĩ pe súmo saserdóte Josué+ akãre, haʼéva Jehozadac raʼy.
12 Ha ere chupe:
‘Péicha heʼi Jehová, umi ehérsito yvagapegua ruvicha: “Koʼápe oĩ pe kuimbaʼe hérava Hoky.+ Haʼe heñóita pe lugár oĩhágui voi ha omopuʼãta Jehová témplo.+
13 Haʼe hína upe omopuʼãtava Jehová témplo, ha chupe oñemeʼẽta pe podér ijojahaʼỹva. Haʼe oguapýta itrónope ha ogovernáta peteĩ rréicha, ha oikóta avei chugui saserdóte,+ ha ojapóta umi mokõi tembiapo* ikatu hag̃uáicha ogueru pyʼaguapy umi héntepe.
14 Ha pe koróna* opytáta pe témplope ikatu hag̃uáicha Jehová imanduʼa upe ojapo vaʼekuére Hélem, Tobiya, Jedayá, ha Hen, haʼéva Sofonías raʼy.
15 Ha umi oĩva mombyry oúta ha omopuʼãta avei Jehová témplo”. Ha peẽ peikuaáta chembou hague pene rendápe Jehová, umi ehérsito yvagapegua ruvicha. Ha upéva oikóta... peẽ pesegíramo pehendu pende Jára Jehová ñeʼẽ’”.
Nóta
^ Koʼápe ikatu oñeñeʼẽ hína 4 grúpo de ánhel rehe.
^ Térã: “amo gotyove pe márgui”.
^ Térã: “koróna ojajaipáva”.
^ Upéva heʼise umi tembiapo ojapótava governánte ha saserdóteramo.
^ Térã: “koróna ojajaipáva”.
