Apocalipsis 10:1-11
10 Ha ahecha ótro ánhel ipoderósova oguejýva yvágagui. Haʼe oreko ijehe umi arai peteĩ aóicha, ha iñakã ári oĩ peteĩ árko íris. Hova ojogua kuarahýpe+ ha umi hetyma* katu haʼete mokõi kolúmna imbaretéva ojoguáva tatarendýpe.
2 Ipópe oguereko peteĩ kuatiañeʼẽ* michĩva ha ojeavríva. Haʼe omoĩ ipy derécha márpe ha ipy iskiérdo katu yvy ári.
3 Haʼe osapukái hatã, haʼete voi peteĩ león okororõva.+ Ha haʼe osapukáivo oñehendu oñeʼẽha 7 arasunu.+
4 Umi 7 arasunu oñeʼẽvo, che ajepreparáma askrivi hag̃ua la heʼíva hikuái. Péro ahendu peteĩ oñeʼẽva yvágagui+ ha heʼíva: “Umi 7 arasunu heʼíva ningo peteĩ sekréto, ani reskrivi umíva”.
5 Pe ánhel ahecha vaʼekue, oñemboʼýva hína pe mar ha pe yvy ári, ohupi ipo derécha yvága gotyo.
6 Ha haʼe ohura Ñandejárare, pe oikovéva opa ára g̃uarã,+ pe ojapo vaʼekue yvága ha umi mbaʼe oĩva pype, pe yvy ha umi mbaʼe oĩva pype, pe mar ha umi mbaʼe oĩva pype,+ ha heʼi: “Ñandejára nohaʼarõmoʼãvéima.
7 Péro hiʼag̃uívo pe tiémpo pe séptimo ánhel+ ombopu hag̃ua itrompéta,+ oñekumplipáta Ñandejára sekréto sagrádo.+ Upéva hína umi notísia porã haʼe oikuaauka vaʼekue umi profétape+ oservíva chupe esklávoramo”.
8 Ha pe oñeʼẽva yvága+ guive, oñeʼẽ jey chéve ha heʼi: “Tereho ejagarra pe kuatiañeʼẽ ojeavríva, pe orekóva ipópe pe ánhel oñemboʼýva pe mar ha pe yvy ári”.+
9 Upéi aha pe ánhel rendápe ha ajerure chupe pe kuatiañeʼẽ. Ha haʼe heʼi chéve: “Ejagarra ha heʼu,+ nde jurúpe eiretéicha heʼẽta, péro nde pyʼápe iróta”.
10 Ajagarra pe kuatiañeʼẽ pe ánhel pógui ha haʼu,+ ha che jurúpe eiretéicha heʼẽ,+ péro amokõ rire iro che pyʼápe.
11 Ha ojeʼe chéve: “Reprofetisa jey vaʼerã mbaʼépa oikóta umi puévlore, umi tetãre, umi hénte oñeʼẽvare diferénte idióma, ha avei mbaʼépa oikóta heta rréire”.
