Ezequiel 24:1-27
24 Upéi pe día 10, pe mes décimope, pe noveno áñope,* Jehová oñeʼẽ jey chéve ha heʼi:
2 “Yvypóra raʼy, koestediaite voi eanota ko fécha.* Pe rréi de Babilonia oñepyrũma oataka koestediaite voi Jerusalén.+
3 Ha emombeʼu peteĩ ehémplo* oñeʼẽva umi opuʼãvare cherehe, ha ere hesekuéra:
‘Péicha heʼi Ñandejára Jehová ogovernáva opa mbaʼe:
“Emoĩ peteĩ ólla* tatápe ha emoĩ pype y.+
4 Epoi pype unos kuánto soʼo pedáso,+ umi soʼo pedáso iporã porãva.
Epoi ikuartokue ha ipaletakue, ha emyenyhẽte pype umi soʼo kangue iporãnguetéva.
5 Ejagarra pe ovecha iporãvéva pe ovecha atýgui,+ ha emoĩve jepeʼa pe ólla guýpe.
Embopupu umi soʼo pedáso ha embojy umi soʼo kangue pe óllape”’.
6 Upévare péicha heʼi Ñandejára Jehová ogovernáva opa mbaʼe:
‘¡Aichejáranga pe siuda ojeporojuka haguépe,*+ upéva hína peteĩ ólla iñerrumbrepáva, chugui ningo ndojepeʼáiva la iñerrúmbre!
Eguenohẽ umi soʼo pedáso, tróso por tróso,+ ha ani reiporavo* mavaitévapa reguenohẽta.
7 Pórke pe tuguy oñohẽ vaʼekue ko siuda oĩ gueteri pype,+ haʼe oñohẽ upéva pe ita perõ ári.
Haʼe noñohẽi yvýpe ojaty hag̃ua yvykuʼípe.+
8 Upéicha rupi oĩ ipochyetereíva ha oñevengaséva.
Che amoĩ huguy pe ita perõ vera ári,ani hag̃ua ojejaty’.+
9 Upévare péicha heʼi Ñandejára Jehová ogovernáva opa mbaʼe:
‘¡Aichejáranga pe siuda ojeporojuka haguépe!*+
Atyraite amoĩta iguýpe la jepeʼa.
10 Emoĩ hetave jepeʼa ha embojepota,embojy porã pe soʼo, eñohẽ pe hykuere ha eheja tokaipa umi soʼo kangue.
11 Emoĩ pe ólla nandi umi tatapỹi ári haku hag̃ua,ikatu hag̃uáicha pe ikóvre haku pytã asy.
Umi mbaʼe kyʼa orekóva hykúta hyepýpe+ ha pe iñerrúmbre okaipáta tatápe.
12 Ñandearhela ha ñanemokaneʼõ ningo,pórke ndojeíri pe iñerrúmbre iñanambusuetéva.+
¡Emombo tatápe pe ólla iñerrumbrepáva!’.
13 ‘Nde ningo ndekyʼa nderekotieʼỹ rupi.+ Che añehaʼã romopotĩ, péro nde nanepotĩri voi umi mbaʼe kyʼa reguerekóvagui. Nde nanepotĩmoʼãi ág̃a chepochyjera peve nendive ha añetrankilisa peve.+
14 Chete Jehová haʼéma upéva, ha oñekumplíta katuete. Che ndatardamoʼãi ajapo hag̃ua upéva, nambyasymoʼãi ni ndoguapymoʼãi cherehe.+ Ha haʼekuéra ndehusgáta asegún umi nde rape ha umi mbaʼe rejapo vaʼekue’, heʼi Ñandejára Jehová ogovernáva opa mbaʼe”.
15 Ha Jehová oñeʼẽ jey chéve ha heʼi:
16 “Yvypóra raʼy, degolpete aipeʼáta ndehegui ne hénte rehayhúva.+ Aníke reñembyasy,* ha aníkena rejaheʼo ni reñohẽ nde resay.
17 Nepyahẽ vaʼerã kirirĩháme, ha ani rejapo ni peteĩ umi mbaʼe ojejapóva jepi oĩ jave omanóva.+ Ejokua ne turvánte* ne akãre+ ha emonde ne sandália.+ Ani remoʼã nde vigóte,*+ ha ani reʼu pe pan ojeguerúva ndéve”.*+
18 Ha añeʼẽ umi héntepe pyhareve, ha che rembireko omano kaʼaruete. Upévare, al ótro día pyhareve ajapo oñemanda hagueichaite chéve.
19 Umi hénte heʼi hína kuri chéve: “¿Neremombeʼumoʼãi piko oréve mbaʼéichapa oikóta orerehe umi mbaʼe eréva?”.
20 Ha che akontesta chupekuéra: “Jehová oñeʼẽ chéve ha heʼi:
21 ‘Ere vaʼerã Israel rogayguápe: “Péicha heʼi Ñandejára Jehová ogovernáva opa mbaʼe: ‘Che ag̃aiténtema amongyʼáta pe che lugár sagrádo,+ peẽ ningo pendeorgullóso upe lugár rehe, pemombaʼe ha penerakateʼỹ hese pende pyʼaite guive.* Pende raʼykuéra ha pende rajykuéra peẽ voi peheja vaʼekue pe siudápe, ojejukáta espádape.+
22 Upéi peẽ pejapóta Ezequiel ojapo haguéicha. Peẽ ndapeikomoʼãi pemoʼã pende vigóte, ha ndapeʼumoʼãi pan oguerútava peẽme umi ótro.+
23 Peẽ perekóta pene akãre pene turvánte* ha umi pene sandália pende pýre. Ndapejaheʼomoʼãi ni napenerasẽmoʼãi. Síno pendetujúta umi mbaʼe vai pejapo vaʼekuére,+ ha penepyahẽta oñondivepa.
24 Ezequiel haʼe hína peteĩ señál peẽme g̃uarã.+ Haʼe ojapo hagueichaite, peẽ pejapo vaʼerã. Ág̃a péva oiko vove, peẽ peikuaáta che haʼeha Ñandejára Jehová ogovernáva opa mbaʼe’”’”.
25 “Ha nde katu yvypóra raʼy, pe aipeʼaha díape chuguikuéra pe ilugár isegúro porãva, upéva hína upe mbaʼe porã ombovyʼáva chupekuéra, pe mbaʼe haʼekuéra ohayhuetéva, ha pe ikorasõnguéra* omombaʼéva, ha avei aipeʼaha díape chuguikuéra entéro umi itaʼýra ha itajyrakuéra,+
26 upéva omombeʼúta ndéve peteĩ ojesalva vaʼekue.+
27 Upe díape nde reavríta nde juru ha reñeʼẽta upe ojesalva vaʼekuéndi, ha naneñeʼẽngumoʼãvéima.+ Ndehegui oikóta peteĩ señál chupekuéra g̃uarã, ha oikuaáta hikuái che haʼeha Jehová”.
Nóta
^ Upéva hína pe noveno áño ojegueraha hague hetãgui rréi Joaquín, Ezequiel ha umi ótro judíope.
^ Hebréope: “ko día réra”.
^ Térã: “peteĩ mbaʼe orrepresentáva”.
^ Térã: “ólla ijuru guasúva”.
^ Térã: “ani reiporavo a la suérte”.
^ Térã: “oñeñohẽ haguépe tuguy”.
^ Térã: “oñeñohẽ haguépe tuguy”.
^ Térã: “rejepytiʼanupã”.
^ Térã: “ne rembe yvate gotyogua”.
^ Hebréope: “pe pan oguerúva kuimbaʼekuéra”.
^ Térã: “pene álma oiporiahuvereko chupe”.
^ Térã: “hiʼalmakuéra”.
