Ezequiel 27:1-36
-
Músika jaheʼo omombeʼúva Tiro oñehundiha (1-36).
27 Jehová oñeʼẽ jey chéve ha heʼi:
2 “Nde katu yvypóra raʼy, epurahéi peteĩ músika jaheʼo oñeʼẽva Tiro rehe,+
3 ha ere Tírope:
‘Nde reikóva pe mar entráda ypýpe,nde renegosia vaʼekue umi hénte oikóvandi heta íslape.
Péicha heʼi Ñandejára Jehová ogovernáva opa mbaʼe:
“Tiro, nde ere vaʼekue: ‘Che ningo cheporãiterei ha ndaipóri chembojojáva’.+
4 Nde territoriokuéra oĩ pe mar mbytépe,ha umi nemopuʼã vaʼekue nemoporãitevéntema.
5 Ojejapoháicha peteĩ várko, nderehe ojepuru vaʼekue umi távla de enévro Senírpe guare.+
Ha oipuru hikuái peteĩ sédro Líbanope guare ojapo hag̃ua pe póste puku* oĩva ne mbytépe.
6 Ojapo hikuái umi ne rremokuerarã umi yvyramáta guasu* oĩvagui Basánpe,ha ne frénte* katu ojejapo vaʼekue madéra de siprésgui ha ojedekora marfíl* ojegueru vaʼekuépe umi ísla de Kitímgui.+
7 Umi téla de líno iparáva Egíptope guare ojepuru ojejapo hag̃ua pe téla guasu ojepurúva velarã pe várko póste pukúre.
Ha umi téla ojepurúva nderehe techorã ojejapo ílo hovy ha lána lílagui, ojegueru vaʼekue umi ísla de Eliságui.+
8 Umi orremáva katu haʼe vaʼekue umi hénte Sidón ha Arvadpegua.+
Tiro, umi omaneháva nde varkokuéra haʼe vaʼekue umi kuimbaʼe ikatupyryvéva.+
9 Umi kuimbaʼe ikatupyrýva* ha ivakeánova Guebalpegua+ omboty umi madéra ojoapyhápe ani hag̃ua oike y pe várkope.+
Kompletoite umi várko marpegua ha umi marinerokuéra ou ne rendápe okambia hag̃ua nendive imerkaderiakuéra.
10 Nde ehérsitope oĩ vaʼekue umi kuimbaʼe Persia, Lud ha Putgua,+ umíva haʼe vaʼekue nde gerrerokuéra.
Haʼekuéra omosaingo nderehe umi ijeskúdo ha ikaskokuéra ha nemoporã hikuái.
11 Umi kuimbaʼe Arvadgua oĩva nde ehérsitope ojekoloka vaʼekue umi ne murálla ári kompletoite.
Umi kuimbaʼe ipyʼaguasúva oñenkarga vaʼekue umi nde torrekuérare.
Haʼekuéra omosaingo nderehe umi ijeskúdo apuʼa umi ne murálla jerére kompletoite,ha nemoporãitevéntema hikuái.
12 Tarsis+ onegosia vaʼekue nendive reguereko haguére heta rrikésa.+ Haʼekuéra okambia ha omeʼẽ ndéve pláta, iérro, estáño ha plómo umi mbaʼerepy reguerekóvare.+
13 Javán, Tubal+ ha Mesec+ onegosia vaʼekue nendive, omeʼẽ ndéve hikuái ne merkadería rehe esklávo+ ha umi kósa de kóvre.
14 Togarmá+ familiare okambia ha omeʼẽ ndéve heta kavaju ha mburika umi mbaʼerepy reguerekóvare.
15 Umi hénte Dedanpegua+ onegosia vaʼekue nendive, ha rekontrata vaʼekue umi ombaʼapo vaʼerã ndéve heta íslape. Haʼekuéra omeʼẽ ndéve impuéstoramo marfíl,+ ha umi yvyra ijapyte hũva ha hepýva.*
16 Edom onegosia vaʼekue nendive reprodusi haguére heta mbaʼe. Umi mbaʼerepy reguerekóvare okambia ha omeʼẽ ndéve turkésa, lána líla, téla ojevordáva diferénte kolórpe, téla iporãva, umi ita iporãitéva marpegua* ha ita pytã iporãitereíva.*
17 Judá ha Israel territoriopegua onegosia nendive, ha umi mbaʼerepy reguerekóvare+ okambia ha omeʼẽ ndéve trígo Minítpe guare,+ hiʼupy iporã porãva, eirete,+ aséite ha aséite perfumádo.*+
18 Damasco+ onegosia vaʼekue nendive reprodusi haguére heta mbaʼe ha reguereko haguére heta rrikésa. Ha umívare omeʼẽ ndéve hikuái víno Helbónpe guare ha lána Zahárpe guare.*
19 Vedán ha Javán oĩva Uzal ypýpe okambia ha omeʼẽ ndéve umi mbaʼerepy reguerekóvare iérro ikatúva oñemoldea, kásia, ha takuarílla hyakuã asýva.
20 Dedán+ okambia ha omeʼẽ vaʼekue ndéve ne merkaderiakuérare umi mantaʼi* oñemoĩva animál ári ojeguapy hag̃ua.
21 Nde rekontrata vaʼekue umi árabepe ha enterove umi omoakãvape Quedar,+ haʼekuéra ningo onegosia vaʼekue ovecha raʼyrusu, ovecha mácho ha kavara rehe.+
22 Umi komersiánte Seba ha Raamapegua+ onegosia vaʼekue nendive, haʼekuéra okambia ha omeʼẽ vaʼekue ndéve opaichagua perfúme iporãva, ita vera iporãitereíva ha óro umi mbaʼerepy reguerekóvare.+
23 Harán,+ Cané, Edén,+ umi komersiánte Sebagua,+ Asur+ ha Kilmad onegosia vaʼekue nendive.
24 Haʼekuéra ogueru vaʼekue onegosia hag̃ua ne merkádope* umi ao iporã porãva, mánto ojejapóva téla hovýgui ha ojevordáva diferénte kolórpe ha avei alfómbra de diferénte kolór. Kompletoite koʼã mbaʼe haʼekuéra oñapytĩ porã ha ogueru.
25 Umi várko de Tarsis+ ogueru ha ogueraha ojoapykueripa ne merkaderiakuéra.
Upévare pe mar mbytépe ereko vaʼekue hetaiterei mbaʼerepy* ha nerenyhẽte vaʼekue.
26 Umi kuimbaʼe orremáva ndegueraha pe mar ipochyveha gotyo.
Pe yvytu oúva ésteguio ojapo nderehe sarambi ha nerundi pe mar mbytépe.
27 Umi rrikésa, umi mbaʼerepy reguerekóva, ne merkaderiakuéra, umi ne marinéro, umi omaneháva nde varkokuéra,umi kuimbaʼe ombotýva umi madéra ojoapyhápe ani hag̃ua oike y pe várkope, umi onegosiáva ndéve ne merkaderiakuéra,+ ha enterove umi nde gerrerokuéra,+kompletoite umi hénte* oĩ vaʼekue nde territóriope,enterove haʼekuéra ohóta pe mar ruguápe upe reñehundiha díape.+
28 Osapukái vove umi omaneháva nde varkokuéra, oryryipáta pe yvy oĩva mar oríllare.
29 Enterove umi orremáva, umi marinerokuéra ha umi omaneháva umi varkokuéra,oguejýta ivarkokuéragui ha oñemboʼýta pe yvýpe.
30 Haʼekuéra osapukáita ha ojaheʼo asýta nderehe,+ha upe aja omoĩta hikuái yvykuʼi iñakã arikuéra ha ojapajeréita pe tanimbúpe.
31 Oñemoakã perõta* ha omondéta umi ao ohechaukáva oñembyasyha.
Haʼekuéra hasẽ soróta* ha ojaheʼo asýta nderehe.
32 Oñembyasyetereígui opurahéita hikuái peteĩ músika jaheʼo, ha oñembyasýta nderehe heʼívo:
‘¿Máva piko ojogua Tírope, koʼág̃a okirirĩva hína pe mar mbytépe?+
33 Og̃uahẽ jave ndéve umi mbaʼerepy pe mar mbytégui, nde rembovyʼa vaʼekue heta héntepe.+
Umi rrikesaita reguerekóva ha ne merkaderiakuéra omborríko vaʼekue umi rréi ko yvy ariguápe.+
34 Koʼág̃a reñehundi pe mar mbytépe ha reho pe y ruguápe.+
Ha kompletoite umi ne merkadería ha nde puévlo oho pe y ruguápe nendive.+
35 Enterove umi hénte oikóva umi íslare ijurujáita omañávo nderehe,+ha umi irreikuéra oryrýita okyhyjégui,+ ha hovakuérare ojekuaáta ojepyʼapyha.
36 Umi komersiánte oĩva umi tetãnguéra apytépe oñakãmbovaváta* ohechávo umi mbaʼe oikóva nderehe.
Nde ningo derrepentete reñehundíta ha ivaietereíta voi upéva.
Ha redesapareséta pára siémpre’”’”.+
Nóta
^ Térã: “mástil”.
^ Hebréope: “rróvle”.
^ Térã: “próa”.
^ Hebréope: “kuimbaʼe ijedáva”.
^ Hebréope: “umi évano”.
^ Koʼápe oñeñeʼẽ hína umi korál rehe.
^ Térã: “rruvi”.
^ Térã: “aséite valsámiko”.
^ Térã: “lána gris pytãngýva”.
^ Térã: “téla ojetehe vaʼekue”.
^ Térã: “nde plásape”.
^ Ikatu avei: “reñembotuichaiterei vaʼekue”.
^ Hebréope: “kongregasión”.
^ Upéva heʼise haʼekuéra voi oñemoakã perõha ohechauka hag̃ua oñembyasy ha oñemotĩha.
^ Térã: “oñembyasýta hiʼálma ruguaite guive”.
^ Hebréope: “oturuñeʼẽta”.
