Ezequiel 8:1-18
8 Pe sexto* áñope, pe día 5, pe sexto méspe, che aguapy hína kuri che rógape, ha umi kuimbaʼe omoakãva* Judápe oguapy che renondépe. Upe jave Ñandejára Jehová ogovernáva opa mbaʼe oñakarama cherehe.
2 Ha amañávo ahecha peteĩ persóna ojoguáva tatápe, ha ikuʼágui yvy gotyo ahecha peteĩ mbaʼe ojoguáva tatápe,+ ha ikuʼágui yvate gotyo ahecha peteĩ mbaʼe overáva ojoguáva pláta ha óro oñembojeheʼa vaʼekuépe.*+
3 Upéi haʼe oipyso peteĩ mbaʼe haʼetéva peteĩ po ha chejagarra che akãranguégui, ha peteĩ espíritu* cherupi pe yvýgui yvate ha chegueru Jerusalénpe, peteĩ visión rupive Ñandejára ohechauka chéve upéva. Chegueru oĩháme pe okẽ hyepypegua,+ omañáva nórte gotyo pe témplogui, oĩháme pe taʼanga* ombopochýva Ñandejárape.+
4 Ha Israel Jára podér omimbipa hína kuri upépe,+ ahecha haguéicha pe ñu guasúpe.+
5 Upéi haʼe heʼi chéve: “Yvypóra raʼy, emañamína nórte gotyo”. Upémarõ amaña nórte gotyo, oĩháme pe altár entráda nortepegua, ha upépe ahecha pe taʼanga* ombopochýva Ñandejárape, pe entrádape.
6 Haʼe heʼi chéve: “Yvypóra raʼy, ¿rehecha piko umi mbaʼe vai, umi mbaʼe oporombojeguarúva ojapóva koʼápe Israel rogaygua?+ Umi mbaʼe ningo chemomombyry ko che lugár sagrádogui.+ Péro rehecháta heta mbaʼe oporombojeguarúva ha ivaivéva koʼãvagui”.
7 Upéi chegueru pe korapy entrádape, ha amañávo ahecha peteĩ kuára oĩva pe parére.
8 Haʼe heʼi chéve: “Yvypóra raʼy, embotuichave pe kuára oĩva pe parére”. Upémarõ ambotuichave pe kuára oĩva pe parére, ha ahecha peteĩ entráda.
9 Haʼe heʼi chéve: “Eike ha ehecha umi mbaʼe vai, umi mbaʼe oporombojeguarúva ojapóva hikuái koʼápe”.
10 Upémarõ aike ha ahecha opaichagua animál otyryrýva* raʼanga ha opaichagua animál salváhe oporombojeguarúva raʼanga,+ ha umi dios puerkésa* raʼanga orekóva Israel rogaygua.+ Entéro koʼãva raʼanga ojetalla pe parére, pe ijerére kompletoite.
11 Ha 70 kuimbaʼe omoakãva Israel rogayguápe oñemboʼy hína henondepekuéra, ha ijapytepekuéra oñemboʼy Jaazanías, haʼéva Safán+ raʼy. Káda uno oreko ipópe pe mbaʼyru ojehapyha insiénso, ha pe insiénso ratatĩ hyakuã asýva ojupi ohóvo yvate.+
12 Ha Ñandejára heʼi chéve: “Yvypóra raʼy, ¿nde piko rehecha hína umi mbaʼe ojapóva pytũmbýpe umi kuimbaʼe omoakãva Israel rogayguápe, káda uno umi koty hyepypegua oĩháme umi idiós raʼanga? Pórke haʼekuéra heʼi hína: ‘Jehová nañanderechái. Jehová ohejáma ko yvy’”.+
13 Haʼe heʼi avei chéve: “Rehecháta heta mbaʼe oporombojeguarúva ha ivaivéva koʼãvagui ojapóva hína hikuái”.
14 Upémarõ chegueraha pe entrádape, oĩháme pe okẽ nórte gotyogua Jehová rógape. Ha upépe ahecha umi kuña oguapýva hasẽ hína pe dios Tamuz rehe.
15 Haʼe heʼi avei chéve: “¿Rehechápa koʼã mbaʼe yvypóra raʼy? Rehecháta heta mbaʼe ivaivéva koʼã mbaʼégui”.+
16 Upémarõ chegueraha Jehová róga korapy ryepýpe,+ oĩva Jehová témplo entráda ha pe altár mbytépe. Upépe oĩ amo 25 kuimbaʼérupi oñemolómova Jehová témplore ha omañáva éste gotyo, haʼekuéra oñesũ hína éste gotyo pe kuarahýpe.+
17 Haʼe heʼi chéve: “Yvypóra raʼy, ¿rehechápa ko mbaʼe? ¿Judá rogayguápe g̃uarã piko vyrorei mbaʼe la ojapo koʼã mbaʼe oporombojeguarúva? ¿Omyenyhẽ vaʼerã piko avei ko yvy violénsiagui+ ha osegi chembopochy? ¡Emañami! Koʼápe omoinge hína hikuái che tĩnguápe pe mbaʼe oporombojeguarúva.*
18 Upévare rreniégo reheve ajapóta la ajapo vaʼerã, nambyasymoʼãi ni ndaiporiahuverekomoʼãi chupekuéra.+ Ni osapukái hatãvéramo jepe chéve hikuái che apysápe, nahendumoʼãi chupekuéra”.+
Nóta
^ Upéva hína pe sexto áño ojegueraha hague hetãgui rréi Joaquín, Ezequiel ha umi ótro judíope.
^ Hebréope: “ansianokuéra”.
^ Térã: “eléktro”.
^ Pe ñeʼẽ espíritu ikatu hína heʼise peteĩ ánhel térã Ñandejára espíritu.
^ Térã: “símbolo”.
^ Térã: “símbolo”.
^ Koʼápe oike avei hína opaichagua vichoʼi.
^ Hebréope ojepuru peteĩ ñeʼẽ heʼiséva “animál rekaka”, ha ojepuru ojeapoʼi hag̃ua ótrope.
^ Hebréope: “pe yvyra rakã térã trónko”. Amalisia upéva peteĩ póste ojepurúva ojeadora hag̃ua umi dios fálsope.
