Job 32:1-22
32 Upéi koʼã mbohapy kuimbaʼe noñehaʼãvéi okontesta Jóbpe, pórke haʼe oĩ konvensído ihustoha.+
2 Upémarõ Elihú ipochyeterei. Haʼe ningo Barakel raʼy, pe buzita,+ haʼéva Ram familiare. Elihú orrenegaiterei pórke Job ohechaukase ihustoveha Ñandejáragui.+
3 Haʼe ipochyeterei avei umi mbohapy Job amígore, pórke vyrorei la heʼíva hikuái ha heʼi voi Ñandejára iñañaha.+
4 Elihú ohaʼarõ oñeʼẽ hag̃ua pórke haʼe imitãve chuguikuéra.+
5 Péro ohechakuaávo umi mbohapy kuimbaʼe ndorekoveimaha mbaʼeve heʼi vaʼerã, ipochyvéntema.
6 Upémarõ Elihú, Barakel raʼy, oñepyrũ oñeʼẽ ha heʼi:
“Che ningo chemitã,ha peẽ pendeedave chehegui.+
Ha porrespeta rupi ahendu porã raẽ la pejéva,+ha nañanimái kuri haʼe peẽme la aikuaáva.
7 Che apensa: ‘Toñeʼẽ umi ijedavéva,haʼekuéra ningo oikuaavéma hetave mbaʼe ha iñarandu’.
8 Péro añetehápe pe espíritu sánto hína la ñanepytyvõva ñanearandu hag̃ua,Ñandejára Todopoderóso espíritu la ñanembokatupyrýva.+
9 Ndahaʼéi ningo ñandeeda haguérente ñanearandútamava,ha ndahaʼéi umi ijedáva añónte oikuaáva mbaʼépa oĩ porã.+
10 Upévare che haʼe: ‘Aipota koʼág̃a pejapysakami cherehe,che haʼéta avei la aikuaáva’.
11 Che ningo ahaʼarõ peẽ peñeʼẽmba raẽ,ha ajapysaka porã la pejévare,+akirirĩnte peẽ pekalkula aja mbaʼépa pejéta.+
12 Añatende porã kuri káda únore,ha apilla ni peteĩva ndaikatuiha pehechauka Job ojekivokaha,ni pehechauka japuha la haʼe heʼíva.
13 Upévare, ani peiko peje: ‘Ore orearandu voi,Ñandejára ningo la ombohováiva chupe, ndahaʼéi peteĩ persóna’.
14 Job ningo noñeʼẽi che kóntrape,upévare ndaʼemoʼãi chupe umi mbaʼe peẽ pejéma vaʼekue.
15 Koʼág̃a ni peteĩva noñanimavéima heʼi mbaʼeve okyhyjégui,ndorekovéima mbaʼevete heʼi vaʼerã.
16 Che ahaʼarõ kuri, péro upéi okirirĩma hikuái,oñemboʼýntema upépe ha ndeʼivéima mbaʼevete.
17 Upévare, che haʼéta avei la aikuaáva,ha amombeʼúta la apensáva.
18 Hetaiterei mbaʼe oĩ haʼeséva,Ñandejára espíritu chemomýi añeʼẽ hag̃ua.
19 Naaguantavéima ningo, añeʼẽsetereíma,ndaʼéiramo mbaʼeve, che korasõ okapúta.*+
20 Pehejána tañeʼẽmi, péichamante añetrankilisáta,che koʼág̃a arrespondéta.
21 Che nasẽmoʼãi avave favórpe,+ni ndaikomoʼãi ambojuruheʼẽ avavépe.
22 Añetehápe che ndaikói añemoĩ porãse avavéndi,pórke ajapórire péicha, ymáma Ñandejára cherundíma vaʼerãmoʼã”.
Nóta
^ Hebréope: “Che ryekue ojogua víno ndojehejáivape orrespira, haʼete umi víno ryru pyahu okapu potaitémava”.
