JESÚS oñeʼẽ meme vaʼekue pe ñemboʼére. Haʼe oĩha tiémpope ko yvy ape ári, umi líder rrelihióso judio oñemboʼémi vaʼerã “umi kálle prinsipál eskínare”. Haʼekuéra oipota umi hénte ohecharamo chupekuéra ha oipota avei ojeʼe hesekuéra irrelihiosoitereiha, upévare oñemboʼe jave hikuái orrepeti jey jey la heʼíva ha ombopuku iñemboʼekuéra oimoʼãgui péicha Ñandejára ohendutaha chupekuéra (Mateo 6:5-8). Jesús ohechauka porãiterei vaʼekue koʼã mbaʼe vyroreiha, péicha oipytyvõ umi ipyʼaporãvape oikuaa hag̃ua mbaʼépa ndojapói vaʼerã oñemboʼe jave. Péro haʼe ndahaʼéi omboʼénteva mbaʼépa ndajajapói vaʼerã ñañemboʼe jave.

Jesús heʼi vaʼekue ñañemboʼe jave jahechauka vaʼerãha jaipotaha toñembotuicha Jehová réra, tou irréino ha tojejapo ivolunta. Avei heʼi ñanemboʼe jave ikatuha ñamombeʼu Ñandejárape umi mbaʼe jahasáva ñande rekovépe (Mateo 6:9-13; Lucas 11:2-4). Haʼe ojevale kuri avei umi ehémplore ohechauka hag̃ua ke jaipotáramo Jehová ñanerendu, tekotevẽha jajerovia, ñaneumilde ha ñañemboʼe meme chupe (Lucas 11:5-13; 18:1-14). Haʼe ndahaʼéi omboʼénteva koʼã mbaʼe, síno ohechauka umíva iñehémplo rupive (Mateo 14:23; Marcos 1:35).

Umi mbaʼe omyesakã vaʼekue Jesús tuichaiterei oipytyvõ kuri idisipulokuérape oñemboʼe porãve hag̃ua. Jesús ohaʼarõ kuri pe pyhare omano mboyvemi omboʼe hag̃ua idisipulokuérape pe leksión iñimportantevéva pe ñemboʼégui.

Upe pyhare pukukue Jesús omokyreʼỹ ijapostolkuérape, upépe haʼe oaprovecha kuri ha omombeʼu chupekuéra peteĩ mbaʼe ipyahúva, haʼe heʼi: “Che hína pe tape, pe añetegua ha pe oporomoingovéva. Che rupive añoite ikatu oñeg̃uahẽ pe Túa rendápe”. Upéi Jesús opromete chupekuéra peteĩ mbaʼe, ha heʼi: “Oimeraẽ mbaʼe pejeruréva che rérape, ameʼẽta peẽme, péicha ajapóta pe Taʼýra ombotuicha hag̃ua pe Túape. Pejeruréramo oimeraẽ mbaʼe che rérape, ameʼẽta peẽme”. Ha upéi heʼive chupekuéra: “Koʼág̃a peve peẽ ndapejeruréi mbaʼevete che rérape. Pejerure ha oñemeʼẽta peẽme, péicha pevyʼaitereíta” (Juan 14:6, 13, 14; 16:24).

Ajépa tuichaite mbaʼe la heʼíva chupekuéra. Peteĩ diksionário bíblico heʼi: “Upéva haʼe peteĩ kámbio tuichaitereíva jajapóva ñañemboʼe jave”. Péro péva ndeʼiséi Jesús omboʼe hague upe guive ñañemboʼetaha chupe Ñandejárape rangue, síno ohechauka haʼe haʼeha pe tape ñañemoag̃ui hag̃ua Jehováre.

Ñande ñaĩ segúro Ñandejára siémpre ohenduha umi ñemboʼe ojapóva umi oservíva chupe (1 Samuel 1:9-19; Salmo 65:2). Péro Ñandejára ojapo rire pe pákto Israel ndive, entéro umi oipotáva Jehová ohendu iñemboʼe orrekonose vaʼerã Israel haʼeha Ñandejára puévlo teete. Upe rire, Salomón tiémpope umi oipotáva Jehová ohendu iñemboʼe oho vaʼerã pe témplope ojapo hag̃ua isakrifísio (Deuteronomio 9:29; 2 Crónicas 6:32, 33). Upéicharamo jepe, koʼã mbaʼe ojejapo peteĩ tiempomírente. Oskrivi haguéicha apóstol Pablo, pe léi oñemeʼẽ vaʼekue umi israelítape ha umi sakrifísio ojejapóva pe témplope “ohechaukánte umi vendisión oútava, pe léi ndahaʼéi hína umi vendisión, síno ijoguahánte” (Hebreos 10:1, 2). Koʼã mbaʼe ningo haʼe peteĩ sómbra ohechaukánteva umi mbaʼe oikótava amo gotyove (Colosenses 2:17). Upévare pe áño 33 guive natekotevẽvéima ñaneñeʼẽrendu pe léi mosáikape ikatu hag̃uáicha jaiko Jehová amígoramo, upéva rangue tekotevẽ ñaneñeʼẽrendu Jesucrístope, pórke pe léi haʼe kuri peteĩ guía ñandegueraháva ñaneñeʼẽrendu hag̃ua chupe (Juan 15:14-16; Gálatas 3:24, 25).

Jesús haʼe pe tape iporãvéva jaguerekóva ñañemoag̃ui hag̃ua Jehováre, haʼe ningo haʼe peteĩ amígo ñanepytyvõva ñañemoag̃ui hag̃ua Ñandejárare ikatu hag̃uáicha haʼe ohendu ha ombohovái ñane ñemboʼe. ¿Mbaʼéicha rupípa Jesús ikatu ojapo koʼã mbaʼe ñande rehehápe?

Enterovéva ñanase imperfékto ha ndaipóri mbaʼevete ikatúva jajapo ñakambia hag̃ua upéva. Ndajaguerekói avei pe derécho ñañemoag̃uívo Jehováre pórke haʼe ningo peteĩ Dios ipotĩva (Romanos 3:20, 24; Hebreos 1:3, 4). Jesús katu omeʼẽ hekove perfékto entéro yvyporakuéra rehehápe (Romanos 5:12, 18, 19). Upéicha rupi entéro umi ojeroviáva isakrifísiore ha oñemboʼéva hérape ikatu ‘oñemoag̃ui Ñandejárare kyhyjeʼỹre’ (Efesios 3:11, 12).

Ñañemboʼe jave Jesús rérape jahechauka jajeroviaha koʼã mbohapy mbaʼére: 1) Jesús haʼeha “Ñandejára Ovecha Raʼy”, ha isakrifísio rupive ikatuha oñeperdona ñande pekadokuéra. 2) Jehová omoingove jey rire Jesúspe, oiko chugui pe “súmo saserdóte” oñenkargáva ñanderupytypa hag̃ua umi venefísio oguerúva pe rreskáte. Ha 3) Jesús añoite haʼeha “pe tape” ñañemoag̃ui hag̃ua Jehováre ñane ñemboʼe rupive (Juan 1:29; 14:6; Hebreos 4:14, 15).

Ñañemboʼe jave Jesús rérape jahechauka ñamombaʼeha chupe, upéva ningo la Jehová oipotáva, upévare la bíbliape heʼi: ‘Jesús rérape oñesũta enterovéva, ha enterovéva ohechakuaáta Jesucristo haʼeha ñande Ruvicha, ha péicha oñemombaʼeguasúta Ñandejárape, haʼéva hína pe Túa’ (Filipenses 2:10, 11). Ha la iñimportanteveha, ñañemboʼe jave Jesús rérape ñambotuicha hína Jehovápe, haʼe ningo ontrega vaʼekue Itaʼýra rekove ñanderehehápe (Juan 3:16).

La bíbliape ojepuru heta téra ha título ñantende porã hag̃ua mbaʼeichaitépa iñimportánte la Jesús ojapóva. Umíva ñanepytyvõ ñamombaʼeve hag̃ua umi mbaʼe jahupytýva koʼág̃a ha jahupytýtava amo gotyove Jesús rupive. (Ehecha pe rrekuádro “ ¿Mbaʼéichapa oñehenói Jesúspe?”). Upéicharõ, Jesúspe oñemeʼẽ peteĩ “téra iporãvéva entéro umi ótro téragui”, a upéva ningo heʼise Ñandejára omoĩ hague ipoguýpe entéro mbaʼe oĩva yvágape ha ko yvy ape ári (Filipenses 2:9; Mateo 28:18).

Jehová ohendu hag̃ua ñane ñemboʼe jajapo vaʼerã upéva Jesús rérape (Juan 14:13, 14). Péro nahiʼãi jaipuru Jesús réra ñañemboʼe jave jajepokuaágui reínte. ¿Mbaʼérepa?

Epensamína ko ehémplore, ñamoĩ chupe ojeskrivi hague ndéve peteĩ kárta, ha opakuetévo pe persóna ojedespedi ndehegui heʼívo “maitei rory”. Oiméne repensa upéva heʼi hague ndéve ohechauka hag̃ua iñamavleseha nendive, ndahaʼéi katuete osẽva ikorasõgui. Upéicha avei ñañatende vaʼerã jaipurúvo Jesús réra ñañemboʼe jave ani hag̃ua jaipuru péva jajepokuaágui reínte. Ñande ningo ñañemboʼe vaʼerã “kontinuadoite”, upéicharõ jepe jajapo vaʼerã upéva ‘ñande pyʼaite guive’ (1 Tesalonicenses 5:17; Salmo 119:145).

¿Mbaʼépa ikatu jajapo pono jaipuru Jesús réra ñañemboʼe jave jajepokuaágui reínte? Upearã ikatu jajepyʼamongeta umi mbaʼe Jesús ojapómava ha ojapótavare amo gotyove ñanderehehápe. Ñañemboʼe jave Jehovápe ñambotuichákena avei chupe omeʼẽ haguére Itaʼýra Jesús ñanderehehápe. Péicha ikatúta ñaime segúro la Jesús heʼi vaʼekuére: “Pe Túa omeʼẽta peẽme oimeraẽ mbaʼe pejeruréva chupe che rérape” (Juan 16:23).