KAPÍTULO 13
Jesús disipulokuéra
¿Mávapa ko kuimbaʼe ha mbaʼéichapa oiko chugui Jesús disípulo?
¿MÁVAPA upe ojapo vaʼekue opaite mbaʼe Jehová heʼíva?... Upéicha, upéva haʼe Jesucristo. ¿Ha ikatúpa ñande avei ñaneñeʼẽrendu haʼéicha?... La Biblia heʼi Jesús ou hague ojapo heta mbaʼe porã, ikatu hag̃uáicha jajapo haʼe ojapo haguéicha. Ha haʼe oipota oiko ñandehegui idisípulo.
¿Mbaʼéichapa ikatu oiko ñandehegui Jesús disípulo?... Primeroite voi ñaaprende vaʼerã chugui. Péro ndahaʼéi upévante, tekotevẽ avei jaguerovia ha jajapo umi mbaʼe haʼe ñanemboʼéva.
Heta oĩ heʼíva ojeroviaha Jesúsre. Péro, ¿enterovépa hína Jesús disípulo?... Nahániri. Oĩ ohóva jepi tupaópe péro noñehaʼãi oaprende pe Mboʼehára Guasu omboʼe vaʼekue. Añetehápe Jesús disípulo hína umi ojapóva umi mbaʼe porã Jesús ojapo vaʼekue.
Jahechamína máva mávapa rakaʼe Jesús disípulo haʼe oĩrõ guare ko yvy ape ári. Peteĩva haʼe Felipe. Oikuaa rire Jesúspe, haʼe pyaʼe oho ohenói iñamígo Natanaélpe (hérava avei Bartolomé). Natanael oguapy hína peteĩ yvyramáta guýpe rehechaháicha ko divúhope. Upéi opuʼã oho Jesús rendápe ha og̃uahẽvo, Jesús heʼi: “Pemañami, peteĩ isrraelíta arakaʼeve noporombotavýiva”. Haʼe oñemondýi ha heʼi: “¿Nde piko mbaʼéicha chekuaa?”.
¿Máva mávapepa ohenói Jesús oiko hag̃ua chuguikuéra idisípulo?
Jesús ombohovái: “Felipe nerenói mboyve rohecha kuri pe ígo máta guýpe”. Natanael ohecharamoiterei upéva, ha heʼi chupe: “Nde hína Ñandejára Raʼy, nde hína pe Rréi Israelgua” (Juan 1:49).
Judas Iscariote, Judas (hérava avei Tadeo), Simón
Péro upe día mboyve oĩma vaʼekue ótro omoirũva Jesúspe. Umíva hína Andrés ha iñermáno Pedro; Juan ha amalisia peteĩ iñermáno hérava Santiago (Juan 1:35-51). Péro upéi haʼekuéra oheja Jesúspe, ha oho jey ombaʼapo péskape. Peteĩ ára, Jesús oguata ohóvo mar de Galilea kóstare, ha ohecha Andrés ha Pedro oityha irréd márpe opeska hag̃ua. Upérõ heʼi chupekuéra: “Peju chemoirũ”.
Santiago (Alfeo raʼy), Tomás, Mateo
Ohomiévo, Jesús ohecha Santiago ha Juánpe. Haʼekuéra oĩ itúvandi peteĩ kanóape ha orremenda umi rred. Haʼe heʼi chupekuéra oho hag̃ua avei hendive. ¿Mbaʼépa nde rejapo vaʼerãmoʼã Jesús nerenóirire? ¿Rehónepa hendive upepete voi?... Haʼekuéra oikuaa vaʼekue Ñandejára ombou hague Jesúspe. Upévare upepete oheja hembiapo ha omoirũ chupe (Mateo 4:18-22).
Natanael, Felipe, Juan
Oiko rire chuguikuéra Jesús disípulo, ¿ojapópa iporãva meménte ha ndojavyvéima mbaʼevetépe? Nahániri. Oiméne nemanduʼa ojodiskuti hague hikuái ohecha hag̃ua mávapa iñimportanteve ijapytepekuéra. Péro haʼekuéra ohendu Jesúspe ha oñehaʼã okambia. Ñande avei ñañehaʼãramo ñakambia oikóta ñandehegui Jesús disípulo.
Santiago (Juan ermáno), Andrés, Pedro
Jesús heʼi opaichagua héntepe oiko hag̃ua chugui idisípulo. Peteĩ jey, oho hendápe peteĩ mitãrusu ipláta heta ha tuicha omandáva, ha oporandu Jesúspe mbaʼépa ojapo vaʼerã ohupyty hag̃ua jeikove opaveʼỹva. Avei heʼi imitã guive ojapoha umi mbaʼe Ñandejára omandáva. Upémarõ Jesús heʼi chupe: “Eju chemoirũ”. ¿Ndépa reikuaa mbaʼépa oiko upe rire?...
Pe mitãrusu ombyasyeterei oikuaávo iñimportanteveha omoirũ Jesúspe, oiko rangue ombyaty plátante. Haʼe nomoirũi Jesúspe ohayhuvégui umi mbaʼe orekóva Ñandejárape rangue (Lucas 18:18-25).
Jesús opredika un áño seis méserupi, ha upéi oiporavo doce kuimbaʼépe idisipulokuéra apytégui oiko hag̃ua chuguikuéra ijapóstol. Koʼã kuimbaʼépe oñemeʼẽ peteĩ tembiapo iñimportánteva. ¿Ndépa reikuaa mbaʼéichapa héra hikuái?... Iporãitéta ningo reaprendéramo. Emañamína ko divúhore ha eleemi herakuéra. Upéi eñehaʼã ere de memória.
¿Mávapa koʼã kuña oipytyvõ vaʼekue Jesúspe oho jave opredika?
Peteĩva héra Judas Iscariote, péro tiémpo rire ou iñaña ha ótro disípulo opyta hendaguépe. ¿Ndépa reikuaa mávapa?... Héra Matías. Upe rire, mokõi kuimbaʼégui oiko avei Jesús apóstol, haʼekuéra hína Pablo ha Bernabé, péro koʼãva noĩri umi doce apytépe (Hechos 1:23-26; 14:14).
Jahecha haguéicha kapítulo 1-pe, Jesús ovyʼa vaʼekue umi mitã ndive ha omboʼe chupekuéra. ¿Mbaʼérepa?... Oikuaa rupi umi mitãgui ikatuha avei oiko idisípulo. Heta vése umi kakuaa ohenduseve voi peteĩ mitã oñeʼẽramo chupekuéra Jesúsre ha oaprendese chugui.
Oĩ vaʼekue avei heta kuña ojeroviáva Jesús rehe. Umíva apytépe oĩ María Magdalena, Juana ha Susana. Haʼekuéra omoirũ vaʼekue Jesúspe oho jave opredika ótro puévlope. Oiméne koʼã kuña oipytyvõ Jesúspe, ojohéi chupe ijao térã ojapo hembiʼurã (Lucas 8:1-3).
¿Reipotápa oiko ndehegui Jesús disípulo?... Nemanduʼákena ndovaleiha erénte rejeroviaha Jesúsre. Tekotevẽ rejapo haʼe oipotáva reime reimehápe. Ndahaʼéi rejeporta porãtava rreunionhápe añónte. ¿Moõpa ikatu rejeporta porã avei?...
Upéicha. Rejeporta porã vaʼerã nde rógape térã eskuélape. Aníke nderesarái: oiko hag̃ua ndehegui Jesús disípulo rejapo vaʼerã káda día umi mbaʼe porã haʼe ojapo vaʼekue, tahaʼe haʼehápe.
¿Moõpa rehechauka vaʼerã nde haʼeha Jesús disípulo?
Jaleemi mbaʼépa heʼi la Biblia Jesús disipulokuérare: Mateo 28:19, 20; Lucas 6:13-16; Juan 8:31, 32 ha 1 Pedro 2:21.
Koʼã téma ikatu ndegusta avei
JESÚS OHECHAUKA PE TAPE, OMBOʼE PE AÑETEGUA, OMEʼẼ JEIKOVE
Mbaʼe rresponsavilidápa oreko Jesús disipulokuéra
Jesús disipulokuéra oreko peteĩ rresponsavilida tuicháva. Jesús omyesakã porã mbaʼépa hína upéva, ha oĩ heta oñesorprendéva ohendúvo haʼe heʼíva.
JESÚS OHECHAUKA PE TAPE, OMBOʼE PE AÑETEGUA, OMEʼẼ JEIKOVE
Jesús oñepyrũ oiporavo idisipulokuerarã
¿Mbaʼépa okonvense umi 6 disípulope Jesús haʼeha pe Mesías?
