¿REHENDÚMAPA oñeñeʼẽha jepi fin del múndore?... Koʼág̃arupi heta mbaʼe ojeʼe ko mbaʼére. Oĩ heʼíva pe fin del múndope oikotaha peteĩ gérra ha ojeporutaha umi bomba atómica. ¿Ohejánepa Ñandejára umi hénte ohundi ñande yvy porãite? ¿Ndépa mbaʼé repensa?...

La Biblia ningo oñeʼẽ pe fin del múndore. Por ehémplo heʼi: “Ko múndo [...] ohasa ohóvo” (1 Juan 2:17). ¿Heʼisépa upéva ko yvy oñehunditaha?... La Biblia ndeʼíri upéva. Ohechauka guei Ñandejára ojapo hague ko yvy  yvypóra ‘oiko hag̃ua pype’ vyʼápe (Isaías 45:18). Salmo 37:29-pe heʼi: ‘Hekojojávape opytáne ko yvy ha upépe haʼekuéra oikóta opa árare’. Upévare heta vése la Biblia heʼi ko yvy opytataha opa ára g̃uarã (Salmo 104:5; Eclesiastés 1:4).

Ko yvy noñehundimoʼãirõ pe fin del múndope, ¿mbaʼépa upéicharõ la oñehundítava?... Jaikuaa hag̃ua upéva, jahechamíta mbaʼépa oiko vaʼekue yma Noé tiémpope. La Biblia heʼi: “[Ñandejára] noponderái avei pe múndo yma guarére, síno okastiga chupekuéra”.

¿Oĩpa rakaʼe ojesalváva oúrõ guare pe ama guasu Noé tiémpope?... La Biblia heʼive: “[Ñandejára] oguerúrõ guare pe ama guasu umi hénte aña ári, osalva Noépe, haʼe ningo peteĩ kuimbaʼe opredikáva umi mbaʼe hekopeguáva, ha hendive osalva avei siete tapichápe” (2 Pedro 2:5).

Upéicharõ, la Biblia heʼi Ñandejára ‘noponderái hague pe múndore’, péro ¿mbaʼépa la oñehundi vaʼekue? ¿Ko yvy térã umi hénte aña?... Pe téxto heʼi oñehundi hague “umi hénte aña”, térã umi hembiapo vaíva. Ñandejára Ñeʼẽ heʼi avei Noé ‘opredika’ hague. ¿Mbaʼépa nde ere Noé opredika hague?... Heʼi umi héntepe oñehunditaha umi hembiapo vaíva.

Peteĩ jey, Jesús omombeʼu idisipulokuérape mbaʼépa ojapo vaʼekue umi hénte ou mboyvemi pe ama guasu. Haʼe heʼi: “Upe tiémpope, pe ama guasu mboyve umi hénte okaru ha omboyʼu; kuimbaʼe ha kuñanguéra omendajoa, Noé oike peve pe árkape. Haʼekuéra nopenái mbaʼevére ha upéi ou pe ama guasu ha ohundipaite chupekuéra”. Upe rire, Jesús heʼi heta hénte upéicha oikotaha avei ko ñane tiémpope ou mboyve pe fin (Mateo 24:37-39).

 Ñande ikatu ñaaprende peteĩ mbaʼe Jesús heʼi vaʼekuégui. Kapítulo 10-pe jahecháma kuri mbaʼéichapa oiko umi hénte Noé tiémpope guare. ¿Nemanduʼápa?... Oĩ voi umi iñaña ha otrata vaietereíva hapichápe. Ha Jesús heʼi haguéicha oĩ avei umi nopenáiva Noé heʼívare.

Upéinte, peteĩ árape Jehová heʼi Noépe omboutaha peteĩ ama guasu ohundi hag̃ua umi héntepe. Oavisa chupe tuichaiterei okytaha, ha umi sérro ijyvatevéva jepe opytapataha y guýpe. Jehová omanda Noépe ojapo hag̃ua peteĩ árka guasu. Upéva ojogua peteĩ káha puku tuichaitereívape, rehechaháicha pe divúho oĩva páhina 238-pe.

Ñandejára heʼi upe árka tuicha vaʼerãha ikatu hag̃uáicha oike pype Noé, ifamília ha heta mymba. Péicha nomanomoʼãi hikuái pe ama guasúpe. Noé ha ifamília heta ombaʼapo vaʼekue, oity umi yvyramáta tuichaicháva ha umívagui ojapo pe árka. Tuichaiterei rupi pe árka heta áñore oñembaʼapo hese.

¿Nemanduʼápa mbaʼépa Noé ojapo vaʼekue avei upe tiémpope?... Opredika umi héntepe ikatu hag̃uáicha oikuaa hikuái outaha pe ama guasu. ¿Openápa hese hikuái? Ifamília añoite opena hese. Umi ótrope ndoúi ni ndohói Noé heʼíva. ¿Nemanduʼápa mbaʼépa ojapo vaʼekue hikuái?... Okaru, omboyʼu, kuimbaʼe ha kuñanguéra omendajoa. Haʼekuéra opensa ojapo porãha opa mbaʼe ha ni noñemotiémpoi ohendu hag̃ua Noépe. Jahechamína mbaʼépa oiko upéi hesekuéra.

Noé ha ifamília oike pe árkape ha Jehová omboty la okẽ. Umi hénte katu ndogueroviáiti outaha peteĩ ama guasu. Upeichaháguinte oñepyrũ oky, ha ndahaʼéi jepiveguáicha síno oky charara voi. Sapyʼaitérõ g̃uarã pe y henyhẽma opárupi, oitypa umi yvyramáta  guasu guasu ha umi ita tuichavéva jepe orahapa henonderã. ¿Mbaʼépa oiko umi ndoikéivagui pe árkape?... Jesús heʼi: “Ou pe ama guasu ha ohundipaite chupekuéra”. Omanombaite hikuái. ¿Mbaʼérepa?... Heʼi haguéicha Jesús, “haʼekuéra nopenái mbaʼevére”. Ojeavisa porã chupekuéra péro nohenduséi (Mateo 24:39; Génesis 6:5-7).

Oiméne nemanduʼa Jesús heʼi hague ikatuha ñaaprende peteĩ mbaʼe upe oiko vaʼekuégui. ¿Mbaʼépa ikatu ñaaprende?... Umi hénte ningo nomanói iñaña haguérente. Síno nomboykéi rupi avei ni michĩmi itiémpo oñemoag̃ui hag̃ua Ñandejárare ha oikuaa hag̃ua haʼe ojapótava. Ñande avei ñañatende vaʼerã pono oiko ñanderehe upéva, ¿ajépa?...

¿Ndépa ere Ñandejára ohundi jeytaha ko múndo peteĩ ama guasu rupive?... Haʼe opromete vaʼekue ndojapomoʼãveimaha upéva. Heʼi vaʼekue: “Amoĩ che árko íris pe araíre ha upévata hína peteĩ señál”. Jehová heʼi pe árko íris ohechaukaha ‘arakaʼeve nomboumoʼãveimaha peteĩ ama guasu ohundi hag̃ua umi héntepe’ (Génesis 9:11-17, NM).

Upéicharõ ikatu jajerovia Ñandejára arakaʼeve nohundimoʼãveimaha ko múndope peteĩ ama guasu rupive. Péro jahecháma haguéicha, la Biblia heʼi ko múndo oñehunditaha. ¿Mávapa ojesalváta  upérõ?... ¿Ndépa ere ojesalvataha umi noaprendeséiva Ñandejára heʼíva ha nomboykéiva itiémpo ostudia hag̃ua la Biblia?...

Ñande ningo jaipota Ñandejára ñandesalva, ¿ajépa?... ¿Revyʼánepa nde ha ne hentekuéra pejesalvárõ Noé famíliaicha?... Péro jajesalva hag̃ua, ñantende raẽ vaʼerã mbaʼépa ojapóta Ñandejára ohundi hag̃ua ko múndo ha ogueru hag̃ua imúndo pyahu. Jahechamína upéva.

La Biblia omombeʼu upéva Daniel, kapítulo 2, versíkulo 44-pe. Upépe oñeñeʼẽ oikótavare ñane tiémpope, ha heʼi: ‘Oisãmbyhy aja koʼã mburuvicha, Ñandejára yvagapegua omoĩta peteĩ goviérno noñehundimoʼãiva arakaʼeve. Ndoʼamoʼãi avaveichagua tetã poguýpe. Ohundietéta guei opavave koʼã goviérno ha ndopamoʼãi arakaʼeve’.

¿Rentendépa mbaʼépa heʼise ko téxto?... La Biblia heʼi Ñandejára goviérno ohunditaha umi goviérno oĩva ko yvy ape ári. ¿Mbaʼérepa?... Naiñeʼẽrendúi rupi pe governánte Ñandejára voi oiporavo vaʼekuépe. ¿Mávapa upéva?... Jesucristo.

Jehová añoite la ikatúva odesidi mbaʼeichagua goviérnopa iporãvéta, ha oiporavóma Itaʼýra Jesúspe ogoverna hag̃ua. Koʼẽrõitéma haʼe ohundíta umi goviérno oĩva koʼág̃a. Apocalipsis kapítulo 19, versíkulo 11 guive 16 peve heʼi mbaʼéichapa oikóta upéva. Ko téxto nepytyvõta avei rentendeve hag̃ua pe divúho oĩva páhina 243-pe. La Biblia heʼi pe gérra Jehová ohunditahápe umi goviérno oĩva ko yvy ape ári heraha Armagedón.

Ñandejára heʼíma ohunditaha umi goviérnope, péro ¿ojerurépa ñandéve ñaipytyvõ hag̃ua chupe?... Nahániri, la Biblia heʼi Armagedón haʼeha ‘Ñandejára Ipuʼakapáva ñorairõ’ (Apocalipsis  16:14, 16). Upéicharõ, Armagedón hína Ñandejára gérra, ha haʼe ojevaléta Jesucristo rehe omoakã hag̃ua umi ánhel oñorairõtava upépe. ¿Heta piko ofalta gueteri oñepyrũ hag̃ua ko ñorairõ? Jahechamína upéva pe ótro kapítulope.