Satanás ha idemoniokuéra ndoipotái jaservi Ñandejárape. Oñehaʼã oipeʼa opavave tapichápe Ñandejáragui. Mbaʼéichapa ojapo upéva? Peteĩ mbaʼe oiporúva haʼe pe religión falsa (2 Corintios 11:13-15). Peteĩ religión ijapu nomboʼéirõ pe añetegua oĩva Bíbliape. Religión falsa ojogua pe pirapire guaʼúpe: haʼete iporãva pero ndovaléi mbaʼeverã. Ivaive hag̃ua, ikatu omeʼẽ ñandéve heta akãrasy.

Japu oñemboʼéva religiónpe ndaikatúi ombovyʼa Jehovápe, Ñandejára añetegua. Oĩrõ guare Jesús ko Yvy ape ári, umi omoakãva religionkuéra ojukase chupe. Haʼekuéra oimoʼã pe adoración ojapóva oĩ hekópe porã. Heʼi hikuái: “Peteĩnte ore Ru, ha upéva Tupã”. Pero oimoʼãparaʼe Jesús upeichaha avei? Nahániri. Haʼe heʼi chupekuéra: “Pende ru niko aña” (Juan 8:41, 44). Ko árape, heta tapicha oimoʼã omeʼẽha adoración Ñandejárape, pero añetehápe ojapohína Satanás ha idemoniokuéra oipotáva (1 Corintios 10:20).

 Peteĩ yvyra máta itujúva ndahiʼaporãi, upéicha avei religión falsa omoheñói tapicha heko añáva. Ko mundo henyhẽ problémagui oúva mbaʼe vaígui ojapóva yvypóra. Oĩ tieʼỹ, ñorairõ, ñemonda, jejuka, violación ha heta mbaʼe ñandejopýva. Heta tapicha ojapóva koʼã mbaʼe oguereko irreligión, upevére ko religión ndojapokái chupekuéra iporãva. Ndaikatúi oiko chuguikuéra Ñandejára amigo ndohejáirõ umi hembiapo vai (Mateo 7:17, 18).

Religión falsa omboʼe tapichakuérape oñemboʼe hag̃ua taʼangápe. Ñandejára heʼi ñandéve ani hag̃ua ñañemboʼe taʼangápe. Kóva oĩ hekópe porã. Mbaʼépa jaʼéne oĩrõ peteĩ noñeʼẽiva ñanendive pero oñeʼẽva ñane raʼangápe? Ikatúnepa upeichagua jareko ñane amigorã? Nahániri, ndaikatumoʼãi. Jehová oipota tapichakuéra oñeʼẽ chupe, ani peteĩ taʼanga oikoveʼỹvape  (Éxodo 20: 4, 5).

Religión falsa omboʼe ikatuha ojejuka tapichakuérape guerrahápe. Jesús heʼivaʼekue Ñandejára amigokuéra ojoayhuvaʼerãha. Ndajajukái niko umi jahayhúvape (Juan 13:35). Iñañávape jepe naiporãi jajuka. Ohórõ guare Jesús enemigokuéra ojagarra hag̃ua chupe, haʼe ndohejái hemimboʼekuéra oñorairõ oprotege hag̃ua chupe (Mateo 26:​51, 52).

Religión falsa omboʼe umi iñañáva ohasa asytaha infiérnope. La Biblia katu omboʼe pecado opaha ñemanóme (Romanos 6:23). Jehová haʼe Ñandejára oporohayhúva. Ñanderapýnepa opa ára Ñandejára ñanderayhúrõ? Katuete ndojapomoʼãi upéva. Paraíso oútavape oĩta peteĩ religión añónte, pe religión Jehovápe iporãva (Revelación 15:4). Opavave religión oiporúva japu oúva Satanásgui oñehundipavaʼerã.