1, 2. a) ¿Mbaʼe iñimportántevapa heʼi vaʼekue Jesús ñanepytyvõva koʼág̃a peve? b) ¿Mbaʼépa ojejapo Ñandejára puévlo kóntrape, ha mbaʼépepa osẽ umíva?

 JESÚS oĩ Pilato renondépe, upe omandavéva umi hudío retãme. Upérõ Jesús heʼi: “Che Rréino ndahaʼéi ko mundopegua. Che Rréino haʼérire ko mundopegua che rembiguaikuéra oñorairõ vaʼerãmoʼã ani hag̃ua umi hudío chejagarra. Péro haʼéma haguéicha, che Rréino ndahaʼéi ko mundopegua” (Juan 18:36). Jesús heʼíva upérõ omboʼe peteĩ mbaʼe iñimportánteva koʼág̃a peve isegidorkuérape g̃uarã. Pilato omanda vaʼekue ojejuka hag̃ua Jesúspe péro haʼe ogana sapyʼaiténte, pórke tres día haguépe Jesús oikove jey. Umi governánte Romagua katu oñehaʼã ohundipa Cristo segidorkuérape, péro ndaikatúi vaʼekue. Jesús disipulokuéra osegi oikuaauka umi notísia porã oparupiete upe tiémpope (Col. 1:23).

² Pe Rréino oñepyrũ rire ogoverna yvágape, umi tetã orekóva ehérsito tuicháva ha heta árma gerrarã oñehaʼã ohundipa Ñandejára puévlope. Péro nosẽi la ijidéape. Umi goviérno oipota testigokuéra osẽ iládo oñorairõ jave ótro tetãndi, péro nokonsegíri upéva. Koʼág̃a oĩma haimete káda tetãme umi oñemoĩva Ñandejára Rréino poguýpe. Ñaiméramo jepe opárupi ko múndope, jaiko peteĩ ñeʼẽme ha ndajaikéi polítikape. Koʼã mbaʼe ojehupyty pe Rréino ogovernáma rupi ha ñande Ruvicha Jesucristo osegi haguére ñanemoakã, ñanerekomboʼe ha oñangareko ñanderehe. ¿Mbaʼéichapa ojapo upéva? Ñambohováivo ko porandu imbaretevéta ñande jerovia. Jahechamína unos kuánto káso oñegana vaʼekue umi trivunálpe. Rréi Jesucristo ningo la ñanepytyvõva ohecha rupi ‘ndajajeheʼaiha ko múndore’ (Juan 17:14).

3, 4. a) ¿Mbaʼépa oiko pe Rréino oñepyrũmíre ogoverna? b) ¿Ontende porãpa rakaʼe Ñandejára puévlo mbaʼépa heʼise nañañentremetéi polítikape ni umi gérrape? Emyesakã.

³ Pe Rréino oñepyrũmíre ogoverna, oiko peteĩ gérra yvágape ha ojeity Satanáspe ko yvy gotyo (elee Apocalipsis 12:7-10, 12). Ko yvy ape ári oiko peteĩ gérra ha Ñandejára  puévlo ohechauka vaʼerã ojeroviaha Jehováre. Umi ermáno ojedesidíma osegitaha Cristo ehémplo ha ndojeheʼamoʼãiha ko múndore. Péro ñepyrũrã haʼekuéra nontendeporãi mbaʼépa heʼise nañañentremetéi polítikape ni umi gérrape.

⁴ Por ehémplo La Aurora del Milenio, volumen seis a osẽ vaʼekue 1904-pe, omokyreʼỹ ermanokuérape ani hag̃ua oho gerrahápe. Pe lívro heʼi peteĩ ermánope ojeʼéramo toñepresenta soldadorã, haʼe oñehaʼã vaʼẽrãha oñemeʼẽ hag̃ua chupe ótro traváho natekotevẽmoʼãihápe oñorairõ. Péro noñepenáiramo hese ha oñemondo gerrahápe, pe ermáno oñatende vaʼerã ani hag̃ua ojuka avavépe. Herbert Senior oiko vaʼekue Gran Bretáñape ha ojevautisa 1905-pe, omombeʼu mbaʼéichapa la situasión upérõ: “Norontendéi vaʼekue mbaʼépa rojapóta ha ndojeʼeporãi oréve ovalépa roho roñepresenta soldadorã rojapo hag̃ua ótro tembiapo”.

 5. ¿Mbaʼépa oñepyrũ omyesakã porãve Ñemañaha de 1 de septiembre de 1915?

⁵ Rrevísta Ñemañaha de 1 de septiembre de 1915 oñepyrũ omyesakãve ko téma. Oñeʼẽ umi konsého osẽ vaʼekuére pe lívro Estudios de las Escritúraspe ha heʼi: “Roñeporandu roikóvo iporãpa peteĩ kristiáno oñepresenta soldadorã ndohomoʼãirõ jepe gerrahápe”. Ñamoĩ chupe peteĩ kristiánope ojeʼeha ojejukataha nomondeséirõ soldádo unifórme ha ndojaposéirõ servísio militár, ¿mbaʼépa ojapo vaʼerã? Pe rrevísta heʼi: “Mbaʼépa ivaivéta, ¿ñamano ñaneñeʼẽrendu haguére Jesucrístope ha nañamboykeséigui Ñandejára léi? Térã, ¿ñamano ñaĩ haguére guaʼu umi goviérno ládo? Ikuentave ñamano ñaneñeʼẽrendu rupi ñande Ruvicha yvagapeguápe”. Upéi oñemohuʼãvo pe artíkulo heʼi: “Ndoroʼéi avavépe ojapo vaʼerãha katuete péicha, síno romokyreʼỹnte enterovépe opensa hag̃ua ko mbaʼére”.

 6. ¿Mbaʼépa ñanemboʼe ermáno Herbert Senior ehémplo?

⁶ Upéi heta ermáno ontende porãma ko téma ha odesidíma iñeʼẽrendutaha Ñandejárape toiko la oikóva. Ermáno Herbert Senior heʼi: “Ahechakuaa vaʼekue romboguejýrõ várkogui umi vála ojeporútava gerrarã, ivainteha avei romoĩramoguáicha umi ármape rombokapu hag̃ua” (Luc. 16:10). Ko ermánope oñemondo kárselpe ndojaposéi rupi servísio militár. Haʼe ha cuatro ermáno oĩ kuri peteĩ kársel héravape Richmond (Gran Bretaña). Upépe oĩ vaʼekue préso heta kuimbaʼe ótro rrelihiongua ndohoséiva gerrahápe. Peteĩ jey ermáno Herbert umíape ñemihaitépe oñemondo gerrahápe Fránciape. Upépe oñekondena chupekuéra omano hag̃ua. Oñemoñemboʼy ermáno Herbert umíape una partída soldádo renondépe oĩmava ojapi hag̃uáicha chupekuéra. Péro ipahápe ndojejukái chupekuéra, upéva rangue oñekondena 10 áño de kárselpe.

 7. Oñepyrũrõ guare segunda gérra mundiál, ¿mbaʼépa hesakã porãma Ñandejára puévlope?

 ⁷ Oñepyrũrõ guare pe segunda gérra mundiál, Jehová puévlope hesakã porãma mbaʼépa heʼise noñemoĩri peteĩ goviérno ládo ha mbaʼépa ojapo vaʼerã osegi hag̃ua Jesús ehémplo (Mat. 26:51-53; Juan 17:14-16; 1 Ped. 2:21). Por ehémplo Ñemañaha 1 de noviembre de 1939-pe osẽ peteĩ artíkulo hérava “Neutralidad”. Upépe heʼi: “Ñandejára puévlo oreko peteĩ kompromíso hendive ha upévare ni mbaʼevéicharõ ndohói vaʼerã gerrahápe”. Ermáno Simon Kraker, upe rire ombaʼapo vaʼekue ofisína sentrálpe oĩva Broóklynpe (Nueva York), heʼi upe artíkulore: “Ahechakuaa umi tetã ojepreparáramo jepe gerrarã, Ñandejára siervokuéra oiko vaʼerãha pyʼaguapýpe enterovéndi”. Itiempoitépe og̃uahẽ upe informasión oipytyvõtava Ñandejára puévlope ogueropuʼaka hag̃ua umi mbaʼe oútava tenonderã. Upe rire ojepersegi vaipaite chupekuéra.

8, 9. ¿Mbaʼéichapa oñekumpli raʼe apóstol Juan heʼi vaʼekue?

⁸ Apóstol Juan heʼi vaʼekue Ñandejára Rréino oñepyrũ rire ogoverna 1914-pe, pe dragón haʼéva Satanás oñehaʼãtaha ohundi umi oĩvape pe Rréino poguýpe. Upearã opoíta  ijurúgui y peteĩ rríoicha ojukapa hag̃ua chupekuéra b (elee Apocalipsis 12:9, 15). ¿Mbaʼéichapa oñekumpli raʼe upéva? Áño 1920 guive heta oĩ oñepyrũva opersegi Ñandejára puévlope. Ermáno Kraker ha hetave ermáno oikóva Norteaméricape segunda gérra mundiál aja oho préso oñemoĩ rupi Ñandejára Rréino ykére. Pe gérra tiémpope, Estados Unídospe ojegueraha kárselpe hetaiterei ndohoséivape gerrahápe oaprende rupi irrelihiónpe upéva ivaiha. Umívagui a la mita rasa haʼe vaʼekue testígo de Jehová.

⁹ Satanás ha umi oĩva ipoguýpe ohundipase umi oñemoĩvape Ñandejára Rréino poguýpe, toiko oikohápe hikuái. Ojegueraha chupekuéra umi trivunálpe África, Estados Unidos ha Európape. Haʼekuéra ni mbaʼevéicharõ ndohoséi gerrahápe ha upévare hetápe ojegueraha kárselpe, oñembyepoti ha ojetrosa chugui ijyva térã hetyma. Alemániape heta oñembohasa asy Ñandejára puévlope ndohoséi rupi gerrahápe ha ndeʼiséi haguére “¡Heil Hitler!” (heʼiséva Hitler ñande salvadór). Ojeʼe oĩ hague 6 mil testígorupi umi kárselpe nasikuéra tiémpope. Ha oĩ 1.600 rasa ojejuka vaʼekue, umíva apytépe oĩ alemán ha ótro tetãygua. Péro Ñandejára ipoderóso rupi, osolusionambaitéta umi mbaʼe vai Satanás ojapo vaʼekue ipuévlore (Mar. 8:34, 35).

10. ¿Mbaʼépa orrepresenta “pe yvy”, ha mbaʼéichapa oipytyvõ Ñandejára puévlope?

¹⁰ Apóstol Juan ohai vaʼekue avei “pe yvy” omokõtaha “pe rrío” térã ojokotaha umi opersegívape Ñandejára puévlope. Pe yvy orrepresenta umi autorida oipytyvõva Ñandejára siervokuérape. Segunda gérra mundiál rire pyʼỹinte umi autorida osẽ umi testígo ládo (elee Apocalipsis 12:16). Por ehémplo, heta trivunál iñimportánteva odefende pe derécho orekóva testigokuéra odesidívo ndojapomoʼãiha servísio militár ha ndopartisipamoʼãiha umi fiésta patriótikape. Jahechami mbaʼéichapa Jehová oipytyvõ ipuévlope ogana hag̃ua umi trivunálpe, iprovlémarõ guare hikuái servísio militár káusare (Sal. 68:20).

11, 12. ¿Mbaʼépa ombohovái ermáno Sicurella ha Thlimmenos, ha mbaʼépa ojehupyty upe haguére?

¹¹ Estados Unidos. Anthony Sicurella tuvakuéra ningo testígo de Jehová. Ha haʼe ojevautisa orekópe 15 áño. Ombotýrõ guare 21 áño oho oñeanota Junta de Reclutamiéntope ha heʼi haʼeha minístro rrelihióso. Dos áño rire, áño 1950-pe ojerure ivaharã. Pe FBI heʼíramo jepe ndotopái hague ko mitãrusu ojapoha mbaʼeve ivaíva, pe Departamento de Justicia nomeʼẽi chupe la ojeruréva. Heta oiko rire trivunalháre, pe Tribunal Supremo osẽ ermáno Sicurella ládo ha heʼi ndovaleiha la odesidi vaʼekue pe ótro trivunál.  Ko ojedesidi vaʼekue ou porãiterei entéro oikóvape Estados Unídospe ha ndojaposéiva servísio militár.

¹² Grecia: Áño 1983-pe Iakovos Thlimménospe oñemondo kárselpe ndojaposéi haguére servísio militár. Ojepoi rire chugui oho oheka traváho ombaʼapo hag̃ua de kontadór, péro moõve ndojejagarrái chupe orekógui antesedénte penál. Oho umi trivunálpe péro upe tetãme operde ikáso, upémarõ omog̃uahẽ pe Tribunal Europeo de Derechos Humánospe. Áño 2000-pe, pe Gran Sala del Tribunal oĩhápe 17 hués, osẽ ko ermáno favórpe ha upe guive upe tetãme oñeñatendeve ani hag̃ua oñemboyke avavépe. Upe mboyve Gréciape oĩ vaʼekue mas de 3.500 ermáno orekóva antesedénte penál oho haguére kárselpe ndojaposéi haguére servísio militár. Upe rire Grecia onohẽ peteĩ léi heʼíva ojepeʼapa vaʼerãha umi antesedénte ha osẽ avei ótra léi heʼíva ikatuha ojejapo ótro tembiapo pe puévlo rehehápe ojeho rangue kuartélpe.

13, 14. ¿Mbaʼépa ñanemboʼe I. Stefanov ha Vahan Bayatyan ohasa vaʼekue?

¹³ Bulgaria. Áño 1994-pe ermáno I. Stefanóvpe oñehenói oñepresenta hag̃ua soldadorã. Upérõ haʼe oreko 19 áño ha heʼi ndohomoʼãiha kuartélpe ni ndojapomoʼãiha ambue tembiapo militarkuéra poguýpe. Oñekondena chupe oho hag̃ua kárselpe un áño imédio, péro ojerure ojehecha jey hag̃ua ikáso pe trivunálpe pórke oreko derécho odesidívo mbaʼépa ojapóta. Pe káso oñembohasa pe Tribunal Europeo de Derechos Humánospe. Áño 2001-pe ojerrevisa mboyve ko ermáno káso pe goviérno og̃uahẽ hendive peteĩ ñeʼẽme ojeheja rei hag̃ua chupe ikondéna. Péro ndahaʼéi chupénte, síno enterove umi oikóvape pe tetãme ha ojaposéva ótro traváho ojapo rangue servísio militár. c

¹⁴ Armenia. Áño 2001-pe ermáno Vahan Bayatyan ohupyty pe eda ojapo hag̃ua servísio militár. d Heʼi porãramo jepe mbaʼérepa ndaikatúi oho kuartélpe, entéro umi trivunál hetãygua osẽ ikóntrape. Oñekondena chupe oho hag̃ua kárselpe dos áño imédio ha septiembre de 2002-pe oho kárselpe. Péro osẽ diez mése imédio haguépe. Upémarõ ko ermáno ojerure pe Tribunal Europeo de Derechos Humanos ohecha hag̃ua la ikáso. Ha 27 de octubre de 2009, ko trivunál osẽ ikóntrape. Ko mbaʼe ojedesidíva haʼete ohejáva yvýre umi ermáno arméniope oĩva avei upe situasiónpe. Upe rire pe Gran Sala del Tribunal Europeo ohecha jey la ikáso ha 7 de julio de 2011 osẽ Vahan Bayatyan favórpe. Enterove ningo oreko derécho odesidívo mbaʼépa ogueroviáta, ojapóvo ikonsiénsia heʼíva chupe, ha oiporavóvo irrelihión. Ha upérõ primera ves pe trivunál ohechakuaa ojerrespeta  vaʼerãha oĩramo ndohoséiva kuartélpe irrelihión omboʼégui upéva oĩ vaiha. Ko desisión ou porã ndahaʼéi umi testígope añónte síno hetaiterei hénte oikóvape umi tetã oĩvape Consejo de Európape. e

15. ¿Mbaʼérepa Ñandejára puévlo ndopartisipái umi festého patriótikope?

¹⁵ Jehová puévlo oñemoĩ pe Rréino ykére, upévare ndojapói servísio militár ha avei nomombaʼeguasúi hetã ojejapo jave umi festého patriótiko. Pe segunda gérra mundiál guive umi hénte oparupigua oñepyrũ ifanatikove hetãre. Heta goviérno katu mbaretépe ojerure umi héntepe opromete hag̃ua oñemoĩtaha ipoguýpe ojapóvo peteĩ huraménto, opurahéivo ímno nasionál térã osaludávo vandéra. Péro ñande ñamombaʼeguasu vaʼerã Jehovápe añoite (Éx. 20:4, 5). Upéicha rupi hetaiterei ojepersegi ermanokuérape. Péro Jehová ojevale jey umi autorida rehe ombovevýi hag̃ua  ñandéve pe jehasa asy. Jahechamína mbaʼéichapa Jehová ñanepytyvõ Cristo rupive ñasẽ porã hag̃ua umi trivunálpe (Sal. 3:8).

16, 17. ¿Mbaʼépa ohasa raʼe Lilian ha Wiliam Gobitas, ha mbaʼépa ñaaprende upévagui?

¹⁶ Estados Unidos. Áño 1940-pe pe Tribunal Supremo osẽ testígo de Jehová kóntrape. Oĩ voi ocho hués ovotáva ikontrapekuéra ha peteĩnte osẽ ifavórpe. Pe káso héra Distrito escolar de Minersville contra Gobitis. Lilian Gobitas f orekóva 12 áño ha iñermáno Wiliam orekóva 10, iñeʼẽrenduse vaʼekue Jehovápe ha upévare ndosaludái pe vandéra ni ndojaposéi huraménto. Upéicha rupi oñemosẽ chupekuéra eskuélagui. Upe káso oñemog̃uahẽ Tribunal Suprémope, ha haʼekuéra heʼi oĩ porã hague pe eskuéla odesidi vaʼekue pórke upéicharõmante “pe tetã oĩta peteĩ ñeʼẽme”. Upeakuére opárupi hetaiteve umi opersegíva testigokuérape. Oñemosẽ heta mitãme eskuélagui, umi kakuaa katu oñemosẽ itravahohágui ha umi hénte ojagarra ombyepoti vaipa heta ermánope. Pe lívro hérava El brillo de nuestro país heʼi voi: “Áño 1941 guive 1943 peve ojepersegi vaieterei umi testígo de Jehovápe Estados Unídospe. Neʼĩrava peichaite peve ojepersegi peteĩ rrelihiónpe”.

¹⁷ Péro Ñandejára enemigokuéra sapyʼaiténte ogana. Áño 1943-pe pe Tribunal Supremo ohecha avei ótro káso ojoguáva Gobitis kásope. Péva héra La Junta Escolar del Estado de Virginia Occidental contra Barnette. Ko vuéltape osẽ testígo de Jehová ládo. Upérõ primera ves Estados Unídospe pe trivunál tuichavéva okambia pyaʼeterei peteĩ mbaʼe odesidi vaʼekue. Upe rire saʼivéma ojepersegi Jehová puévlope. Upéicha rupi Estados Unídospe ojerrespetavéma entéro derécho.

18, 19. ¿Mbaʼépa oipytyvõ Pablo Bárrospe osegi hag̃ua iñeʼẽrendu? ¿Mbaʼéichapa ikatu jasegi iñehémplo?

¹⁸ Argentina. Áño 1976-pe oñemosẽ vaʼekue eskuélagui Pablo ha Hugo Bárrospe, peteĩva orekórõ guare 8 áño ha pe ótro 7. Haʼekuéra oñemosẽ ndohupiséi haguére vandéra. Peteĩ jey pe direktóra omyaña Páblope ha oñakãpete chupe; avei oheja chupekuéra eskuélape una óra salída rire, jahecha péichapa ndopartisipái umi fiésta patriótikape. Pablo imanduʼa mbaʼeichaitépa ohasa asy hikuái ha heʼi: “Jehová nachepytyvõirire ndaikatumoʼãi kuri aaguanta upe oiko vaʼekue ha ndaikatumoʼãi asegi cheñeʼẽrendu”.

¹⁹ Peteĩ trivunál ohecha ko káso ha pe hués heʼi oĩ porãha oñemosẽ eskuélagui Pablo ha Húgope. Péro áño 1979-pe ko káso oñemog̃uahẽ Corte Suprema de Justíciape, ha upe Corte Suprema heʼi ndovaleveimaha pe ótro trivunál odesidi vaʼekue. Haʼekuéra heʼi: “Oñemosẽvo umi mitãme, ndojerrespetái pe derécho orekóva oike hag̃ua eskuélape (artíkulo 14) ha pe goviérno nokumplíri irresponsavilida ohekomboʼévo  mitãnguérape (artíkulo 5)”. Upe káso oñegana vaʼekue oipytyvõ mil mitã testígo de Jehovápe. Heta oñemosẽta vaʼekuépe eskuélagui noñemosẽi ha umi oñemosẽ vaʼekue ikatu oho jey, umíva apytépe Pablo ha Hugo.

20, 21. ¿Mbaʼéichapa omombarete ñande jerovia Roel ha Emily ohasa vaʼekue?

²⁰ Filipinas. Áño 1990-pe, Roel Embralinag g orekórõ guare 9 áño ha iñermána Emily 10 oñemosẽ eskuélagui ha hendivekuéra oñemosẽ mas de 65 testígo ndosaludái haguére pe vandéra. Roel ha Emily túva hérava Leonardo oho oñeʼẽ trankílo porãnte umi profesorkuérandi péro nokonsegíri mbaʼeve. Ijetuʼuvévo pe situasión ermáno Leonardo omog̃uahẽ pe káso Tribunal Suprémope. Haʼe ningo ndaiplatái ha ndorekói ni avogádo, upévare upe família ojerure asy Jehovápe oipytyvõ hag̃ua chupekuéra. Upe tiémpope umi mitã kompañerokuéra oñembohory hesekuéra ha otrata vai chupekuéra. Leonardo ndoikuaái umi léi ha upévare opensa ndaikatumoʼãiha ogana upe káso.

 ²¹ Péro upéi, peteĩ avogádo hérava Felino Ganal oho odefende hag̃ua Leonardo famíliape. Haʼe ombaʼapo vaʼekue umi avogádo iñimportantevéva ndive upe tetãme. Péro upe tiémpope g̃uarã nombaʼapovéima umívandi ha oiko chugui testígo de Jehová. Pe Tribunal Supremo ohechárõ guare pe káso osẽ umi testígo de Jehová favórpe ha ndohejái oñemosẽ chupekuéra eskuélagui. Jahechakuaa nosẽporãi hague umi oovligase vaʼekue testigokuérape ojapo hag̃ua peteĩ mbaʼe vai.

22, 23. a) ¿Mbaʼérepa testígo de Jehová ogana hetaite káso iñimportánteva? b) ¿Mbaʼépa ñanepytyvõ jaiko porã hag̃ua ermanokuéra opa tetãyguándi?

²² ¿Mbaʼérepa testígo de Jehová ogana hetaite káso iñimportánteva? Ñande ndajaikói umi polítiko rapykuéri japyta porã hag̃ua hendivekuéra. Upéicharamo jepe heta tetãme oĩ umi hués ipyʼaporãva osẽva ñande ládo. Hiʼarive ojedesidívo peteĩ mbaʼe testígo favórpe, upéva oipytyvõ upéi ojerrespeta hag̃ua enterove derécho. Jahecha porãiterei Cristo ñanepytyvõ hague ñagana hag̃ua umi káso (elee Apocalipsis 6:2). ¿Mbaʼérepa ñamog̃uahẽ jepi koʼã káso umi trivunálpe? Ñande ningo ndahaʼéi jaipotáva oñekambiapa umi léi, síno ñambaʼaposénte Rréi Jesucrístope g̃uarã avave ñandejokoʼỹre (Hech. 4:29).

²³ Koʼág̃a umi hénte ndochaʼéi ojuehe ha oiko vaipa polítika káusare. Ñande ñañemoĩva Rréi Jesucristo poguýpe katu ñañehaʼã ani hag̃ua ñasẽ ni peteĩ goviérno ládo ha haʼe ñanepytyvõ upearã. Jaikuaa Satanás oñehaʼãha ñanemoingovai ikatu hag̃uáicha ñanemomombyry Jehovágui, péro nosẽi la ijidéape. Pe Rréino ningo oipytyvõ hetaiterei héntepe oiko hag̃ua peteĩ ñeʼẽme, ha nomboʼéi chupekuéra oñorairõ hag̃ua. Jahechávo mbaʼeichaitépa oiko porã oñondivepa ermanokuéra opa tetãygua jahechakuaa Ñandejára Rréino ogovernamaha pórke upéva rupivémante jaiko péicha (Is. 2:4).