1, 2. a) ¿Mbaʼépa ohechauka Jesucristo ogovernamaha 1914 guive? b) ¿Mbaʼépa jahecháta ko kapítulope?

 ÑANDE jerovia imbareteve jahechávo umi mbaʼe ohupytýmava Ñandejára Rréino ogovernáramo jepe iñenemigokuéra apytépe (Sal. 110:2). Ñande Rréi Jesucristo oreko peteĩ ehérsito opredikáva kyreʼỹme, oipytyvõ isegidorkuérape oiko hag̃ua tekopotĩme ha oadora hag̃ua Jehovápe haʼe oipotaháicha. Avei ñanepytyvõ jaiko hag̃ua oñoermánoicha ko múndo tuichakuére oĩramo jepe heta oñemoĩva ñanderehe. Koʼãva ha hetave mbaʼe ohechauka ñande Rréi ogovernamaha iñenemigokuéra apytépe 1914 guive.

² Hiʼarive oĩ hetave mbaʼe ijojahaʼỹva ojapótava koʼẽrõite pe Rréino. Oúta omyanguʼi ha ohundi entéro iñenemigokuérape (Mat. 6:10; Dan. 2:44). Péro upe mboyve oikóta heta mbaʼe iñimportánteva okumplítava profesía oĩva la Bíbliape. Jahechamína koʼã profesía jaikuaa hag̃ua mbaʼépa la oikótava.

 3. ¿Mbaʼe raẽvépa ñahaʼarõ oiko?

³ Ojeʼéta oĩha pyʼaguapy. Apóstol Pablo oskrivírõ guare ikárta umi Tesalonicaguápe, omombeʼu mbaʼe raẽvépa oikóta (elee 1 Tesalonicenses 5:2, 3). Upépe oñeʼẽ “Jehová ára” rehe, oñepyrũtava ojeataka vove “Babilonia Guasu” (Apoc. 17:5). Péro pe ára oñepyrũ mboyvemi, umi tetãnguéra heʼíta: “¡Jaikóma pyʼaguapýpe ha kyhyjeʼỹme!”. Ikatu una vénte heʼi hikuái térã heta vése. ¿Oĩtapa avei koʼãva apytépe umi rrelihión omoakãva? Haʼekuéra ningo Satanás mundopegua avei, upévare oiméne omoirũta umi tetãnguérape heʼi hag̃ua ojeikomaha ‘pyʼaguapýpe’ (Jer. 6:14; 23:16, 17, ÑÑB; Apoc. 17:1, 2). Oiko vove ko mbaʼe heʼise Jehová ára og̃uahẽʼintemaha. Ñandejára enemigokuéra “ni mbaʼevéicharõ ndojesalvamoʼãi”.

 4. ¿Mbaʼérepa ideprovécho ñandéve ñantende pe profesía heʼi vaʼekue Pablo?

 ⁴ ¿Mbaʼérepa ideprovécho ñantende ko profesía? Apóstol Pablo heʼi: “Peẽ che ermanokuéra napeiméi pytũmbýpe umi mondaháicha, upévare upe día nog̃uahẽmoʼãi pende ári peimoʼãʼỹve jave” (1 Tes. 5:3, 4). Umi ótro hénte ni ndopillái la oikóva péro ñande jaikuaa mbaʼépepa opáta koʼã mbaʼe oikóva ñane tiémpope. ¿Mbaʼéichapa oñekumplíta pe profesía heʼíva oñeanunsiataha pyʼaguapy? Jaikuaa hag̃ua tekotevẽ ñahaʼarõ ha jahecha mbaʼéichapa okambia ohóvo umi mbaʼe oikóva ko múndope. Upearã tekotevẽ japyta “japayhápe ha akóinte ñapensa hekopete” (1 Tes. 5:6; Sof. 3:8).

 5. ¿Mbaʼépa oikóta oñepyrũvo pe jehasa asy guasu?

⁵ Ojeataka umi rrelihión. Ñanemanduʼami jey Pablo oskrivi vaʼekuére: “Umi hénte heʼi vove: ‘¡Jaikóma pyʼaguapýpe ha kyhyjeʼỹme!’, upepete oimoʼãʼỹve jave oñehundíta hikuái”. Pe ára overa vove ningo ensegída ñahendu osunúrõ. Upéicha avei ojeʼe riremi oĩha pyʼaguapy, “upepete” oĩta ñehundi. ¿Mbaʼépa la oñehundítava? Primero, entéro rrelihión japu térã “Babilonia Guasu”. La Bíbliape oñehenói chupekuéra “kuña rekovai” (Apoc. 17:5, 6, 15). Oñehundívo umi rrelihión kristiána guaʼu ha entéro umi ótro rrelihión japu ojekuaáta oñepyrũmaha pe “jehasa asy guasu” (Mat. 24:21; 2 Tes. 2:8). Heta hénte ndoroviasemoʼãi oñehundiha umi rrelihión. ¿Mbaʼére piko? Pórke pe kuña rekovai heʼi ijehe haʼeha “peteĩ rréina” ha ‘arakaʼeve ndojaheʼomoʼãiha’. Péro oimoʼãʼỹve jave opilláta reiete ojerovia hague ijehe. Oñehundíta peteĩ tesapirĩme oikoramoguáicha ‘peteĩ díapente’ (Apoc. 18:7, 8).

 6. ¿Mávapa la ohundítava ‘Babilonia Guasúpe’?

⁶ ¿Mávapa la ohundítava ‘Babilonia Guasúpe’? “Peteĩ mymba ñarõ pytã asýva”, ‘diez hatĩva’. Pe lívro de Apocalipsis ontendeka ko mymba ñarõ haʼeha pe Organización de las Naciones Unidas (ONU). Umi diez hatĩ haʼe hína entéro goviérno oĩva pe mymba ñarõ ládo (Apoc. 17:3, 5, 11, 12). ¿Mbaʼépa ojapóta pe mymba ñarõ pe kuña rekovaíre? Sarambi ningo ojapóta hese, oguerahapaitéta chugui ipláta ha imbaʼerepy, ohejáta nandi vera. Avei “hoʼúta hoʼo ha ohapypaitéta chupe tatápe” (elee Apocalipsis 17:16). a

 7. a) ¿Mbaʼéichapa oñekumpli raʼe áño 66-pe Jesús heʼi vaʼekue Mateo 24:21, 22-pe? b) ¿Mbaʼéichapa oñekumplíta Jesús heʼi vaʼekue ñane tiémpope?

⁷ Umi ára oñemombykýta. Jesús omombeʼu vaʼekue mbaʼépa oikóta pe jehasa asy guasu aja. “Umi ojeporavo vaʼekue rehehápe, umi ára oñemombykýta.” (elee Mateo 24:21, 22.) Upe heʼi vaʼekue oñekumpliʼimi áño 66-pe Jehová ndohejáirõ guare pe ehérsito rrománo omongora Jerusalén heta tiémpore (Mar. 13:20). Upéva rupive  umi kristiáno Jerusalén ha Judeagua ikatu kuri ojesalva. ¿Mbaʼéichapa oñekumplíta ñane tiémpope Jesús heʼi vaʼekue? Jehová ojevaléta Jesús rehe omombyky hag̃ua pe atáke ojapótava pe ONU umi rrelihión kóntrape. Péicha pe rrelihión añetegua añoite ojesalváta ha noñehundimoʼãi umi rrelihión japu ndive (Sal. 96:5). ¿Mbaʼépa oikóta upe rire? Jahechami.

8, 9. ¿Mbaʼérehepa oiméne oñeʼẽ raʼe Jesús heʼírõ guare kuarahy umíva iñypytũtaha? ¿Mbaʼépa ojapóta la hénte?

⁸ Jesús oñeʼẽrõ guare umi ára paháre omombeʼu heta mbaʼe iñimportánteva oikótava Armagedón mboyvemi. Umi mokõi mbaʼe jahechátava primerorã ojeskrivi lívro de Mateo, Marcos ha Lúcaspe (elee Mateo 24:29-31; Marcos 13:23-27; Lucas 21:25-28).

⁹ Oikóta heta mbaʼe iñextráñova yvágape. Jesús heʼi vaʼekue: “Pe kuarahy iñypytũta, jasy ndohesapemoʼãi, umi estrélla hoʼáta yvágagui”. Ko tiémpope heta hénte ojeroviaiterei umi rrelihión omoakãvare, oimoʼã haʼekuéra ohesapeha chupekuéra haperã. Péro koʼẽrõite upéva okambiáta. ¿Heʼisépa raʼe avei Jesús ojehechataha heta mbaʼe iñextráñova oikóva yvágape? Ikatu voi mbaʼe hína (Is. 13:9-11; Joel 2:1, 30, 31). ¿Ha mbaʼépa ojapóta la hénte upéva oiko vove? “Ipyʼatarovapáta umi tetãnguéra, ndoikuaáigui mbaʼépa ojapóta” (Luc. 21:25; Sof. 1:17). Pe Rréino enemigokuéra, tahaʼe “rréi” térã “tembiguái”, “odesmajáta kyhyjégui ohaʼarõ rupi umi mbaʼe oúva hína ko yvy ape ári”. Ohekáta hikuái moõpa okañýta péro ndotopamoʼãi ni peteĩ lugár ojesalva hag̃ua Jesucristo kastígogui (Luc. 21:26; 23:30; Apoc. 6:15-17).

10. a) ¿Mbaʼéichapa oporohusgáta Jesús? b) ¿Mbaʼéichapa oñeñandúta umi oñemoĩva pe Rréino ládo ha umi oñemoĩva ikóntrape?

¹⁰ Ojeseparáta umi ovecha ha kavara. Ñandejára Rréino enemigokuéra ohecháta peteĩ mbaʼe omondyivétava chupekuéra. Jesús omombeʼu: “Ohecháta Yvypóra Raʼýpe ouha umi arai ári, tekomimbipa ha podér reheve” (Mar. 13:26). Pe podér guasuete ohechaukáta Jesús oumaha ohusga hag̃ua yvyporakuérape. Ótra pártepe pe profesía oñeʼẽva ára paháre omombeʼu porãve mbaʼéichapa oikóta upéva. Jahechami pe ehémplo oñeʼẽva ovecha ha kavaráre (elee Mateo 25:31-33, 46). Jesucristo omoĩta umi “ovecha” apytépe umi siémpre oñemoĩ vaʼekuépe pe Rréino ládo. Haʼekuéra oñakãrapuʼãta ohechakuaágui Ñandejára osalvapotaitemaha chupekuéra (Luc. 21:28). Umi oñemoĩ vaʼekuépe pe Rréino kóntrape katu Jesucristo omoĩta ‘kavarakuéra’ apytépe. Haʼekuéra “ojepytiʼanupãta ñembyasýgui” opillávo ‘oñehunditaha opa ára g̃uarã’ (Mat. 24:30; Apoc. 1:7).

11. ¿Mbaʼérehepa ñanemanduʼa vaʼerã jahechávo umi mbaʼe oikótava?

 ¹¹ Péro Jesucristo ohusga rire ‘opa tetãnguérape’ noñepyrũmoʼãi gueteri Armagedón (Mat. 25:32). Tenonderãite oiko vaʼerã hetave mbaʼe iñimportánteva. Jahechamína mokõi mbaʼe oikótava: Gog oñemoĩ vaʼerã Ñandejára puévlo kóntrape, ha oñembyaty vaʼerã umi unhído yvágape. Ñahesaʼỹijo aja koʼã mbaʼe ñanemanduʼákena Ñandejára Ñeʼẽ nomombeʼuiha arakaʼetépa oikóta. Ikatu voi okoinsidi hína.

12. ¿Mbaʼépa ojapóta Satanás pe último ñorairõme?

¹² Pe último ñorairõ. Gog de Magog oñorairõta umi unhído oĩva ko yvy ári kóntrape, ha avei umi ambue ovechakuéra kóntrape (elee Ezequiel 38:2, 11). Satanás oñemosẽ guive yvágagui, heta vésema oñorairõ umi unhído kóntrape. Ko vuéltape oñorairõta ipahaite Ñandejára Rréino kóntrape (Apoc. 12:7-9, 17). Oñepyrũ rire oñembyaty umi unhídope kongregasiónpe, Satanás oñehaʼã omomombyry chupekuéra Jehovágui péro nosẽi la ijidéape (Mat. 13:30). Péro oñehundipa vove umi rrelihión japu haʼetéta oimeraẽva ikatútava ohundi Ñandejára puévlope, pórke oñekompara voi chupekuéra peteĩ puévlo naimurállai ha nahokẽivare. Satanás oimoʼãta ndaikatuiha ojavy upe oportunida ha heʼíta umi goviernokuérape: tapeho peñorairõ pende fuersakue Ñandejára puévlo kóntrape ha pehundi.

13. ¿Mbaʼéichapa Jehová oñangarekóta isiervokuérare?

¹³ Proféta Ezequiel omombeʼu mbaʼépa la oikótava. Heʼi: ‘Nde Gog rejúta ne retãgui opytáva nórtepe, nde heta puévlo ndive; peẽ pejupáta kavaju ári, heta hénte ndive ha soldadokuéra imbaretéva reheve. Ha reñemoĩta che retã rehe ku arai hũ omoʼãháicha pe yvy’ (Ezeq. 38:15, 16, ÑÑB). Haʼete ningo avave ndaikatumoʼãiva ojoko chupekuéra, ¿mbaʼépa ojapóta Jehová upémarõ? Haʼe heʼi: “Chepochyetereíta”, ‘asapukáita: “pe espáda toʼa hiʼarikuéra”’ (Ezeq. 38:18, 21; elee Zacarías 2:8). Ñandejára oñorairõta isiervokuéra rehehápe ha péicha oñepyrũta pe gérra hérava Armagedón.

14, 15. ¿Mbaʼe ótra kósapa oikóta Satanás oñepyrũ rire oñorairõ Ñandejára puévlo kóntrape?

¹⁴ Jahecha mboyve mbaʼéichapa Jehová oñangarekóta ipuévlore Armagedónpe jahechami raẽ ótra kósa iñimportánteva. Ko mbaʼe oikóta Satanás oñepyrũ rire oñorairõ Ñandejára puévlo kóntrape ha Armagedón mboyve. Jahecháma haguéicha párrafo 11-pe oñembyaty vaʼerã umi unhído opytáva gueteri ko yvy ape ári.

¹⁵ Oñembyaty umi unhídope. Mateo ha Marcos oskrivi kuri mbaʼépa Jesús heʼi vaʼekue umi “ojeporavo vaʼekue” rehe. Umíva hína umi unhído. Koʼã mbaʼe oiko vaʼerã Armagedón og̃uahẽ mboyve (ehecha párrafo 7). Jesús omombeʼu  mbaʼépa haʼe ojapóta ogoverna tiémpope. “Haʼe omondóta hiʼanhelkuéra ombyaty hag̃ua umi ojeporavo vaʼekuépe opa hendáguio; nórte, sur, kuarahyreike ha kuarahyresẽguio, pe yvy púnta guive yvága púnta peve.” (Mar. 13:27; Mat. 24:31.) Jesús heʼívo oñembyatytaha umi unhídope ndeʼiséi ojesellapataha chupekuéra. Oñepyrũ mboyvemi pe jehasa asy guasu ningo ojesellátama umi unhídope (Apoc. 7:1-3). Upérõ Jesús oñeʼẽ kuri peteĩ mbaʼe oikótavare pe jehasa asy guasu aja. Upévare, ikatu jaʼe Satanás omoñepyrũ rire pe último ñorairõ, oñembyatytaha yvágape umi unhído oĩva gueteri ko yvy ape ári.

16. ¿Mbaʼépa ojapóta Armagedón aja umi unhído oĩva yvágape?

¹⁶ ¿Oñembyatypátapa umi unhídope oñepyrũ mboyve pe Armagedón? Si. Entéro unhído oĩtama yvágape oñepyrũ vove Ñandejára gérra. Upépe oñemeʼẽta chupekuéra autorida oñorairõ hag̃ua Jesús ykére. Ohundíta hikuái “vastón de iérrro” reheve pe Rréino enemigokuérape (Apoc. 2:26, 27). Umi 144 mil unhído oikove jeýva yvágape omoirũta umi ánhel ipoderosoitévape. Haʼekuéra oĩta Rréi Jesucristo poguýpe ha ojepreparáta oñorairõ hag̃ua heta “soldadokuéra” kóntrape. Umíva hína iñenemigokuéra omongoráva Ñandejára puévlope (Ezeq. 38:15). Haʼekuéra oñorairõ vove oñepyrũta hína Armagedón (Apoc. 16:16).

17. ¿Mbaʼépa oikóta umi “kavarágui” Armagedónpe?

¹⁷ Ojekastiga umi iñañávape. Armagedónpe og̃uahẽta huʼãme pe jehasa asy guasu. Upévo Jesucristo ojapóta ótro traváho. Ndahaʼéi ohusgátanteva ‘opa tetãnguérape’, síno okastigáta umi iñañávape térã umi ‘kavarápe’ (Mat. 25:32, 33). Ñande Rréi oikutúta tetãnguérape ‘peteĩ espáda ipukúva ha hakuávape’. Entéro umi hénte ohechaukáva haʼeha “kavara”, tahaʼe “rréi” térã “tembiguái”, “oñehundíta opa ára g̃uarã” (Apoc. 19:15, 18; Mat. 25:46).

18. a) ¿Mbaʼérepa idiferénte la ohaʼarõva umi ‘ovechakuérape’? b) ¿Mbaʼépa ojapóta Cristo ogana hag̃ua iñorairõ?

¹⁸ Tuichaiterei okambiáta umi ovechakuéra situasión. Umi kavara ehérsito oĩva Satanás poguýpe haimete ombochipe chupekuéra. Haʼete voi kuri nañameʼẽiva hesekuéra mbaʼeve, péro umi ovecha ojesalváta pe jehasa asy guasúpe. Upeichaite, “peteĩ aty guasu” opytáta ko yvýpe (Apoc. 7:9, 14). Péicha Cristo oganáta pe ñorairõ, ohundipáta pe Rréino enemigokuérape ha upéi omombóta Satanás ha idemoniokuérape peteĩ yvykua pypukúpe. Upépe opytáta hikuái mil áñore ojapoʼỹre mbaʼevete ku omanoramoguáicha (elee Apocalipsis 6:2; 20:1-3).

19, 20. ¿Mbaʼéichapa ikatu jajapo ñanemboʼéva Isaías 26:20 ha 30:21?

¹⁹ ¿Mbaʼéichapa ikatu jajeprepara ñahaʼarõ hag̃ua koʼã kámbio guasuete? Ojapo unos kuánto áño rrevísta Ñemañaha heʼi hague: “Jajesalva hag̃ua ñaneñeʼẽrendu vaʼerã”. ¿Mbaʼérepa? Jaikuaa hag̃ua jahechami mbaʼépa heʼi vaʼekue Jehová yma umi hudío oikóvape Babilóniape. Jehová heʼíma ótro tetã ipuʼakataha umi vavilóniore ha ipuévlo tekotevẽha ojeprepara upearã. Haʼe heʼi: “Tereho che retãgua, eike nde rógape ha emboty ne rokẽ. Ekañy sapyʼami ohasa aja pochy guasu” (Is. 26:20). Ko versíkulope oñemanda chupekuéra heta mbaʼe: “Tereho”, “eike”, “emboty” ha “ekañy”. Ojapo hag̃ua Ñandejára heʼíva, umi hudío opyta vaʼerã hógape koty ñembotypýpe. Péicha umi soldádo ojagarrátava pe siuda ndojapomoʼãi hesekuéra mbaʼeve. Upéicharõ ojesalva hag̃ua hikuái tekotevẽ kuri iñeʼẽrendu Ñandejárape. b

²⁰ ¿Mbaʼépa ikatu ñaaprende Ñandejára siervokuéra yma guarégui? Jajesalva hag̃ua umi mbaʼe oútavagui katuete ñakumplipaite vaʼerã Jehová omandáva (Is. 30:21). Pe kongregasión rupive haʼe heʼíta ñandéve mbaʼépa jajapo vaʼerã. Upévare koʼág̃a guive jajepokuaa vaʼerã ñaneñeʼẽrendu ñande pyʼaite guive (1 Juan 5:3). Jajapóramo upéicha ifasilvéta ñandéve ñaneñeʼẽrendu amo gotyove. Péichamante oñangarekóta ñanderehe ñande Ru Jehová ha ñande Rréi Jesús (Sof. 2:3). Ñandejára oñangareko rupi ñanderehe ikatúta jahecha mbaʼéichapa Irréino ohundi iñenemigokuérape. Tuichaiterei mbaʼe upe oikótava, upévare ni mbaʼevéicharõ nañanderesaraimoʼãi upévagui.