HETA persónape ijetuʼu heʼi térã ohechauka hag̃ua la oñandúva. Ikatu oime michĩme heta ohasa asy, térã ojepokuaa oguerokirirĩnte pe oñandúva. Upéicharõ jepe, iñimportánte jahechauka pe ñañandúva, péicha ojekuaáta mbaʼeichagua persónapa ñande, mbaʼépa oĩ ñane korasõme ha mbaʼépa ñapensa ñande rapicháre. Ha Jehová voi ñanemokyreʼỹ ñamoheñói hag̃ua ñande pyʼapýpe umi mbaʼe porã ha jahechauka umíva hendaitépe (Rom. 12:10; 1 Tes. 2:7, 8).

Ñamombeʼu jave ñande rapichápe umi mbaʼe ñañandúva, iñimportánte ñañeʼẽ con sentimiénto, pórke ndajajapóiramo péicha ikatu opensa nañanesinseroiha. Jaiporavo porãramo umi palávra jaiporútava ha ñamoĩramo chupe sentimiénto, ñambojeguáta ñane ñeʼẽ ha ikatúta japoko ñande rapicha korasõre.

Eñeʼẽ mborayhúpe. Jahayhúramo ñande rapichápe, upéva ojekuaa ñañeʼẽ ha jatrata lájare chupe. Upéicha avei ñañeʼẽ jave umi mbaʼe porã Jehová ohechaukávare térã jaagradese jave chupe, ñane ñeʼẽre ojekuaa vaʼerã pe mborayhu ñañandúva hese (Is. 63:7-9). Iñimportánte avei ñanderory ha ñañeʼẽ mborayhúpe ñande rapichakuérape.

Jahechami mbaʼépa oiko vaʼekue Jesús tiémpope. Peteĩ lepróso ou oñemboja hendápe ha ojerure asy Jesúspe omonguerami hag̃ua chupe. Eñeimahinami mbaʼéichapa oiméne Jesús mborayhúpe oñeʼẽ pe leprósope heʼívo: “Si, romonguerase” (Mar. 1:40, 41). Epensami avei pe ojapo vaʼekue pe kuña doce áñorema oikóva huguyháre. Haʼe okueraségui ou kirirĩhaitépe opoko Jesús ao ruguáire, ¿mbaʼépa ojapo ko kuña ojepillávo? Ou oñesũ Jesús renondépe, okyhyjetereígui oryrýi osusũ anga ha kyhyjepópe omombeʼu pe ojapo vaʼekue. Eñeimahinamína mbaʼéichapa Jesús ombopyʼaguapy chupe heʼívo: “Che rajy, rejerovia rupi ningo rekuera. Tereho katu pyʼaguapýpe”  (Luc. 8:42b-48). Koʼag̃aite peve opoko ñane korasõre ñanemanduʼávo mbaʼéichapa Jesús otrata mborayhúpe umi héntepe.

Ñande avei jaiporiahuverekóramo ñande rapichápe Jesús ojapo haguéicha, ñane ñeʼẽre ojekuaáta ñaipytyvõseha chupekuéra. Upévare japredika jave ñanderory ha ñañeʼẽ vaʼerã mborayhúpe umi héntepe, péro ojekuaa vaʼerã ñanesinseroha. Ñanembaʼeporãramo, umi hénte ikatu ñanerenduseve. Tekotevẽ ñañeʼẽ mborayhúpe ñamokyreʼỹ hag̃ua chupekuéra, térã ñamyesakãvo Ñandejára Ñeʼẽ heʼíva. Ha koʼýte jahechauka vaʼerã mborayhu ñakonsola jave umi ohasa asývape.

Roʼyeterei jave pyaʼe ñañembojase tata ypýpe jajepeʼe hag̃ua, upéicha avei pe mborayhu oipytyvõta ñande rapichakuérape oñemoag̃uise hag̃ua ñanderehe. ¿Mbaʼéichapa ikatu rehechauka upéva? Nde rováre ojekuaa vaʼerã reñeinteresaha umi nerendúvare, ha reñehaʼã vaʼerã pe mborayhu tosẽ ne korasõite guive. Nderejapóiramo upéicha, ikatu odeskonfia hikuái nderehe.

Ñande vos rehe pyaʼe ojekuaa avei pe ñañandúva. Péro oĩ heta persóna ivós mbareteterei ha haʼete voi siémpre iñeʼẽ arhélva. Upéicharamo jepe oñehaʼãramo hikuái ikatu omehorave. Umi hénte iñeʼẽ peteĩteĩva térã oñeʼẽ hatãitereíva, ikatu oñehaʼã oñeʼẽ suaveve. Por ehémplo opronunsia jave umi vokál ikatu ombopukuve pe sonído.

Reñeʼẽ hag̃ua mborayhúpe iñimportánte reñeinteresa nde pyʼaite guive umi nerendúvare. Rejepyʼapy ha reipytyvõséramo umi héntepe, upéva ojekuaáta reñeʼẽ lájare.

Igústo hag̃ua la nde diskúrso tekotevẽ nekyreʼỹ, péro iñimportánte avei reñeʼẽ mborayhúpe. Ñande ningo ndajaipotái pe informasión opyta umi ñanerendúva akãmente, síno og̃uahẽ ikorasõme, ha upearã ñañeʼẽ vaʼerã mborayhúpe.

Ehechauka hetave sentimiénto reñeʼẽ jave. ¿Mbaʼéichapa repilla peteĩ persóna oñekevranta jave? Ikatu rehechakuaa hese ojepyʼapyha, haʼete okyhyjéva ha osuspira manterei. Añetehápe ñande ikatu jahechauka oimehaichagua sentimiénto jaiporavo porãramo umi palávra jaiporútava. Avei ojekuaa ñañandúva ñande vos rehe, ñande hésto ha umi séña jajapóvare. La Biblia ningo ñanemokyreʼỹ akóinte jahechauka hag̃ua javyʼaha, tahaʼe ñaime jave ñande rógape térã ñande  rapichakuérandi. Péro heʼi avei ñamboyke vaʼerãha umi lája ivaíva (Efes. 4:31, 32; Filip. 4:4).

La Bíbliape oñeñeʼẽ heta héntere, oñemombeʼu oĩ hague iñeʼẽrendúva ha avei umi iñañáva. Avei omombeʼu mbaʼe mbaʼépa oñandu ha ohasa vaʼekue hikuái. Relee jave umi téxto vívliko, nde vos rehe ojekuaa vaʼerã mbaʼeichagua persónarepa reñeʼẽ hína. Upearã tekotevẽ reñemoĩ umi personáhe vívliko lugárpe; reñehaʼã vaʼerã repensa ha reñeñandu haʼekuéraicha. Relee jave emoĩ sentimiénto nde lektúrape, péicha umi hénte haʼetéta voi ohecha ha oñandúva umi mbaʼe eréva. Péro reñatende vaʼerã ani rexahera ha rehasa la rrája.

Odepende pe informasiónre. Reikuaa hag̃ua mbaʼeichagua sentimiéntopa rehechauka vaʼerã, odepende hína mbaʼérehepa reñeʼẽta.

Koʼág̃a ikatu reheka Mateo 11:28-30 ha eñatende porã mbaʼérehepa oñeñeʼẽ. Upéi elee kapítulo 23-pe, Jesús omongavajúrõ guare umi mboʼehára leipegua ha fariseokuérape. Eñeimahinami mbaʼéichapa upérõ oñeʼẽne raʼe Jesús, ndahaʼeiete kangy térã mbeguemínte oñeʼẽtava chupekuéra.

Elee Hechos 14:11-18 ha epensa mbaʼéichapa oiméne Pablo ha Bernabé oñeñandúne raʼe umi hénte oadorasérõ guare chupekuéra. Upéi emañami pe versíkulo 14 ha 18 rehe, ha eñeimahinami mbaʼeichaitépa oñeñandu umi hénte ohendu rire Pablo ha Bernabé heʼíva.

Upéicharõ, jalee ha ñañeʼẽ hag̃ua hendaitépe ndahaʼéi jaiporavo porãnte vaʼerã umi palávra ha idéa, síno tekotevẽ ñañeʼẽ con sentimiénto.