LA Biblia heʼi ‘ñamombaʼe vaʼerãha opaichagua yvypórape’, ha ‘ndovaleiha jakopi avavére’ (1 Ped. 2:17; Tito 3:2). Añetehápe enterove persónape “ojejapo vaʼekue ‘Ñandejára joguaháramo’” (Sant. 3:9). Jaikuaa avei Cristo omano hague yvyporakuérare, upévare entéro omerese ohendu umi notísia porã ha oñarrepenti, ikatu hag̃uáicha ojesalva (2 Ped. 3:9). Ñande ningo jarrespeta vaʼerã opavavépe, ha koʼýte umi ijedáva ha umi orekóvape autorida.

Heta persónape ijetuʼu jepi orrespeta hag̃ua hapichápe la Biblia heʼiháicha, ¿mbaʼérepa? Oĩ tetãme ojerrespeta hag̃ua peteĩ persónape odepende ipire kolór rehe, ijedáre, inasionalidáre, haʼéramo kuña térã kuimbaʼe, ipláta hetápa, térã orekópa autorida. Avei opárupi lénto umi funsionário púvliko ikorruptoiterei ha upéicha rupi ndojerrespetavéi umi autoridápe. Heta tetãme umi hénte ikuerairóma ombaʼapo hague un día pytã apenaite omantene hag̃ua ifamília. Oparupiete jahecha hénte maledukádo ha nomombaʼéiva hapichápe. Umi mitãrusúpe katu iñirũnguéra omboliga opuʼã hag̃ua umi profesór ha autoridáre. Térã ohecha hikuái télepe mbaʼéichapa umi mitãrusu ojapo oñantoháva chupekuéra ha omanda ituvakuérare. Añetehápe ijetuʼu hína ani hag̃ua ova ñanderehe ko múndo opensa lája. Péro jarrespetáramo umi héntepe, ifasilvéta ñañemongeta hag̃ua hendivekuéra.

Ehechaukáke nderrespetuosoha. Koʼýte japredika jave ñañemonde ha ñañekomporta vaʼerã hekópe. Káda lugárpe umi hénte oreko diferénte fórma ohechauka hag̃ua orrespetaha hapichápe, ha ñande jareko vaʼerã enkuénta umíva. Por ehémplo oĩ lugárpe reporosaluda jave ndereipeʼáiramo ne sombréro térã repoʼẽramo nde volsíllope, oñepensa nemaledukadoha, péro ótro hendápe péva ndopytavaíri. Pono ñambopochy avavépe ha japredika porãve hag̃ua, jarrespeta vaʼerã umi kostúmbre oĩva káda lugárpe.

Upéicha avei iñimportánte ñañatende ñañeʼẽta jave umi héntendi, koʼýte umi ijedávandi. Por ehémplo, peteĩ imitãvéva oñeʼẽtaramo ijedávandi,  opyta vai jepi ohenóinteramo chupe hérarupi, iporãve heʼíramo chupe “karai fuláno”, térã “dóña fulána”. Avei ñañeʼẽta jave peteĩ ijedávandi térã peteĩ orekóvandi autorida, jaʼénteramo chupe “nde” opensáta ñanemaledukadoha.

Eporosaluda porãke. Heta siuda ha puévlope umi hénte ojepokuaa ojosaluda katuete, tahaʼe ojotopávo kállere térã og̃uahẽ jave peteĩ lugárpe, ikatu peteĩ salúdo mbykymínte, oñakãity, opukavymi térã omopuʼã ipo. Umi ndoporosaludáivare ojeʼe jepi ijejapo ha imaledukadoha.

Oĩ ningo persóna hasykatúva térã orekóva algún defékto físiko, ha upévare umi hénte omboyke ha oapoʼi jepi koʼã persónape. Ñande jasaludánteramo chupekuéra pyaʼe pyaʼe ikatu opensa jadespresiaha chupekuéra. Ñandejára Ñeʼẽ ningo heʼi jarrespeta ha jatrata vaʼerãha mborayhúpe koʼã persónape (Mat. 8:2, 3). Añetehápe ningo ndaipóri voínte ni peteĩ ndorekóiva defékto. Péro epensamína, ¿mbaʼéichapa reñeñandúta umi hénte siémpre imanduʼáramo algún defékto reguerekóvare, oiporu rangue nde réra oñeʼẽ jave nderehe? ¿Erétapa nderrespetaha hikuái? Katuete nde reipotáta haʼekuéra imanduʼa umi mbaʼe porã reguerekóvare térã rejapo vaʼekuére.

Japredika jave iporãta ñaporandu tuvakuérare ñañeʼẽ mboyve umi mitãndi, ¿mbaʼérepa? Jepe Jehová voi omanda ñandéve japredika vaʼerãha, ñande jaikuaa haʼe oheja hague tuvakuéra kárgope omboʼe ha okorrehi hag̃ua ifamíliape (Efes. 6:1-4). Upévare iporã ñañeʼẽ raẽ tuvakuérandi ñañeʼẽ mboyve umi mitãndi.

Umi persóna ijedáva oikuaa ha ohasáma heta mbaʼe, upévare ojerrespeta vaʼerã chupekuéra (Job 32:6, 7). Peteĩ prekursóra Sri Lankapegua oreko vaʼekue enkuénta ko mbaʼe, upévare peteĩ karai ijedáva oheja opredika chupe. Ñepyrũrã ko karai heʼi chupe: “Ndéngo nemitãiterei, mbaʼe piko rejúta chemboʼese la Biblia”. Pe ermána ombohovái: “Che ningo karai ndajúi romboʼe hag̃ua. Síno amombeʼusénte ndéve peteĩ mbaʼe che aaprende vaʼekue. Upe aaprendéva omeʼẽ chéve esperánsa ha upévare amombeʼuseterei che rapichápe”. Oñeʼẽ rupi chupe rrespetuósamente, pe karai heʼi: “Ha vuéno, emombeʼúna chéve upéicharõ la reaprende vaʼekue”. Pe ermána heʼi chupe: “Che aaprende mbaʼépa jajapo vaʼerã jaiko hag̃ua opa ára g̃uarã”. Upéi pe karai oñepyrũ ostudia la Biblia. Añetehápe ningo naentéroi ijedáva heʼíta ñandéve oipotaha jarrespeta chupekuéra, péro jajapóramo katuete ovyʼa ha oagradeséta hikuái.

 Oĩhárupi komunida indíhena umi ermáno osegi umi kostúmbre umi hénte upepegua osegíva. Por ehémplo, oñeʼẽ raẽ pe líder ndive ohechauka hag̃ua irrespetuosoha hikuái, ha upéi opredikáma umi hénte oĩva pe trívupe. Upéicharamo jepe ñanemanduʼa vaʼerã ndovaleiha ñandesepilléro ni jajapo mbaʼeve japyta porãséguinte umi héntendi (Prov. 29:5). Ha oĩramo jepe palávra ojeporúva oñembotuicha hag̃ua peteĩ persónape, ñande ndovaléi jaiporueterei umíva ha jahasáma la rrája.

Reñeʼẽ vaʼerã rrespetuósamente. La Biblia omombeʼu ñandéve japredika jave ñañeʼẽ vaʼerãha ‘pyʼaporãme ha jahechauka jarrespetaha ñande pyʼaite guive ñande rapichakuérape’ (1 Ped. 3:15). Upévare, ¿mbaʼépa jajapóta peteĩ persóna omombeʼúramo ñandéve umi mbaʼe ogueroviáva ha japilla naisentidoiha la heʼíva? ¿Jaʼétapa chupe direktoite tuichaiterei ojavyha? Iporãvéta ningo ñahendu porãnteramo chupe, ñaporandu mbaʼérepa opensa upéicha ha ñañehaʼã ani ñaofende chupe. Upéi pyʼaporãme jahechauka chupe la Biblia heʼíva orrasona hag̃ua.

Iñimportánte avei ñañeʼẽ rrespetuósamente jajapo jave diskúrso. Rehechaukáta rerrespetaha umi nerendúvape ndereikóiramo rekritika ni reapoʼi chupekuéra. Ha ani rentendeka ndojaposéiguinte nokumpliriha umi mbaʼe oñehaʼarõva chuguikuéra. Pórke péicha rejapóramo, ikyreʼỹ rangue oñedesanimáta hikuái. Upéicharõ, ¿mbaʼéichapa rehecha vaʼerã umi nerendúvape? Rereko vaʼerã enkuénta haʼekuéra ohayhuha Jehovápe ha oserviseha chupe. Jesús ojapo haguéicha tekotevẽ nembaʼerechakuaa ha reiporiahuvereko umi ijerovia kangývape, umi ipyahuvévape ha umi hasypeve ohechakuaávape mbaʼe kámbiopa ojapo vaʼerã.

Remeʼẽta jave peteĩ konsého ikatu rehechauka rerrespetaha umi héntepe ndereikóiramo remandánte chupekuéra la ojapo vaʼerã, síno ere vaʼerã entéro tekotevẽha osegi pe konsého, ¿mbaʼéicha ikatu rejapo upéva? Por ehémplo, ere rangue “¿Mbaʼéichapa ikatu pejapo ko téxto heʼíva?”, iporãvéta eréramo “¿Mbaʼéichapa ñanepytyvõkuaa ko téxto heʼíva?”. Térã ere rangue “¿Pejapópa hína peẽ ikatúva entéro Ñandejára servísiope?”, opyta porãvéta eréramo “Iporãta káda uno ñañeporandu: ‘¿Ajapópa hína opa ikatúva?’”. Añetehápe iporãvéta reñeinkluíramo, remandánte rangue tojesegi umi konsého oĩva la Bíbliape, péicha umi nerendúva ikyreʼỹvéta ojepyʼamongeta ha ohecha hag̃ua mbaʼépepa tekotevẽ omehora.

Nde diskúrso aja ndovaléi rejapo peteĩ komentário térã remombeʼu peteĩ káso rembopukaséguinte umi nerendúvape. Rejapóramo péicha umi hénte opensáta ndéve g̃uarã naiñimportanteiha la eréva ha ndojagarramoʼãi  ensério la nde diskúrso. Añetehápe Ñandejára oipota javyʼa jaservívo chupe, ha ikatu pe informasión reiporúva oreko algúna párte igústo ha ñanembopukáva. Péro reikóramo reñemokachiãi oĩháme púnto iñimportánte ha isériova, rehechaukáta ndererrespetaiha umi nerendúvape ni Jehovápe.

Jehová ningo omombaʼe ha orrespeta entéro persónape, upévare reñeʼẽ ha retrata lájare umi héntepe, siémpre ojekuaa vaʼerã rehaʼangaha chupe.