OJAPO jave iñasignasión heta persóna inerviosoiterei oiporútaramo peteĩ voského, haʼekuéra oimoʼã okonvenivetaha oskrivi palávra por palávra la heʼítava.

Péro enterove ningo ñañemongeta ñande rapichándi káda día, tahaʼe ñane hénte térã ñane amigokuérandi ha ndajaikói jaskrivi mbaʼe mbaʼépa jaʼéta. Upéichante avei jajapo ñañemongetárõ umi héntendi predikasiónpe ha ñañemboʼe jave ñande pyʼaite guive Jehovápe.

¿Mbaʼérepa okonvenive jaiporu peteĩ voského jaleénte rangue palávra por palávra la jaʼétava? Releepaitéramo nde diskúrso ikatu añete nanderesárai la erétavagui ha nderejavymoʼãi. Péro ijetuʼuvéta og̃uahẽ hag̃ua pe informasión umi nerendúva korasõme. Avei releénteramo hasyve rekambia hag̃ua ne tóno, nosẽmoʼãi reñemongetarõguáicha ha ikatu ikaigue la nde diskúrso. Ha remañaitereíramo ne nótare, umi nerendúva opensáta nereñeinteresaiha hesekuéra ha pyaʼeterei ojedistraéta. Ikatu hag̃uáicha igústo la nde diskúrso ha oporomokyreʼỹ, reiporu vaʼerã peteĩ voského ha ejapo ku reñemongetarõguáicha umi nerendúvandi.

Ko eskuéla ñanepytyvõ ikatu hag̃uáicha ñañemongetakuaa ñande rapichándi. Jajotopa jave ñane amigokuérandi ndajaiporúi peteĩ nóta jaʼe hag̃ua chupekuéra la ñapensáva. Ha predikasiónpe ndajaikói avei jaskrivi ñane presentasión jakyhyjégui ñanderesaráirõ g̃uarã mbaʼépa jaʼéta. Upévare, rejapo jave peteĩ demostrasión ko eskuélape, eñehaʼãkena ejapo reñeʼẽháicha jepi normálmente. Rejeprepara porãramo ha reiporu peteĩ voského nemanduʼa hag̃ua umi idéa iñimportantevévare, rehecháta mbaʼéichapa umi palávra oútama ndéve ne akãme. ¿Mbaʼépa ikatu rejapo ani hag̃ua rekyhyje reiporu hag̃ua peteĩ voského?

 Emohenda porã umi idéa. Reiporu peteĩ voského heʼise remohenda porãha umi idéa reiporútava. Ndahaʼéi reiporavo vaʼerã káda palávra erétava, síno heʼise repensa vaʼerãha reñeʼẽ mboyve.

Oĩ heta persóna opoi rei reínteva ijurúgui ha upe rire ombyasy heʼi haguére peteĩ mbaʼe hendapeʼỹ. Ha ótro katu oñeʼẽ porãhágui peteĩ mbaʼére osẽ oñeʼẽ ótra kosaitére. Ani hag̃ua rejapo koʼã mbaʼe ikatu remohenda raẽ ne akãme umi idéa ha upéi ae eñeʼẽ. Tenonderã epensa raẽ mbaʼépa la remombeʼuséva, mbaʼéichapa ikatu ere upéva oñentende porã hag̃ua, ha upéi eñepyrũ eñeʼẽ.

 Rejeprepara jave resẽ hag̃ua repredika, ani remohendánte nde kartérape umi puvlikasión reiporútava, remohenda vaʼerã avei ne akãme umi idéa remombeʼuséva. Oimérõ reiporúta peteĩ suherénsia osẽva Ñane Marandu Porãme, relee vaʼerã heta vése opyta porã meve ne akãme umi púnto prinsipál. Rekopiánte rangue umi palávra ojeporúva upépe, eñehaʼã ere umi mbaʼe ne ñeʼẽtépe ha epensa mbaʼe palávrapa og̃uahẽvéta umi hénte oĩvape nde territóriope. Rekalkula raẽ vaʼerã mbaʼe mbaʼépa la erétava ha emohenda umi idéa. ¿Mbaʼe mbaʼépa rereko vaʼerã enkuénta? 1) Ne introduksiónpe ikatu remombeʼu peteĩ mbaʼe oipyʼapýva umi héntepe ha eporandu chupe mbaʼépa opensa pe témare. 2)  Epensa mbaʼépa ikatu ere pesegi hag̃ua peñemongeta, ha mbaʼe téxtopa ikatu relee rehechauka hag̃ua Jehová osolusionataha upe provléma. Ikatúma guive emyesakã koʼã mbaʼe oikotaha Irréino rupive. 3) Emokyreʼỹ pe ogajárape osegi hag̃ua umi konsého pehecha vaʼekue la Bíbliape. Ikatu reheja chupe peteĩ puvlikasión térã ere chupe ndostudiaséipa la Biblia. Ere pe ogajárape reju jeytaha pesegi hag̃ua peñemongeta.

Koʼã mbaʼe repensáramo resẽ mboyve repredika, upe rire oútantema ndéve ne akãme umi mbaʼe erétava. Péro rehechakuaáramo tekotevẽha rereko peteĩ nóta, mbykymínte reskrivi vaʼerã. Ikatu remoĩ ne introduksión, umi téxto releétava ha mbaʼépa eréta retermina hag̃ua. Peichagua voského nepytyvõta hesakuaitépe remyesakã hag̃ua pe ereséva, ha umi hénte imanduʼa porãvéta pe mensáhere.

 Ikatu avei repensa mbaʼe mbaʼépa umi hénte oporandu jepi nde territóriope, térã mbaʼépa ndogustái chupekuéra umi mbaʼe ñamboʼévagui. Rembohovái porã hag̃ua umíva, ikatu reanota umi téxto oñeʼẽva umi púntore ha mbaʼépa eréta remyesakã hag̃ua. ¿Moõpa retopakuaa informasión? Lívro Razonamiéntope ha la Bíbliape pe párte hérava “Ñahesaʼỹijo hag̃ua”, umívape retopáta heta téma ha téxto rembohovái hag̃ua umi porandu. Reiporukuaa avei ótra informasión retopáva ñane puvlikasiónpe. Ikatu reprepara peteĩ voského térã efotokopia pe párte reiporuséva ha emoĩ nde kartérape. Ha retopa vove peteĩ persóna ojapóva ndéve peteĩ porandu térã heʼíva japuha peteĩ mbaʼe ñamboʼéva, ere chupe revyʼaha omeʼẽ haguére ndéve oportunida remyesakã hag̃ua mbaʼépa nde reguerovia (1 Ped. 3:15). Eiporu ne nóta rembohovái hag̃ua chupe.

Reñemboʼéta jave ne famíliandi, kongregasiónpe térã pe grúpondi osẽ mboyve opredika, iporãta repensa raẽramo mbaʼe mbaʼépa la erétava. Lucas 11:2-4-pe jatopa Jesús omboʼe hague idisipulokuérape mbaʼe mbaʼépa ikatu ojerure oñemboʼe jave. Salomón katu oñemboʼe hetaiterei mbaʼére oñeinagurárõ guare pe témplo. Katuete opensa raẽne raʼe mbaʼe mbaʼépa la heʼítava. Haʼe tenonderã imanduʼa Jehová rehe ha pe promésa haʼe ojapo vaʼekuére Davídpe, upéi oñeʼẽ pe témplore ha ipahaitépe ojerure umi hénte rehehápe (1 Rey. 8:22-53). Koʼã ehémplo ikatu ideprovécho ndéve.

Nde voského isensíllo vaʼerã. Rejapo jave nde diskúrso, ¿mbaʼeichaite pevépa ipuku vaʼerã ne notakuéra?

Aníke nderesarái pe voského nepytyvõtaha nemanduʼa hag̃ua umi idéare. Ikatu reskrivi mbykymi mbaʼépa eréta ne introduksiónpe. Upéi epensántema umi idéare ha ani rejepyʼapy mbaʼe palávrapa reiporúta. Eñehaʼã eiporu fráse mbykýva nemanduʼa hag̃ua umi idéare. Umi púnto prinsipál reskrivi vaʼerã majúskulape, térã emarka peteĩ pinsélpe. Koʼã púnto prinsipál guýpe ikatu remoĩ umi idéa remyesakãtava ha umi téxto releétava. Iporãvéta releéramo la Bíbliagui voi umi téxto. Eanota reiporútaramo ehémplo ha informasión osẽ vaʼekue télepe térã diáriope. Péicha jave ne notakuéra ipukuve vaʼerã ikatu hag̃uáicha ikompléto pe informasión. Eñehaʼãkena ne notakuéra taiñordenádo ha toĩmba porã.

Oĩ diskursánte oiporúva peteĩ voského isensillomívante, upévape oskrivi umi palávra iñimportantevéva, umi téxto oiporútava  térã divúho ikatu hag̃uáicha imanduʼa umi idéare. Peichagua voského oipytyvõ chupe opresenta porã hag̃ua pe informasión ha ikatu ojapo idiskúrso oñemongetarõguáicha hapichándi. Ko leksión nepytyvõta avei ndéve rejapo hag̃ua upéicha.

Rembaʼapo vove ko leksiónpe nepytyvõitereíta rerrepasáramo pe párte hérava “Mbaʼéichapa rejapo vaʼerã peteĩ voského”, oĩva páhina 39-42-pe.

Mbaʼéichapa reiporu vaʼerã nde voského. Ndahaʼéi reprepara porãnte vaʼerã nde voského, síno reñehaʼã vaʼerã avei reiporu porã upéva.

Tenonderãite, rejeprepara porã vaʼerã. Emaña pe títulore, umi púnto prinsipál rehe ha epensa mbaʼéichapa umíva omyesakãve pe téma. Ekalkula mboy tiémpopa reiporu vaʼerã remyesakã hag̃ua káda púnto. Remañávo pe primer púntore epensa koʼã mbaʼére: mbaʼe ehémplopa reiporúta, mbaʼe téxto ha mbaʼe informasiónpa omopyenda upe púnto. Upéi ejapo jey péicha rehasávo umi ótro púnto prinsipálpe. Ofaltátaramo ndéve tiémpo, rehecha vaʼerã mbaʼépa ikatu reipeʼave. Ipahaitépe errepasa jey kompletoite nde diskúrso, péro ani reaprendese de memória. Reñekonsentra vaʼerã umi idéare ha ani umi palávrare.

Rejapóvo nde diskúrso remaña meme vaʼerã umi nerendúvare. Relee rire peteĩ téxto, eñehaʼã explika ne ñeʼẽtépe remañaʼỹre ne nótare. Ha reiporútaramo peteĩ ehémplo, ani relee, síno rejapo vaʼerã ku remombeʼutarõguáicha ne amigokuérape. Ani remaña nde voskéhore ere mboyve káda fráse, eñeʼẽ guei nde pyʼaite guive, pórke upéva katuete og̃uahẽvéta umi nerendúva korasõme.

Rejepokuaa vove reiporu peteĩ voského rejapo hag̃ua diskúrso, upéva heʼise reprogresamaha rehóvo ko eskuélape, ha péicha oikóta ndehegui peteĩ diskursánte ikatupyrýva.