UMI ermáno heta ojesakrifika ou hag̃ua rreunionhápe ohenduségui Jehová ñeʼẽ. Ideprovécho hag̃ua chupekuéra umi informasión, upe ojeʼéva oñehendu porã vaʼerã.

Yma Israélpe ndaipóri vaʼekue mikrófono ni parlánte. Upéicharõ, ¿mbaʼépa ojapo vaʼekue Moisés oñeʼẽrõ guare heta hénte renondépe? Oĩrõ guare hikuái Moábpe oike mboyve pe yvy oñepromete vaʼekuépe, Moisés oiméne omoĩ diferénte lugárpe kuimbaʼe orrepeti jeýva umi mbaʼe haʼe heʼíva, péicha enterovépe og̃uahẽ porã pe informasión (Deut. 1:1; 31:1). Tiémpo riremínte, Josué ombyaty umi isrraelítape sérro Guerizim ha Ebal renondépe, umi levíta katu opyta umi sérro paʼũme. Upérõ Josué omombeʼu vaʼekue mbaʼe iporãvapa ohupytýta hikuái okumplírõ Ñandejára Léi, ha umi mbaʼe vai oútava hiʼarikuéra naiñeʼẽrendúiramo. Ohendúvo koʼã mbaʼe umi isrraelíta ombohovái heʼívo: “Taupéicha” (Jos. 8:33-35). Oiméne Josué ojevale avei heta kuimbaʼére orrepeti hag̃ua haʼe heʼíva, péro katuete upe lugár tuicha oipytyvõne raʼe oñehendu porã hag̃ua pe ojeʼéva.

Heta tiémpo rire, mar de Galilea rembeʼýpe ‘ijaty hetaiterei hénte’ ohendu hag̃ua Jesúspe. Upémarõ haʼe ojupi ha oguapy peteĩ kanóape, ohomie pe y rembeʼýgui, ha umi hénte opyta pe kóstape. Upévo Jesús oñepyrũ omboʼe chupekuéra (Mar. 4:1, 2). ¿Mbaʼérepa ojupi peteĩ kanóape oñeʼẽ hag̃ua? Oiméne Jesús ojapo upéva pórke pe y ári ñande vos oñehendu porãve ha og̃uahẽ mombyryve.

Ymave ningo odepende pe diskursánte vos rehe umi hénte ohendu porã hag̃ua pe ojeʼéva. Péro áño 1920-rupi umi asambleahárupi oñepyrũma ojeporu mikrófono ha parlánte oñehendu porãve hag̃ua umi diskúrso.

Umi mikrófono ha parlánte. Umi mikrófono rupive ikatu oñehendu hatãve umi mbaʼe jaʼéva ha mombyryve. Péicha pe  diskursánte natekotevẽi osapukái térã ojeforsaiterei oñehendu hag̃ua chupe, ha umi héntepe g̃uarã ifasilve oñekonsentra hag̃ua pe ojeʼévare.

Koʼág̃arupi oiko jave umi aty guasu jareko heta aparáto pyahu ñanepytyvõva oñehendu porã hag̃ua pe ojeʼéva. Heta lugár ñande atyhápe umi rreunionrã oĩ avei mikrófono umi diskursántepe g̃uarã, ha oĩ voi kongregasión orekóva avei mikrófono oñekomenta hag̃ua. Ne kongregasiónpe oĩramo avei, reñehaʼã vaʼerã reiporu porã.

Ereko enkuénta koʼã mbaʼe. Eiporu porã hag̃ua pe mikrófono nemanduʼa vaʼerã koʼã mbaʼére: 1) Reñemoĩ vaʼerã 10 térã 15 sentímetro pe mikrófonogui. Pórke rembojaitéramo nde jurúre osẽ vaipáta la nde vos, ha reñemoĩramo mombyryeterei apenaite oñehendúta la eréva. 2) Reñemoĩ vaʼerã pe mikrófono renondépe ani ijykére. Remomýitarõ jepe ne akã nde derécha térã nde iskiérda gotyo, reñeʼẽ vaʼerã pe mikrófono renondetépe. 3) Ani reñeʼẽnte rejapoháicha jepi voi, síno ehupimie michĩmi la nde vos. Péro natekotevẽi resapukái, pórke umi parlánte rupive umi hénte ohendu porãta voi la eréva. 4) Oimérõ ndehuʼu, rejahyʼopykarãi (karraspeár), térã neatĩase, rejere vaʼerã ani rejapo umíva pe mikrófono renondépe.

Rejapo jave diskúrso. Rejupi jave platafórmape peteĩ ermáno oúta omoĩ porã hag̃ua ndéve pe mikrófono. Haʼe ojapo aja upéva, reñemboʼy porã ha remaña vaʼerã pe auditóriore. Remoĩ vaʼerã ne notakuéra pe atrílpe ha eñatende ani pe mikrófono omoʼãmba ndehegui.

Reñepyrũvo reñeʼẽ rejapysaka vaʼerã mbaʼéichapa osẽ la nde vos, noiméipa osẽ hatãitereíma hína. Upéicharõ iporãta reñemomombyrymie tres térã cuatro sentímentro pe mikrófonogui. Ikatúramo jepe remaña mimi ne notakuérare, reñeʼẽta jave reñakãrapuʼã vaʼerã, ikatu hag̃uáicha reñeʼẽ pe mikrófono renondetépe.

Otoka jave ndéve lektúra. Iporãvéta rerekóramo nde pópe la Biblia térã ótra puvlikasión releétava, ha ani reñakãity relee hag̃ua, rehupírõ ningo ifasilvéta ndéve remaña umi nerendúvare. Ikatu hag̃uáicha rehecha pe releétava remoĩ vaʼerã pe informasión pe  mikrófono kostádope, ha nde reñemboykeʼimi. Péicha reñeʼẽta pe mikrófono renondetépe.

Umi oleéva rrevísta Ñemañaha oreko jepi voi peteĩ mikrófono olee hag̃ua oñemboʼyhápe. Péicha oñemboʼy rupi, ifasilve chupekuéra orrespira porã ha ikatu olee kyreʼỹme ha con sentimiénto. Tekotevẽ oñehendu porã ojelee jave umi puvlikasión rreunionhápe, ¿mbaʼérepa? Pórke upéicharõmante umi ermáno ikatúta ontende porã pe informasión ha ideprovéchota chupekuéra.

Rekomenta jave. Ojeporúramo jepe mikrófono ne kongregasiónpe, lomímonte reñeʼẽ vaʼerã oñentende ha oñehendu hag̃uáicha la eréva. Rekomenta jave ani hag̃ua rejayvyeterei, rejoko vaʼerã nde pópe la Biblia térã pe puvlikasión ojestudiáva, ikatu hag̃uáicha rehecha porã pe informasión.

Heta kongregasiónpe oĩ voi ermáno ombohasáva umi mikrófono oñekomenta hag̃ua. Oñemeʼẽramo ndéve komentário, ani pyaʼeterei remboguejy la nde po, upéicharõmante pe ermáno nderecháta. Eñatendéke rejagarra hag̃ua ombohasávo ndéve la mikrófono ha ani reñepyrũntéma reñeʼẽ. Upéi reiporupa rire, pyaʼe remeʼẽ jey vaʼerã pe ermánope.

Rejapo jave demostrasión. Rejapótaramo demostrasión hetave mbaʼe rehecha vaʼerã osẽ porã hag̃ua. Oĩ lugárpe pe mikrófono oĩ voi fího, péicha ifasilve umi ermánape oiporu la Biblia ha inotakuéra. Péro ne kongregasiónpe ndaipóriramo koʼãichagua mikrófono, iporãvéta ne ajudánte ojagarráramo ani hag̃ua mbaʼeve ndestorva nde pópe. Pepraktika aja iporãta ne ajudánte oñensajáramo ojagarra porã hag̃ua la mikrófono. Upéi pejapo aja pe demostrasión nemanduʼa vaʼerã ndovaleiha reñemolómo pe auditóriope.

Sapyʼánte pe Aty Ñanemboʼéva Japredika Hag̃uáme, ojejapo demostrasión opartisipahápe hetave ermáno. Péicha jave ojeporu jepi hetave mikrófono, ha umíva oñemohenda porã vaʼerã pe platafórmape pe párte oñepyrũ mboyve, térã oñemeʼẽ chupekuéra ojupikuévo. Koʼã mbaʼe ojeprepara vaʼerã a tiémpo, ani hag̃ua pejecha tesaparápe. Ikatu peaprovecha pe ensájo aja pepraktika hag̃ua mbaʼéichapa peiporúta umi mikrófono. Oimérõ ndaikatúi pepraktika pe platafórmape voi, ikatu peiporu ótra kósa peteĩ mikrófonoicha. Pejapopa rire pe demostrasión, peñatende vaʼerã ani hag̃ua  hatãiterei pemboguejy umi mikrófono pe mesa ári, ha ani pejekupylia umi kávlere peguejykuévo.

Umi rreunionhápe ñande ñañomokyreʼỹ ha ñaaprende Ñandejára Ñeʼẽ heʼíva, ha umi mikrófono ideprovechoiterei upearã (Heb. 10:24, 25). Upéicharõ, káda uno jaiporu porãramo umi mikrófono ikatu ñaipytyvõ osẽ porã hag̃ua umi rreunión.