UMI mbaʼe oñemboʼéva rreunionhápe oñemopyenda la Bíbliape. Ha japredika jave jaiporu avei Ñandejára Ñeʼẽ ñamyesakã hag̃ua heta mbaʼe. ¿Mbaʼépa ñanepytyvõta jahechauka hag̃ua oñemopyendaha la Bíbliape umi mbaʼe ñamboʼéva? Jaiporavo porãramo umi mbaʼe jaʼétava jalee mboyve peteĩ téxto, tuicha ñanepytyvõta upearã.

Jaleéta jave peteĩ téxto, ndahaʼéi jaʼénte vaʼerã “jaleemína ko téxto” ha oĩma. Iporãvéta ñañehaʼãramo ñambohape raẽ jalee mboyve. Upearã ikatu rejapo koʼã mbaʼe: 1) Rembokuriosoʼimi umi nerendúvape, tove toikuaase hikuái mbaʼépa heʼi upe téxtope, ha 2)  ehechauka mbaʼérepa releéta upe téxto. ¿Mbaʼéichapa rehupytýta koʼã mokõi mbaʼe? Jahechamína.

Reporandukuaa peteĩ mbaʼe. Relee mboyve pe téxto ikatu rejapo peteĩ porandu remopensa hag̃ua umi nerendúvape. Jesús pyʼỹinte ojapo vaʼekue upéva. Peteĩ jey umi fariséo oheja vaise Jesúspe opavave renondépe, péro Jesús oporandu chupekuéra: “¿Mbaʼépa peẽ peje? ¿Máva raʼýpa pe Cristo?”. Haʼekuéra heʼi: “David raʼy”. Jesús katu heʼi chupekuéra: “¿Mbaʼére piko upéicharõ espíritu sánto rupive, David ohenói chupe che Ruvicha?”. Upe rire oñeʼẽ chupekuéra Salmo 110:1 heʼívare. Umi fariséo itáicha okirirĩ, ha umi hénte katu vyʼápe ohendu Jesúspe (Mat. 22:41-46).

Predikasiónpe relee mboyve peteĩ téxto ikatu rejapo koʼã porandu: “Enterove ningo jareko ñande réra, ¿orekónepa Ñandejára héra tee? Jahechamína mbaʼéichapa ombohovái la Biblia Apocalipsis 4:11-pe”; “¿Arakaʼépa oĩta peteĩ goviérnonte omandáva ko yvy tuichakuére? Emañami mbaʼépa heʼi Daniel 2:44”; “¿Omombeʼúpa la Biblia mbaʼe situasiónpa oĩta ñane tiémpope? Eñatendemi mbaʼépa heʼi 2 Timoteo 3:1-5 ha epensami ojoguápa ñane situasiónpe”; “¿Arakaʼépa opáne umi jehasa asy ha ñemano? La Biblia ombohovái upéva Apocalipsis 21:4, 5-pe”.

 Ereko jave diskúrso ikatu rejapo peteĩ porandu umi nerendúva oleese hag̃ua umi téxto. Péicha ohekaséta hikuái umi téxto, jepe oikuaáma voi mbaʼépa heʼi. Reporandu vaʼerã umi mbaʼe ointeresátava chupekuéra, pórke igústoramo jepe la ne téma, haʼekuéra ikatu ojedistrae relee aja umi téxto ikonosídova. Upévare repensáma vaʼerã mbaʼépa ikatu ere iñinteresánte hag̃ua chupekuéra.

Emombeʼu peteĩ provléma. Ikatu avei remombeʼu peteĩ provléma, ha upéi ere: “Ko téxto jaleétava ohechaukáta ñandéve mbaʼéichapa ikatu oñembohovái upéva”. Anínte ere upe téxto rupive oñesolusionaitetaha voi upe provléma. Péro ikatu remokyreʼỹ umi nerendúvape nde relee aja haʼekuéra toñehaʼã tohechakuaa mbaʼéichapa oipytyvõta chupekuéra ombohovái hag̃ua upe provléma.

Ikatu avei reñeʼẽ peteĩ konséhore oĩva la Bíbliape ñanepytyvõva ñanderekoporãve hag̃ua, ha upéi elee peteĩ téxto oĩháme Ñandejára siérvo rembiasakue ohechaukáva mbaʼérepa ou porã ñandéve upe konsého. Pe téxto releétava orekóramo dos térã hetave púnto ohóva pe témare, erekuaa umi nerendúvape toñehaʼã topilla máva mávapa umíva. Rehechakuaáramo ijetuʼutaha umi nerendúvape ontende peteĩ púnto, ikatu remoĩ diferénte opsión haʼekuéra orrasona hag̃ua. Ha upéi ejevale pe téxtore rehechauka hag̃ua mbaʼépa iporã jajapo upe situasiónpe.

Ehechauka iñimportanteha la Biblia heʼíva. Oiméramo umi nerendúva oñeinteresáma pe témare, ha remyesakãma rehóvo heta mbaʼe chugui, ikatúntema ere: “Jahechamína mbaʼépa heʼi Ñandejára Ñeʼẽ ko témare”. Péicha rejapóramo rehechauka iñimportanteha pe informasión releétava.

Jehová ojevaléramo jepe heta kuimbaʼére ohai hag̃ua la Biblia, umíva oskrivínte Ñandejára mensáhe. Añetehápe opa mbaʼe oĩva la Bíbliape haʼe hína Jehová ñeʼẽ. Upévare naiporãmoʼãi jaʼénte: “Pedro oskrivi”, térã “Pablo heʼi”, koʼýte umi ñanerendúva ndostudiáiramo la Biblia. Haʼekuéra ojeroviavéta jaʼéramo: “Ñandejára Ñeʼẽ heʼi”. Jehová voi omanda vaʼekue Jeremíaspe omombeʼúvo imensáhe heʼi hag̃ua: “Pehendumi mbaʼépa heʼi Jehová” (Jer. 7:2; 17:20; 19:3; 22:2). Ndajaʼéiramo jepe Ñandejára réra jalee mboyve peteĩ téxto, upe rire ñamyesakã vaʼerã opa mbaʼe oĩva la Bíbliape haʼeha hína Jehová ñeʼẽ.

 Ereko enkuénta umi téxto oĩva upe mboyve ha upe rire. Repensa jave mbaʼépa eréta relee hag̃ua peteĩ téxto, reikuaa vaʼerã mávapa oskrivi ha mbaʼe situasiónpepa ojeskrivi upe téxto. Por ehémplo, ¿mbaʼépa eréta releétaramo peteĩ párte oñeʼẽhápe Job, térã oñeʼẽhápe umi iñamígo guaʼu? Avei Lucas oskrivíramo jepe Hechos, oĩ párte oñeʼẽha Santiago, Pedro, Pablo, Felipe, Esteban, Gamaliel, hudiokuéra ndojeroviáiva ha avei heta ánhel. Upéicharõ, releéta jave rereko vaʼerã enkuénta mávapa upe oñeʼẽva. Iñimportánte nemanduʼa David ndoskrivíri hague entéro umi sálmo ha Salomón ndoskrivíri avei Proverbios kompletoite. Avei ideprovechoitereíta reikuaáramo mávape g̃uarãpa ojeskrivi upe párte releétava, ha mbaʼe témarepa oñeñeʼẽ hína.

Emombeʼu umi mbaʼe oiko vaʼekue yma. Por ehémplo, nde diskúrsope reñeʼẽtaramo pe rreskátere ha releéta Hebreos 9:12, 24, iporãta remyesakã raẽ umi saserdóte guasu oikémi hague pe tavernákulo ryepýpe, ha upéva orrepresentaha pe lugár Jesús oike hague oho rire yvágape. Péro reiporavo porã vaʼerã mbaʼépa eréta, ani rekonfundipa umi nerendúvape ha amo ipahápe neremyesakãi jey pe téxto. Upéicharõ, relee mboyve umi téxto ikatu remombeʼu mbaʼépepa ojojogua umi mbaʼe oiko vaʼekue yma ojeskrivírõ guare upe téxto, ha umi mbaʼe nde remombeʼúva nde diskúrsope. Ikatu avei remombeʼu algún detálle oñentende porãve hag̃ua upe téxto.

Heta mbaʼe ikatu reaprende reñatendéramo umi diskursánte ikatupyrývare. Ejesareko mbaʼépa heʼi hikuái olee mboyve peteĩ téxto ha epensa mbaʼérepa osẽ porã chupekuéra. Reprepara vove nde diskúrso eiporavo umi téxto iñimportantevéva ha epensa mbaʼépa rehupytyse umíva rupive. Ekalkula avei mbaʼépa eréta relee mboyve umi téxto, péicha rembohape porãta umi nerendúva ohekase hag̃ua umi téxto. Rejapóramo koʼã mbaʼe rehechaukáta nde diskúrso oñemopyendaha la Bíbliape.