REPOROMBOʼE jave umi hénte ikatu hína oñeporandu: “¿Mbaʼéicha piko che aikuaáta siértopa la heʼíva chéve? ¿Omeʼẽ piko chéve pruéva aguerovia hag̃ua chupe?”. Upéicha rupi nde remyesakã vaʼerã mbaʼérepa pe persóna ikatu oguerovia umi mbaʼe remboʼéva térã nde explikasión rupive haʼe voi ohechakuaa vaʼerã siertoha hína la eréva. Katuete remeʼẽ vaʼerã koʼãichagua pruéva, koʼýte reñeʼẽ jave umi púnto iñimportantevévare nde diskúrsope.

Apóstol Pablo omoĩ ñandéve ehémplo iporãitereíva: haʼe oikekuaa vaʼekue umi héntepe opredika jave, omorrasona chupekuéra, omopyenda porã umi mbaʼe heʼíva ha mborayhúpe ojerure asy umi héntepe okambia hag̃ua opensa lája (Hech. 18:4; 19:8). Péro oĩ umi iñeʼẽkuaa rupi ombotavýva umi héntepe ha ojaprovecha hesekuéra (Mat. 27:20; Hech. 14:19; Col. 2:4). Koʼãichagua persóna oiko ombojuruheʼẽ hapichápe, oinventa umi mbaʼe heʼíva, oiporu informasión ndojekuaáiva siértopa, heʼi umi mbaʼe okonvenívante chupekuéra ha naisentídoiramo jepe la heʼíva, japu ha ñeʼẽkuaápe ogueraha hapykuéri umi héntepe. Ndovaléi ningo ñande jajapo koʼã mbaʼe ñakonvense hag̃ua ñande rapichápe.

Opa mbaʼe eréva oñemopyenda vaʼerã la Bíbliape. ¿Mbaʼérepa ñamopyenda vaʼerã la Bíbliape opa mbaʼe jaʼéva? Pórke Jehová hína opa mbaʼe Apohare, ndaipóri avave iñaranduvéva chugui, upéicharõ Iñeʼẽ ogarantisa siertoha la jaʼéva. Ñande ningo nañamboʼéi vaʼerã umi mbaʼe oúvante ñandéve ñane akãme, síno Ñandejára Ñeʼẽ heʼíva. Upearã tuichaiterei ñanepytyvõ umi puvlikasión oúva tembiguái jeroviahágui, umíva ñanemokyreʼỹ jastudia hag̃ua la Biblia. Upéicha rupi ñande ñaipytyvõse ñande rapichápe ohecha hag̃ua mbaʼépa omboʼe Ñandejára Ñeʼẽ. Péro ndajajapói vaʼerã upéva ñañembovale ni jahechauka hag̃ua ñande ñanerrasonha, síno pe persóna ohecha hag̃ua ijeheguiete mbaʼépa pe añetegua. Ñande jaikuaa siertoha Jesús heʼi vaʼekue: ‘Ñandejára ñeʼẽ hína pe añetegua’ (Juan 17:17).

 Péro sapyʼánte ikatu otoka ndéve reñeʼẽ peteĩ ndoikuaáivandi la Biblia haʼeha Ñandejára Ñeʼẽ térã ndojeroviáiva hese. Péicha jave reñatende vaʼerã mbaʼe moméntopepa opyta porãvéta relee peteĩ téxto. Péro nemanduʼákena ija vovéntema ndéve reñeʼẽ vaʼerãha la Bíbliare.

¿Ojegueroviátapa umi mbaʼe eréva releénte rupi peteĩ téxto vívliko? Nahániri, sapyʼánte tekotevẽta rehecha umi téxto oĩva upe versíkulo mboyve ha upe rire, remyesakãve hag̃ua pe ogajárape. Ñamoĩ chupe pe téxto reiporúvape noñeñeʼẽi direktoite pe púnto remyesakãsévare, ¿mbaʼépa ikatu rejapo? Reiporu vaʼerã ótro téxto ohóva pe témare ikatu hag̃uáicha umi nerendúva ohechakuaa pe explikasión remeʼẽva oñemopyendaha la Bíbliape.

Ani reinventa ni rexahera pe téxto heʼíva oho hag̃ua pe explikasión nde remeʼẽsévare. Relee porã vaʼerã pe téxto heʼíva rentende hag̃ua mbaʼépa añetehápe heʼise. Nemanduʼa vaʼerã pe versíkulo oñeʼẽramo jepe pe témare, umi nerendúva opilla vaʼerãha mbaʼéichapa pe téxto omopyenda upe eréva, upéicharõmante oñekonvenséta hikuái.

Moõguipa ikatu renohẽve informasión. Sapyʼánte ikatu reiporu informasión onohẽ vaʼekue umi sientífiko térã profesór iñarandúva. Péro rejasegura vaʼerã siértopa pe informasión heʼíva. Koʼãva reiporukuaa rehechauka hag̃ua la Biblia heʼíva siertoha.

Ñepyrũrã ikatu ere ñane univérso ohechaukaha oĩha peteĩ Kreadór, térã reñeʼẽ umi léi de la naturalésare, por ehémplo pe léi de gravedád, koʼãva ohechauka oĩmante vaʼerãha peteĩ persóna iñarandúva omoĩ vaʼekue koʼã léi. Umi mbaʼe eréva katuete oĩ porãta ohóramo la Biblia heʼívandi (Job 38:31-33; Sal. 19:1; 104:24; Rom. 1:20). Koʼã mbaʼe oipytyvõta umi nerendúvape ohechakuaa hag̃ua la Biblia heʼíva siertoha.

¿Mbaʼépa ikatu ere rehechaukaséramo la Biblia ouha Ñandejáragui? Ikatu remombeʼu oĩ hague heta profesór iñarandúva heʼi vaʼekue la Biblia haʼeha Ñandejára ñeʼẽ, péro ndojekuaaguasúiramo umi profesórpe ndojegueroviamoʼãi upe heʼíva hikuái. ¿Ha remombeʼúramo umi sientífiko heʼi vaʼekue? Haʼekuéra iñimperfékto avei ha naiporãi remopyenda ne enseñánsa yvypóra heʼívapente. Upévare ikuentave reñepyrũ la Bíbliare voi, ha upéi ae remombeʼu umi deskuvrimiénto sientífiko ohechaukaha la Biblia ndahaʼeiha yvypóra rembiapokuénte.

 Remyesakã jave peteĩ enseñánsa, rehechauka porã vaʼerã mbaʼérepa ikatu ojeguerovia upéva. Por ehémplo, relee jave 2 Timoteo 3:1-5, ikatu reiporu peteĩ notísia osẽ ramóva, ohechaukáva mbaʼéichapa koʼág̃arupi heta ‘hénte ndojoayhuvéi’. Péicha rejapóramo, ndahasymoʼãi umi nerendúvape ontende hag̃ua ñaimemaha pe ára pahápe.

Heta vése ideprovécho jaiporúramo peteĩ komparasión. Ikatu jahechauka mbaʼépepa ojojogua dos kósa, idiferénteramo jepe ojuehegui. Umi komparasión ikatu oipytyvõ umi héntepe oguerovia hag̃ua la Biblia omboʼéva. Por ehémplo rehechauka hag̃ua Ñandejára Rréino haʼeha peteĩ goviérno, ikatu rekompara peteĩ goviérnore oĩva peteĩ tetãme. Umi goviérno yvy ariguáicha, Ñandejára Rréinope oĩ mburuvicha omandáva, umi hénte oĩva ipoguýpe, ha oreko avei umi léi, hués ha eskuéla ñaaprende hag̃ua.

Umi experiénsia avei ikatu nepytyvõ rehechauka hag̃ua mbaʼérepa ideprovécho jasegi umi konsého oĩva la Bíbliape. Ikatu voi remombeʼu peteĩ mbaʼe ndete rehasa vaʼekue. Por ehémplo remyesakã hag̃ua iñimportanteha jalee ha jastudia porã la Biblia, ikatu remombeʼu mbaʼéichapa nepytyvõ raʼe koʼã mbaʼe. Omokyreʼỹ hag̃ua umi ermánope, apóstol Pedro oñeʼẽ peteĩ mbaʼe ohendu ha ohecha vaʼekuére: “Ore roikuaauka peẽme ñande Ruvicha Jesucristo podér ha haʼe oĩtaha, ore voi rohechágui hekomimbipa tuichaitéva” (2 Ped. 1:16-18). Apóstol Pablo avei oñeʼẽ vaʼekue umi mbaʼe ohasa vaʼekuére (2 Cor. 1:8-10; 12:7-9). Péro nemanduʼa vaʼerã avei mbykymínte reñeʼẽ vaʼerãha umi mbaʼére, ani ág̃a umi hénte opensa reñembotuichaha hína.

Umi mbaʼe opensa ha ogueroviáva káda persóna idiferénte ojuehegui, ha reguereko vaʼerã enkuénta upéva redesidi jave mbaʼe mbaʼépa eréta rehechauka hag̃ua siertoha upe remboʼeséva hína. Proverbios 16:23 heʼi voi: “Pe iñarandúva opensa porã la heʼítava ha oikekuaa hapichápe”.