¿REHECHÁMAPA mbaʼépa ojapo jepi umi hénte ojoguáta jave frúta? Enterove oñehaʼã oiporavo umi iporã ha heʼẽ asýva, upévare omaña ipíntare jahecha hiʼaju porãpa, oĩ voi katu ojopy jopýva ha ohetũva. Ikatu hag̃uáicha oiporavo porã, umi hénte idetallísta, ohecha mbaʼe mbaʼépepa idiferénte ojuehegui káda frúta, ojesareko ikolór, hyakuãre ha umícha. Ojogua rupi heta vésema, oikuaáma mbaʼeichaguápa oraha vaʼerã. Péicha ojapo haguére ovyʼáta ha ideprovechoitereíta chupe la oraháva.

Péro hetaitereive mbaʼe porã jahupytýta jastudia haguére Ñandejára Ñeʼẽ. Jajapo meméramo upéva jahayhuvéta Jehovápe ha jajeroviavéta hese. Avei ikatúta japredika porãve ha umi mbaʼe jadesidívare ojekuaáta ñanearanduha ha jajapoha Jehová heʼíva. La Biblia heʼi voi: “Entéro umi mbaʼe reguerohorýva ndaikatúi oñembojoja umi mbaʼe rehupytýtavare” (Prov. 3:15). Odepende restudia lájare rehupyty hag̃ua koʼã mbaʼe (Col. 1:9, 10).

¿Mbaʼépa heʼise jastudia? Ndeʼiséi jalee pyaʼe pyaʼénte peteĩ informasión, heʼise guei ñamombaʼapoha ñane akã ñantende porã hag̃ua pe jaleéva hína. Heʼise avei ñahesaʼỹijoha pe jaleéva, ñapensa mbaʼéichapa omyesakãve pe jaikuaámava voi ha jahechakuaa mbaʼéicha rupípa jagueroviakuaa siertoha pe ojeʼéva. Restudia jave ejepyʼamongeta umi mbaʼe pyahu reaprendévare ha mbaʼéichapa resegíta umi konsého oĩva la Bíbliape. Ikatu repensa avei mbaʼéichapa reiporúta pe informasión reipytyvõ hag̃ua nde rapichápe. Péicha jahecha jastudia jave tekotevẽha jajepyʼamongeta porã.

Restudiáta jave oiméne reprepara nde Biblia, umi puvlikasión reiporútava, peteĩ viróme ha peteĩ kuadérno. Péro, ¿repreparápa avei ne korasõ restudia hag̃ua? La Biblia omombeʼu mbaʼépa ojapo vaʼekue Esdras: “Oprepara ikorasõ  ostudia ha ojapo hag̃ua Jehová Léi heʼíva. Avei omboʼe hag̃ua Israélpe umi mandamiénto ha umi mbaʼe hekopeguáva” (Esd. 7:10). ¿Mbaʼe mbaʼépa jajapo vaʼerã japrepara hag̃ua ñane korasõ?

Ñañemboʼérõ japrepara ñane korasõ jarresivi hag̃ua umi konsého oĩva Ñandejára Ñeʼẽme. Jaipota ningo umi mbaʼe Jehová ñanemboʼéva opoko ñane korasõre. Upévare iporãta avei jajeruréramo chupe ijespíritu (Luc. 11:13). Ejerurékena chupe tanepytyvõ rentende hag̃ua pe restudiáva, ikatu hag̃uáicha rehechakuaa mbaʼéichapa omyesakã umi mbaʼe ojapótava ha mbaʼéichapa pe informasión nepytyvõ reñemoag̃uive hag̃ua hese. Ha péicha ikatúta rehechakuaa mbaʼépa oĩ porã ha oĩ vai ha ikatúta rekumpli umi mbaʼe oĩva Iñeʼẽme (Prov. 9:10). Restudiávo ‘rejerure meme vaʼerã Ñandejárape’ tanemoarandu (Sant. 1:5). Eñehaʼãke ehechakuaa mbaʼépepa tekotevẽ rekambia ha ejerure Ñandejárape tanepytyvõ reipeʼaite hag̃ua ne akãgui umi mbaʼe vai rejaposéva térã repensáva. Aníkena nderesarái reagradese vaʼerãha Jehovápe umi mbaʼe reaprendévare (Sal. 147:7). Ñañemboʼéramo jastudia hag̃ua katuete ñañemoag̃uivéta hese, ha upéva ñanemomýita jajapo hag̃ua Iñeʼẽme heʼíva (Sal. 145:18).

Péicha jajapóramo ñaneumílde ha jarresivi porãvéta umi konsého oĩva la Bíbliape. Heta hénte ko mundopegua oikose oikuaaparamoguáicha ha oheka voi defékto oñeʼẽ vai hag̃ua umi mbaʼe oleévare, péro ñande ndaupéichai jajerovia rupi Jehováre (Prov. 3:5-7). Jatopáramo peteĩ mbaʼe nañantendéiva, ndajaikói ñañembovale ha jaʼe oĩ vaiha, síno ñahaʼarõ upe rire Jehová omyesakãve ha ñañehaʼã jahekave informasión (Miq. 7:7). Esdras ojapo haguéicha ñande jajapose umi mbaʼe ñaaprendéva ha ñamboʼese ñande rapichápe. Péicha ñaneumílderamo ñaaprende hag̃ua, jahupytýta heta mbaʼe porã jastudiávo.

Restudiáta jave relee rangue párrafo uno guive opa peve, emaña raẽ pe artíkulo kompletoitére, reikuaa hag̃ua mbaʼérehepa oñeʼẽ pe informasión. Emaña pe título, subtítulo ha epensa mbaʼéichapa umíva omyesakãve pe téma. Emañakuaa orekóramo taʼanga ha rrekuádro. Ehechapa rire koʼã mbaʼe epensa mbaʼépa reaprendéta ha mbaʼéichapa ideprovéchota ndéve pe informasión. Péva nepytyvõta rentende porãve hag̃ua pe restudiátava.

 Upe rire eheka umi idéa iñimportantevéva oĩva pe artíkulope. Heta lívro ha artíkulo de estúdio oĩva rrevísta Ñemañaháme oreko umi pregúnta káda párrafope g̃uarã. Reñehaʼã vaʼerã repilla ha remarka umi rrespuésta releévo rehóvo umi párrafo. Ndorekóiramo jepe porandu, lomímonte remarka vaʼerã umi púnto iñimportantevéva nde nemanduʼaséva. Ha oĩramo peteĩ idéa ipyahúva ndéve g̃uarã, ehesaʼỹijomie rentende porã meve. Eñatendéke oĩramo peteĩ ehémplo térã púnto omyesakã porãvéva umi mbaʼe jagueroviáva, upéi reiporu hag̃ua predikasiónpe térã rejapóta jave diskúrso. Epensa avei mávapepa ikatu remombeʼu reaprende vaʼekue omombareteve hag̃ua ijerovia. Emarka umi mbaʼe reiporuséva ha errepasa jey restudiapa rire.

Releévo rehóvo eheka nde Bíbliape umi téxto ha epensa mbaʼéichapa omyesakã térã omopyenda pe idéa prinsipál oĩva pe párrafope.

Ikatu hína retopa umi mbaʼe nerentendeporãiva térã reikuaasevéva, péro reiko rangue rejedistrae umívare eanota restudiave hag̃ua upe rire. Ikatu hesakãve ndéve releévo rehóvo umi párrafo, ha oimérõ ndaupéichai ikatu oime restudiaseve upéi. ¿Mbaʼépa reanotakuaa? Peteĩ téxto nerentendéiva térã haʼete ndéve ndohóiva pe témare. Ikatu oime rentende pe releéva péro ofalta rentende porãve ikatu hag̃uáicha remyesakã ótrope. Reheja reínte rangue rentende porãʼỹre koʼã mbaʼe, iporãta rehesaʼỹijove ág̃a restudiapa vove.

Apóstol Pablo oskrivírõ guare ikárta umi evréope, heʼi chupekuéra pe kárta mbytérupi: “Umi mbaʼe jaʼéva apytégui kóva hína pe iñimportantevéva” (Heb. 8:1). Restudia jave, ¿repytápa avei nde ha rejepyʼamongeta umi púnto iñimportantevévare? Jahechamína mbaʼérepa ojapo upéva Pablo. Oñepyrũvo ikárta haʼe ohechauka Cristo oho rire yvágape oñepyrũ hague oservi Saserdóte Guasúramo Ñandejára renondépe (Heb. 4:14–5:10; 6:20). Ha kapítulo 8-pe heʼívo “kóva hína pe iñimportantevéva”, oipytyvõ chupekuéra ohechakuaa hag̃ua mbaʼérepa iñimportánte chupekuéra g̃uarã upéva. Omombeʼu Cristo oñepresenta hague Ñandejára renondépe ha oavri pe tape oike hag̃ua hikuái pe “lugár marangatúpe” (Heb. 9:24; 10:19-22). Haʼekuéra ojeroviáramo koʼã mbaʼére ohendúta avei umi ótro konsého omeʼẽva Pablo: ojerovia mbarete hag̃ua, oaguantakuaa ha ojapo hag̃ua iporãva. Ñande avei ñañehaʼãramo ñantende porã umi púnto prinsipál, jahechakuaáta mbaʼéichapa pe téma oñemyesakã ohóvo pe artíkulope. Péicha ñantende porãta mbaʼérepa tekotevẽ jasegi umi konsého oĩva pe puvlikasiónpe.

 La iñimportantevéva hína rejapo umi mbaʼe reaprendéva. Upévare restudia jave iporãta reñeporandu: “¿Tekotevẽpa akambia che lája térã umi méta arekóva? ¿Mbaʼéichapa ideprovéchota chéve ko konsého asolusiona hag̃ua peteĩ provléma térã adesidi porã hag̃ua? ¿Mbaʼéichapa ikatu aiporu upéva che rogapýpe, predikasiónpe ha kongregasiónpe?”. Eñemboʼe ha ejepyʼamongeta koʼã mbaʼére ha epensa mbaʼéicha javépa ikatu ideprovécho ndéve.

Restudiapa rire peteĩ kapítulo térã artíkulo, ejapo peteĩ rrepáso jahecha nemanduʼápa umi púnto iñimportantevévare. Upéva nepytyvõta opyta hag̃ua ne akãme pe informasión ha upéi reiporu hag̃ua.

Ñande jaservíva Jehovápe jareko hetaiterei mbaʼe jastudia vaʼerã. ¿Mbaʼe mbaʼépa restudiakuaa? Iporãta releéramo káda día pe folléto Ñahesaʼỹijo Ñandejára Ñeʼẽ ára ha ára. Ha rejepreparáramo umi rreunionrã umíva katuete ideprovechovéta ndéve. Oĩ avei ostudiáva umi puvlikasión osẽ vaʼekue oiko mboyve chugui Testígo, térã oleévo la Biblia upe semána oiporavo umi téxto ohesaʼỹijo porãsevéva.

¿Mbaʼépa rejapokuaa ndaikatúiramo restudiapa umi informasión oñehesaʼỹijótava pe semána rreunionhápe? Ani remarka markánte rekumpliségui reínte, térã ivaivéva katu ndereleeiete voi. Upéva rangue ehecha mbaʼe mbaʼépa ikatúta relee ha estudia porã umíva. Eñehaʼã ejapo upéva káda semána ha mbeguekatúpe eñemotiémpo rejeprepara hag̃ua entéro rreuniónpe g̃uarã.

Jehová oikuaa pe omoakãva hogapy ombaʼapo jejopy vaʼerãha omantene hag̃ua ifamíliape, upévare heʼi: “Ejapo ne rembiapo okapegua ha eprepara nde kokue” (Prov. 24:27). Péro umi ñande rogaygua tekotevẽ avei oñemoag̃ui Jehováre ha oikuaave chupe, ha upéva ndaikatúi ñambotapykue. Upéicha rupi la Biblia heʼi voi menakuéra ‘omoakã porã vaʼerãha ifamiliakuérape ha hogapy’ (1 Tim. 3:5, 12). ¿Mbaʼéichapa ikatúta ojapo upéva umi omoakãva hogapy? La Biblia heʼive: “Pe disernimiénto oipytyvõ oñemopyenda porã hag̃ua peteĩ óga” (Prov. 24:3).

¿Mbaʼéichapa ikatu reiporu pe disernimiénto reipytyvõ hag̃ua ne famíliape? Rerekóramo disernimiénto repilláta mbaʼe mbaʼépa oikotevẽ ne família ha rehechakuaáta mbaʼeichaitépa oĩ hikuái ijeroviápe.  ¿Mbaʼéichapa rejapokuaa upéva? Reñemongeta jave káda únondi eñehaʼã ejapysaka porã heʼívare hikuái. Eñeporandumína: “¿Ojeplagea ha ojekehápa jepi hikuái? ¿Haʼetépa ipyʼaróva hikuái hapicháre? ¿Omombaʼetereípa hikuái pe pláta?”. Resẽ jave repredika hendivekuéra, ¿haʼetépa otĩva hikuái heʼi hag̃ua haʼeha testígo de Jehová? Pelee ha pestudia jave la Biblia, ¿ovyʼápa hikuái térãpa ikaigue olee hag̃ua? ¿Omotenondépa hikuái Jehová servísio? Reñatende porã ha nembaʼerechakuaáramo repilláta mbaʼépa rejapo vaʼerã remombarete hag̃ua ne família jerovia.

Ejeporeka umi artíkulo osẽ vaʼekuére umi rrevísta ¡Despertad!, ha Ñemañaháme oñeʼẽva ne família oikotevẽvare. Emombeʼu chupekuéra mbaʼe pártepa pestudiáta ojeprepara hag̃ua hikuái. Pestudia jave ani rejaʼo ni remotĩ chupekuéra, upéva rangue mborayhúpe ehechauka mbaʼéichapa umi konsého oĩva umi rrevístape ikatu oipytyvõ ne famíliape. Eñehaʼã enterove topartisipa pe estúdio aja ha eipytyvõ chupekuéra ohechakuaa hag̃ua Ñandejára Ñeʼẽ ideprovechoitereiha (Sal. 19:7).

Heta hénte nomombaʼéiva Ñandejárape ojesareko ko univérsore, ha ohecha umi mbaʼe vai oikóva ko múndope, péro ojepyʼamongetáramo jepe koʼã mbaʼére, ndaikatúi ontende mbaʼéicha rupípa oiko umi mbaʼe. Umi ostudia meméva la Biblia ha ohejáva pe espíritu sánto odirihi chupekuéra katu idiferentete voi. Haʼekuéra ohechakuaa oexistiha ñande Apohare, hesakã chupekuéra mbaʼéichapa oñekumpli ohóvo umi profesía oĩva la Bíbliape, ha ontende mbaʼépa hína Ñandejára rembipota yvyporakuérape g̃uarã (Mar. 13:4-29; Rom. 1:20; Apoc. 12:12).

Péro ndovaléi ñañemombaʼeguasu jaikuaa haguére koʼã mbaʼe. Upéva rangue, jaleéramo la Biblia káda día ñanepytyvõ ñaneumílde hag̃ua (Deut. 17:18-20). Avei ñanemombarete ani hag̃ua “pe pekádo” ñanembotavy, ¿mbaʼérepa? Pórke jahayhu ha ñamombaʼéramo la Biblia, Satanás péicha péichante nañandereitymoʼãi iñuhãme (Heb. 2:1; 3:13; Col. 3:5-10). ‘Péicha ikatúta jaiko Jehová oipotaháicha, haʼe ñandeguerohory hag̃ua opa mbaʼépe. Ha jasegíta jajapo opaichagua tembiapo porã ha jaikuaa porãve Ñandejárape’ (Col. 1:10). Enterove jahupytyse upéva jalee jave la Biblia, ha ndaipóri mbaʼeve ikatúva ñambojoja upévare.