IÑIMPORTANTETEREI ñahendukuaa ikatu hag̃uáicha ñaaprende. Ha ndahaʼéi upéva añónte, ikatu voi jajesalva, oiko haguéicha umi isrraelítare. Oguenohẽ mboyve chupekuéra Egíptogui, Jehová omanda Moiséspe heʼi hag̃ua umi ansiáno Israelguápe mbaʼe mbaʼépa ojapo vaʼerã ani hag̃ua Jehová ánhel ojuka umi taʼýra ypykuépe (Éx. 12:21-23). Upéi umi ansiáno omombeʼu jey koʼã mbaʼe káda famíliape. Pe mensáhe ndojeskrivíri mamove, upévare umi isrraelíta ojapysaka porã vaʼerã pe ojeʼévare. ¿Ojapópa hikuái upéicha? La Biblia omombeʼu: “Entéro Israelgua ojapo opa mbaʼe Jehová heʼi hagueichaite Moisés ha Aarónpe” (Éx. 12:28, 50, 51). Ojapo haguére péicha, nomanói hikuái.

Koʼág̃a ñandéve ñaneraʼarõ hína peteĩ mbaʼe tuichaitevéva upévagui. Jehová ñandeprepara hína jajesalva hag̃ua Armagedónpe; ha umi rreunión rupive haʼe ñanerekomboʼe. Upéicha rupi ñañatende porã vaʼerã umi mbaʼe ojeʼévare kongregasiónpe. ¿Reaprovecha porãpa umi mbaʼe ojeʼéva upépe? Upéva odepende rehendu lájare.

¿Nemanduʼápa umi mbaʼe ojeʼévare? ¿Rejepokuaápa rejepyʼamongeta umi mbaʼe rehendúvare reiporu hag̃ua ndete voi umi konsého térã reipytyvõ hag̃ua nde rapichápe?

Jaaprovecha porã hag̃ua ojeʼéva rreunionhápe tekotevẽ japrepara ñane korasõ ñahendu hag̃ua. Jahechakuaa iñimportanteha upéva jaleévo upe oiko vaʼekue rréi Jehosafat tiémpope, haʼe oipota vaʼekue oñemombaʼeguasu Jehovápe hekoitépe ha pyʼaguasúpe odefende upéva. Jehosafat ogovernárõ guare Judá, omanda toñehundi umi taʼanga ha umi lugár oñemombaʼeguasuhápe umi ñandejára guaʼúpe. Upéi heʼi umi levíta, prínsipe ha saserdótepe omboʼe hag̃ua Ñandejára Léi entéro umi siudápe. Upéicharõ jepe noñehundipái umi lugár ojeadorahápe umi taʼanga (2 Crón. 17:6-9; 20:33). Umi lugárpe  oñemombaʼeguasu umi diós guaʼu ha oĩ avei heʼíva upépe omombaʼeguasuha Jehovápe. Koʼã mbaʼe vai hetaiterei tiémporema ojapo hikuái ha upévare ndaikatúi opa.

¿Mbaʼére piko umi hudío ojevy jey umi mbaʼe vaípe? La Biblia ombohovái: “Haʼekuéra ndopreparái ikorasõ iñeʼẽrendu hag̃ua Ñandejárape”. Jepe umi hudío ohendu pe Léi heʼíva, nokumplíri hikuái. Oiméne haʼekuéra heʼi: “Mombyryetereíma ningo opyta Jerusalén jaha hag̃ua upépe jajapo sakrifísio, japytántena koʼápe”. Péro añetehápe ndojeroviáinte hikuái Jehováre.

Pono ñandegueraha tape vaíre ko múndo aña, tekotevẽ japrepara ñane korasõ ikatu hag̃uáicha ñahendu ha ideprovécho ñandéve Jehová heʼíva. ¿Mbaʼépa heʼise japrepara ñane korasõ? Heʼise ñañemboʼe vaʼerãha Jehovápe; jajerure chupe tañanepytyvõ jajapysaka porã ha ñamombaʼe hag̃ua ojeʼéva rreunionhápe (Sal. 27:4; 95:2). Péicha jajapóramo ñamombaʼe ha jaagradeséta ñane ermanokuéra rembiapo, iñimperféktoramo jepe hikuái, Jehová ojevale hesekuéra ñanerekomboʼe hag̃ua. Avei jaagradeséta Ñandejárape umi mbaʼe porã ñaaprendévare, tahaʼe ipyahúva térã ñanemomanduʼa haguére umi mbaʼe jaikuaámava voi. Ñande jajapose hekoitépe Jehová rembipota, upévare jaʼe avei: “Ehechauka chéve nde rape ikatu hag̃uáicha aiko nde reipotaháicha. Chembopyʼapeteĩna amombaʼe hag̃ua nde réra” (Sal. 86:11).

Heta mbaʼére sapyʼánte ndaikatúi ñañekonsentra porã rreunionhápe. Ikatu jajepyʼapyeterei peteĩ mbaʼére, oĩ ijayvúva okápe térã salónpe voi, térã ñanderasy rupi ndaikatúi ñañatende porã. Tuvakuéra katu oñatende vaʼerã ifamília michĩvare. Upéicharõ, ¿mbaʼépa ñanepytyvõta ñañatende porã hag̃ua?

Tekotevẽ ñamaña pe diskursántere ñañekonsentra hag̃ua. Avei iporãta jaheka ha jaleéramo umi téxto heʼíva pe ermáno, jepe ikonosidoiterei lomímonte jalee vaʼerã. Sapyʼánte ñandekurióso rupi jajerese ñamaña oimeraẽ mbaʼére, péro upéicha jajapóramo nañañatendeporãmoʼãi ha hetaiterei mbaʼe ojeʼéva ojehasáta ñandehegui.

Oimérõ reñekevrantaiterei peteĩ mbaʼére ha ndaikatúi reñatende porã, rejerure vaʼerã Jehovápe tomeʼẽ ndéve pyʼaguapy (Sal. 94:19; Filip. 4:6, 7). Tekotevẽramo, ejerure jey jey chupe tanepytyvõ (Mat. 7:7, 8). Umi rreunión ningo peteĩ rregálo omeʼẽva ñandéve Jehová,  upévare ikatu rejerovia haʼe oipotaha ideprovécho ndéve (1 Juan 5:14, 15).

Oiméne katuete ñanemanduʼa peteĩ diskúrso ñandegustaiterei vaʼekuére. Upéicharõ jepe, ndahaʼéi hína umi mbaʼe ñandegustavéva la iñimportánteva. ¿Mbaʼérepa? Peteĩ diskúrso ikatu ñambojoja peteĩ viáhere, tapére ikatu jahecha heta lugár iporãitereíva, péro la iñimportánteva hína ñag̃uahẽ pe jahasehápe. Upéicha avei peteĩ diskúrsope: pe ermáno heʼi heta mbaʼe iporãva, péro haʼe ndoipotái jaikuaánte umi informasión, síno oipota jajedesidi jajapo Jehová heʼíva.

Por ehémplo ñahesaʼỹijomi pe diskúrso Josué ojapo vaʼekue, oĩva Josué 24:1-15-pe. Haʼe oipota vaʼekue umi isrraelíta oadora Jehovápe añoite ha omboykete pe taʼanga ñemombaʼeguasu. ¿Mbaʼérepa tekotevẽterei ojapo hikuái upéva? Pórke noñatendéiramo mbeguekatúpe pe rrelihión japu ikatu ogueraha chupekuéra tape vaíre, ha ipahápe opyta vaíta Jehová ndive. Péro ohendu rire Josuépe heʼi hikuái: “Ni mbaʼevéicharõ ore noromboykemoʼãi Jehovápe roservi hag̃ua umi ñandejára guaʼúpe, [...] ore roservíta Jehovápe”. Ha upeichaite ojapo hikuái (Jos. 24:16, 18, 31).

Rehendu jave peteĩ diskúrso, epensa mbaʼépa nemboʼese hína upéva. Eñatende mbaʼéichapa pe diskursánte oiporu ehémplo ha téxto oipytyvõva chupe omog̃uahẽ hag̃ua ñandéve pe informasión. Avei iporãta reñeporandúramo mbaʼéichapa nde ikatu rejapo upe heʼíva.

Rreunionhápe oĩ párte enterove ikatuhápe ñakomenta, por ehémplo jastudia jave Ñemañaha, ojejapo jave Ñandejára Ñeʼẽ Ñehesaʼỹijo, ha Aty Ñanemboʼéva Japredika Hag̃ua.

Ojejapo jave koʼã párte ideprovechovéta ñandéve jajapysaka porãramo mbaʼéichapa pe omoakãva ojapo umi porandu ha omyesakã umi párte iñimportantevéva. Ikatu rembohovái nde pyʼapýpe umi porandu ojejapóva ha rejapysaka ótro okomenta jave. Péicha ikatúta hesakã porãve ndéve peteĩ téma reikuaámava voi, ha nde rekomentávo remokyreʼỹta avei umi ótro ermánope (Rom. 1:12).

Rejepreparáramo rreunionrã ikatúta rekomenta ha reñatende porãve. Ndaikatúiramo restudiapa pe informasión oñehesaʼỹijótava, eñehaʼã ehechaʼimi jepe mbaʼe mbaʼérehepa oñeñeʼẽta.

Ñaime jave aty guasuhápe ikatu ijetuʼuve ñañatende porã hag̃ua, oĩ rupi hetave mbaʼe ikatúva ñandedistrae. ¿Mbaʼépa ikatu jajapo jajapysaka porã hag̃ua?

Iñimportánte japytuʼu porã jaha mboyve. Iporãta avei ñamañáramo pe prográmare jaikuaa hag̃ua pe téma ha mbaʼe mbaʼérehepa oñeñeʼẽta káda día. Avei reheka vaʼerã umi téxto ojeleéva, ha hetápe oipytyvõ oñekonsentra hag̃ua oanota mimíramo umi idéa iñimportantevéva. Rehokuévo ha rejukuévo asambleahápe ikatu reñemongeta ótrondi umi mbaʼe reaprende vaʼekuére. Koʼã mbaʼe rejapóramo nepytyvõta opyta hag̃ua ne akãme umi mbaʼe ojeʼéva.

Umi oservíva Jehovápe oipytyvõ ifamíliape, umi michĩvévape jepe ikatu hag̃uáicha ‘iñarandu ojesalva hag̃ua’, upearã ogueraha chupekuéra rreunión ha asambleahápe (2 Tim. 3:15). Umi mitãme ijetuʼuve oñatende hag̃ua, upévare tuvakuéra tekotevẽ ohecha mbaʼéichapa oipytyvõkuaa chupekuéra. Ikatu rejapo koʼã mbaʼe jahechátava.

Peime jave pende rógape, pemoĩ peteĩ óra peñensaja hag̃ua umi mitãndi peimeramoguáicha salónpe. Emboguapy chupekuéra ha pelee térã pemaña umi divúho oĩva ñane puvlikasionkuérape. Rreunión jave ani pemeʼẽ chupe hugéte peipotáguinte opyta peteĩ hendápe. Umi isrraelíta yma guaréicha, haʼekuéra oho rreunionhápe “ohendu ha oaprende hag̃ua” (Deut. 31:12). Michĩvéramo jepe ifamília oĩ túva ohechakuaáva ideprovechotaha omeʼẽrõ chupe umi puvlikasión ojeporútava. Ha okakuaavévo ohóvo peipytyvõ vaʼerã chupekuéra tojeprepara okomenta hag̃ua rreunionhápe.

Ñandejára Ñeʼẽ heʼívare jahechakuaa iñimportanteha ñañatende porã ñaneñeʼẽrendu hag̃ua Jehovápe, upéicha heʼi vaʼekue Moisés umi isrraelítape: “Amoĩ ne renondépe mokõi tape, peteĩva ndegueraha jeikovépe ha pe ótro ñemanóme. Eiporavo peteĩ, upe reiporavóva omeʼẽta ndéve vendisión térã maldisión. Eiporavóke jeikove, [...] ehayhu Ñandejára Jehovápe, ejapysaka iñeʼẽ rehe ha ejepytaso ijykére” (Deut. 30:19, 20). Koʼág̃a iñimportanteterei avei jajapysaka Jehová heʼívare ha upéi ñakumpli, upéicha añoite haʼe ñandeguerohorýta ha jaikovéta opa árare. Jahechaháicha iñimportánte hína jasegi pe konsého Jesús omeʼẽ vaʼekue, haʼe heʼi: “Pejapysaka porã vaʼerã” (Luc. 8:18).