OĨ HETA porandu ojoguáva umi sóvre oñemboty porãvape. ¿Mbaʼérepa? Ñande jahecha ijapénte, péro la iñimportánteva hína oĩ hyepýpe. Umi porandu upéicha jepi avei: la añetehápe iñimportánteva ndahaʼéi hína pe pregúntante, síno pe oĩva pe persóna pyʼapýpe, mbaʼépa omomýi chupe oikuaase hag̃ua upéva.

Rembohovái porã hag̃ua tekotevẽ reikuaa raẽ mboy informasiónpa remeʼẽta ha mbaʼéichapa eréta upéva. Ha pe persóna oipotáramo jepe pyaʼe rembohovái chupe, ani rejapura (Juan 16:12). Jesús heʼi haguéicha ijapostolkuérape, sapyʼánte umi oporandúva ñandéve natekotevẽi oikuaa pe informasión, térã nokonveníri voi chupe oikuaa (Hech. 1:6, 7).

La Biblia heʼi: “Pene ñeʼẽ akóinte iporã ha ijuky vaʼerã, peikuaa hag̃ua mbaʼéichapa pembohováita entéro ombaʼeporandúvape peẽme” (Col. 4:6). Upéicharõ, rembohováita jave ndahaʼéi la erétavante la iñimportánteva, síno mbaʼéichapa eréta upéva.

Umi saduséo otantea hag̃ua Jesúspe ou oporandu chupe pe ñemoingove jeýre. Haʼekuéra omombeʼu oĩha peteĩ kuña omenda vaʼekue siete vése, ha oporandu chupe mávandipa opytáta pe kuña ág̃a oñemoingove jey vove. Péro Jesús oikuaa haʼekuéra ndogueroviaiha umi omanóva opuʼã jeytaha. Upévare ombohováivo pe porandu ohechauka chupekuéra ojavyha. Omombeʼu chupekuéra peteĩ káso oĩva Ñandejára Ñeʼẽme ha upéva rupive ojurumbotyete chupekuéra. Jesús omyesakã porã umi saduséope Ñandejára ikatuha omoingove jey umi omano vaʼekuépe; ha upévare noñanimavéima oporandu hikuái mbaʼevete (Luc. 20:27-40).

Rerresponde hag̃ua peteĩ persónape tekotevẽ reikuaa raẽ mbaʼépa opensa ha oipyʼapy chupe. Por ehémplo ne kompañéro de traváho térã de eskuéla oporandúramo ndéve mbaʼérepa ndajafestehái pe navida, ¿mbaʼépa añetehápe oikuaase hína haʼe? ¿Oikuaasépa mbaʼépa heʼi la Biblia pe navidáre, térãpa oikuaase ikatúpa ñande jajediverti? Iporãta reporandúramo chupe mbaʼérepa oporandu ndéve upéva, upéicha ikatúta rembohovái porã chupe. Ikatu reaprovecha pe oportunida rehechauka hag̃ua chupe mbaʼépa heʼi la Biblia, ha mbaʼéichapa umi konsého  ñanepytyvõ jajehekýi hag̃ua heta mbaʼe vai oguerúvagui koʼãichagua fiésta.

Ñamoĩ chupe koléhiope otokaha ndéve remombeʼu mbykymi ne kompañerokuéra renondépe mbaʼe kreénsiapa oguereko testígo de Jehová. Upe rire oĩta katuete umi ojapóva porandu. Rehechakuaáramo isinseroha, iporãta rembohováiramo mbykymi ha hesakuaitépe. Péro, ¿mbaʼépa ikatu rejapo rehechakuaáramo haʼe ogueroviaha umi japu ojeʼéva Testigokuérare? Rembohovái mboyve chupe iporandu, remombeʼukuaa mbaʼéicha rupípa heta hénte oguerovia umi mbaʼe, ha mbaʼérepa ñande testígo de Jehová jahecha iporãveha jajapo la Biblia heʼíva. Ani rejagarra vai la oporandúva ndéve, upéva rangue repensa vaʼerã haʼe añetehápe oikuaaseha hína mbaʼépa oguerovia testígo de Jehová. Ha jepe ikatu nderejavaisénte hína umi hénte rovake, nde ikatu reaprovecha pe oportunida, ¿maʼerãpa? Remyesakã hag̃ua enterovépe mbaʼépa ñande jaguerovia, ha avei umi enseñánsa oñemopyendaha la Bíbliape.

¿Mbaʼépa ikatu rejapo ne patrón nomeʼẽséiramo ndéve permíso reho hag̃ua asambleahápe? Tenonderã reñemoĩ vaʼerã ilugárpe ha eñehaʼã entende pe haʼe opensáva. Por ehémplo, ¿mbaʼére piko nereñekuaveʼẽi rembaʼapo hag̃ua óra éxtra? Térã ikatu remombeʼu chupe upépe rehoha rehendu informasión nepytyvõva neonrrádo hag̃ua. Péicha nembaʼerechakuaáramo ne patróndi haʼe ikatu avei omeʼẽse ndéve permíso. Péro epensami ne patrón ojerureha ndéve ndejapu térã remonda hag̃ua, ¿mbaʼéichapa rembohováita chupe? Ikatu derechoite ere ne patrónpe nderejapomoʼãiha upéva ha emyesakã mbaʼépa heʼi la Biblia, péro iporãvéta hína eréramo chupe: “Epensamína, koʼág̃a che chejapúramo nde ejerure rupi chéve, moõ reikuaa ág̃a ótrope ndachejapumoʼãipa avei ndéve”.

Ikatu avei koléhiope nde profesór heʼi ndéve rejapo hag̃ua peteĩ mbaʼe Jehová ndoguerohorýiva, ¿mbaʼéichapa reñedefendéta? Nemanduʼa vaʼerã nde profesór nopensaiha nde repensaháicha, ha avei haʼe oĩha rresponsávle pe ojejapóvare upépe. Upévare tekotevẽ rehechakuaa koʼã mbaʼe reñeʼẽ mboyve hendive: 1) mbaʼépa oipyʼapy chupe, 2) rehechauka vaʼerãha rerrespetaha chupe remombeʼúvo mbaʼérepa ndaikatúi rejapo pe ojeruréva, ha 3) ehechauka  redesidimaha nderejapomoʼãiha peteĩ mbaʼe Jehovápe ndogustáiva. Péicha jahecha resẽ porã hag̃ua tekotevẽha rejeprepara porã, ha ndahaʼéi erénteva pyaʼe pyaʼe mbaʼépa reguerovia (Prov. 15:28). Ha oimérõ nemitã gueteri, nde tuvakuéra ikatu nepytyvõ reprepara hag̃ua la erétava.

Ikatu avei otoka ndéve redefende umi mbaʼe regueroviáva umi mburuvicha renondépe, tahaʼe peteĩ polisía térã peteĩ hués. Ikatu oporandu ndéve mbaʼérepa ñande testígo de Jehová ndajajeheʼái polítikare, ndajajapói servísio militár térã oikuaase mbaʼérepa ndajafestehái umi fiésta patriótika. ¿Mbaʼéicha rembohovái vaʼerã? La Biblia heʼi: “Pejapo vaʼerã upéva pyʼaporãme ha pehechauka perrespetaha pende pyʼaite guive pende rapichakuérape” (1 Ped. 3:15). Repensa vaʼerã avei mbaʼérepa oikuaase umi mbaʼe ha eñehaʼã entende pe opensa lája. ¿Mbaʼépa ikatu rejapove? Tekotevẽrõ guare apóstol Pablo ojevale vaʼekue umi léi rromána rehe ombovale hag̃ua iderécho, ha nde avei ikatu rejapo upéva (Hech. 22:25-29). Remombeʼukuaa ñande jasegiha umi kristiáno primer siglopegua ehémplo, ha heta Testígo ñane tiempopegua ohasa hague avei peichagua situasiónre. Térã ikatu ere chupe la Biblia omokyreʼỹha kristianokuérape orrespeta hag̃ua umi léi, noĩrima guive Ñandejára mandamiénto kóntrape (Rom. 13:1-14). Reguerekóramo enkuénta koʼã mbaʼe remyesakãta jave la Biblia heʼíva, ikatu umi autorida ontendeve mbaʼérepa ñande ñanediferénte.

Rembohovái mboyve peteĩ porandu tekotevẽ avei reikuaa raẽ mbaʼépa opensa pe persóna la Bíbliare. Upéicha ojapo vaʼekue Jesús umi saduséo oporandúrõ guare chupe pe ñemoingove jeýre. Jesús oikuaa haʼekuéra ojeroviaha umi lívro oskrivi vaʼekuére Moisés añónte, upévare heʼi chupekuéra: “Moisés voi ohechauka umi omano vaʼekue oikove jeytaha” (Luc. 20:37). Iporã resegi avei iñehémplo ha reiporu umi párte upe persóna oikuaa ha ogueroviáva.

Péro, ¿mbaʼépa ikatu rejapo ndojeroviáiramo la Bíbliare? Upéicha jave ikatu resegi apóstol Pablo ehémplo. Haʼe ojapórõ guare idiskúrso Areópagope ndeʼíri chupekuéra direktoite: “Ñandejára Ñeʼẽme heʼi...”, péro opillaʼỹre hikuái omyesakã heta mbaʼe oĩva la Bíbliape (Hech. 17:22-31). Oĩ hénte ndogueroviáiva la Biblia heʼíva, upévare revisita rire chupe heta vésemante ikatúta relee peteĩ téxto. Upévo erénte rangue la Biblia haʼeha Ñandejára Ñeʼẽ, ikatu remyesakã raẽ mbaʼérepa ideprovécho  ha mbaʼérepa ogueroviakuaa la Biblia heʼíva. Péro aníke nderesarái nde rehoha reñeʼẽ hag̃ua Ñandejára promésare, upévare mbeguekatúpe reipytyvõ vaʼerã pe ogajárape haʼete voi ohechakuaa hag̃ua la Biblia omboʼéva, pórke upéva katuete opokovéta ikorasõre (Heb. 4:12).

Jehová ningo ndotratavaíri avavépe, upéva rangue akóinte imbaʼeporã opavavéndi. Upéicha rupi haʼe omanda isiervokuérape: “Pene ñeʼẽ akóinte iporã ha ijuky vaʼerã” (Col. 4:6; Éx. 34:6). Péva heʼise ñanembaʼeporã vaʼerãha ñande rapichándi, ñandetrata vaíramo jepe hikuái. Umi mbaʼe jaʼéva ohechauka vaʼerã ñanderrespetuosoha, ha ni mbaʼevéicharõ ndovaléi ñanemaledukádo ni ñaneñeʼẽ arhél.

Umi hénte ningo ikueráima ojetrata vai ha oaguanta hague heta mbaʼe ijetuʼúva káda día. Upévare ikatu iñeʼẽ arhél ñandéve ñag̃uahẽ jave japredika hag̃ua. ¿Mbaʼéichapa ñambohovái vaʼerã? La Biblia heʼi: “Ñambohováiramo pyʼaguapýpe porã ñande rapichápe, ikatu ñambopochyjera chupe” (Prov. 15:1; 25:15). Ha ñañeʼẽramo torypápe, umi hénte opensa vaíva ñanderehe jepe ikatu okambia opensa lája. Ko múndope umi hénte opárupi ohecha ojetrata vaíva ha iñeʼẽ arhélvamante, upévare ñanderorýramo ñag̃uahẽ jave japredika, haʼekuéra ikatu hína ñanerenduse.

Ñande ndajahái jajodiskuti hag̃ua umi ndorrespetáivandi la Biblia heʼíva. Upéva rangue jatopase peteĩ ñanerendu porãva jaikuaauka hag̃ua chupe umi notísia porã. Upéicharõ jepe, oĩramo ijarhélva ñandéve, aníke ñanderesarái jatrata porã vaʼerãha opavavépe ha jahechauka ñaimeha konvensído Ñandejára promésa oñekumplitaha (1 Tes. 1:5).

Ñamoĩ chupe ne estudiánte térã peteĩ ermáno ou ojerure ndéve konsého ha heʼi: “¿Mbaʼépa nde rekalkula, mbaʼépa ikatu ajapo ko situasiónpe?”, ¿mbaʼépa eréta chupe? Oiméne nde reikuaáma mbaʼépa redesidíta reimérire ilugárpe, péro nemanduʼa vaʼerã káda uno jajechataha Ñandejárandi umi mbaʼe jadesidívare (Gál. 6:5). Apóstol Pablo omokyreʼỹ vaʼekue umi héntepe iñeʼẽrendu hag̃ua Ñandejárape ojeroviágui hese (Rom. 16:26). Ha upéva ehémplo porã opavavépe g̃uarã, pórke umi odesidíva ojapo peteĩ mbaʼe oñemoĩ porãséguinte ótrondi, oservi hína yvypórape ha ndahaʼéi Ñandejárape (Gál. 1:10). Upéicharõ, nereipytyvõmoʼãi pe persónape erénteramo chupe direktoite mbaʼépa ojapo vaʼerã.

 ¿Mbaʼéichapa upéicharõ rembohovái vaʼerã? Ikatu remomanduʼa chupe peteĩ konsého vívlikore térã Ñandejára siérvo rembiasakuére. Iporãta remboʼéramo mbaʼéichapa haʼete ikatu oheka umi informasión. Ikatu voi remyesakã mbaʼéichapa ideprovécho ñandéve umi konsého, péro ndovaléi ere: “Péichako rejapo vaʼerã”. Upéva rangue eheja haʼe tohechakuaa mbaʼéichapa umi konsého oipytyvõkuaa chupe odesidi porã hag̃ua. Emokyreʼỹ avei pe persónape ohechakuaa hag̃ua mbaʼépa Jehová ohaʼarõ chugui. Upéicha ‘haʼe ojepokuaáta oiporu iñakã ha ikatupyrýtama ijeheguiete oikuaa hag̃ua mbaʼépa iporã ha mbaʼépa ivai’ (Heb. 5:14).

Umi rreunionhápe oĩ jepi umi párte opavave ikatuhápe japartisipa. ¿Mbaʼéichapa ñakomenta vaʼerã? Jajapo vaʼerã upéva ñamombaʼeguasu ha jaguerohory hag̃ua Jehovápe. Rréi David ombotuicha vaʼekue Jehovápe “oĩ jave umi hénte atýpe” (Sal. 26:12). Ñande avei ‘ñañomokyreʼỹ jajapo hag̃ua iporãva’ ñane komentário rupive (Heb. 10:23-25). Upéicha rupi ideprovéchota ndéve restudiáramo pe informasión oñehesaʼỹijótava.

Rejepokuaa vaʼerã rekomenta mbykymi ha hesakuaitépe, péicha ndahasymoʼãi oñentende hag̃ua. Reñeʼẽ rangue pe párrafo kompletoitére, eiporavo peteĩ púnto ha upévarente reñeʼẽ, péicha umi ótro ikatúta avei okomenta. Iporãitereíta avei rerresaltáramo mbaʼéichapa umi téxto omopyenda pe párrafo heʼíva. Ani releénte pe informasión, eñehaʼã guei ekomenta ne ñeʼẽtépe ha umi mbaʼe eréva tosẽ ne korasõite guive. Ani rejepyʼapy rejavýramo g̃uarã, upéva ningo sapyʼánte oikónte voi enterovére.

Jahecha upéicharõ ñambohovái porã hag̃ua ndahaʼéi jaikuaánte vaʼerã mbaʼépa jaʼéta. Tekotevẽ jaikuaa raẽ mbaʼépa omomýi pe persónape ombaʼeporandu hag̃ua ñandéve. Reñehaʼãramo reikuaa upéva, rembohováita hekoitépe ha pe eréva opokóta ikorasõre (Prov. 15:23).