KAPÍTULO 7

Aimémapa asẽ hag̃uáicha ógagui?

“Oĩ ningo cheapoʼíva voi aiko haguére che tuvakuérandi. Oimoʼã nasẽi aja ógagui chemitãkuñaʼietereiha gueteri.” (Carla)

“Che tuvakuéra ndohejái voi ajapo mbaʼeve chejehegui rei. Chemorrenegaiterei ningo upéva ha ahaséntema voi ógagui.” (Katia)

HETA mitãrusu odesidise ijeheguíntema mbaʼépa ojapóta ha ndoikoséi opa árare ituvakuéra poguýpe. Jahecha haguéicha kapítulo 3-pe, Ñandejára voi heʼi kuimbaʼe ha kuña ohejataha hóga ha orekotaha ifamília (Génesis 2:23, 24; Marcos 10:7, 8). Ikatúmapa resẽ nde rógagui ha redesidi ndejeheguíntema mbaʼépa rejapóta? Mbaʼéicha ikatu reikuaa? Upearã tekotevẽ rembohovái mbohapy porandu. Jahechami.

 Mbaʼérepa rehose nde rógagui?

Emarka mbaʼérepa rehose nde rógagui. Eiporavo umi iñimportantevéva ndéve g̃uarã.

․․․․․ Nemonguerái umi provléma oĩva nde rogapýpe

․․․․․ Redesidise ndejeheguíntema mbaʼépa rejapóta

․․․․․ Rejechaukase ne amigokuérape

․․․․․ Reipytyvõse peteĩ ne amígope oikóva haʼeño

․․․․․ Reipytyvõse voluntárioramo ambue hendápe

․․․․․ Rehecha hag̃ua reikokuaátapa neaño

․․․․․ Ndereikosevéima nde tuvakuéra ári

․․․․․ Ambue ․․․․․

Koʼã mbaʼe ikatu iporã térã ivai. Upévare reñeporanduvaʼerã: “Mbaʼérepa añetehápe ahase ógagui?”. Oimérõ reikose ne akãre ha ndereipotavéima ojeʼe ndéve mbaʼépa rejapovaʼerã, katuete rejecha vaíta.

Jahechamína koʼã mitãkuña rembiasakue. Orekórõ guare 20 áño, Daniela osẽ hógagui oiko hag̃ua haʼeño. Haʼe heʼi: “Ndaikatumoʼãi voínte rejapo opa mbaʼe rejaposéva. Rembaʼapo ha repagavaʼerã heta mbaʼe ha umíva neñapytĩete”. Carmen oho oiko ambue tetãme 6 mése aja, ha heʼi: “Ahasa porã ningo, péro koʼẽ guive ambaʼapovaʼerã. Amopotĩ che róga, che korapy, amyatyrõ umi mbaʼe oñembyaíva, ajaojohéi. Amo ipahápe nahembyvéima chéve tiémpo ni apytuʼu hag̃ua”.

Ani rejapura reho hag̃ua nde rógagui (Proverbios 29:20). Ou porãtarõ jepe ndéve reiko neaño, reikuaa raẽ vaʼerã heta mbaʼe rejevale hag̃ua ndejehe. Mbaʼe rehépa ñañeʼẽ?

Ajevalekuaámapa chejehe?

Epensamína rejapotaha peteĩ viáhe puku reho hag̃ua peteĩ lugár reikuaaʼỹháme. Resẽtantepa reho rejepreparaʼỹre? Katuete rehecha raẽta mbaʼépa reikotevẽta. Pór ehémplo,  nde aorã, ne matularã, ha rehechavaʼerã mbaʼe tapépa rejagarráta. Ikatu voi regueraha peteĩ mapaʼi rehecha hag̃ua reho porãpa. Upéicha avei rehóta jave nde rógagui: rejeprepara raẽ vaʼerã. Péro heta mitãrusu ndojapói upéva, ohóntema hógagui oikuaaʼỹre heta mbaʼe.

Rréi Salomón heʼivaʼekue: ‘Iñakãguapýva opensa raẽ ojapo hag̃ua peteĩ mbaʼe’ (Proverbios 14:15, NM). Ejepyʼamongetami koʼã mbaʼére rehecha hag̃ua ikatútapa rejevale ndejehe. Emoĩ (✔) umi mbaʼe rejapokuaámava ykére, ha (X) umi mbaʼe ikatúvape rembaʼapove.

□ Eiporukuaa nde pláta. Silvia, orekóva 19 áño heʼi: “Chéngo ndajoguáiva mbaʼeve che plátagui. Che tuvakuérante omoĩmba chéve aikotevẽva guive. Péro ahárõ ógagui chetéma ajecháta ha akyhyje aiporu vaírõ g̃uarã che pláta”. Mbaʼépa ikatu rejapo reiporukuaa hag̃ua nde pláta?

La Biblia heʼi: ‘Iñarandúva ohendu ojeʼéva chupe ha oikuaave heta mbaʼe’ (Proverbios 1:5). Pór ehémplo nde tuvakuéra ikatu nepytyvõ reiporukuaa hag̃ua nde pláta. Eporandúna chupekuéra mboýpa ogasta un més aja alkilér, tembiʼu, pasáhe térã kóchere. Haʼekuéra omombeʼúta ndéve mbaʼéichapa omohenda ipláta. Rehenduvaʼerã chupekuéra, upéicha  resẽ vove nde rógagui reikuaátama mbaʼéichapa reiporuvaʼerã nde pirapire. a

□ Tembiapo ogapypegua. Reikóramo neaño, rejapokuaánepa umi tembiapo ogapypegua? Bruno orekóva 17 áño heʼi: “Aikóramo cheaño ajoheivaʼerã che ao, ha upéva ndachegustaiete voi”. Aarón oreko 20 áño, haʼe heʼíva ikatu nepytyvõ: “Una semána aja etantea ejapo opa mbaʼe ndejeheguíntema. Ejogua reikotevẽva ha epaga nde volsíllogui, eñekosina, ejaojohéi, eplancha nde ao, emopotĩ nde koty, ha reviahátarõ ani reiko redepende nde tuvakuérare ndegueraha hag̃ua”. Upéicha reikokuaátama neaño ha remombaʼevéta nde tuvakuéra ojapóva nderehehápe.

□ Ejogueraha porã nde rapichándi. Mbaʼéichapa rejogueraha ne ermáno ha nde tuvakuérandi? Oimérõ manterei peiko vai ikatu repensa iporãvetaha reváramo peteĩ ne amígondi. Péro redesidi mboyve upéva, eñatendemi Eva heʼívare: “Mokõi che amíga oho oiko oñondive. Haʼekuéra ojososiaite vaʼekue, péro upéinte ou noñontendevéi. Peteĩva hendápe porã oreko ikosakuéra ha oñehaʼã ombaʼapove Ñandejárape g̃uarã. Pe ótra katu sarambikuépe oreko ikoty ha noñehaʼãguasúi Ñandejára servísiope”.

 Erika, orekóva 18 áño, heʼíva nepytyvõta: “Reiko aja nde rógape eaprende mbaʼéichapa retratavaʼerã nde rapichápe, ehechakuaa ndovaleiha reñemohatã nde erévapente ha reñehaʼãvaʼerãha resolusiona oimeraẽ provléma. Heta ohóva hógagui ojoavy meme rupi ituvakuérandi upéi ojepokuaa odiparántema iprovlémagui ha noñehaʼãi osolusiona”.

□ Ejapo umi mbaʼe nemoag̃uivétava Ñandejárare. Heta mitãrusu oho hógagui ndosegiséigui ituvakuéra rrelihión. Ha oĩ osẽ rire hógagui oñehaʼãmbaitéva ostudia meme la Biblia ha ojapo porã hembiapo Ñandejárape g̃uarã, péro upéi ou ikaigue ha omboykepaite umíva. Ha nde, mbaʼépa rejapokuaa ani hag̃ua ikangy nde jerovia? (1 Timoteo 1:19.) b

Ñandejára oipota ndete rehechakuaa añeteha umi mbaʼe regueroviáva (Romanos 12:1, 2). Upearã akóinte releevaʼerã la Biblia, resẽ meme repredika ha ani refalta rreunionhápe. Ikatu voi rehai peteĩ kalendáriore mbaʼe díapa rejapóta koʼã mbaʼe. Ha un més aja ehecha rekumplítapa, nde tuvakuéra oikoʼỹre neatõi manterei.

Péro oĩ gueteri peteĩ porandu tekotevẽva rembohovái.

Mbaʼépa rehupytyse?

Mbaʼe mbaʼépa rehupytyse ajeve rehose nde rógagui?  Noiméipa rediparasénte provlémagui térã reikose neakãre? Oiméramo upéicha, haʼete ku remaneháva rehóvo ha remañánteva nde rretrovisór rehe: rejesarekónte umi mbaʼe rehejávare nde rapykuépe remaña rangue ne renonderãre. Ajépa ipeligrosoite! Upévare rejedesidíramo resẽ nde rógagui rehovaʼerã rehupytységui peteĩ mbaʼe iporãva.

Heta testígo de Jehová oho hógagui opredika hag̃ua oñekotevẽhápe hetãme térã ambue tetãme. Oĩ ohóva ombaʼapo sukursálpe ýrõ oipytyvõ oñemopuʼã hag̃ua Salón del Reino. Ambue katu osẽ hógagui oikose rupi haʼeño omenda mboyvemi. c

Tahaʼe haʼéva upe rehupytyséva, repensa porã vaʼerã resẽ mboyve nde rógagui. La Biblia heʼi voi: “Ikatupyrýva rembiapo, mbaʼe porã memete, ha umi vai vaínte ombaʼapóva opa mboriahúpe” (Proverbios 21:5). Rehenduvaʼerã avei umi konsého omeʼẽva ndéve nde tuvakuéra (Proverbios 23:22). Ejerure Ñandejárape tanepytyvõ redesidi porã hag̃ua ha eñehaʼã ejapo umi mbaʼe ojeʼevaʼekue ko kapítulope.

Upéicharõ, reñeporandu rangue: “Ikatúmapa aha ógagui?”, iñimportanteve reñeporandu: “Ikatúmapa añemantene chejupe?”. Oiméramo upéicha, rehejakuaáma ne rráncho ha ejapo nde raperã.

[Nóta]

TÉYSTO OĨVA LA BÍBLIAPE

‘Pe kuimbaʼe ohejavaʼerã isy ha itúvape.’ (Mateo 19:5, NM)

PETEĨ KONSÉHO

Uno térã dos mése aja etantea epaga nde tuvakuérape tembiʼu, alkilér ha umi mbaʼe ogastávare nderehehápe. Nderejaposéiramo térã ijetuʼúrõ ndéve, ndaikatúi gueteri reiko neaño.

REIKUAÁPARAʼE?

Revyʼaséramo, rehechavaʼerã mbaʼérepa añetehápe rehose nde rógagui ha ani vyroreírente reho.

UMI MBAʼE AJAPÓTAVA!

Asẽse ógagui ahupytységui koʼã mbaʼe: ․․․․․

Mbaʼépa aporanduse che ru térã che sýpe ko témare? ․․․․․

NDÉPA MBAʼE ERE?

● Oĩ mimíramo jepe provléma nde rogapýpe, mbaʼépepa nepytyvõta repytavéramo reiko nde tuvakuérandi?

● Mbaʼépepa ikatu reipytyvõ nde tuvakuérape reiko aja nde rógape? Ha mbaʼéichapa upéva ideprovéchota ndéve reiko vove neaño?

[Komentário oĩva páhina 52-pe]

“Enterove ningo jadesidise ñandejeheguíntema mbaʼépa jajapóta. Péro rehosérõ nde rógagui nderejaposéiguinte nde tuvakuéra heʼíva, rehechaukáta nemitãʼireikoitiha”. (Aarón)

[Taʼanga oĩva páhina 50 ha 51-pe]

Rejapo hag̃ua peteĩ viáhe puku rejeprepara porã vaʼerã. Ha resẽ mboyve nde rógagui tekotevẽ avei reikuaa heta mbaʼe