KAPÍTULO 12

Mbaʼépa ajapovaʼerã ajeroviave hag̃ua chejehe?

Sí No

Reñemaña jave espéhope, ndegustápa upe rehecháva? □ □

Oĩpa peteĩ mbaʼe rejapokuaáva ha nembovyʼáva? □ □

Regueropuʼakápa oĩ jave ndejopýva mbaʼe vairã? □ □

Ndepochýpa ojeʼéramo ndéve mbaʼépepa rembaʼapovevaʼerã? □ □

Reaguantápa oĩ jave oñeʼẽ vaíva nderehe? □ □

Reñandúpa nde rapichakuéra nderayhuha? □ □

Reñangarekópa ndejehe neresãi hag̃ua? □ □

Revyʼápa oho porã jave ótrope? □ □

Ikatúpa ere osẽ porãha ndéve umi mbaʼe rejapóva? □ □

Heta mitãrusu ombohovái “No” koʼã porandu, ndojeroviái rupi ijehe ha ndohechakuaáigui umi mbaʼe porã ojapóva. Ko kapítulo nepytyvõta oimérõ nde avei repensa upéicha.

 NDEPYʼAPYETEREÍPA ne pínta, umi mbaʼe rejapóva ha nde rapichakuéra opensáva nderehe? Oiméramo péicha, ndahaʼéi neaño rehasáva koʼã mbaʼe, oĩ heta mitãrusu oñeñandúva upéicha.

“Chekueráima nosẽporãigui chéve mbaʼeve, haʼe ha ajapóvante voi osẽ vai chéve. Tódo el día apensa umívare.” (Leticia.)

“Reñemoporãvérõ jepe oĩ katuete iporãve jeýva ndehegui.” (Ana.)

“Aime jave che rapichakuérandi ndajeroviaiete voi chejehe. Akyhyjeterei ningo ojeʼérõ g̃uarã cherehe ndavaleiha mbaʼeverã.” (Raquel.)

Oimérõ repensa avei upéicha, ani rejepyʼapy. Nde ikatu rembohovái ha resolusiona ko provléma. Jahechamína mbohapy mbaʼe ikatúva rejapo rejeroviave hag̃ua ndejehe.

Eipytyvõ nde rapichápe

La Biblia heʼi: ‘Javyʼaiteve ñameʼẽvo, ñandéve oñemeʼẽ rangue’ (Hechos 20:35, NM).

Mbaʼépa heʼise: Eipytyvõ nde rapichápe ha reñeñandu porãta. Mbaʼérepa? Proverbios 11:25 heʼi: ‘Imbaʼeporãva oñakãrapuʼã ha ipojerávape oñemyengovia porãne’. Katuete revyʼáta reipytyvõramo nde rapichápe. Ha oiméramo nde testígo de Jehová, koʼýte reñeñandu porãta remombeʼúramo Ñandejára Rréino ojapótava (Isaías 52:7).

“Añehaʼã ahecha mbaʼépa ikatu ajapo che rapichakuéra rehehápe, koʼýte kongregasiónpe. Aipytyvõramo ótrope ningo avyʼaiterei.” (Brenda.)

“Ñamboʼéramo Ñandejára Ñeʼẽ tuicha ñañeñandu porãve,  jajesarekovégui ñande rapicha oikotevẽvare ha ndajaikói rupi ñapensa ñandejehénte.” (Javier.)

Nemanduʼáke: Ani reipytyvõ nde rapichápe renohẽ hag̃uánte chugui provécho (Mateo 6:2-4). Nderovamokõirõ katuete ojepilláta nderehe, ha reiete reñehaʼãta. Nderehupytymoʼãi mbaʼeve nderejapóigui pyʼaporãme (1 Tesalonicenses 2:5, 6).

Rejapo hag̃ua: Mávapepa reipytyvõraʼe? Ehai héra ha mbaʼépa rejapo hesehápe.

․․․․․

Mbaʼéichapa reñeñandúraʼe upe rire?

․․․․․

Mávapepa avei reipytyvõkuaa ha mbaʼépa ikatu rejapo hesehápe?

․․․․․

Eheka ne amigorã

La Biblia heʼi: ‘Ñane angirũ tee opa araitépe oporohayhu, ha ñane pehẽnguéicha ñanepytyvõ jajejopy vai jave’ (Proverbios 17:17, ÑÑB).

Mbaʼépa heʼise: Ne amígo tee oĩta nde ykére reikotevẽve jave (1 Samuel 18:1; 19:2). Reikuaa haguénte voi oĩha  ojepyʼapýva nderehe tuichaiterei nemokyreʼỹ (1 Corintios 16:17, 18). Upévare eñehaʼã eheka ne amigorã umi tapicha nepytyvõtava.

“Reñeñandu vaírõ, ne amígo tee ojapóta ikatúva guive reĩ porã jey hag̃ua.” (Daniel.)

“Tuicha ñanembopyʼaguapy jaikuaárõ oĩha ñande rapicha ñanemombaʼe ha ñandeguerohorýva.” (Elena.)

Nemanduʼáke: Ne amigokuéra nandejopyivaʼerã rekambia hag̃ua, síno orrespetáta nde eréva ha rejapóva (Proverbios 13:20; 18:24; 1 Corintios 15:33). Reñepyrũrõ rejapo opa mbaʼe haʼekuéra heʼíva repyta porãséguinte hendivekuéra, ohugapáta nderehe ha amo ipahápe nderevyʼamoʼãi (Romanos 6:21).

Rejapo hag̃ua: Ehai peteĩ ne amígo réra nepytyvõva rejeroviave hag̃ua ndejehe, ha ndojapoukáiva ndéve mbaʼeve ivaíva.

․․․․․

Iporãta rejeheʼavéramo upe ne amígore. (Natekotevẽi katuete ndeavegua.)

Rejavýramo jepe ani nekaneʼõ

La Biblia heʼi: “Opavave niko hembiapo vai ha mombyry oĩ [Ñandejára] reko mimbipágui” (Romanos 3:23).

Mbaʼépa heʼise: Enterove ningo ñaneimperfékto ha upévare jaʼe ha jajapótante voi heta mbaʼe hendapeʼỹ (Romanos 7:21-23; Santiago 3:2). Upéicharamo jepe ikatu regueropuʼaka upéva. La Biblia ñanemomanduʼa voi:  ‘Pe hekopotĩva hoʼáramo jepe siete vése, opuʼã jeýne katuete’ (Proverbios 24:16, ÑÑB).

“Reñeñandu vaítante voi reikóramo reñembojoja nde rapicháre, koʼýte haʼe ojapo porãvéramo peteĩ mbaʼe nosẽporãiva jepi ndéve.” (Kevin.)

“Entéro ningo jajavy péro jajapo avei heta mbaʼe iporãva. Upévare jajesarekovaʼerã umi mbaʼe jajapo porãvare ha ñañehaʼã ñakambia jajavyhápe.” (Lauren.)

Nemanduʼáke: Ndovaléi reiko rejapo ivaíva ha upéi ere neimperfékto rupínte rejapo hague (Gálatas 5:13). Ñandejára nandeguerohorymoʼãi rejapóramo upéicha (Hebreos 10:26, 27).

Rejapo hag̃ua: Ehai peteĩ mbaʼe tekotevẽhápe rembaʼapove.

․․․․․

Ehai ijykére mbaʼe féchapa kostedía. Eheka informasión reikuaa hag̃ua mbaʼépa rejapokuaa ha un més haguépe ehecha mbaʼéichapa reho hese.

 Mbaʼéichapa nderecha Ñandejára

La Biblia heʼi: “Ñandejára tuichave [...] ñande pyʼapýgui” (1 Juan 3:20, BNP). Upéva heʼise ñaneimperféktoramo jepe haʼe ohechaha ñanderehe heta mbaʼe porã ñande ndajahecháiva. Epensamíntena ko mbaʼére: ñamoĩ chupe erekoha peteĩ 100 mil guarani ichaʼĩ ha osoroʼimíva, remombótapa? Nahániri, ni mbaʼevéicharõ nerepensamoʼãi ndovaleveimaha.

Jehová avei ojapo upéicha omañávo ñanderehe. Haʼe ndeʼíri ndajavaleiha ñaneimperfékto haguére. Omombaʼeterei guei ñañehaʼãramo jajapo chupe ogustáva, ñaimoʼãramo jepe saʼietereiha. Heʼiháicha Iñeʼẽme: “[Ñandejára] ndojapói mbaʼeve hekopeʼỹ, upévare ndahesaráiri pene mborayhúgui pehechaukavaʼekue héra rehehápe” (Hebreos 6:10, ÑÑB).

PE KAPÍTULO OÚVAPE

Reñeñandu vaietereípa ha repensáma voi neremeʼẽveimaha? Mbaʼépa ikatu rejapo?

TÉYSTO OĨVA LA BÍBLIAPE

‘Peteĩteĩ toipyguara hembiapo tee, ha ojuhúramo iporãha tovyʼa, ani oñembojoja hapicha ojapóva rehe.’ (Gálatas 6:4, ÑÑB)

PETEĨ KONSÉHO

Manterei eréramo “Ndavaléi mbaʼeverã”, térã “Nosẽporãi voi chéve mbaʼeve”, koʼýte nekangýta. Oiméne oĩ umi mbaʼe nderejapokuaáiva, péro katuete oĩ hetave mbaʼe osẽ porãva ndéve.

REIKUAÁPARAʼE?

Tekotevẽ ningo nde voi rejehayhu, upéicharõ añoite umi oĩva nde jerére nderayhúta ha nemombaʼéta avei.

UMI MBAʼE AJAPÓTAVA!

Mbaʼépa ikatu ajapo oĩramo oñembohorýva cherehe? ․․․․․

Apensaitereíramo umi mbaʼe nosẽporãivare chéve, ajapóta koʼã mbaʼe: ․․․․․

Mbaʼépa aporanduse che ru térã che sýpe ko témare? ․․․․․

NDÉPA MBAʼE ERE?

● Mbaʼérepa mitãrusu ha mitãkuñanguéra ndojeroviái jepi ijehe?

● Mbaʼéichapa nepytyvõta rejeroviavéramo ndejehe?

[Komentário oĩva páhina 88-pe]

“Oĩ umi iporãitereíva, péro heʼíva ijehe ivaíha. Ha oĩ katu naiporãguasúiva ha oimoʼãva ndaiporiha haʼeichagua iporãva. Odepende káda únore mbaʼéichapa ojecha”. (Alyssa)

[Taʼanga oĩva páhina 90-pe]

Peteĩ 100 mil osoroʼimi hague ndeʼiséi ndovaleveimaha, ha Ñandejárape g̃uarã ñaneimperfékto hague ndeʼiséi ndajavaleiha mbaʼeverã