KAPÍTULO 28

¿Mbaʼéichapa ikatu amboyke pe omosexualida?

“Chemitãrusúpe chegusta vaʼekue unos kuánto mitãkuimbaʼe, péro apensa voi kuri ndahaʼeiha normál la añandúva” (Óscar).

“Peteĩ che amígandi roñohetũ jepe una térã dos véserupi, péro lomímonte chegusta avei umi mitãrusu. Upévare apensa kuri che haʼeha visexuál” (Sara).

OJAPO 30 térã 40 áñorupi umi hénte ni noñeʼẽséi hague pe omosexualidáre, péro koʼág̃arupi trankílo ikatu oñeñeʼẽ hese. Ha oĩrõ peteĩ ndoapojáiva pe omosexualida, provávlemente oĩta hetaiterei oñepyrũva okritika hese. Peteĩ mitãkuña orekóva 16 áño hérava Amy heʼi: “Ndaapojái rupi pe omosexualida, oĩ opensáva ndachaʼeiha hesekuéra, ha umi hénte ótro paispeguáre entéro”.

Ñane tiémpope oĩ heta opensáva ndaivairiha jajapo oimeraẽ mbaʼe ñameʼẽ hag̃ua ñandejupe gústo, ha ko idéa omomýi heta imitãvape otantease hag̃ua pe omosexualida. Rebeca, orekóva 15 áño heʼi: “Che koléhiope oĩ heʼíva haʼeha lesviána, visexuál, ha oĩ avei heʼíva otanteaseha oimeraẽ mbaʼe”. Ha Cristina, orekóva 18 áño omombeʼu ikoléhiope oikoha avei upéva. Haʼe heʼi: “Mokõi che kompañéra ojeofrese voi chéve. Peteĩva oskrivi chéve peteĩ nóta oporandu hag̃ua arekosépa rrelasión sexuál hendive”.

Koʼág̃arupi hetaiterei oñemopropagánda pe omosexualida. Upévare oiméne reñeporandúmava: “¿Añetehápe piko ivaieterei  pe omosexualida? Peteĩ mitãrusúpe ogustáramo ótro mitãkuimbaʼe, ¿heʼisémapa upéva pe persóna haʼeha omosexuál?”.

¿Mbaʼépa opensa Ñandejára pe omosexualida rehe?

Ñane tiémpope oĩ heta hénte, umíva apytépe heta líder rrelihióso jepe heʼíva ndaivairiha koʼã mbaʼe. Péro la Biblia heʼi porã ñandéve mbaʼépa opensa hese Jehová. Heʼi Ñandejára okrea hague kuimbaʼe ha kuñáme, ha omenda rire ae pe ména ha tembireko ikatuha oreko rrelasión sexuál (Génesis 1:27, 28; 2:24). Upéva ñanepytyvõ ñantende hag̃ua mbaʼérepa la Biblia heʼi ivaietereiha umi rrelasión omosexuál (Romanos 1:26, 27).

Oĩ heʼíva la Biblia itujaiterei ha ndaideprovechoveimaha. Péro, ¿mbaʼépa repensa? ¿Mbaʼérepa oiméne heʼi hikuái upéva? Oĩ opensáva upéicha pórke nokonveníri chupekuéra la heʼíva pype. Por ehémplo oĩ ojaposetereíva peteĩ mbaʼe, péro la Biblia heʼi upéva naiporãiha ha ndogustái chupekuéra upéva. Koʼãichagua persóna oñemohatã haʼekuéra opensávapente ha oipota enterovéva opensa haʼekuéraicha, péro ñande ndajajoguaséi chupekuéra upévape.

¿Mbaʼépa ojapokuaa peteĩ mitãrusu ogustáramo chupe ótro mitãkuimbaʼe, térã peteĩ mitãkuña ogustáramo chupe ótro mitãkuña? ¿Heʼisépa upéva haʼeha omosexuál? Nahániri. Nemanduʼákena peteĩ persóna “imitãitereíva” ikatunteha voi heta vése ou iñakãraku ndojaposéirõ jepe upéva (1 Corintios 7:36). Sapyʼánte nde reñandúrõ koʼã mbaʼe, upéva ndeʼiséi hína nde haʼeha omosexuál. Normálmente peichagua sentimiénto opa ohóvo kon el tiémpo. Péro upe aja iñimportanteterei rekontrola umi deséo reguerekóva pono rejapo peteĩ mbaʼe neakãrakúgui reínte. ¿Mbaʼépa nepytyvõta upearã?

Ejerure Jehovápe tanepytyvõ. Ikatu resegi rréi David ehémplo, haʼe ojerure asy vaʼekue Ñandejárape: “Ejesarekóna cherehe  reikuaa hag̃ua mbaʼépa areko che korasõme. Emañána pe che pyʼapýpe oĩvare reikuaa hag̃ua mbaʼépa la chekevrantáva. Ehechána noiméipa aha hína tape vaíre, ha chegiána ikatu hag̃uáicha aiko opa árare” (Salmo 139:23, 24). Jehová omeʼẽkuaa ndéve pe “pyʼaguapy tuichavéva entéro mbaʼe yvyporakuéra ikatúvagui ontende”, ha “pe podér umi ótra hénte ndorekóiva”. Péicha ikatúta ‘reñangareko ne korasõre ha umi mbaʼe repensávare’, pono rejapo peteĩ mbaʼe ikyʼáva ereko jave umi deséo vai (Filipenses 4:6, 7; 2 Corintios 4:7).

Epensa meme umi mbaʼe ipotĩvare (Filipenses 4:8). Elee la Biblia káda día. Upéva katuete nepytyvõta remopotĩ hag̃ua umi mbaʼe oĩva ne akãme ha ne korasõme (Hebreos 4:12). Jason heʼi: “La Biblia ningo hetaitereíma chepytyvõ. Por ehémplo, sapyʼánte arekóramo peteĩ deséo vai, katuete alee 1 Corintios 6:9, 10 ha Efesios 5:3”.

Emboykete vaʼerã pe pornografía ha umi propagánda omosexuál (Colosenses 3:5). Ani rehecha, rehendu ni repensa umi mbaʼe ikatúva nemoakãraku. Upearã emboykete vaʼerã opaichagua pornografía, pelíkula, prográma osẽva télepe, ha rrevísta osẽhápe umi modélo oipurúva saʼieterei ao. Eipeʼaite ne akãgui umi pensamiénto ikyʼáva ha epensa umi mbaʼe potĩre. Peteĩ mitãrusu heʼi: “Ahechakuaáramo arekoha peteĩ deséo ivaíva ótro mitãkariaʼýre, upepete añemoĩ apensa pe téxto bíblico chegustavévare”.

 Oĩ heʼíva natekotevẽiha jajapo koʼã mbaʼe, káda uno ikatuha odesidi la ogustáva chupe pe séxore, ha enterovéva ojeaseptánte vaʼerãha ijupe ha umi deséo orekóva. Péro la Biblia katu heʼi enterovéva jarekoha la kapasida ñakontrola hag̃ua ñande deséo. Por ehémplo, omombeʼu voi ñandéve oĩ hague heta persóna haʼe vaʼekue omosexuál ha okambiáva oiko hag̃ua chuguikuéra kristiáno (1 Corintios 6:9-11). Haʼekuéra ningo ipuʼaka vaʼekue koʼã deséore, ¡ha ikatu reime segúro nde avei ikatuha rekonsegi upéva!

¿Mbaʼépa rejapokuaa lomímonte resegírõ reguereko umi deséo? ¡Aníkena eñentrega! Nemanduʼákena Jehovápe ombojeguaruha umi práktika omosexuál. Upévare, peteĩ oĩva ko situasiónpe, ikatu ojedesidi ha ndojapói mbaʼeve ikyʼáva orekóramo jepe pe deséo.

Ñamoĩmína peteĩ ehémplo. Ikatu ñapensa peteĩ kuimbaʼe “ipochy reíva” rehe (Proverbios 29:22). Ostudia mboyve la Biblia, haʼe orrenega ha orreaksiona vaʼekue oimeraẽ mbaʼérente. Péro upéi oaprende tekotevẽha ojejokokuaa. ¿Heʼisépa upéva arakaʼeve ndaipochymoʼãveimaha ni michĩmi? Nahániri. Péro koʼág̃a oikuaáma mbaʼépa opensa Jehová umi orreaksiona vaívare ipochy jave, ha upévare oñehaʼãmbaite ani hag̃ua ipuʼaka hese umi mbaʼe oñandúva.

Upéicha avei oiko peteĩ orekóvare umi deséo omosexuál, péro oaprendéva mbaʼépa omboʼe la Biblia upe témare. Sapyʼánte  ndoipotáiramo jepe ikatu ou chupe iñakãme umi pensamiénto ikyʼáva. Péro opensáramo Jehová opensaháicha pe omosexualidáre, ipuʼakáta umi deséo orekóvare.

¡Aníkena eñentrega!

Oiméramo nde reguereko peichagua deséo, ikatu oime reñeñandu oñeñandu haguéicha peteĩ mitãrusu heʼi vaʼekue: “Añehaʼãma akambia la añandúva, ajerure Jehovápe tachepytyvõ, alee la Biblia, ha ahendúma heta diskúrso oñeʼẽva ko témare. Ndaikuaaveíma mbaʼépa ikatu ajapove”.

Oiméramo nde reñeñandu avei upéicha, añetehápe ndahaʼemoʼãi la ifásiltava ndéve ndepuʼaka hag̃ua ne situasiónre. Péro peteĩ persóna oipotáramo Ñandejára oguerohory chupe, ojapómante vaʼerã la haʼe ojeruréva ha omboykete opaichagua tekovai ha tekokyʼa, lomímonte oiméramo jepe ijetuʼuetereíta chupe upéva. Aníkena nderesarái Ñandejára ontendeha la reñandúva ne korasõme, ha oiporiahuverekoha umi oservívape  chupe (1 Juan 3:19, 20). a Rejapóramo Jehová ohaʼarõva ndehegui, haʼe katuete nevendesíta. Upévare la Biblia heʼi voi: “Umi ojapóva nde léi heʼíva ohupytýta hetaiterei mbaʼe porã” (Salmo 19:11). Koʼág̃ama voi ikatúta revyʼa ko múndope henyhẽtéramo jepe umi provléma.

Upéicharõ, ejeroviákena Jehováre ha ani reheja ipuʼaka nderehe umi deséo vai (Gálatas 6:9). Eñehaʼãmbaitékena ejapo hag̃ua ko téxto heʼíva: “Ndapechaʼéi vaʼerã umi mbaʼe vaíre, ha pehayhu vaʼerã iporãva” (Romanos 12:9). Resegíramo reñehaʼã, kon el tiémpo ikatu voi opa ohóvo umi deséo. Péro la iporãvéva rehupytýtava remboykéramo umi práktika omosexuál, haʼe pe oportunida reikóvo pára siémpre Ñandejára múndo pyahúpe.

MBAʼÉPA JAHECHÁTA PE ÓTRO KAPÍTULOPE

¿Mbaʼépa ikatu ojapo peteĩ mitãrusu tódo el tiémpo opensáramo mitãkuñáre, térã peteĩ mitãkuña tódo el tiémpo opensáramo mitãkuimbaʼére?

[Nóta]

TÉXTO OĨVA LA BÍBLIAPE

“Emañána pe che pyʼapýpe oĩvare reikuaa hag̃ua mbaʼépa la chekevrantáva. Ehechána noiméipa aha hína tape vaíre” (Salmo 139:23, 24).

PETEĨ KONSÉHO

Ikatu hag̃uáicha reikuaa mbaʼéichapa oñekomporta vaʼerã peteĩ kuimbaʼe, ikatu restudia Jesús ehémplo (1 Pedro 2:21). Hese ojekuaa vaʼekue haʼe hague peteĩ kuimbaʼe imbaretéva, péro avei ikariñóso vaʼekue.

¿REIKUAÁPA RAʼE?

Ijetuʼúrõ jepe rekontrola entéro umi deséo reguerekóva, si ikatu rekontrola umi mbaʼe rejapóva. Ikatu rejedesidi nderejapomoʼãiha mbaʼeve ikyʼáva reguerekórõ jepe pe deséo.

UMI MBAʼE AJAPÓTAVA

¿Mbaʼéichapa ikatu aexplika peteĩ persónape mbaʼépa heʼi la Biblia pe omosexualida rehe? ․․․․․

¿Mbaʼéichapa arrespondekuaa peteĩ persónape heʼírõ chéve la Biblia heʼíva pe omosexualidáre ymaiterei guaremaha? ․․․․․

¿Mbaʼépa aporanduse che túa térã che sýpe ko témare? ․․․․․

¿NDÉPA MBAʼE ERE?

● ¿Mbaʼérepa ivaiete Ñandejárape g̃uarã pe omosexualida?

● ¿Mbaʼe mbaʼépa ikatu rejapo ani hag̃ua reʼa pe omosexualidápe?

● Repensáramo Ñandejára opensaháicha pe omosexualida rehe, ¿heʼisépa upéva nde haʼeha peteĩ omofóviko? (Omofóviko haʼe peteĩ persóna ndochaʼeitéva voi umi omosexuál rehe).

[Komentário oĩva páhina 236-pe]

“Ko múndo ikyʼaiterei ha oafektáma kuri apensa lája. Upéicha rupi naimevéima kuri segúra ivai térã iporãpa pe omosexualida. Péro koʼág̃a añemomombyryete entéro persóna ha opa mbaʼe oapojávagui pe omosexualida” (Ana).

[Taʼanga oĩva páhina 233-pe]

Entéro mitãrusu ha mitãkuña odesidi vaʼerã ojegiátapa umi mbaʼe kyʼa omboʼévare ko múndo, térãpa umi mbaʼe potĩ omboʼévare Ñandejára Ñeʼẽ