UMI arete guasu oĩva ko múndope ha ojefesteháva heta henda rupi ndoúi la Bíbliagui. Upéicharõ, moõguipa ou koʼã fiésta? Rehekáramo umi lívro oñeʼẽva koʼã mbaʼégui, retopáta omombeʼuha heta mbaʼe ndereikuaáiva umi arete ojefestahávagui pe nde reikoha rupi. Jahechami koʼã ehémplo.

Semana Santa. Ojeʼéramo jepe ko arete ojejapoha Jesús ñemano ha ñemoingove jeýre, heta mbaʼe ojejapóva upépe ou umi pagánogui. Umíva apytépe oĩ umi prosesión ojejapóva umi  taʼangápe. Pe lívro hérava Las Grandes Religiones Ilustradas heʼi, heta tiémpo Jesús ou mboyve, umi Babiloniaygua “ombojeroviaitereivaʼekue umi taʼanga oadoráva [...]. Omonde porã, ha ombojeguaka hag̃ua omoĩ hese kollár, kuãirũ ha ijyva rehegua; oñemoĩ peteĩ lugár iporãitereívape ha oñemboguata prosesiónpe”. Avei heta tetãme oñemombaʼe ha ojeporu pe “conejo de Pascua”. Pe Encyclopedia Católica heʼi: “Pe tapiti haʼe peteĩ símbolo pagáno, ha ojeporu ymaiterei guive orrepresenta hag̃ua pe ñemoña pyaʼe [fertilidad]”.

Año Nuevo. Pe ára ha umi mbaʼe ojejapóva ojefesteha hag̃ua pe Año Nuevo napeteĩchai opa tetã rupi. Ko fiésta ñepyrũgui ojeʼe: “Pe mburuvicha Romaygua Julio César omoĩvaʼekue pe 1 de enero Año Nuevo áraramo, pe áño 46-pe, ñande ára mboyve. Umi rrománo odedikavaʼekue ko ára Jánope, haʼevaʼekue pe diós umi okẽ ha opa mbaʼe oñemoñepyrũvape. Pe més enero [latínpe Januarius] oñembohéra upéicha oñemombaʼe hag̃ua Jánope, haʼe mokõi hova vaʼekue: peteĩ omaʼẽva henonde gotyo ha pe ótro hapykue gotyo” (The World Book Encyclopedia). Upéicharõ, umi mbaʼe ojejapóva ojefesteha hag̃ua pe Año Nuevo ou umi pagáno ojapovaʼekuégui.

Noche de Brujas (Halloween). “Umi mbaʼe ojejapóva ojefesteha hag̃ua pe Noche de Brujas ou umi druida [umi celta ymaguare saserdóte] ojapovaʼekuégui kristianokuéra ára mboyve. Umi celta ojapovaʼekue fiésta mokõi idioskuéra tuichavévape: pe Kuarahy jára ha umi omanovaʼekue járape g̃uarã [...]. Ko últimope oñemboaretevaʼekue pe 1 de noviembre, upe árape oñepyrũ umi celta Áño Pyahu. Ko arete ojejapóva umi omanovaʼekuépe g̃uarã oike mbeguekatúpe umi kristianokuéra kostúmbrepe.” (The Encyclopedia Americana.)

Umi arete ojefesteháva avei. Ndaikatúi ñañeʼẽ opa arete ko múndope ojefestehávagui. Péro, Jehovápe g̃uarã naiporãi umi arete ojejapóva oñemombaʼe hag̃ua peteĩ kuimbaʼépe térã yvyporakuéra organisasiónpe (Jeremías 17:​5-7; Hechos 10:​25, 26). Jaikuaa hag̃ua avei iporãpa Ñandejárape peteĩ fiésta rrelihiósa jahechavaʼerã moõguipa ou (Isaías 52:11; Revelación [Apocalipsis] 18:4). La Biblia heʼíva koʼã mbaʼére ko lívro kapítulo 16-pe, nepytyvõta reikuaa hag̃ua mbaʼéichapa ohecha Ñandejára jafesteha umi arete ndoúiva umi rrelihióngui.