Moisés oĩrõ guare pe sérro Sinaípe, Jehová ojerure chupe ojapo hag̃ua peteĩ tavernákulo. Pe tavernákulo haʼe hína peteĩ óga kárpa oipurútava umi israelita oadora hag̃ua Ñandejárape ha ikatútava oraha mamo ohohápe.

Jehová heʼi kuri Moiséspe: “Ere umi israelítape ogueru hag̃ua opa ikatúva ojejapo hag̃ua pe tavernákulo”. Upéicha rupi umi israelita oraha Moiséspe óro, pláta, kóvre, ita vera ha opaichagua hója orekóva. Ogueraha avei hikuái lána, téla de líno, animál pirekue ha hetave mbaʼe. Umi israelita ipojeraiterei ha ogueraha hetaiterei mbaʼe, upéicha rupi Moisés heʼímante chupekuéra: “Anivéntema pegueru mbaʼeve, hetaiterei mbaʼéma oñembyaty”.

Heta kuimbaʼe ha kuña ikatupyrýva ombaʼapo ojejapo hag̃ua pe tavernákulo. Jehová voi ombokatupyry umívape osẽ porã hag̃ua chupekuéra la itraváho. Oĩ vaʼekue ojapóva ílo, otehéva ha ovordáva. Oĩ vaʼekue avei ombaʼapóva órore, ita veráre ha oikytĩva umi yvyra oñekotevẽtava.

Umi israelita ojapo pe tavernákulo Jehová heʼi hagueichaite chupekuéra. Ojapo hikuái peteĩ kortína iporãitereíva odividíva dos hendápe pe tavernákulo, un ládo oĩ pe lugár hérava Sánto ha pe ótro ládo katu oĩ pe Santísimo. Pe Santísimope oĩ vaʼekue pe Árka del pákto, upéva ojejapo madéragui ha ojerrevesti órope. Pe lugár héravape Sánto katu oĩ vaʼekue peteĩ kandelávro de óro, peteĩ mesa ha peteĩ altár ojehapyha insiénso. Pe tavernákulo korapýpe oĩ vaʼekue peteĩ palangána guasu de kóvre ha peteĩ altár guasu. Umi israelita ohecha jave pe Árka del pákto imanduʼa opromete  hague hikuái Jehovápe iñeʼẽrendutaha chupe. ¿Reikuaápa mbaʼépa heʼise peteĩ pákto? Upéva heʼise ñañekomprometeha jajapotaha peteĩ mbaʼe.

Jehová oiporavo Aarón ha itaʼyrakuérape oservi hag̃ua kómo saserdóte pe tavernákulope. Haʼekuéra oñangareko vaʼerã pe tavernákulore ha oikuaveʼẽ vaʼerã upépe umi sakrifísio. Aarón haʼe vaʼekue pe saserdóte prinsipál, upévare haʼe añoite oreko vaʼekue permíso oike hag̃ua pe Santísimope. Haʼe oike vaʼerã upépe una ves al áño ojapo hag̃ua sakrifísio ipekádore, ifamiliakuéra pekádore ha enterove umi israelita pekádore.

Un áño umi israelita osẽ haguépe Egíptogui otermina hikuái pe tavernákulo. Péicha orekóma hikuái peteĩ lugár oadora hag̃ua Jehovápe.

Upéi Jehová omoĩ peteĩ arai pe tavernákulo ári, upéicha ohechauka oguerohoryha pe ojapo vaʼekue hikuái. Pe arai ojupi jave pe tavernákulo árigui, umi israelita ombyaty ikosakuéra ha okontinua iviáhe. Upéicha jave, haʼekuéra odesarma avei pe tavernákulo ha oho pe arai ohoha gotyo. Péro pe arai ndojupíri aja, haʼekuéra opytánte pe oĩháme.