Heta rréi iñañaitereíva ogoverna vaʼekue umi 10 trívu oĩva Israélpe, umíva apytépe oĩ rréi Acab. Haʼe omenda vaʼekue Jezabel rehe, peteĩ kuña iñañaitereíva oadoráva Baálpe. Acab ha Jezabel ogueraha vaipa vaʼekue umi héntepe ha upéicha rupi hetaiterei oĩ vaʼekue oadoráva avei Baálpe. Acab ha Jezabel ojukauka vaʼekue avei heta Jehová profétape. ¿Mbaʼépa ojapo Jehová ko situasiónpe? Haʼe omondo proféta Elíaspe omeʼẽ hag̃ua peteĩ mensáhe rréi Acábpe.

Elías heʼi rréi Acábpe haʼe iñañaiterei rupi ndokymoʼãveimaha Israélpe. Tres áño rasa ndokyvéi, mbaʼeve nosẽvéi umi kokuépe ha umi hénte ivareʼapáma. Upéi Jehová omondo jey proféta Elíaspe Acab rendápe oñemoñeʼẽ hag̃ua chupe, péro pe rréi heʼi Elíaspe: “Nde ningo provlémamante regueru. Nde kúlpare la oiko hína koʼã mbaʼe”. Péro Elías heʼi chupe: “Ndahaʼéi ningo che kúlpare la ndokyvéi, síno nde readora rupi Baálpe. Embyaty umi héntepe ha Baal profetakuérape pe sérro Carmélope ha upépe jahecháta mávapa pe Dios verdadéro”.

Umi hénte oñembyatypaite pe sérro Carmélope ha upépe Elías heʼi chupekuéra: “Pedesidíma vaʼerã mbaʼépa pejapóta. Oimérõ Jehová haʼe pe Dios verdadéro, peservi vaʼerã chupe, ha oiméramo Baal haʼe pe dios verdadéro, peservi chupe. Péro jajapóta peteĩ mbaʼe jahecha hag̃ua mávapa pe Dios verdadéro. Umi 450 proféta oservíva Baálpe oprepara vaʼerã peteĩ ofrénda ha oñemboʼe chupe. Che avei apreparáta peteĩ ofrénda ha añemboʼéta Jehovápe. Pe dios omboúva tata yvágagui ha ohapýva pe ofrénda, upéva haʼéta pe Dios verdadéro”. Ha umi hénte heʼi: “Oĩ porã, tojejapo katu upéicha”.

Upémarõ Baal profetakuéra oprepara pe ofrénda ha pyharevete guive oñemboʼe Baálpe ha ojerure asy chupe: “¡Baal ekontestána oréve!”. Péro Baal nokontestái chupekuéra. Upévare Elías oñembohory hesekuéra ha heʼi: “¡Pesapukái hatãvéna chupe! Oiméne oke hína ha tekotevẽ oñemombáy chupe”. Upéi ja pyharéma ha Baal profetakuéra osegínte oñemboʼe, péro avave norrespondéi chupekuéra.

Elías omoĩ avei iñofrénda peteĩ altár ári ha oñohẽmbaite hese y, upéi oñemboʼe Jehovápe ha heʼi: “Jehová, tojekuaa koestedía nde haʼeha pe Dios verdadéro”. Ensegída Jehová ombou tata yvágagui ha ohapy pe ofrénda, ha umi hénte ohechávo upéva heʼi: “¡Jehová haʼe pe Dios verdadéro!”. Ha Elías heʼi chupekuéra: “¡Pejagarra Baal profetakuérape! ¡Aníke peheja okañy ni peteĩ!”.  Upe díape ojuka hikuái 450 proféta oservívape Baálpe.

Upéi ojekuaa peteĩ arai michĩmíva opuʼãva oúvo pe márguio ha Elías heʼi Acábpe: “Amo oúma hína peteĩ torménta, eprepara nde kárro ha eho nde rógape”. Upéi iñypytũmbaite pe tiémpo, ou peteĩ yvytu atã ha oñepyrũma katu oky tuichaiterei. Opa sapyʼa la séka. Acab ojupi ikárrope ha oho pyaʼe porã. Péro Jehová oipytyvõ Elíaspe odipara pyaʼeve hag̃ua Acab kárrogui. ¿Ikatúpa jaʼe Elías opytuʼutamaha upe rire umi provlémagui? Jahechamína.