EMAÑAMI ko família guasúre. Koʼã 12 mitãkuimbaʼe haʼe Jacob raʼykuéra. Ha oguereko avei itajyrakuéra. Ndépa reikuaa mbaʼéichapa héra itaʼyrakuéra? Jaikuaáta koʼág̃a.

Lea membykuéra héra Rubén, Simeón, Leví ha Judá. Raquel ohechakuaávo ndaikatuiha imemby, ombyasyeterei. Upévare omeʼẽ Jacóbpe isiérva Bilhá, ha Bilhá imemby mokõi mitãkuimbaʼe hérava Dan ha Neftalí. Upémaramo Lea avei omeʼẽ Jacóbpe isiérva Zilpá, ha Zilpá imemby Gad ha Aser. Ipahápe Lea oguereko jey mokõi mitã, Isacar ha Zabulón.

Hasy peve Raquel oguereko peteĩ mitãkuimbaʼe, ha ombohéra José. Upe rire jaikuaavéta heta mbaʼe Joségui, pórke chugui oikovaʼekue peteĩ persóna iñimportantetereíva. Koʼãva haʼe umi 11 mitãkuimbaʼe oguerekovaʼekue Jacob oikórõ guare Labán ndive, pe Raquel túva.

Jacob oguereko avei itajyrakuéra, péro la Biblia oñeʼẽ peteĩrente. Upe itajýra héra Dina.

Peteĩ árape Jacob odesidi oheja Labánpe ha oho jey Canaánpe. Upévare ombyaty ifamília guasu, ijovechakuéra ha opaichagua animalkuéra oguerekóva, ha oñepyrũ pe viáhe puku.

Oho jey riremi Jacob ha ifamília Canaánpe, Raquel imemby jey peteĩ mitãkuimbaʼe. Imemby oviaha aja hikuái. Raquel oĩ vaieterei, ha ipahápe omano imembykuévo. Péro pe mitã oĩ porã. Jacob ombohéra chupe Benjamín.

Iporã ñanemanduʼa mbaʼéichapa héra umi 12 Jacob raʼykuéra pórke pe tetã Israel osẽ chuguikuéra. Upéicha rupi, umi 12 trívugui 10 ogueraha Jacob raʼykuéra réra ha mokõi José raʼykuéra réra. Isaac oikove heta áño koʼã mitãkuimbaʼe onase rire, ha ovyʼaitenerakaʼe iniéto heta haguére. Péro jahechami mbaʼépa ojehurakaʼe iniéta Dínape.