OHASÁMA 10 áño pe rréi Nabucodonosor oguerahahague umi isrraelíta ikatupyryvéva Babilóniape. Ha emañami mbaʼépa oikohína! Jerusalén ojehapy, ha umi isrraelíta nomanóiva ojegueraha prisionéro Babilóniape.

Nemanduʼáne Jehová profetakuéra heʼihague koʼã mbaʼe oikotaha umi hénte ndohejáiramo hembiapo vai. Péro umi isrraelíta nohenduivaʼekue umi profétape. Osegi oadora umi ñandejára guaʼúpe, oadorarangue Jehovápe. Upévare omerese hikuái pe kastígo. Upéva jaikuaa pórke Ñandejára proféta Ezequiel omombeʼu ñandéve umi mbaʼe vai ojapovaʼekue isrraelitakuéra.

Reikuaápa nde mávapa Ezequiel? Peteĩ mitãrusu Nabucodonosor oguerahavaʼekue Babilóniape 10 áño oiko mboyve ko ñehundi guasu Jerusalénpe. Daniel ha umi mbohapy iñamigokuéra, Sadrac, Mesac ha Abednego, ojeguerahavaʼekue avei Babilóniape upérõ.

Ezequiel oĩ aja Babilóniape, Jehová ohechauka chupe umi mbaʼe oikóva pe témplope, Jerusalénpe. Jehová ojapo upéva peteĩ milágro rupi. Ezequiel oĩ gueteri Babilóniape, péro Jehová ohechauka chupe umi mbaʼe oikóva pe témplope. Ha ivaieterei pe ohecháva!

‘Ehechami umi mbaʼe vaiete ojapóva umi hénte ko témplope’, heʼi Jehová Ezequiélpe. ‘Emañami, umi pare henyhẽte mbói ha ótro mymbakuéra raʼangágui. Ha emañami, mbaʼéichapa umi isrraelíta oadorahína!’. Ezequiel ohecha koʼã mbaʼe, ha oskrivi pe oikovahína.

‘Ndépa rehecha mbaʼépa ojapohína ñemihápe umi líder isrraelíta?’, Jehová oporandu Ezequiélpe. Haʼe ohecha avei ko mbaʼe. Oĩ 70 kuimbaʼe, ha enterove oadora umi ñandejára guaʼúpe. Heʼi hikuái: ‘Jehová nañanderechái. Haʼe ohóma ko tetãgui’.

Upémaramo Jehová ohechauka Ezequiélpe umi kuña oĩva pe témplo rokẽme, opytáva nórtepe. Oguapy hikuái upépe ha oadora ñandejára guaʼu Tamúzpe. Ha emañami umi kuimbaʼe oĩvare Jehová témplo rokẽme! Oĩ 25 rupi. Ezequiel ohecha chupekuéra. Ojayvy hikuái pe kuarahy resẽ gotyo ha oadora upéva!

‘Koʼã hénte nachemombaʼéi’, heʼi Jehová. ‘Ndahaʼéi ojapónteva mbaʼe vai, ou voi katu che rogaitépe ojapo!’. Upévare Jehová opromete: ‘Koʼág̃a oñandúta hikuái mbaʼeichaitépa chepochy. Ha nambyasymoʼãi chupekuéra oñehundi vove’.

Ohasa rire tres áño Jehová ohechaukahague Ezequiélpe koʼã mbaʼe, umi isrraelíta opuʼã pe rréi Nabucodonosor kóntrape. Upémaramo haʼe osẽ oñorairõ hendivekuéra. Ohasa rire un áño ha seis mése, umi Babiloniaygua ohasa pe Jerusalén murálla ha ohapypa pe siuda. Hetaiterei umi hénte omano térã ojegueraha prisionéro Babilóniape.

Mbaʼérepa Jehová oheja oiko pe ñehundi vaiete umi isrraelítare? Pórke nohendúi Jehovápe ha ndojapói iléi heʼíva. Kóva ohechauka iñimportanteha jajapo meme Ñandejára heʼíva.

Upe rire ojeheja mbovymi oiko Israélpe. Pe rréi Nabucodonosor omoĩ oñangareko hag̃ua umi héntere peteĩ hudíope hérava Guedalías. Péro umi isrraelíta ojuka Guedalíaspe. Upévare umi hénte okyhyje oúrõ g̃uarã umi vavilónio ojukapa chupekuéra. Upémaramo mbaretépe ogueraha Jeremíaspe hendivekuéra, ha oho hikuái Egíptope.

Upéicha Israel opyta henteʼỹre. Avave ndoikói Israélpe 70 áño aja. Opyta nandiete. Péro Jehová opromete ogueraha jeytaha ipuévlope hetãme 70 áño ohasa rire. Upe aja, mbaʼépa oiko Ñandejára puévlore Babilóniape? Jahechami.