KO KUÑATAĨ iporãitéva héra María. Haʼe isrraelíta, ha oiko peteĩ puévlo hérava Nazarétpe. Ñandejára oikuaa haʼe ipyʼaporãitereiha. Upévare omondo pe ánhel Gabriel oñeʼẽ hag̃ua hendive. Reikuaa piko mbaʼépa Gabriel heʼi Maríape? Jahechami.

‘Mbaʼéichapa, tuichaite favór oñemeʼẽva ndéve’, heʼi chupe Gabriel. ‘Jehová oĩ nendive.’ María ndohecháiva gueteri ko persónape. Ojepyʼapy, pórke ndoikuaái mbaʼépa heʼise chupe. Péro, upéi Gabriel otrankilisa chupe.

‘Ani rekyhyje María’, heʼi. ‘Jehová ovyʼaiterei ndereheve. Upévare ojapóta peteĩ mbaʼe iporãitereíva ndéve g̃uarã. Nde reguerekóta koʼẽrõite peteĩ mitã. Ha remboheravaʼerã Jesús.’

Gabriel heʼi avei chupe: ‘Ko mitãgui oikóta mbaʼe guasu, ha oñehenóita chupe pe Ñandejára Ijyvatetéva Raʼy. Jehová ojapóta chugui rréi, haʼehaguéicha David. Péro Jesús haʼéta rréi opa ára g̃uarã, ha irréino núnka ndopamoʼãi!’.

‘Mbaʼéicha piko oikóta koʼã mbaʼe?’, oporandu María. ‘Amendaʼỹre ha aikoʼỹre peteĩ kuimbaʼéndi, mbaʼéicha piko aguerekóta peteĩ mitã?’.

‘Ñandejára podér oguejýta nde rehe’, heʼi Gabriel. ‘Upévare pe mitã oñehenóita Ñandejára Raʼy.’ Upémaramo heʼi chupe: ‘Nemanduʼa ne pariénte Elisabet rehe. Umi hénte heʼivaʼekue hese ig̃uaig̃uietereimaha imemby hag̃ua. Péro koʼẽrõite oguerekóta peteĩ mitã. Upévare, rehecháma ndaiporiha mbaʼeve Ñandejára ikatuʼỹva ojapo’.

Upépe María heʼi: ‘Che Jehová eskláva! Toiko cherehe pe erehaguéicha’. Upémaramo pe ánhel oho.

María pyaʼe oho ovisita Elisabétpe. Ohendúvo Elisabet María ñeʼẽ, pe mitã oĩva Elizabet ryépe opo vyʼágui. Elisabet henyhẽ espíritu sántogui ha heʼi Maríape: ‘Nde haʼe pe tuichave oñevendesíva kuñanguéra apytépe’. María oiko tres mése rupi Elisabet ndive, ha upe rire oho jey Nazarétpe.

María omendapotaite peteĩ kariaʼy hérava José ndive. Péro José oikuaávo María oguerekotaha peteĩ mitã, nomendaséi hese. Upévare Ñandejára ánhel heʼi chupe: ‘Ani rekyhyje remenda hag̃ua María rehe. Pórke Ñandejára omeʼẽ chupe peteĩ mitã’. Upémaramo María ha José omenda, ha ohaʼarõ hikuái onase Jesús.