KOʼÃVA haʼe Jesús disipulokuéra. Haʼekuéra iñeʼẽrendu chupe ha opyta Jerusalénpe. Ohaʼarõ aja hikuái oñondivepa, peteĩ tyapu guasu omyenyhẽ pe óga. Ojogua peteĩ yvytu atã ohasa pyaʼévape. Ha koʼág̃a oñepyrũ ojekuaa enterove disípulo akã ári peteĩ tata rendy kũ joguaha. Rehechápa pe tata rendy iñakã arikuéra? Mbaʼépa heʼise upéva?

Peteĩ milágro! Jesús oĩ jeýma yvágape Itúva ndive, ha oñohẽhína Ñandejára espíritu sánto isegidorkuéra ári. Ndépa reikuaa mbaʼépa ojapouka chupekuéra pe espíritu? Oñepyrũ oñeʼẽ hikuái heta idiómape.

Heta tapichakuéra oĩva Jerusalénpe ohendu pe tyapu ojoguáva yvytu atãme, ha ou hikuái ohecha hag̃ua mbaʼépa oikohína. Oĩ umi ouvaʼekue ótro tetãgui ofesteha hag̃ua pe fiésta isrraelíta hérava Pentecostés. Haʼekuéra noimoʼãi pe oikóva! Umi disípulo omombeʼu iñidiomakueraitépe umi mbaʼe iporãmbajepéva Ñandejára ojapovaʼekue.

‘Koʼãvaningo Galileaygua meme’, heʼi umi ótro tetãygua. ‘Mbaʼéicha piko koʼãva ikatu oñeʼẽ umi idióma oñeñeʼẽva umi tetã jajuhágui?’.

Koʼág̃a Pedro oñemboʼy ha oñeʼẽ chupekuéra. Oñeʼẽ hatã ha omombeʼu mbaʼéichapa ojejukákuri Jesúspe, ha Jehová omoingove jey hague chupe. ‘Koʼág̃a Jesús oĩ yvágape Ñandejára ykére, ideréchape’, heʼi Pedro. ‘Ha haʼe oñohẽ ko espíritu sánto oprometevaʼekue. Upévare oiko koʼã milágro.’

Heʼívo Pedro koʼã mbaʼe, heta oĩ ombyasyetereíva pe Jesucrístore ojejapovaʼekue. ‘Mbaʼépa rojapovaʼerã?’, oporandu hikuái. Pedro heʼi chupekuéra: ‘Pekambiavaʼerã pende rekove ha pejevautisa’. Upe árape 3.000 rupi ojevautisa ha oiko chuguikuéra Jesús disípulo.