1. ¿Mbaʼépepa ojojogua umi kristiáno yma guare ha umi testígo de Jehová?

 HAʼEKUÉRA kyreʼỹme opredika. Iñumílde ha ojegia hikuái pe espíritu sántore. Ojepersegíramo jepe, ndaipóri omokirirĩ vaʼerã chupekuéra, ha Ñandejára kontinuadoite ovendesi chupekuéra tuichaháicha. Péicha vaʼekue umi kristiáno tee yma guare ha péicha avei koʼág̃arupi umi testígo de Jehová.

2, 3. ¿Mbaʼépa la lívro de Héchospe añoiténte oñemombeʼúva?

² Katuete umi rreláto igustoitéva jalee vaʼekue lívro de Héchospe, nemokyreʼỹ ha nemombareténe raʼe. Hiʼarive péva pe lívro añoite la omombeʼúva umi mbaʼe ohasa vaʼekue kristianokuéra Jesús oho riremi yvágape.

³ Lívro de Héchospe oñemombeʼu 95 persóna réra, oúva 32 paísgui, 54 siudágui ha 9 íslagui. Igustoiterei umi mbaʼe oñemombeʼúva pe lívrope. Por ehémplo omombeʼu mbaʼéichapa vaʼekue umi hénte, mbaʼeichaitépa ijejapo vaʼekue umi oĩva umi rrelihión japúpe, mbaʼéichapa umi governánte ni nopyrũmbái, ha mbaʼéichapa iñañaiterei umi opersegíva kristianokuérape. Péro Hechos noñeʼẽi koʼã mbaʼérente, síno oñeʼẽ avei ne ermáno ha ermanakuéra yma guarére. Haʼekuéra oreko vaʼekue avei provléma ñandéicha, péro lomímonte oñehaʼãmbaite opredika hag̃ua umi notísia porã kyreʼỹme.

 4. ¿Mbaʼérepa jaʼekuaa ñande jajoguaha avei Páblope, Tabítape ha hetave ótrope?

⁴ Ohasáma ningo haimete 2.000 áño oiko hague koʼã mbaʼe. Upérõ ningo opredika vaʼekue kyreʼỹme Pedro ha Pablo, ha avei oiko vaʼekue pe doktór jahayhuetéva Lucas ha Bernabé pe okonsolakuaaitéva hapichakuérape. Upe tiémpope oiko vaʼekue Esteban pe ipyʼaguasuetéva, ha avei Tabita ha Lidia umi imbaʼeporãitéva. Péro ndahaʼéi haʼekuérante, oĩve avei kuri heta kristiáno ifiélva. Ohasámarõ jepe hetaiterei áño koʼã ermáno oiko hague, jaʼekuaa jajoguaitereiha chupekuéra. ¿Mbaʼérepa? Pórke Jesús omanda haguéicha, ñande avei japredika haʼekuéra ojapo haguéicha (Mat. 28:19, 20). ¡Ajépa javyʼaite ñande avei jajapo haguére upe tembiapo!

 5. ¿Moõ moõpa Jesús disipulokuéra oñepyrũta kuri opredika?

 ⁵ Epensamíntena la Jesús omanda vaʼekuére idisipulokuérape. Haʼe heʼi: “Oñemeʼẽta peẽme podér pe espíritu sánto ou vove pende ári, ha oikóta pendehegui che testígo Jerusalénpe, oparupiete Judéape, Samáriape ha umi lugár mombyryvehápe jepe ko yvy ape ári” (Hech. 1:8). Primeroite voi pe espíritu sánto omombaretéta kuri chupekuéra oiko hag̃ua chuguikuéra Jesús testígo “Jerusalénpe” (Hech. 1:1–8:3). Upéi pe espíritu sánto ogiáta chupekuéra opredika hag̃ua ‘Judéape ha Samáriape’ (Hech. 8:4–13:3). Ha upéi haʼekuéra opredikáma vaʼerã kuri umi notísia porã “umi lugár mombyryvehápe jepe ko yvy ape ári” (Hech. 13:4–28:31).

6, 7. ¿Mbaʼépa ñande jareko umi kristiáno yma guare ndorekói vaʼekue?

⁶ Ne ermáno ha ermanakuéra oiko vaʼekue upe tiémpope, ndorekói vaʼekue pe Biblia kompléto opredika porã hag̃ua umi notísia porã. Pe lívro oskrivi vaʼekue Mateo por ehémplo, oĩmba kuri áño 41 rupi ae. Pablo oskrivi vaʼekue unos kuánto kárta ojeskrivi mboyve lívro de Hechos, ha umi kárta oĩmba kuri áño 61 rupi ae. Haʼekuéra ndorekói kuri káda uno peteĩ kópia Ñandejára Ñeʼẽgui ha ndorekói avei puvlikasión ikatúva oheja umi ohendu porãvape chupekuéra predikasiónpe. Umi judíogui oiko mboyve kristiáno, oiméne pe sinagógapente ohendu raʼe ojeleévo umi Escrituras Hebreas (2 Cor. 3:14-16). Upéicharõ jepe haʼekuéra tekotevẽ vaʼekue ostudia ha oñatende porã ojelee jave pe sinagógape, pórke oiméne haʼekuéra de memóriante heʼi vaʼerã kuri umi téxto.

⁷ Ko ñane tiémpope katu káda uno jareko la ñande Biblia, ha jareko avei hetaiterei puvlikasión oñeʼẽva la Bíbliare. Ñande japredika avei umi notísia porã 240 paíspe ha hetaiterei idiómape.

8, 9. a) ¿Mbaʼépa ikatu kuri ojapo Jesús disipulokuéra pe espíritu sánto rupive? b) ¿Mbaʼépa ojapo hína koʼág̃a pe esklávo de konfiánsa pe espíritu sánto rupive?

⁸ Jesús omandárõ guare idisipulokuérape haʼe hag̃ua itestígo, heʼi chupekuéra: “Oñemeʼẽta peẽme podér pe espíritu sánto ou vove pende ári”. Pe espíritu sánto ogia rupi chupekuéra, Jesús segidorkuéra ikatúta kuri opredika opárupi ko yvy ape ári. Por ehémplo, espíritu sánto rupive Pedro ha Pablo ikatu vaʼekue omonguera umi hasývape, omosẽ umi demóniope ha omopuʼã jey umi omano vaʼekuépe. Upéicharõ jepe, pe espíritu sánto rupive ikatu hína ojejapo ótra kósa iñimportantevéva. Pe espíritu sánto oipytyvõta kuri umi apóstol ha disípulope ikatu hag̃uáicha oikuaauka la héntepe pe añetegua omeʼẽtava chupekuéra jeikove opaveʼỹva (Juan 17:3).

⁹ Pe Pentekostéspe áño 33-pe, Jesús disipulokuéra oñepyrũ kuri oñeʼẽ diferénte idiómape “pe espíritu sánto ombokatupyryháicha chupekuéra  oñeʼẽ hag̃ua”. Upéi haʼekuéra oñepyrũ kuri omombeʼu “umi mbaʼe ijojahaʼỹva Ñandejára ojapo vaʼekue” (Hech. 2:1-4, 11). Koʼág̃arupi ñande ndaikatumoʼãi ñañeʼẽ peteĩ idióma pyahu peteĩ milágro rupive, péro Jehová espíritu sánto oipytyvõ hína pe esklávo de konfiánsape ojapo hag̃ua umi puvlikasión hetaiterei idiómape. Por ehémplo káda mes oñeimprimi hetaiterei rrevísta Ñemañaha ha ¡Pepáyke!, ha ñane páhina de Internet jw.org-pe katu oĩ hetaiterei puvlikasión ha vidéo mas de 1.000 idiómape. Koʼã mbaʼe ñanepytyvõ ñamombeʼu hag̃ua “umi mbaʼe ijojahaʼỹva Ñandejára ojapo vaʼekue” umi hénte oúvape “entéro tetã, trívu ha puévlogui, ha oñeʼẽva diferénte idióma” (Apoc. 7:9).

10. ¿Mbaʼépa ojejapo hína 1989 guive pe Traducción del Nuevo Múndogui?

¹⁰ Áño 1989 guive pe esklávo de konfiánsa oñehaʼãmbaite hína pe Traducción del Nuevo Mundo de las Santas Escrituras oĩ hag̃ua heta hetave idiómape. Ko Biblia oĩma mas de 200 idiómape, oñeimprimíma hetaiterei kópia ha osegi gueteri oñeimprimive hína. Ñandejára ha pe espíritu sánto rupive añoiténte koʼã mbaʼe ikatu osẽ porã.

11. ¿Mbaʼéichapa ojetradusi umi puvlikasionkuéra?

¹¹ Ko múndo tuichakuére oĩ hetaiterei kristiáno ombaʼapóva de voluntário ojetradusi hag̃ua koʼã mbaʼe, hiʼarive oĩ hikuái mas de 150 paíspe. Upéva ningo nañanesorprendéi. Ndaipóri voi ótra organisasión ko yvy ape ári pe espíritu sánto rupive ikatúva opredika porã umi notísia porã oñeʼẽva Ñandejára Jehováre, pe Mesías rehe ha pe Rréino oĩmavare yvágape (Hech. 28:23).

12. ¿Mbaʼépa oipytyvõ vaʼekue Páblope ha umi ótro kristiánope osegi hag̃ua opredika porã?

¹² Pablo ohórõ guare Antioquía de Pisídiape, ha opredika umi judíope ha umi ndahaʼéivape judío, “enterove umi ipyʼaporãva ohupyty hag̃ua jeikove opaveʼỹva” oñepyrũ kuri ojerovia (Hech. 13:48). Opakuetévo lívro de Hechos, Lucas heʼi Pablo kyhyjeʼỹme osegi hague opredika Ñandejára Rréino “ha mbaʼeve ndojokói chupe” (Hech. 28:31). ¿Moõpa opredika upérõ Pablo? Ndaipóri oimoʼã vaʼerã, péro upérõ haʼe oĩ hína kuri Rómape, haʼéva pe poténsia mundiál kapitál upe tiémpope. Pe espíritu sánto oipytyvõ vaʼekue Jesús segidorkuérape ojapo hag̃ua entéro mbaʼe predikasiónpe, upévare siémpre ogia ha oipytyvõ chupekuéra tahaʼe jepe raʼe opredika jave térã ojapo jave diskúrso.

13. ¿Mbaʼérepa ñañemboʼe vaʼerã oĩ jave ñandepersegíva?

¹³ Jesús disipulokuéra ojepersegi vaipárõ guare, haʼekuéra ojerure asy kuri Jehovápe ombopyʼaguasu hag̃ua chupekuéra. ¿Ha mbaʼépa oiko upe rire? “Enterovete voi henyhẽ espíritu sántogui, ha opredika pyʼaguasúpe Ñandejára ñeʼẽ” (Hech. 4:18-31). Ñande avei ñañemboʼe jepi  ikatu hag̃uáicha ñanearandu ha ñanembarete jasegi hag̃ua japredika ijetuʼúramo jepe (Sant. 1:2-8). Ñandejára ñanepytyvõ rupi ijespíritu sánto rupive, ñande ikatu jasegi japredika. Ndaipóri ojoko vaʼerã pe predikasión, ni oĩrõ oñemoĩ mbaretéva ñanderehe térã ñandepersegi vaipaitéva. Péro oĩ jave ñandepersegíva, tekotevẽterei ñañemboʼe Jehovápe ha jajerure chupe ijespíritu sánto. Péicharõmante ikatúta ñanearandu ha ñandepyʼaguasu jasegi hag̃ua japredika porã umi notísia porã (Luc. 11:13).

14, 15. a) ¿Mbaʼépa oiko raʼe oñepyrũ haguére ojepersegi kristianokuérape Esteban omano rire? b) ¿Mbaʼéichapa hetaite hénte oĩva Sibériape oikuaa raʼe pe añetegua?

¹⁴ Esteban opredika vaʼekue pyʼaguasúpe, ojagarra mboyve ojuka chupe ikontrariokuéra (Hech. 6:5; 7:54-60). Oñepyrũrõ guare “ojepersegi mbarete” kristianokuérape, umi apóstol añoite la opyta vaʼekue Judéape, upéi entéro umi disípulo isarambipaite Judea ha Samaria tuichakuére. Péro upéva ndojokoiete voi chupekuéra osegi hag̃ua opredika porã. Felipe por ehémplo oho kuri Samáriape ha “oñepyrũ oñeʼẽ umi héntepe Cristo rehe”, upéicha rupi hetave hénte oñepyrũma avei ojerovia (Hech. 8:1-8, 14, 15, 25). Péro ndahaʼéi voi upévante, síno entéro umi isarambipa vaʼekue oho kuri “Fenicia, Chipre ha Antioquíape. Péro haʼekuéra omombeʼu umi notísia porã umi judíopente. Upéicharamo jepe, ijapytepekuéra oĩ umi kuimbaʼe Chipregua ha Cirenegua oúva Antioquíape ha oñepyrũ opredika umi hénte oñeʼẽvape griégope, ha omombeʼu chupekuéra umi notísia porã oñeʼẽva ñande Ruvicha Jesús rehe” (Hech. 11:19, 20). Amo ipahápe, ojepersegi rupi kristianokuérape, hetave héntepe ikatu ojepredika ha umi notísia oñeʼẽva Ñandejára Rréinore ojekuaave hetave hendápe.

¹⁵ Ñane tiémpope péicha lénto avei oiko kuri oĩrõ guare pe unión soviética. Áño 1950 rupi, hetaiterei testígo de Jehovápe oñemondopa kuri Sibériape. Oñemondo rupi chupekuéra diferénte lugárpe, haʼekuéra ikatu kuri opredika ha omosarambi umi notísia porã upe país tuichaitévape. Upérõ ningo hetaiterei ermánope oñemosarambi kuri Sibériare, péro la ndaupéichairire, entéro koʼã ermáno ndorekomoʼãi kuri la pláta oviaha hag̃ua 10.000 kilómetro ikatu hag̃uáicha opredika. Péicha pe goviérno voi oipytyvõ chupekuéra oho hag̃ua hikuái heta lugárpe. Peteĩ ermáno heʼi voi: “Amo ipahápe pe goviérno voi oipytyvõ hetaiterei hénte ipyʼaporãva oĩva Sibériape oikuaa hag̃ua pe añetegua”.

16, 17. ¿Ojekuaápa lívro de Héchospe Jehová ovendesi hague kristianokuérape opredika porã haguére?

¹⁶ Ojekuaa porãiterei ningo Jehová ovendesi hague umi kristiáno yma guarépe. Pablo ha umi ótro kristiáno la oñotỹ ha orregáva “péro Ñandejára hína upe omongakuaáva” (1 Cor. 3:5, 6). Jaleévo lívro de Hechos,  japilla porã hetaitereive hénte oñepyrũ hague oservi Jehovápe, pórke Jehová voi ovendesi la ojapóva kristianokuéra. Upévare “Ñandejára ñeʼẽ ojekuaauka heta hetave hendárupi, ha umi disípulo hetaitereive ohóvo Jerusalénpe” (Hech. 6:7). Umi kristiáno oñepyrũ rupi opredika heta hetave lugárpe “umi kongregasión oĩva Judea, Galilea ha Samaria tuichakuére oñepyrũ oiko pyʼaguapýpe ha avave noñemoĩri hesekuéra, ha osegi imbareteve hikuái ijeroviápe. Haʼekuéra heta hetave ohóvo, pórke umi kongregasión ohechauka okyhyjeha Jehovágui ha oiko pe espíritu sánto omombaretéva chupekuéra oipotaháicha” (Hech. 9:31).

¹⁷ Antioquía de Síriape katu tahaʼe umi judío térã umi oñeʼẽva griego, ohendu kuri pe añetegua pórke umi kristiáno ipyʼaguasu ha opredika chupekuéra. Avei “Jehová oĩ hendivekuéra, ha hetaiterei hénte ojerovia ha osegi ñande Ruvichápe” (Hech. 11:21). Upéi Hechos omombeʼuve la oiko vaʼekue upe siudápe: “Jehová ñeʼẽ katu oñemog̃uahẽ hetave hendápe ha heta hetave oĩ umi ojeroviáva” (Hech. 12:24). Ha Pablo ha umi ótro kristiáno osegi rupi opredika porã umi notísia porã “Jehová ñeʼẽ ojekuaave ohóvo heta hendárupi tuicha podér reheve” (Hech. 19:20).

18, 19. a) ¿Mbaʼérepa ñaĩ segúro Jehová ñanepytyvõha avei ñandéve? b) Emombeʼumína peteĩ ehémplo ohechaukáva Jehová oipytyvõha isiervokuérape.

¹⁸ Ikatu ñaĩ segúro Jehová ñanepytyvõha hína avei ñandéve koʼág̃arupi. Upévarente amás día hetave rei oĩ la oñemeʼẽva Jehovápe ha ojevautisa. Péro ndahaʼéi upévante, Jehová ñanepytyvõ rupínte avei ikatu ñaaguanta oĩ jave oñemoĩ mbaretéva ñanderehe térã ñandepersegi vaipáva, ha upéva ári jey lomímo jeýnte jasegi japredika, ojapo haguéicha Pablo ha umi ótro kristiáno (Hech. 14:19-21). Jehová ningo siémpre oĩta ñanepytyvõ hag̃uáicha ha “ijyva opa ára g̃uarãva” siémpre ñandejokóta ijetuʼuve jave ñanendive (Deut. 33:27). Siémpre ñanemanduʼa vaʼerã, Jehová núnka ndohejamoʼãiha isiervokuérape héra rehehápe (1 Sam. 12:22; Sal. 94:14).

¹⁹ Ñapensamíntena por ehémplo la ohasa vaʼekuére ermáno Harald Abt pe segunda gérra mundiál aja. Anivéma hag̃ua opredika, umi nazi omondo chupe peteĩ kámpo de konsentrasiónpe Sachsenháusenpe. Mayo de 1942-pe, pe polisía sekréta Alemaniapegua oho pe ermáno rógape, ojagarra hikuái itajyraʼípe ha oapresa hikuái hembireko Élsape. Upéi ojegueraha pe ermánape umi kámpo de konsentrasiónpe ha heta vése ojerova ha ojerova chupe. Haʼe heʼi: “Umi áño aĩ haguépe umi kámpo de konsentrasiónpe Alemániape, aaprende kuri peteĩ mbaʼe iñimportantetereíva. Upérõ guare ahechakuaa mbaʼeichaite pevépa Jehová espíritu ikatu nemombarete rehasa jave peteĩ situasión ijetuʼuetereíva. Ajejagarra mboyve, che alee kuri peteĩ kárta oskrivíva peteĩ ermána, ha haʼe heʼi kuri Jehová espíritu ikatuha nepytyvõ ndepyʼaguapy hag̃ua, ijetuʼueterei jave nendive. Che apensa kuri pe ermána oexaheraʼimaha  ha ndahaʼeiha la upeichaite voi. Péro che voi añepyrũrõ guare ahasa umi mbaʼe ijetuʼúva, pépe ae apilla siérto hague la heʼíva pe ermána, pórke cherehe peichaite avei oiko kuri. Oimérõ nderehasáiva peichagua situasión, ijetuʼúta voi ndéve eñeimahina hag̃ua, péro che haʼekuaa ndéve cherehe peichaite oiko hague”.

20. ¿Mbaʼépa ojapo vaʼekue Pablo oĩ aja préso peteĩ ógape, ha mbaʼéichapa upéva ikatu hína omokyreʼỹ unos kuánto ermáno ha ermánape?

²⁰ Opakuetévo lívro de Hechos oñemombeʼu Pablo opredika hague hína kyreʼỹme “Ñandejára Rréino” (Hech. 28:31). Upérõ Pablo oĩ kuri préso peteĩ ógape, upévare ndaikatúi osẽ opredika umi ogahárupi Rómape. Péro upéva ndojokói chupe, pórke haʼe opredika kuri umi ovisitávape guive chupe. Koʼág̃arupi oĩ jepi avei ñane ermáno ha ermanakuéra ndaikatuvéimava osẽ hógagui, tahaʼe pórke hasy térã ijedaitereíma ha oĩma tupápe, térã oiko peteĩ lugár ojekuidahápe umi ijedávare. Upéicharõ jepe, koʼã ermáno ohayhueterei Jehovápe ha noñentregái, upévare opredikaseterei voi hikuái. Ñañemboʼékena hesekuéra ha jajerure Jehovápe otopakami hag̃ua chupekuéra umi hénte ipyʼaporãvare ha oikuaasevéva Jehovápe.

21. ¿Mbaʼérepa jahechakuaa vaʼerã saʼipaitemaha la tiémpo hembýva japredika hag̃ua?

²¹ La majoría ñande apytépe ikatu japredika umi ogahárupi térã hetave hendáicha. Upévare jajapopaitékena la ikatumíva guive ñakumpli porã hag̃ua pe traváho oñemeʼẽ vaʼekue ñandéve, ha jasegi japredika porã umi notísia oñeʼẽva Ñandejára Rréinore “mombyryvehápe jepe ko yvy ape ári”. Ñande jahechakuaa ndaikatuveimaha japerde ñane tiémpo, pórke jahecháma umi señál Cristo oĩmaha ha jaikomaha umi ára pahápe (Mat. 24:3-14). Koʼág̃ama jakuʼe vaʼerã pórke saʼipaitéma la tiémpo hembýva. Koʼág̃ama ñanerembiapo “heta vaʼerã ñande Ruvicha servísiope” (1 Cor. 15:58).

22. ¿Mbaʼépa jajapose og̃uahẽ meve Jehová ára?

²² Ñahaʼarõ aja “Jehová ára tuichaite ha oporomongyhyjéva”, jasegíkena japredika kyhyjeʼỹme ha jahechauka ñandefielha Jehovápe (Joel 2:31). Ikatúiti hína jatopa umi hénte ojoguáva umi Bereaguápe ha oaseptáva “Ñandejára ñeʼẽ ipyʼaite guive” (Hech. 17:10, 11). Ñande jasegíta japredika porã, ñahendu peve ojeʼeha ñandéve: “Oĩ porãiterei la rejapóva. Nde ningo peteĩ esklávo de konfiánsa ha ndeguápo” (Mat. 25:23). Ñande ñañehaʼãmbaitéramo jajapo hag̃ua disípulo ha jasegi ñandefiél Jehovápe, amo gotyove ikatúta javyʼa pára siémpre, pórke ko tiémpope jareko kuri pe priviléhio iporãitéva japredika porãvo umi notísia porã oñeʼẽva Ñandejára Rréinore.