Jesús ha idisipulokuéra oviaha kuri Peréagui Jerusalén gotyo, ha koʼág̃a okrusa pe rrío Jordán, Jericó ypýpe. Heta hénte oviaha hendivekuéra pe Paskuarã áño 33-pe.

Jesús oguata umi disípulo renonderã. Haʼe og̃uahẽsetereíma Jerusalénpe pe Paskuarã. Umi disípulo katu okyhyje. Oiméne ñanemanduʼa ndaʼaréi Lázaro omanórõ guare, Tomás heʼi hague: “Jaha katu hendive, tañamano jepe raʼe” (Juan 11:16, 47-53). Umi disípulo oikuaa Judéape ipeligrosoha Jesúspe ha chupekuéra g̃uarã. Ndareíri ningo okyhyje hikuái.

Jesús omohaʼeño umi 12 apóstolpe ikatu hag̃uáicha oprepara chupekuéra oaguanta hag̃ua umi mbaʼe oútava. Haʼe heʼi: “Jaha hína Jerusalénpe, ha pe Yvypóra Raʼýpe oñemeʼẽta umi saserdóte ruvichakuéra ha mboʼehára leipegua poguýpe ojehusga hag̃ua. Haʼekuéra heʼíta omano vaʼerãha, ha omeʼẽta chupe umi tetã ambuegua poguýpe, ombyepoti ha oñembohory hag̃ua hese. Upéi oñemosaingóta yvyráre, péro tres día haguépe oñemopuʼã jeýta chupe” (Mateo 20:18, 19).

Jesús ningo tres veseháma heʼi idisipulokuérape haʼe omano ha oikove jeytaha (Mateo 16:21; 17:22, 23). Ha ko vuéltape heʼi voi chupekuéra oñemosaingotaha chupe yvyráre ojejuka hag̃ua. Péro umi disípulo nontendéi mbaʼépa la heʼiséva chupekuéra. Oiméne haʼekuéra opensa Jesús omoĩ jeytaha peteĩ goviérno Israélpe, ha haʼekuéra omoirũtaha chupe upe goviérnope.

Santiago ha Juan sy, hérava Salomé, oviaha avei hendivekuéra pe Paskuarã. Jesús ohenói koʼã mokõi ijapóstolpe “Arasunu Raʼy”, pórke ikyreʼỹeterei hikuái (Marcos 3:17; Lucas 9:54). Areʼíma ningo koʼãva oipota hague oikóvo peteĩ puésto iñimportánteva Cristo Rréinope, ha oiméne  omombeʼu raʼe isykuérape upéva. Koʼág̃a pe kuñakarai oñemboja Jesús rendápe ha oñesũ henondépe. Jesús heʼi chupe: “¿Mbaʼépa reipota?”. Pe kuñakarai heʼi: “Aipota ere chéve, koʼã che memby oguapytaha nde ykére ne Rréinope, peteĩ nde deréchape ha ótro katu nde iskiérdape” (Mateo 20:20, 21).

Jesús opilla upéva ouha Santiago ha Juángui, upévare heʼi chupekuéra: “Peẽ ndapeikuaái mbaʼépa la pejeruréva. ¿Ikatúta piko pemboyʼu chendive pe kópa che amboyʼútava hína?”. Haʼekuéra heʼi: “Ikatúta” (Mateo 20:22). Añetehápe ningo haʼekuéra nontendéi mbaʼépa hína la Jesús ohasátava.

Jesús katu heʼi: “Peẽ añetehápe pemboyʼúta avei upe kópagui. Péro che ndaikatúi haʼévo peẽme peguapytaha che derécha térã che iskiérdape. Upéva che Rúmante odesidíta mávapepa omeʼẽta” (Mateo 20:23).

Umi ótro 10 apóstol orrenegaiterei oikuaávo mbaʼépa ojerure Santiago ha Juan. Upe mboyve ningo haʼekuéra ojodiskutíma voi kuri oimoʼãgui oĩha iñimportantevéva ijapytepekuéra, ha oiméne upérõ púntape oĩ raʼe Santiago ha Juan (Lucas 9:46-48). Ha koʼág̃a katu umi mokõi ojerure Jesúspe oguapy hag̃ua ijykére Irréinope. Upéva ohechauka porã umi 12 apóstol ndosegíri hague Jesús konsého, ha entéronte oñembotuichaseha. Ñambyasýramo jepe, haʼekuéra oikose gueteri iñimportantevévaramo.

Ikatu hag̃uáicha oñesolusiona ko provléma, Jesús oñembyaty umi 12 ndive ha mborayhúpe heʼi chupekuéra: “Peẽngo peikuaa mbaʼéichapa umi mburuvicha omanda hetãyguakuérare, ha umi poguasukuéra ojopy umi héntendi. Peẽ katu ndaupéichai vaʼerã; pe tuichaséva pende apytépe, oiko vaʼerã pene rembijokuáirõ. Ha oĩséva tenondete, oiko vaʼerã enterove rembiguáiramo” (Marcos 10:42-44).

Jesús voi omoĩ la ehémplo chupekuéra, ha heʼi: “Péicha avei pe Yvypóra Raʼy ndoúi oporojokuái hag̃ua, ou guei oiko tembiguáiramo, ha omeʼẽ hekove, opaga ha oguenohẽ hag̃ua hetápe pekádo poguýgui” (Mateo 20:28). Tres áño pukukue Jesús oservi umi héntepe, ha oĩ voi dispuésto omanóvo yvyporakuéra rehehápe. Umi disípulo osegi vaʼerã iñehémplo ha oñehaʼã vaʼerã oservi hapichakuérape, oipota rangue ojeservi chupekuéra. Oñehaʼã vaʼerã avei iñumílde ha ani oikose pe iñimportantevévaramo.