Jesús ha idisipulokuéra oĩ kuri Judéape ha koʼág̃a oho nórte gotyo, Galiléape. Ohokuévo ohasa hikuái Samáriarupi, ha ikaneʼõgui, asajérupi opyta opytuʼu peteĩ póso kóstape, siuda de Sicar ypýpe. Pe póso ningo yma guaréma, ha amalisia ojoʼo vaʼekue Jacob, térã opaga ojoʼoka hag̃ua. Ha ñane tiémpo peve, ko póso oĩ gueteri peteĩ siuda héravape Nablus ypýpe.

Jesús opytuʼu aja pe póso kóstape, idisipulokuéra oho pe puévlope ojogua hag̃ua hiʼupy. Upe aja peteĩ samaritána ou onohẽ y, ha Jesús heʼi chupe: “Jaʼumína michĩmi nde y” (Juan 4:7).

Umi hudío ha samaritáno ningo ndojoguerahaporãi ha ndochaʼéi ojuehe yma guivéma. Upévare pe kuña oñesorprende Jesús oñeʼẽ haguére chupe, ha oporandu: “Nde ningo hudío, ¿mbaʼéichaiko upéicharõ rejeruréta chéve y, ko che samaritánava?”. Jesús heʼi: “Nde ndereikuaái pe rregálo Ñandejára omeʼẽva ni mávapa upe heʼíva ndéve: ‘Jaʼumína michĩmi nde y’. Reikuaárire, nde rejerure vaʼerãmoʼã chupe, ha haʼe omeʼẽ vaʼerãmoʼã ndéve y oporomoingovéva”. Pe kuñakarai heʼi chupe: “Karai, nde ndereguerekói ni válde renohẽ hag̃ua la y, ha ko póso ningo ipypuku hína. ¿Moõgui piko upéicharõ reguenohẽta pe y oporomoingovéva? ¿Nde piko upéicharõ ndetuichave guaʼu ore ru ypykue Jacóbgui, oheja vaʼekue oréve ko ykua, ha haʼe voi itaʼýra ha hymbakuéra reheve hoyʼu vaʼekue chugui?” (Juan 4:9-12).

Upémarõ Jesús heʼi: “Opavave hoyʼúva ko ýgui, ijyʼuhéi jeýta. Péro oimeraẽ hoyʼúva pe y che ameʼẽtavagui, arakaʼeve ndaijyʼuheimoʼãvéima. Pe y ameʼẽtava chupe, haʼetéta ipype peteĩ yvu omeʼẽva y oporomoingovéva opa ára g̃uarã” (Juan 4:13, 14). Jesús ikaneʼõramo jepe, oĩ dispuésto oñemongetávo pe samaritánandi pe añetegua ikatúvare omeʼẽ jeikove opaʼỹva.

Pe kuña ombohovái: “Karai, emeʼẽna chéve pe y, anivéma hag̃ua cheyʼuhéi ni aju anohẽ y koʼágui”. Péro Jesús okambia de téma, ha heʼi chupe: “Tereho ehenói ne ménape ha eju koʼápe”. Pe samaritána heʼi: “Chéko nacheménai”. Jesús heʼi: “Nandejapúi erévo nanemenaiha. Cinco vésema remenda rupi, ha pe kuimbaʼe koʼág̃a oĩva nendive ndahaʼéi ne ména” (Juan 4:15-18). Oiméne pe kuñakarai oñesorprende ohechakuaávo Jesús oikuaaha heta mbaʼe chugui.

Upévare heʼi chupe: “Karai, ahechakuaa nde peteĩ profetaha”. Upéi Jesús ohechakuaa oikuaaseveha Ñandejáragui. ¿Mbaʼéichapa opilla upéva? Pe samaritána heʼi: “Ore rukuéra ypykue [umi samaritáno] omombaʼeguasu vaʼekue Ñandejárape ko sérrope [Guerizim, oĩva ag̃ui upégui], péro peẽ hudiokuéra peje Jerusalénpe ojeadora vaʼerãha chupe” (Juan 4:19, 20).

Upéicharõ jepe, Jesús ohechauka chupe naiñimportanteiha moõpa jaadora Ñandejárape. Haʼe heʼi: “Og̃uahẽta peteĩ óra natekotevẽmoʼãveimaha peju ko sérrope ni peho Jerusalénpe peadora hag̃ua Ñandejárape”. Upéi omyesakã: “Og̃uahẽta hína pe tiémpo, ha koʼág̃ama voi oñepyrũ, umi oadoráva hekoitépe Ñandejárape omombaʼeguasutaha chupe espíritu sánto  poguýpe ha añeteguápe. Añetehápe Ñandejára voi oheka umichaguápe oadora hag̃ua chupe” (Juan 4:21, 23, 24).

Ñandejárape g̃uarã la iñimportantevéva ndahaʼéi hína moõpa ojeadora chupe, síno mbaʼéichapa ojejapo upéva. Jesús heʼíva opokoiterei pe kuña korasõre. Upévare heʼi: “Che aikuaa outaha pe Mesías, oñehenóiva Cristo. Haʼe ou vove, omombeʼúta oréve opaite mbaʼe” (Juan 4:25).

Upéi Jesús heʼi chupe peteĩ mbaʼe iñimportantetereíva: “Che hína upe kuimbaʼe” (Juan 4:26). Ñapensamíntena: Peteĩ asaje ko kuña oho onohẽ y pe pósogui, ha upépe Jesús heʼi chupe haʼeha pe Mesías. Hiʼarive, amalisia haʼe ndeʼíri gueteri upéva avavépe.

Upéi Jesús disipulokuéra og̃uahẽ oúvo Sicárgui ha ogueru hiʼupy. Jesús oĩ gueteri Jacob póso kóstape ha ohecha hikuái haʼe oñemongetaha peteĩ kuña samaritánandi. Haʼekuéra oñemoag̃uívo, pe kuña osẽ oho pe puévlope ha oheja upépe ikambuchi.

Og̃uahẽvo Sicárpe, pe samaritána omombeʼu umi héntepe umi mbaʼe Jesús heʼíva chupe: “Pejumína pehecha, oĩ peteĩ kuimbaʼe omombeʼupaitéva chéve umi mbaʼe ajapo vaʼekue”. Ha ombokuriosove hag̃ua chupekuéra, oporandu: “¿Kóva piko ndahaʼeichéne pe Cristo?” (Juan 4:29). Upe porandu ningo ointeresaiterei umi héntepe Moisés tiémpo guivéma (Deuteronomio 18:18). Ohendúvo upéva, heta persóna odesidi oho ohecha mávapa añetehápe Jesús.

Upe aja umi disípulo heʼi Jesúspe hoʼu hag̃ua umi mbaʼe oguerúva hikuái. Péro haʼe ombohovái chupekuéra: “Oiméko che areko haʼu vaʼerã, peẽ peikuaaʼỹva”. Ohendúvo upéva, heʼijoa hikuái: “Avave ningo ndoguerúi chupe hoʼu vaʼerã, ¿ajépa?”. Jesús katu mborayhúpe omyesakã chupekuéra peteĩ mbaʼe iñimportantetereíva, heʼívo: “Che rembiʼu hína kóva: Ajapo upe chembou vaʼekue rembipota, ha amog̃uahẽ huʼãme  pe tembiapo omeʼẽ vaʼekue chéve ajapo hag̃ua” (Juan 4:32-34).

Jesús heʼívo otermina vaʼerãha peteĩ tembiapo, noñeʼẽi kuri pe koséchare. Upérõ ofalta gueteri cuatro mése oñemonoʼõ hag̃ua umi kóga. Jesús ningo oñeʼẽ hína ótra kláse de koséchare. Haʼe heʼi: “Pemañamína umi kogatýre, mbaʼéichapa otyarõmbáma oñemonoʼõ hag̃ua. Pe omonoʼõvape oñemeʼẽma hembiapo repykue ha haʼe ombyaty pe kóga. Pe kóga hína umi ohupytýtava jeikove opaveʼỹva. Upévare pe oñemitỹva ha omonoʼõva ovyʼa oñondive” (Juan 4:35, 36).

Jesús ohechakuaáma heta persóna oikóva Sicárpe ojeroviaha hese ohendu rire pe samaritánape. Pe kuña heʼi enterovépe: “Omombeʼupaite chéve umi mbaʼe ajapo vaʼekue” (Juan 4:39). Upévare, umi hénte Sicargua ou Jesús rendápe pe póso oĩháme. Ojerure chupe hikuái opytamie hag̃ua hendivekuéra, ha haʼe opyta Samáriape dos día.

Umi samaritáno ohendu rire Jesúspe, hetavéntema oĩ la ojeroviáva hese. Ha heʼi hikuái pe kuñáme: “Koʼág̃a ndahaʼevéima nde eréguinte rogueroviáva, síno ore voi rohendúgui ha roikuaa ko kuimbaʼe añetehápe haʼeha pe osalvátava pe múndo” (Juan 4:42). ¡Ajépa iporãite pe ehémplo omoĩva pe samaritána oñeʼẽvo opárupi Jesúsre, ha omokyreʼỹvo umi héntepe ohendu hag̃ua avei chupe!

Ñanemanduʼákena ofaltaha cuatro mésentema og̃uahẽ hag̃ua pe kosécha tiémpo. Amalisia upérupi oñeñotỹ seváda, ha ojekosecha jepi primavérape. Upéicharõ, oiméne noviembre térã diciembre hína. Upéva ohechauka Jesús ha idisipulokuéra opyta hague ocho méserupi Judéape oikopa rire pe Páskua áño 30-pe, ha upe tiémpope haʼekuéra omboʼe ha ovautisa heta héntepe. Koʼág̃a katu oho hikuái Galilea gotyo, oĩháme hogakuéra. ¿Mbaʼépa ohaʼarõ chupekuéra upépe?