Jaikuaaséramo peteĩ persónape, siémpre ñepyrũrã ñaporandu chupe mbaʼéichapa héra. Ñaporandúramo Ñandejárape mbaʼéichapa héra, ¿mbaʼépa orrespondéta ñandéve?

“Che hína Jehová, péicha che réra” (Isaías 42:8).

Ñandejárape g̃uarã voi iñimportánte upe téra. Ñandejára haʼe voi oiporavo vaʼekue imbaʼerã upe téra ndahaʼéi ótro ombohérava chupe upéicha. Jehová heʼi: “Péicha hína che réra opa árare ha ko téra rupive enterove henerasión imanduʼáta cherehe” (Éxodo 3:15). La Bíbliape heta hendápe oñeñeʼẽ jave Ñandejárare oñemoĩ avei “Todopoderóso”, “Ñandejára Ndaijojaháiva” térã “Ñande Ruvicha”, péro hetaitereive hendápe oñemoĩ héra tee. Ñandejára réra avei oĩ hetave hendápe oimeraẽ ótro téragui, por ehémplo Abrahán, Moisés, David térã Jesúsgui. Jehová ningo oipota jaikuaa héra. La Biblia heʼi voi: “Péicha umi hénte oikuaáta, nde nderérava Jehová, nde añoite hína haʼeha Ñandejára Ndaijojaháiva ko yvy ape ári” (Salmo 83:18).

Jesúspe g̃uarã iñimportánte upe téra. Pe ñemboʼe oñehenóivape “padrenuéstro”, Jesús omboʼe isegidorkuérape heʼi hag̃ua Ñandejárape: “Toñembotuicha nde réra” (Mateo 6:9). Jesús voi heʼi vaʼekue Ñandejárape peteĩ ñemboʼépe: “Che Ru, embotuichána nde réra” (Juan 12:28). Jesúspe g̃uarã entéro mbaʼégui iñimportanteve vaʼekue ombotuicha Ñandejára réra. Upévare haʼe ikatu vaʼekue heʼi: “Che aikuaauka chupekuéra nde réra ha asegíta aikuaauka” (Juan 17:26).

Umi oikuaávape g̃uarã Ñandejárape iñimportánte upe téra. Ñandejára siervokuéra yma guare ontende porã vaʼekue upe téra iñimportantetereiha ojesalva ha ojeprotehe hag̃ua chupekuéra.  “Jehová réra ningo peteĩ tórre isegúro porãva, umi ihústova odipara upépe ojeprotehe hag̃ua” (Proverbios 18:10). “Ha entéro ojeroviáva Jehová rérare ojesalváta” (Joel 2:32). La Biblia ohechauka porã avei upe téra oidentifika porãtaha Ñandejára siervokuérape. “Umi puévlo, káda uno iñeʼẽrendúta idióspe, péro ñande ñaneñeʼẽrendúta Ñandejára Jehovápe opa ára g̃uarã” (Miqueas 4:5; Hechos 15:14).

Ñandejárare añoite opyta porãha upe téra. Heta expérto oĩ de akuérdo Ñandejára réra heʼiseha “Haʼe ojapo upe oipotáva oiko”. Umi mbaʼe Jehová heʼi vaʼekue hérare oñeʼẽrõ guare Moisés ndive ñanepytyvõ ñantende hag̃ua mbaʼépa heʼise pe héra. Haʼe heʼi: “Chehegui oikóta che aipotáva” (Éxodo 3:14). Upe téra ohechauka porã ñandéve Ñandejára haʼeha opa mbaʼe Apohare, ha ndahaʼéi upévante, pe héra ohechauka avei ñandéve chugui térã ikreasióngui ikatuha oiko upe haʼe oipotáva okumpli hag̃ua ivolunta. Umi título ojepurúva oñeñeʼẽ jave Ñandejárare ohechaukáramo jepe haʼe omanda tuichaha, orekoha autorida ha podér, pe téra Jehová añoite ohechauka porã entéro mbaʼe haʼe ikatúva ojapo.

Upe téra ohechauka Ñandejára oñeinteresaha ñanderehe. Jahecha haguéicha, Jehová réra heʼise haʼe ojapoha upe oipotáva oiko, upéva ohechauka porã ñandéve Ñandejára ohayhuetereiha entéro umi mbaʼe ojapo vaʼekue, upévarente oheja osegi oexisti entéro mbaʼe, umíva apytépe ñande. Ñandejára voi omombeʼu ñandéve la héra ha upéva ohechauka oipotaha jaikuaa chupe. Ñande neʼĩra gueteri ni jaikove ni ñapensa umi mbaʼére ha haʼe oikuaaukáma vaʼekue la héra. Upéva ohechauka Ñandejára ndoipotaiha ñapensa hese haʼeha peteĩ espíritu oĩva mombyry ñandehegui ha ndaikatúiva jaiko iñamígoramo, síno haʼe añetehápe oexistiha ha oipotaha ñañemoag̃ui hese (Salmo 73:28).

Jaipurúramo héra jahechauka ñañeinteresaha hese. Eñeimahinamína nde reipotaha peteĩ persóna nderecha iñamígoramo ha upévare ere chupe nerenói hag̃ua nde rérarupi. ¿Péro mbaʼéichapa reñeñandúta upe persóna ndojaposéiramo upéicha? Ikatu voi repensa upe persóna nandepotaiha iñamigorã. Upeichaite avei Jehová, haʼe omombeʼu ñandéve mbaʼéichapa héra pórke oipota jaipuru la héra. Ha jajapóvo upéva, jahechauka hína jaikoseha iñamígoramo. Haʼe inklúso oikuaa mávapa “ojepyʼamongeta hérare” (Malaquías 3:16).

Jaikuaa hag̃ua Ñandejárape tekotevẽterei jaikuaa héra, péro ndahaʼéi voi upévante, iñimportanteterei avei jaikuaa mbaʼeichagua persónapa haʼe.