EÑEIMAHINAMÍNA nde reimeha peteĩ kongregasión kristiánape umi apóstol tiémpope. Apóstol Pablo omondo peteĩ kárta upe kongregasiónpe ha nde rehendu ojeleeha hína, rehechakuaa haʼe omensionaha heta párte oĩva ‘Ñandejára Ñeʼẽme’ (2 Timoteo 3:15). Upémarõ repensa: “Aleesete pe párte apóstol Pablo omensionáva”. Péro upe tiémpope ijetuʼúta kuri ndéve rejapo hag̃ua upéva. ¿Mbaʼérepa?

¿Mbaʼéichapa vaʼekue umi manuskríto ojepurúva apóstol Pablo tiémpope? Ko páhinape oĩ peteĩ ehémplo, pe taʼangápe ojekuaa peteĩva umi rróllo ojetopa vaʼekue mar Muerto ypýpe, oĩháme peteĩ párte lívro de Isaíasgui. ¿Rehechakuaápa mbaʼéichapa ojeskrivi vaʼekue upérõ? Ojeskrivipaite de un puku, ndaipóri púnto ni kóma. Ha ndaipóri avei umi kapítulo ha versíkulo ñande jaipurúva koʼág̃arupi.

Umi oskrivi vaʼekue la Biblia nomoĩri pype kapítulo ha versíkulo. Haʼekuéra oskrivi ikatu hag̃uáicha umi oleéva oikuaa Ñandejára mensáhe kompletoite, ndahaʼéi parteʼi mimínte. Ha upéicha vaʼerã voi ningo. Por ehémplo, peteĩ persóna rehayhúva omondóramo ndéve peteĩ kárta, ndereleemoʼãi parteʼi mimínte, síno pe kárta kompletoite, ¿ajépa?

Péro ndaipóri tiémpope umi kapítulo ha versíkulo la Bíbliape heta mbaʼe ijetuʼuve vaʼekue avei. Por ehémplo, apóstol Pablo omensiona jave umi mbaʼe oĩva Ñandejára Ñeʼẽme heʼínte vaʼekue “Ñandejára Ñeʼẽme heʼiháicha”, térã “Isaías oprofetisa vaʼekue”, ha umícha (Romanos 3:10; 9:29). Ha ijetuʼu vaʼekue ojeikuaa hag̃ua mbaʼe partetépa oĩ upéva noiméiramo pe ohendúva oikuaa porãiterei Ñandejára Ñeʼẽ.

Hiʼarive, ndahaʼéi peteĩ mensáhe añónte la ojeskrivi vaʼekue Ñandejára Ñeʼẽme. Og̃uahẽmbotápe pe áño 100 oñekompletáma vaʼekue la Biblia ha oĩ pype 66 lívro en totál. Upévare umi oleéva la Biblia koʼág̃arupi ovyʼa oĩ haguére pype kapítulo ha versíkulo. Péicha otopa pyaʼeve hikuái umi párte ohechaséva, por ehémplo, umi mbaʼe apóstol Pablo omensionáva umi kárta oskrivi vaʼekuépe.

Ikatu oime nde reikuaase: “¿Ha máva piko la omoĩ vaʼekue umi kapítulo ha versíkulo la Bíbliape?”.

Ojeʼe ningo peteĩ paʼi hérava Stephen Langton odividi hague la Biblia por kapítulo. Haʼe ojapo vaʼekue upéva áño 1200 riremi, omboʼe tiémpope Universidad de Paríspe, oĩva Fránciape. Kon el tiémpo oiko avei chugui Arsovíspo de Canterbury.

Langton tiémpo mboyve, heta expérto otantea mimíma vaʼekue odividi la Biblia por kapítulo, amalisia ifasilve hag̃ua chupekuéra otopa umi párte oleeséva. Epensamínte lívro de Isaías rehe, koʼág̃a orekóva 66 kapítulo. Rehekátarõ peteĩ párte releeséva pe lívro kompletoitépe, hasypeterei retopáta. Upévare ikatu reñeimahina mbaʼeichaitépa ipráktiko raʼe chupekuéra oheka hag̃ua odividi rire hikuái pe lívro por kapítulo.

Péro upéi oĩ jey peteĩ provléma. Káda uno umi expérto odividi de diferénte fórma umi lívro de la Biblia. Por ehémplo, peteĩva odividi pe lívro de Marcos haimete 50 kapítulope voi, ndahaʼéi 16-pe ojejapoháicha koʼág̃a. Langton tiémpope ou vaʼekue Paríspe heta estudiánte ótro lugargua, ha ogueru hikuái umi Biblia  orekóva. Péro umi profesór ha umi estudiánte ndaikatúi heʼi ojupe moõitépa oheka vaʼerã olee hag̃ua peteĩ párte, pórke diferentepa umi kapítulo ojedividi lája.

Upémarõ Langton ojapo peteĩ división pyahu. Heʼiháicha peteĩ lívro, pe traváho haʼe ojapóva “ogustaiterei umi oleévape ha umi ojapóvape kópia” de la Biblia, ha “pyaʼe voi ko idéa isarambi Europa tuichakuére” (The Book—A History of the Bible). Koʼág̃a la majoría umi Biblia oreko umi kapítulo Langton odividi haguéicha.

Amo 300 áñorupi upe rire, peteĩ expérto hérava Robert Estienne ha ombaʼapóva impréntape, ofasilitavéntema ojelee hag̃ua la Biblia. Haʼe oipota kuri hetave hénte ostudia la Biblia, ha ohechakuaa okonvenivetaha umi kapítulo ha umi versíkulo oñemoĩramo peteĩchapa umi Bíbliape.

Ndahaʼéi Estienne pe primero okalkula vaʼekue iporãvetaha ojedividi la Biblia por versíkulo. Por ehémplo, heta tiémpo upe mboyve, umi hudío ojapóva kópia de la Biblia odividíma vaʼekue por versíkulo umi Escrituras Hebreas, oñehenóiva avei Viejo Testamento. Péro haʼekuéra nomoĩri chupe kapítulo. Ha enterovénte avei omoĩ vaʼekue diferentepa umi versíkulo, oikóma haguéicha umi kapítulore.

Estienne odividi por versíkulo umi Escrituras Griegas Cristianas, oñehenóiva avei Nuevo Testamento, ha oipuru avei umi versíkulo oĩma vaʼekue voi umi Escrituras Hebréaspe. Áño 1553-pe haʼe oimprimi pe primera Biblia kompléta orekóva umi kapítulo ha versíkulo ojepuruháicha jepi koʼág̃a (pe Biblia oĩ vaʼekue francéspe). Algúnope ndogustái vaʼekue upéva pórke heʼi ombojaʼopaha la Biblia parteʼi mimíme, ha heʼi oĩtaha opensáva káda versíkulo haʼeha peteĩ fráse apartete. Upéicharõ jepe, umi oimprimíva la Biblia sapyʼaitépe oñepyrũma avei omoĩ umi kapítulo ha versíkulo Estienne ojapo haguéicha.

Haʼetévaicha ndojapomoʼãiva tuichaiterei diferénsia oñemoĩ hague umi kapítulo ha versíkulo. Péro upéva rupive káda párte la Bíbliagui haʼete ku orekóva peteĩ “direksión” ojetopa pyaʼeve hag̃ua. Añetehápe ndahaʼéi Ñandejára la omoĩka vaʼekue umi kapítulo ha versíkulo, ha sapyʼánte iñextráño la ojedividi lája. Péro lomímonte umíva ideprovechoiterei jatopa hag̃ua peteĩ párte oñemensionáva la Bíbliagui, térã ñakomparti hag̃ua ótrondi peteĩ párte ñandegustáva. Jalee jave peteĩ lívro sapyʼánte ñamarka umi palávra térã fráse ñanemanduʼaséva, ha umi kapítulo ha versíkulo ñanepytyvõ jajapo hag̃ua upéva la Bíbliape.

Péro ideprovéchoramo jepe umi kapítulo ha versíkulo, siémpre nemanduʼa vaʼerã iñimportanteha rentende porã pe mensáhe kompletoite Ñandejára oikuaaukaséva ñandéve. Releéta jave peteĩ versíkulo, rejepokuaa vaʼerã rehecha mbaʼéguipa oñeñeʼẽ hína upe pártepe, ikatu hag̃uáicha rentende porã. Upéva nepytyvõta reikuaa porãve hag̃ua rehóvo “Ñandejára Ñeʼẽ, ikatúva nemoarandu rejesalva hag̃ua” (2 Timoteo 3:15).