Peteĩ jahayhúva térã peteĩ persóna iñimportánteva ñanderregaláramo, katuete ñamombaʼetereíta upe rregálo. Algúna vése ikatu avei jarresivi peteĩ rregálo ndahepýiva, péro lomímonte ñamombaʼeterei omeʼẽgui ñandéve peteĩ ñane hénte térã ñane amígo jahayhúva. Upéva oiko kuri Jordan rehe, pe ñamensiona vaʼekue pe ótro artíkulope. ¿Ha mbaʼépa ikatu jaʼe pe rregálo Ñandejára omeʼẽ vaʼekuére ñandéve?

La Biblia heʼi: “Ñandejára ombou Itaʼýra peteĩete ko múndope, ikatu hag̃uáicha haʼe rupive jahupyty pe jeikove” (1 Juan 4:9). Ñandejára ningo pe persóna iñimportantevéva oĩva ko univérsope, upévare koʼytevéntema ñamombaʼe pe rregálo porãite haʼe omeʼẽ vaʼekue ñandéve. Oñeʼẽvo Ñandejárare, peteĩ salmísta heʼi: “Péicha umi hénte oikuaáta, nde nderérava Jehová, nde añoite haʼeha pe Ipoderosovéva ko yvy ape ári” (Salmo 83:18, TNM). ¡Ajépa tuichaite mbaʼe jarresivi haguére peteĩ rregálo pe persóna iñimportantevévagui!

La Biblia heʼi avei Ñandejára haʼeha ñande Ru (Isaías 63:16). ¿Mbaʼérepa jaʼe upéva? Haʼe omeʼẽ rupi ñandéve ñande rekove. Avei haʼe mborayhúpe okuida ñanderehe ojapoháicha peteĩ túa okuidáva ifamília mimíre. Oñeʼẽvo peteĩ puévlo yma guarére hérava Efraín, Ñandejára heʼi: “Efraingua hína chéve g̃uarã peteĩ che raʼy ahayhúva, haʼe upe che raʼy ahayhuvéva [...]. Chembohesaypa ha ambyasyeterei chupe” (Jeremías 31:20). Ko ñane tiémpope Ñandejára peichaiténte avei ohayhu umi isiervokuérape. Haʼe ningo ñande Apohare ipoderosoitéva, péro ndahaʼéi upévante, haʼe hína avei ñande Túa ha ñane amígo ñanderayhuetéva. Upévare ñamombaʼeterei entéro rregálo haʼe omeʼẽva ñandéve.

Ñamombaʼeterei peteĩ rregálo pe persóna omeʼẽramo ñandéve ñanderayhúgui, ha ndahaʼéi oñesentígui ovligádo ojapo hag̃ua upéva. Ha pe orregaláva pyʼaporãme nohaʼarõi oñemyengovia chupe mbaʼeve.

Ñandejára ningo ñanderayhuetereígui omeʼẽ Itaʼýrape ñanderehehápe. La Biblia heʼi voi: “Péicha ojehechauka Ñandejára mborayhu ñande kásope: Ñandejára ombou Itaʼýra peteĩete ko múndope”. ¿Maʼerãpa? La Biblia heʼive: “Ikatu hag̃uáicha haʼe rupive jahupyty pe jeikove” (1 Juan 4:9). ¿Oĩpa raʼe ovligádo Ñandejára ojapóvo upéva? Nahániri. “Péva peteĩ rregálo Ñandejára omeʼẽva imbaʼeporãiterei rupi” (Romanos 3:24).

¿Mbaʼérepa jaʼekuaa Ñandejára ojapo hague upéva “imbaʼeporãiterei rupi”? La Biblia heʼi: “Ñandejára katu ohechauka ñanderayhuha, Cristo omanóvo ñanderehehápe ñande pekadór aja gueteri” (Romanos 5:8). Ñande ningo pekadór ha ndajarekói kuri ñaneguenohẽ vaʼerã ko situasióngui, péro Ñandejára ñanderayhuetereígui ojapo oñekotevẽva ñandesalva hag̃ua. Ñande nañamereséi kuri upéva ha arakaʼeve ndaikatumoʼãi japagapa chupe upe ojapo vaʼekue ñanderehehápe. Koʼag̃aite peve ndaipóri ótra persóna Ñandejáraicha ñanderayhúva ha omeʼẽva ñandéve peichagua rregálo.

Jaikuaáramo peteĩ persóna heta ojesakrifika hague orregala hag̃ua ñandéve peteĩ mbaʼe, katuete ñamombaʼetereíta upe rregálo. Ha oiméramo orregala ñandéve peteĩ mbaʼe haʼe ohayhuetereíva, upépe koʼytevéntema jaapresia upe rregálo.

Ñandejára ningo “omeʼẽ Itaʼýra peteĩete” (Juan 3:16). Haʼe ningo omeʼẽ pe persóna ohayhuvéva ñanderehehápe. Hetaiterei tiémpore Jesús oipytyvõ Ñandejárape ojapórõ guare ko univérso, ha Ñandejára ohayhueterei chupe ha káda día ovyʼa heseve (Proverbios 8:30). La Biblia heʼi Ñandejára ohayhuetereiha Itaʼýra Jesúspe, ha ojeʼe voi hese haʼeha “Ñandejára jahechaʼỹva joguahaite” (Colosenses 1:13-15). Ndaipóriva arakaʼeve mokõi persóna peichaite peve ojogueraha porãva.

Upéicharõ jepe, Ñandejára “ni Itaʼýrare nahakateʼỹi vaʼekue” (Romanos 8:32). Jehová ningo omeʼẽ pe iporãvéva orekóva ñanderehehápe. Añetehápe tuicha sakrifísio ojapo Ñandejára omeʼẽ hag̃ua ñandéve ko rregálo.

Katuete ñamombaʼetereíta peteĩ rregálo oñemeʼẽramo ñandéve hústo upe ñaikotevẽ vaʼekue. Epensamína por ehémplo nderasy vaietereiha ha reikotevẽ peteĩ tratamiénto osalvátava nde rekove, péro nde ndaikatúi repaga upéva hepyeterei rupi. Upéi ou peteĩ persóna ha heʼi haʼe opagataha upe ne tratamiénto. ¡Ajépa remombaʼetereíta ha reagradese joʼa joʼáta chupe ojapo haguére upéva!

“Adán káusare enterove omano, upéicha avei Cristo rupive enterovépe oñemoingove jeýta” (1 Corintios 15:22). Ñande ningo Adán familiare, upévare “enterove ñamano” ha ndaikatúi jajehekýi pe pekádo ha ñemano poguýgui ni ñaime porã Ñandejára renondépe. Ñande ñandejehegui ndaikatúi jaikove ni jajapo mbaʼeve ótro oikove hag̃ua. La Biblia heʼi: “Ni peteĩva ndaikatúi osalva ótrope, ni ndaikatúi opaga Ñandejárape orreskata hag̃ua hapichápe [...] avave ndaikatúi opaga hese la ovaléva, ni iplatavéramo jepe” (Salmo 49:7, 8, TNM). Ñande ningo ñaneaño rei ndaikatumoʼãi jajesalva, upévare ñaikotevẽterei kuri peteĩ ñanepytyvõva upearã.

Jehová ñanderayhueterei rupi opaga kuri pe “tratamiénto” ñaikotevẽte vaʼekue jasalva hag̃ua ñande rekove, ha péicha Jesús rupive avei “enterovépe oñemoingove jeýta”. ¿Mbaʼéichapa ñanepytyvõ Jesús ojapo vaʼekue? La Biblia heʼi: “Itaʼýra Jesús ruguy ñanemopotĩ opaichagua pekádogui”. Jajeroviáramo Jesús  sakrifísiore ikatúta oñeperdona ñande pekadokuéra, ha avei ikatúta jaiko pára siémpre (1 Juan 1:7; 5:13). Péro pe sakrífisio Jesús ojapo vaʼekue oipytyvõta avei umi jahayhúva omano vaʼekuépe. ¿Mbaʼérepa jaʼe upéva? La Biblia heʼi: “Pe ñemano ningo ou peteĩ kuimbaʼe rupive, upévare umi omanóvape oñemoingove jey peteĩ kuimbaʼe rupive” (1 Corintios 15:21). *

Pe sakrifísio ojapo vaʼekue Jesús haʼe peteĩ rregálo omeʼẽ vaʼekue ñandéve pe persóna iñimportantevéva ha ñanderayhuvéva oĩva ko univérsope. Jehová ningo tuicha sakrifísio ojapo vaʼekue omeʼẽvo ñanderehehápe Itaʼýra ohayhuvéva. Ha ndaipóri ni peteĩ rregálo peichaite peve ñaikotevẽ vaʼekue, pórke ñaneguenohẽ pe pekádo ha ñemano poguýgui. Upévare ikatu jaʼe pe sakrifísio Ñandejára ojapo vaʼekue ñanderehehápe haʼeha peteĩ rregálo ivaliosoitereíva ha ndaijojaháiva.