Añetehápe, enterovépe ñaneraʼarõ peteĩ situasión ijetuʼuetereíva ojoguáva avei peteĩ torméntape. Jesús heʼi vaʼekue upéva haʼetaha voi peteĩ “jehasa asy guasu” (Mateo 24:21). Ndaikatúi ningo ñakañýnte ko torméntagui. Péro, ¿mbaʼépa ikatu jajapo jajeprotehe hag̃ua?

Pe Sermón del Móntepe Jesús heʼi vaʼekue mbaʼépa jajapo vaʼerã: “Pemotenonde meméke Ñandejára Rréino ha umi mbaʼe haʼe heʼíva iporãha” (Mateo 6:33). ¿Mbaʼéicha ikatu jajapo upéva?

‘Pemotenonde Ñandejára Rréino’. Upéva heʼise Ñandejára Rréino iñimportanteve vaʼerãha ñandéve g̃uarã opaite mbaʼégui (Mateo 6:25, 32, 33). ¿Mbaʼérepa jajapo vaʼerã upéva? Pórke umi yvypóra goviérno ndoguerekói la kapasida osolusiona hag̃ua ñane provlemakuéra. Ñandejára Rréino añoite ikatu ojapo upéva ñanderehehápe.

Jajapo “umi mbaʼe haʼe heʼíva iporãha”. Ñañehaʼãmbaite vaʼerã ñakumpli umi léi omeʼẽva ñandéve Ñandejára ha jajegia ikonséhore. ¿Mbaʼérepa? Pórke jadesidíramo ñandejeheguínte mbaʼépa iporã ha mbaʼépa ivai, katuete jajeperhudikáta (Proverbios 16:25). Péro jahejáramo Ñandejára ñandegia, ñambovyʼáta chupe, ha ñande voi ñañevenefisiáta (Isaías 48:17, 18).

“Pemotenonde meméke Ñandejára Rréino ha umi mbaʼe haʼe heʼíva iporãha”. Jesús ñandeavisa vaʼekue oĩha heta mbaʼe ipeligrósova ikatúva ñandedistrae, por ehémplo ñapensa jarekotaha  trankilida ñambyatýramo rrikésa. Avei, oĩ ojepyʼapyetereíva hemikotevẽre ha upéva káusare ombotapykuéma Ñandejára Rréino (Mateo 6:19-21, 25-32).

Péro Jesús opromete vaʼekue umi oñemoĩva Ñandejára Rréino poguýpe orekotaha opa mbaʼe oikotevẽva, ha amo gotyove ohupytytaha heta vendisión odurátava pára siémpre (Mateo 6:33).

Jesús disipulokuéra ningo omotenonde meme vaʼekue Ñandejára Rréino ha umi mbaʼe haʼe heʼíva iporãha, péro ndohechajepéi vaʼekue opávo pe sufrimiénto. Upéicharõ jepe, ikatu jaʼe ojeprotehe hague chupekuéra. ¿Mbaʼéichapa oiko raʼe upéva?

Heta mbaʼe vai ningo oiko umi hénte nopenáivare Ñandejára heʼívare, péro haʼekuéra iñeʼẽrendu rupi chupe, ojeprotehe vaʼekue koʼã mbaʼégui. Haʼekuéra ojerovia mbarete vaʼekue Ñandejára Rréino outaha, ha upéva oipytyvõ chupekuéra oaguanta hag̃ua umi provléma ijetuʼuvéva jepe. Avei, Ñandejára omeʼẽ chupekuéra “pe podér umi ótra hénte ndorekóiva” ipuʼaka hag̃ua umi provléma ombohováivare hikuái (2 Corintios 4:7-9).

Umi kristiáno ypykue ojapo vaʼekue la Jesús omandáva chupekuéra, ha omotenonde meme Ñandejára Rréino. Upévare opredika hikuái umi notísia porã oparupiete (Colosenses 1:23). ¿Oĩpa avei ojapóva upéva ñane tiémpope?

¡Si oĩ! Umi testígo de Jehová ontende porã saʼietereíma ofaltaha Ñandejára Rréino ohundi hag̃ua umi hénte añáme. Upévare haʼekuéra ojapo ikatúva entéro okumpli hag̃ua Jesús heʼi vaʼekue: “Umi notísia porã oñeʼẽva Ñandejára Rréinore oñemombeʼúta oparupiete ko yvy ape ári, upe mensáhe ojekuaa hag̃ua entéro tetãrupi, ha upéi og̃uahẽta pe fin” (Mateo 24:14).

¿Mbaʼépa nde rejapóta reaprende rire koʼã notísia porã oñeʼẽva Ñandejára Rréinore? Romokyreʼỹ resegi hag̃ua umi kristiáno Bereagua ehémplo. Apóstol Pablo opredikárõ guare chupekuéra umi notísia porã, “haʼekuéra oasepta Ñandejára ñeʼẽ ipyʼaite guive”. Upéi haʼekuéra “ohesaʼỹijo porã Ñandejára Ñeʼẽ ohecha hag̃ua siértopa umi mbaʼe ojeʼéva chupekuéra”. Ha oĩ rire segúro, ojapo hikuái umi mbaʼe oaprende vaʼekue (Hechos 17:11, 12).

Nde avei ikatu rejapo upéva. Remotenonde meméramo Ñandejára Rréino ha umi mbaʼe haʼe heʼíva iporãha, ikatúta rejeprotehe heta mbaʼe vaígui koʼág̃ama voi, ha amo gotyove ikatúta reiko pyʼaguapýpe pára siémpre.