“Peñatende porãke siémpre, pórke ndapeikuaái mbaʼe día ni mbaʼe órapa oikóta koʼã mbaʼe” (MATEO 25:13).

“Pejesareko meméke ha peñatende porãke siémpre, pórke ndapeikuaái mbaʼe díapa Ñandejára oiporavo” (MARCOS 13:33).

Upéicharõ, Ñandejára oiporavóma ‘peteĩ óra ha peteĩ día’ entéro umi mbaʼe vai opa hag̃ua, péro ni peteĩ persóna oikóva ko yvy ape ári ndoikuaái arakaʼetépa oikóta upéva (Mateo 24:36). ¿Heʼisépa upéva ndaiporiha fórma jaikuaávo hiʼag̃uímapa pe fin? Nahániri. Jesús heʼi vaʼekue idisipulokuérape ojesareko hag̃ua unas kuánta kósare ohechaukátava hiʼag̃uimaha pe día opatahápe umi mbaʼe vai.

Umi mbaʼe Jesús heʼi vaʼekue oikotaha, haʼe hína peteĩ señál ohechaukáva “pe fin ou potaitemaha”. Jesús heʼi: “Peteĩ país opuʼãta ótro país rehe, ha umi goviérno opuʼãta ojuehe. Avei oĩta ñembyahýi, ha yvyryrýi ápe ha pépe” (Mateo 24:3, 7). Haʼe heʼi vaʼekue avei oĩtaha “opaichagua mbaʼasy” (Lucas 21:11). ¿Rehechápa nde oikoha koʼág̃arupi koʼã mbaʼe Jesús heʼi vaʼekue?

La hénte osufrieterei oĩ rupi gérra, ñembyahýi, terremóto ha opaichagua mbaʼasy. Por ehémplo, áño 2004-pe oiko peteĩ terremóto tuichaitereíva pe oséano Índicope ha upéva káusare oñepyrũ peteĩ sunámi ojukáva 225.000 persónape rupi. Tres áñope katu pe pandémia COVID-19 ojuka amo 6 millón 900 mil persónarupi ko yvy tuichakuére. Jesús heʼi vaʼekue koʼã mbaʼe ohechaukataha pe fin hiʼag̃uimbaitemaha.

La Biblia heʼi pe tiémpo ou mboyvemi pe fin heraha ‘umi ára paha’ (2 Pedro 3:3, 4). Ohechaukaháicha 2 Timoteo 3:1-5, umi ára pahápe umi hénte ndorrespetamoʼãi umi mbaʼe iporãva (Ehecha pe rrekuádro “ Oikótava ou mboyvemi pe fin”). ¿Rehechápa nde koʼág̃arupi umi hénte opensaha ijehénte, itaryryiha, isalvaheha ha ndohayhuiha hapichápe? Koʼã mbaʼe haʼe hína peteĩ pruéva ohechaukáva hiʼag̃uimaha pe fin.

Péro, ¿ipukúta piko ‘umi ára paha’? La Biblia heʼi “mbykypaitemaha pe tiémpo hembýva” Ñandejára ‘ohundi hag̃ua umi ohundívape ko yvy’ (Apocalipsis 11:15-18; 12:12).

Ñandejára oiporavóma peteĩ óra ha peteĩ día ohundi hag̃ua ko múndo aña (Mateo 24:36). ¡Ha oĩve hína la notísia iporãva! Ñandejára “ndoipotái avave oñehundi” (2 Pedro 3:9). Upévare haʼe omeʼẽ oportunida entéro persónape oikuaa hag̃ua ivolunta ha ojapo hag̃ua haʼe heʼíva. ¿Mbaʼérepa Ñandejára omeʼẽ gueteri tiémpo? Pórke haʼe oipota jajesalva oñehundi vove ko múndo aña, ha péicha ñaime imúndo pyahúpe oiko vove ko yvýgui peteĩ paraíso.

Ñandejára ojapo tekotevẽva guive ikatu hag̃uáicha la hénte oikuaa mbaʼépa ojapo vaʼerã oiko hag̃ua Igoviérno poguýpe. Jesús heʼi vaʼekue umi notísia porã oñeʼẽva Ñandejára Rréinore oñemombeʼutaha “oparupiete ko yvy ape ári” (Mateo 24:14). Ko yvy tuichakuére umi testígo de Jehová ohasa hetaiterei millón de óra opredikávo ha omboʼévo pe mensáhe de esperánsa oĩva la Bíbliape. Jesús heʼi vaʼekue ko mensáhe porãite oñemombeʼutaha ko yvy tuichakuére ou mboyve pe fin.

Koʼẽrõitéma umi umáno nogovernamoʼãvéima ko yvy ape ári. Péro nde ikatu hína rejesalva oñehundi vove ko múndo aña, ha eiko peteĩ paraísope ko yvy ape ári opromete haguéicha Ñandejára. Pe ótro artíkulo ohechaukáta mbaʼépa ikatu rejapo reime hag̃ua pe múndo pyahu iporãitévape.