Koʼẽrõitéma Ñandejára goviérno yvagapegua ogovernáta ko múndo tuichakuére. Oiko vove upéva umi hénte oikóta vyʼápe ha pyʼaguapýpe, avei orekóta traváho ombovyʼátava chupekuéra. Ñandejára ningo onombra Jesucrístope ogoverna hag̃ua ko yvy. Haʼe oñeinteresa la héntere ha siémpre ojapóta iporãva ñanderehehápe, ndojoguái umi governánte koʼag̃aguápe. Jesucristo ogovernáta mborayhúpe, haʼe ningo peteĩ Rréi imbaʼeporãtava, oporombyasýtava ha ihústotava (Isaías 11:4).

Umi hénte oikótava ko yvy ape ári oĩta unído haʼéramo jepe de diferénte rrása téra diferénte tetãygua. Oikóta chuguikuéra peteĩ puévlo oikóva peteĩ ñeʼẽme (Apocalipsis 7:9, 10). Entéro persóna ohayhúta Ñandejárape ha hapichápe. Avei ombaʼapóta oñondivepa okuida hag̃ua ko yvýre, péicha okumplíta hikuái Ñandejára oipotáva ymaite guive (Salmo 115:16).

Ñandejára Rréino ogoverna vove ko yvy, Ñandejára oñenkargáta pe klíma siémpre oĩ porã hag̃ua (Salmo 24:1, 2). Jesús oĩrõ guare ko yvy ape ári okalmaite vaʼekue peteĩ torménta vai, péicha ohechauka mbaʼépa ikatu ojapo Ñandejára podér rupive (Marcos 4:39, 41). Cristo ogoverna vove, avave ndokyhyjemoʼãi oikórõ g̃uarã peteĩ desástre naturál. Avei Ñandejára Rréino poguýpe jaikóta pyʼaguapýpe umi animalkuérandi ha avavete ndoikomoʼãi ombyai ñande yvy (Oseas 2:18).

Avave ndaitujamoʼãi, naig̃uaig̃uimoʼãi ni nomanomoʼãi. Enterovéva hesãita (Isaías 35:5, 6). Umi hénte oikóta peteĩ lugár iporãva ha ipotĩvape, oiko haguéicha pe primera paréha hardín de Edénpe. Pe múndo pyahúpe pe yvy oprodusi porãitereíta ha enterovéva orekóta la oikotevẽva, ojeiko haguéicha hardín de Edénpe (Génesis 2:9). Pe paraísope oikóta la Ñandejára opromete vaʼekue yma pe puévlo de Israélpe: “Peʼúta hiʼupy peneryg̃uatãha meve” (Levítico 26:4, 5).

Ñandejára goviérno poguýpe ndaiporimoʼãi inhustísia, entéro umi hénte oikóta trankílo ha ojotrata porãta. Opáta umi gérra, ndaiporimoʼãi ojaprovecháva hapicháre oreko rupi podér ha enterovéva ohupytýta hemikotevẽ. La Biblia opromete: “Umi hénte oguapýta iparrál máta guýpe ha hiʼígo máta guýpe, avave nomongyhyjemoʼãi chupekuéra” (Miqueas 4:3, 4).

Káda família orekóta hóga ha ndoikomoʼãi okyhyje ojepeʼárõ g̃uarã chuguikuéra. Avei umi traváho jajapóva ñanembovyʼáta. La Biblia heʼi voi umi oĩva Ñandejára múndo pyahúpe ndoikomoʼãiha “reiete ombaʼapo pohýi” (Isaías 65:21-23).

La Biblia heʼi: “Ko yvy henyhẽta Jehová konosimiéntogui” (Isaías 11:9). Umi hénte oikóva Ñandejára Rréino poguýpe oaprendéta ñande Apohare Jehová iñaranduetévagui ha umi mbaʼe porãite haʼe okrea vaʼekue. Péro ndoipurumoʼãi umi mbaʼe oaprendéva ojapo hag̃ua armaménto térã operhudika hag̃ua hapichápe (Isaías 2:4). Upéva rangue, oaprendéta hikuái mbaʼéichapa ikatu oiko pyʼaguapýpe oñondivepa ha mbaʼéichapa okuida vaʼerã ko yvýre (Salmo 37:11).

Ñandejára ojapo porãiterei vaʼekue ko planéta ikatu hag̃uáicha jaiko vyʼápe káda día. Haʼe oipota jaiko opa ára g̃uarã (Salmo 37:29; Isaías 45:18). Okumpli hag̃ua upéva, Ñandejára “ohundíta pe ñemano opa ára g̃uarã” (Isaías 25:8). La Biblia heʼi voi: “Ndaiporimoʼãvéima omanóva, oñelamentáva, hasẽva ni hasýva” (Apocalipsis 21:4). Ñandejára omeʼẽta entéro yvypórape pe oportunida oikovévo pára siémpre. Haʼe omeʼẽta ko rregálo umi ojesalvávape oñehundi vove ko múndo aña. Avei omoingove jeýta hetaiterei omano vaʼekuépe ikatu hag̃uáicha oiko pára siémpre (Juan 5:28, 29; Hechos 24:15).

 Koʼág̃ama voi ko yvy tuichakuére oĩ hetaiterei ojepreparáva oiko hag̃ua Ñandejára Rréino poguýpe. Koʼã persóna iñimperfékto, péro oñehaʼã oiko Ñandejára oipotaháicha. ¿Mbaʼépa ojapo hikuái? Oaprendeve Ñandejára Jehovágui, ha pe haʼe ombou vaʼekuégui Jesucristo. Koʼãichagua persónape Ñandejára oipotáta imúndo pyahúpe (Juan 17:3).

Reikuaasevéramo mbaʼéichapa ikatu rejesalva ou vove pe fin ha péicha reiko pe múndo pyahúpe, ikatu restudia la Biblia grátis peteĩ testígo de Jehovándi, peipurúvo pe lívro ¡Jaikóta vy’ápe pára siémpre!