Pe primera óra ohasáva peteĩ mitãraʼy osẽ rire isy ryégui, iñimportanteterei pe mitã ojeadapta porã hag̃ua. ¿Mbaʼére? Pórke pe mitã oñemoag̃uíramo isýre onase ramoitépe, tuichaiterei oipytyvõta chupe okakuaa ha ojedesarrolla porã hag̃ua. *

¿Mbaʼépa oipytyvõ pe sýpe orekose hag̃ua imemby hendive ha oñangarekose hag̃ua hese? Peteĩ profesóra hérava Jeannette Crenshaw oexplika oĩha peteĩ ormóna hérava oxitocina “oipytyvõva pe sýpe oĩse hag̃ua imembýndi ha oñeñandu porã hag̃ua opoko, omaña ha omokambu jave chupe” (The Journal of Perinatal Education). Upe jave pe kuérpo oprodusi avei ótra ormóna oipytyvõva pe sýpe orekose hag̃ua imemby hendive ha oñangarekose hag̃ua hese. ¿Mbaʼépa ñanemboʼe upéva?

¿Máva rupivépa pe sy oñandu imembýre koʼã mbaʼe? Haʼe oñandu koʼã mbaʼe ñande Apohare ñanderayhuetéva rupive. Ñandejára Jehová * odiseña vaʼekue koʼã mbaʼe. Rréi David heʼi vaʼekue: “Nde ningo upe cheguenohẽ vaʼekue che sy ryégui” ha “reñangareko cherehe chemichĩete guive, aĩrõ guare che sy jyva ári”. Haʼe heʼive avei Ñandejárape: “Anase guive, apytáma vaʼekue nde kárgope ha nde reñangareko cherehe, che aĩrõ guare che sy retepýpe, nde haʼéma vaʼekue che Jára” (Salmo 22:9, 10).

EPENSAMÍNA KO MBAʼÉRE: Ñandejára ojapo opa koʼã mbaʼe ikatu hag̃uáicha pe sy ohayhu ha oñangareko porã imembýre, ¿ndohechaukái piko upéva Ñandejára ojepyʼapyha káda únore? Ñande ningo haʼe “Ñandejára ñemoñare”, térã ifamília (Hechos 17:29).

Jesucristo ningo haʼe pe persóna oikuaa porãvéva ñande Apoharépe ha haʼe heʼi vaʼekue: “¿Noñevendéi piko mokõi gorrión peteĩ monéda saʼieterei ovalévare? Upéicharamo jepe, ni peteĩva ndoʼái yvýpe pende Ru yvagapegua oikuaaʼỹre. Upéicha avei, pene akãrague jepe haʼe oipapapaite. Upévare ani pekyhyje, peẽ pevaleve hína heta gorrióngui” (Mateo 10:29-31).

Naentéroi ningo ñamaña umi guyraʼi oikóvare pérupi ha koʼytevéntema ndajapillái oĩramo hoʼáva yvýpe. Péro ñande Ru yvagapegua oikuaapaite káda uno umi guyraʼípe. Ha umi guyraʼi ningo arakaʼeve  naiñimportantevemoʼãi chupe g̃uarã peteĩ persónagui, ni hetave guyraʼi oĩramo. Ko mbaʼe nemboʼe álgo iñimportantetereíva: Ñandejára oñeinteresaiterei nderehe, upévare ndovaléi rekyhyje.

Ñandejára Ñeʼẽ heʼi voi:

• “Jehová resa oĩ opárupi, haʼe osegi omaña umi iñañáva ha umi ivuénova ojapóvare” (PROVERBIOS 15:3).

• “Jehová omaña umi hembiapo porãvare, ha ohendu ojerure jave hikuái oipytyvõ hag̃ua chupekuéra” (SALMO 34:15).

• “Ñandejára, nde rehecha mbaʼeichaitépa ahasa asy, ha mbaʼéichapa aiko añelamenta, péro nde cherayhueterei ha upéva chembovyʼaiterei” (SALMO 31:7).

¿Idiferéntetapa ñande rekove jaikuaáramo Ñandejára oipotaha jaiko porã ha omañaha ñanderehe mborayhúpe? Añetehápe tuichaiterei idiferénteta. Jahechamína mbaʼépa omombeʼu Hannah, * oikóva Inglatérrape:

“Hetaiterei tiémpore apensa vaʼekue Jehová ndacherayhuiha ha norrespondeiha che ñemboʼe pórke che jerovia kangy. Apensa kuri Ñandejára chekastigaha térã nopenáinteha cherehe pórke chupe g̃uarã che ndahaʼéi mbaʼeve ha ndojepyʼapýi voi cherehe”.

Péro upe rire Hannah ndodudavéima Jehová oñatendeha hese ha ohayhuha chupe. ¿Mbaʼérepa okambia raʼe umi mbaʼe oñandúva? Haʼe voi omombeʼu saʼi saʼípe okambia hague ohóvo, ha upéi heʼi: “Ojapóma unos kuánto áño ahendu hague peteĩ diskúrso bíblico oñeʼẽva Jesús sakrifísiore ha chemanduʼa opokoiterei hague cherehe, upe diskúrso chepytyvõ kuri aĩ hag̃ua segúra Jehová cherayhuha. Oñembohovái jave chéve che ñemboʼe, cherasẽ jepi pórke ahechakuaa Jehová cherayhuha. Astudia rupi la Biblia ha aha rupi umi rreunión ojapóvape umi testígo de Jehová aikuaa porãve Jehovápe, aikuaa mbaʼeichaguápa haʼe ha avei mbaʼépa oñandu ñanderehe. Koʼág̃a ahecha porã Jehová ñanderayhu ha oĩha ñanepytyvõ hag̃uáicha káda únope”.

Umi mbaʼe Hannah heʼíva ñanemokyreʼỹeterei. ¿Ikatúpa ñaĩ segúro Ñandejára ontendeha umi mbaʼe ñañandúva ha oñeinteresaha umívare? Pe artíkulo oúvape ñarrespondéta upe porandu.