Ymave ñande Apohare oñekomunika vaʼekue yvyporakuérandi umi ánhel ha profetakuéra rupive. Ha avei oñenkarga omoĩ hag̃ua Iñeʼẽme umi mensáhe ha promésa iporãitéva. Ha nde ikatu hína rehupyty umi vendisión haʼe oguerútava koʼẽrõite. Péro, ¿moõpa ikatu jatopa umi promésa porãite?

Ñande Apohare ningo oipota vaʼekue iñeʼẽ oĩ peteĩ Lívro Sagrádope (2 Timoteo 3:16). ¿Ha mbaʼéicha oipuru vaʼekue Ñandejára umi profetakuérape oskrivi hag̃ua iñeʼẽ? (2 Pedro 1:21). Haʼe omoĩ umi kuimbaʼekuéra akãme mbaʼépa oskrivíta. Ñantende hag̃ua upéva ikatu ñapensa peteĩ empresário ojerurévare isekretáriope oskrivi hag̃ua peteĩ kárta ivése. Jepe pe sekretário la oskrivíva, jaikuaa porã pe kárta haʼeha pe empresário mbaʼe. Upéicha avei Ñandejára ojevale kuri umi kuimbaʼére oskrivika hag̃ua iñeʼẽ.

Ñandejára Ñeʼẽ ningo iñimportanteterei, upévare haʼe oipota entéro yvypóra olee ha ontende porã. Ñane tiémpope, ojekuaauka hína umi “notísia porã” ko yvy tuichakuére, “entéro tetã, trívu, puévlo ha umi oñeʼẽvape diferénte idióma” (Apocalipsis 14:6). Ha Ñandejára ovendesi rupi ko Lívro Sagrádo, oĩma mas de 3.000 idiómape tahaʼe peteĩ párte térã kompletoite, upéva hetave oimeraẽ ótro lívrogui ko yvy tuichakuére.