Ndahaʼéi ningo la ifasilpáva jaikuaa hag̃ua mbaʼe rregálopa ogustáta peteĩ persónape. Jaikuaaháicha, ikatu hína peteĩ mbaʼe iñimportánteva algúnope g̃uarã ndahaʼéi la iñimportantetereíva ótrope g̃uarã.

Por ehémplo, peteĩ imitãva ikatu opensa pe rregálo iporãvéva haʼeha peteĩ selulár osẽ pyahuvéva. Peteĩ kakuaa katu ikatu omombaʼeve peteĩ rregálo omomanduʼáva chupe umi ohayhúvare, por ehémplo peteĩ mbaʼe ihentekuéra aretereíma orekóva. Ha oĩ avei heta lugár la hénte omombaʼeveha ojerregaláramo chupekuéra pláta, péicha ikatúgui ojogua chupekuéra ogustáva.

Ijetuʼúramo jepe jatopa hag̃ua pe rregálo iporãvéva peteĩ jahayhúvape g̃uarã, oĩ heta hénte oñehaʼãmbaitéva ojapo upéva. Ha ndaikatúiramo jepe siémpre jajaserta mbaʼeichagua rregálopa iporãvéta peteĩ persónape g̃uarã, oĩ heta mbaʼe ikatúva jareko enkuénta japilla hag̃ua upéva. Jahechamína cuatro mbaʼe ñanepytyvõtava jaiporavo porã hag̃ua pe rregálo ñameʼẽtava ikatu hag̃uáicha oguerohory pe persóna orresivíva.

Mbaʼépa ogusta pe persónape. Peteĩ karai oikóva Bélfastpe, opytáva Irlanda del Nórtepe, omombeʼu siémpre imanduʼaha peteĩ visikléta de karréra ojerregala vaʼekuére chupe orekópe 10 térã 11 áñorupi. Chupe g̃uarã upe visikléta haʼe vaʼekue pe rregálo iporãvéva orresivi vaʼekue pórke haʼe oipotaiterei kuri upéva. Upéva ohechauka porãiterei peteĩ persóna omombaʼe hag̃ua peteĩ rregálo odependetereiha umi mbaʼe ogustávare chupe. Erregalaséramo álgo peteĩ persónape, eñehaʼã vaʼerã epilla mbaʼe mbaʼépa ogusta chupe, pórke umíva haʼéta hína la haʼe oipotátava. Por ehémplo umi ijedámava omombaʼeterei ikatúramo ohasa tiémpo ihentekuéra ndive. Ikatu oime hiʼã chupekuéra pyʼỹi ohecha ifamília ha inietokuérape. Haʼekuéra oinvitáramo chupekuéra oho hag̃ua de vakasión oñondivepa katuete omombaʼetereivéta hikuái upéva oñemeʼẽ rangue chupekuéra ótro rregálo.

Jaikuaa hag̃ua mbaʼépa ogusta peteĩ persónape ñahendukuaa vaʼerã. La Biblia heʼi: “Opavave tekotevẽ ipyaʼe ohendukuaa hag̃ua ha imbegue oñeʼẽ [...]  hag̃ua” (Santiago 1:19). Eñemongeta jave ne amígo ha ne hentekuérandi, eñatende vaʼerã epilla hag̃ua mbaʼépa ogusta térã ndogustái chupekuéra. Péicha rejapóramo ikatúta reikuaa mbaʼe rregálopa ogustáta chupekuéra.

Mbaʼépa oikotevẽ pe persóna. Jarregaláramo peteĩ persónape álgo oikotevẽva, haʼe katuete omombaʼéta upéva isensílloramo jepe. Péro, ¿mbaʼéichapa ikatu jaikuaa mbaʼépa oikotevẽ peteĩ persóna?

Katuete ningo ifasilvéta ñaporandúnteramo peteĩ persónape mbaʼépa oikotevẽ térã mbaʼépa oipota ikatu hag̃uáicha jarregala chupe upéva. Péro heta oĩ ndojaposéiva upéicha pórke omeʼẽse de sorprésa pe persónape peteĩ rregálo ideprovéchotava chupe. Oĩ ningo naiprovlémaiva oñeʼẽ hag̃ua umi mbaʼe ogusta térã ndogustáivare chupe, péro noñeʼẽguasúi umi mbaʼe oikotevẽvare.

Upévare iñimportánte avei ereko enkuénta pe persóna situasión ikatu hag̃uáicha reikuaa mbaʼeichagua rregálopa ideprovéchota chupe. Por ehémplo, oimépa imitã térã ijedáma, soltéro térã omendáva, divorsiádo térã viúdo, orekópa itraváho térã ojehuviláma. Upéi epensa mbaʼeichagua rregálopa ikatu emeʼẽ chupe.

Ehechakuaa hag̃ua mbaʼépa oikotevẽne peteĩ persóna, eporandukuaa peteĩ ohasa vaʼekuépe peichagua situasiónre. Ikatu hína omombeʼu ndéve peteĩ mbaʼe avave nopensáiva peteĩ persóna oikotevẽneha upe situasiónpe. Erekóramo enkuénta upéva, ikatúta erregala peteĩ mbaʼe avave ndopilláiva ideprovechoitereitaha upe persónape.

Ereko enkuénta pe moménto. La Biblia heʼi: “Pe ñeʼẽ hekoitepegua ha hiʼoraitépe hoʼa porã” (Proverbios 15:23). Upéva heʼise jaiporavo porãramo mbaʼe moméntopepa jaʼéta peteĩ mbaʼe, ikatuha omoñeñandu porã peteĩ persónape. Upéicha avei oiko jaiporavo porãramo mbaʼe moméntopepa térã mbaʼe okasiónpepa jarregaláta peteĩ persónape.

¿Mbaʼéicha javépa japororregala jepi? Ikatu peteĩ ñane amígo térã ñane amíga omenda jave, térã peteĩ imembyʼívape, peteĩ ikolasiónvape ha umícha. Oĩ voi oanotáva koʼã fécha ikatu hag̃uáicha opensáma hína mbaʼépa orregaláta upe persónape og̃uahẽ vove upe okasión. *

Jaikuaaháicha, natekotevẽi katuete oĩ peteĩ okasión espesiál japororregala hag̃ua, síno ikatu jajapo upéva en kualkiér moménto. Upéicharõ jepe tekotevẽ avei ñañatende jajapo hag̃ua upéva. Por ehémplo, peteĩ kuimbaʼe orregaláramo álgo peteĩ kuñáme, haʼe ikatu opensa pe kuimbaʼe ojegustaha hese. Ha oiméramo ndahaʼéi hína upéicha ikatu ou iprovléma hikuái upevakuére. Upéva ohechauka porã tekotevẽha jareko avei enkuénta mbaʼérepa jarregalase peteĩ persónape.

Mbaʼérepa japororregala. Ohechaukaháicha pe ehémplo jahecha vaʼekue, ñañatende vaʼerã pe persónapa nontendevaimoʼãi hína mbaʼérepa ñameʼẽ chupe peteĩ rregálo. Ñañatende vaʼerã avei jahecha hag̃ua mbaʼérepa ñande voi jajapose upéva. La majoría ningo ñapensa ñameʼẽsenteha voi rregálo ñande rapichakuérape, upéicharõ jepe oĩ heta opororregaláva openságui ojapómante vaʼerãha upéva tahaʼe áño nuévope térã ótra okasiónpe. Ha oĩ avei opororregaláva oipotágui oñemeʼẽ avei chupe ótro rregálo térã opyta porã hag̃uánte upe persónandi.

¿Mbaʼéichapa jaikuaáta japororregalápa hína ñande pyʼaite guive? La Biblia heʼi: “Pejapókena opa mbaʼe mborayhúpe” (1 Corintios 16:14). Jarregaláramo peteĩ persónape ñande pyʼaite guive ha jahayhúgui chupe, katuete ovyʼaitereíta orresivívo ñande rregálo. Ha ndahaʼéi upévante, ñande avei javyʼaitereíta ñandepojera haguére. Ñandejára avei ovyʼa ñandereheve mborayhúpe jarregaláramo ñande rapichápe. Apóstol Pablo ofelisita vaʼekue umi kristiáno Corintoguápe pórke haʼekuéra ipojera ha vyʼápe orahaka kuri provísta umi kristiáno Judeaguápe  oikotevẽrõ guare hikuái. Peteĩ kártape haʼe heʼi chupekuéra Ñandejára ohayhuetereiha umi “vyʼapópe omeʼẽvape” (2 Corintios 9:7).

Jarekóramo enkuénta umi mbaʼe jahecha vaʼekue, ikatúta jarregala peteĩ persónape álgo ogusta ha ombovyʼátava chupe. Ñandejára oreko vaʼekue enkuénta umi mbaʼe ñaanalisa vaʼekue ha hetave ótra kósa omeʼẽ hag̃ua ñandéve pe rregálo iporãvéva enterovévagui. Pe artíkulo oúvape jahecháta mbaʼépa hína upe rregálo.